SIRONGWA SELIRONGO 4
Eyi agu tu rongo Murarero kuhamena Jesus
“Oru yiro rutu rwange. . . . Ezi yizo honde zange zegwanekero lyepe.”—MAT. 26:26-28.
RUSUMO 16 Tangeni MunwaJehova goMugwavekwa
ETWAROMO *
KUVHURA o faturure eyi ayi horoka poMurarero gwaHompa ndi? Yosili sinzi setu twa diva eyi ayi horoka po. Morwa posilika oso kapi apa horoka yininke yoyinzi. Aso kuna kara silika somulyo, nye morwasinke apa dilire kuhoroka yininke yoyinzi?
1-2. (a) Morwasinke natu uyungira asi Jesus kwa tu ronga nkedi zoureru omu natu diworoka nomfa dendi? (b) Yikara musinke ga likidire Jesus natu ka konakona?
2 Apa Jesus ga kere pevhu, Jesus kwa divikwire asi age murongi ogu nga rongo usili monkedi zoureru. (Mat. 7:28, 29) Mokulifana, age kwa tu likida nkedi zoureru omu natu diworoka nomfa dendi. Tu gazadareni ko unene kuhamena silika esi ntani noyininke yimwe eyi ga uyungire nokurugana Jesus. Ayo nayi ka tu vatera tu ka kwate egano omu Jesus ga likidire elinunupiko nouradi ntani eharo. Tatu ka lironga hena omu natu mu honena.
JESUS GA LINUNUPIKA
Mboroto novhinyu kutudiworokesa asi Jesus kwa tu fira, ntani age ngesi kuna kupangera meguru ngaHompa (Tara paragarafu 3-5)
3. Ngomu va yi likida mwaMateusa 26:26-28, yisinke ga ruganesere Jesus apa ga tulisire po Murarero ntani yisinke ya fanekesere?
3 Apa Jesus ga tulisire po Murarero gwaHompa, age kwa kere novarongwa vendi 11 wovalimburukwi. Age kwa gusire nondya edi da hupire ko poPaska ezi va kere nazo nokudiruganesa mokutulisa po Murarero gwaHompa. (Resa Mateusa 26:26-28.) Age kwa ruganese mboroto za hana muhahu novhinyu eyi ya hupire ko. Jesus kwa tanterere varongwa vendi asi yininke oyo yivali kwa fanekesere honde norutu rwendi rokusikilira mo eyi ga ya geve ngo zambo mokuvazowora. Vapositoli nampo kapi ya va tetukisire kweyi Jesus ga tulisire po Murarero pokoruganesa yininke eyi ya hupire ko poPaska. Morwasinke?
4. Kuliza nepukururo eli Jesus ga pere Malita, morwasinke nampo Jesus ga ruganeserere yininke yoyisesu poMurarero?
4 Koneka eyi ya horokere makwedi gongandi komeho zoMurarero, apa Jesus ga ka dingwire vakaume vendi wovanene oRasarusa naMalita ntani Mariya. Age kwa va rongere. Malita nage yipo ga kere nye kwa viyaukire unene a wapaikire Jesus nondya dononzi. Apa Jesus ga mu mwene, makura ta vatere Malita a dimburure asi kapi ya kere hepero kuwapaika nondya dononzi. (Ruk. 10:40-42) Jesus kwa tulire pasirugana epukururo eli ga pere Malita apa ga wapaikire Murarero gwaHompa. Age kapi ga ruganesere yininke yoyinzi. Yisinke yina kuturonga eyi kuhamena Jesus?
5. Yisinke ga likidire Jesus pokudira kurugana silika sosinene soMurarero ntani ngapi ya liza noVafilipi 2:5-8?
5 Apa Jesus ga kere pevhu, age kwa kere muntu gokulinunupika. Yipo nye, kapi a yi tu tetukisa kweyi ga linunupikire unene mesiku lyendi lyokuhulilira pevhu. (Mat. 11:29) Age ga yi divire asi ta ka gava nzambo zonene po ano Jehova nga mu vhumbura nokumupa sipundi sosinene meguru. Nampili ngoso, age kapi ga lipaparerere mfumwa pokuninka silika soMurarero gwaHompa si kare sosinene. Age kwa tanterere varongwa vendi asi va mu diworoke pokurugana Murarero gwaHompa nkenye mvhura. (Joh. 13:15; 1 Kol. 11:23-25) Pokudira kurugana silika sosinene, kulikida asi Jesus kapi ga kere muntu gokulinenepeka. Ayo kutuhafesa pokudiva asi, elinunupiko kuna kara sikara simwe saHompa gwetu sosinene po.—Resa Vafilipi 2:5-8.
6. Ngapi natu honena sikara saJesus selinunupiko nsene kuna kupita momaudigu?
6 Ngapi natu honena sikara saJesus selinunupiko? Pokutura yihepwa yovakwetu muhowo. (Fil. 2:3, 4) Gazara eyi ga rugene Jesus mesiku lyendi lyokuhulilira. Age ga yi divire asi ntaantani a ka fe, nye age kwa kere nosinka kuhamena vapositoli vendi ava va ya kere noruguwo konyima. Yipo nye, age kwa ruganesere siruwo oso mokuvaronga nokuvakorangeda. (Joh. 14:25-31) Jesus kwa kere nosinka unene kuhamena vakwawo kupitakana nyamwendi. Age kwa tu tulira po sihonena sosiwa unene.
JESUS KWA KARA NOURADI
7. Ngapi omu Jesus ga likidire uradi konyima zokutulisa po Murarero gwaHompa?
7 Jesus kwa likidire uradi konyima tupu zokutulisa po Murarero gwaHompa. Ngapi omu ga yi rugene? Jesus kwa limburukwire Oguhwe nampili ngomu ga divire asi tava ka mu dipaga morwa kuswaura Karunga. (Mat. 26:65, 66; Ruk. 22:41, 42) Jesus kwa twikilire kulimburukwa yipo a fumadeke edina lyaKarunga nokukwatesa ko upangeli waJehova ntani nokupa mpito vantu yipo ngava ka gwane eparu lyanarunye. Ntani age kwa tulilire po varongwa vendi sihonena yipo va liwapaikire maudigu aga ga kere komeho.
8. (a) Yisinke ga tanterere Jesus varongwa vendi? (b) Ngapi omu varongwa vaJesus va kweme sihonena sendi nampili konyima zonomfa dendi?
8 Jesus kwa likidire hena uradi pokudira kudemenena komaudigu gendi ntani pokudemenena koyihepwa yovarongwa vendi. Murarero gwaHompa ogu ga tulisire po Jesus konyima zapa ga tundire po Judasa, kwa pa mpito varongwa vendi wovagwavekwa yipo va ka gwanene mo mauwa kweyi ga va fililire ntani megwanekero eli ga tulisire po kumwe nawo. (1 Kol. 10:16, 17) Mokuvavatera va twikire kukara valimburukwi yipo ngava ka pangere naJesus, age kwa va tanterere eyi va hepa kurugana. (Joh. 15:12-15) Jesus kwa tanterere hena varongwa vendi maudigu aga ngava ligwanekera nago. Age kwa va korangedere va kwame sihonena sendi va “kwate nomutjima” ndi va kare nouradi (Joh. 16:1-4a, 33) Konyima zonomvhura dononzi, varongwa vaJesus simpe kwa kweme sihonena sendi pokulizambera nokulikida uradi. Nampili ngomu ngava hepa, awo ngava li kwafa-kwafa momaudigu gawo.—Heb. 10:33, 34.
9. Ngapi natu honena uradi waJesus?
9 Naina, nose kukwama sihonena saJesus souradi. Pasihonena, twa hepa uradi yipo tu vatere vanavazinyetu ava vana kuhepeka morwa epuro lyawo. Poyiruwo yimwe vanavazinyetu owo kuvatura modorongo. Nsene ta yi horoka oyo, twa hepa kurugana paapa twa hulira yipo tu va vatere kukwatera mo kuvapopera. (Fil. 1:14; Heb. 13:19) Nkedi zimwe natu likida uradi kuna kara pokuzuvhisa “nouradi.” (Yirug. 14:3) Ngwendi Jesus, tu tokomeneni kuzuvhisa mbudi zoUhompa nampili vantu va tu rwanese ndi va tu hepeke. Yisinke natu rugana poyiruwo apa atu dili kukara nouradi?
10. Yisinke twa hepa kurugana komeho zoMurarero gwaHompa ntani morwasinke?
10 Kuvhura tu kare nouradi nsene tu gazadara ko komauwa aga ngatu vhura kugwana morwa nzambo zaJesus zosizoweseso. (Joh. 3:16; Efe. 1:7) Yivike yongandi komeho zoMurarero gwaHompa, ose kwa kara nompito zokunkondopeka rupandu rwetu konzambo zaJesus. Posiruwo oso, resa ereso lyoBibeli lyoMurarero nokugazadara ko kweyi ya horokerere Jesus komeho va ka mu dipage. Makura, apa ngatu ka kara poMurarero gwaHompa, ose ngatu ka kwata egano eyi za fanekesa vhinyu nomboroto ntani nomulyo gonzambo zaJesus. Apa atu kwata egano eyi ga tu ruganena Jehova naJesus nomauwa aga atu gwanene mo nomapata getu, ayo kunkondopeka ehuguvaro lyetu nokutuvatera tu lididimikire dogoro kouhura.—Heb. 12:3.
11-12. Dogoro paapa, yisinke tuna kwata egano mosirogwa esi?
11 Ngesi tuna kwata egano asi, Murarero gwaHompa kapi tupu agu tu diworokesa kuhamena nzambo ezi ga geve Jesus nye hena elinunupiko nouradi ou ga likidire. Ayo kutuhafesa pokudiva asi Jesus ngoMupristeli gwetu goMunene kwa kara noyikara oyo. (Heb. 7:24, 25) Mokulikida rupandu, twa hepa kudiworoka nomfa daJesus ngwendi moomu tupu ga yi tu rekerere. (Ruk. 22:19, 20) Ose kudiworoka ezuva eli lyomulyo mezuva eli lya lifana no-14 Nisan, ezuva ngava dana Vajuda Paska.
12 Monkedi omu Jesus ga rugene Murarero gwaHompa kuturonga hena sikara simwe saJesus esi sa mu tu mangedere a tu fire. Vantu kwa mu divilire kosikara esi. Sikara musinke oso?
JESUS KWA KARA NEHARO
13. Ngapi Johanesa 15:9 ntani 1 Johanesa 4:8-10 aga faturura eharo eli ga tu likida Jehova naJesus ntani wolye ava gwanene mo mauwa?
13 Eyi ga rugene Jesus kwa likidire eharo eli ga kara nalyo Jehova kovantu. (Resa Johanesa 15:9; 1 Johanesa 4:8-10.) Nye unene po, eharo kwa mu tumangedere a tu fire. Yi kare asi tu vagwavekwa ndi “nonzwi dapeke,” natuvenye kugwanena mo uwa keharo eli ga tu likida Jehova naJesus kupitira monzambo zosizoweseso. (Joh. 10:16; 1 Joh. 2:2) Yininke eyi ga ruganesere Jesus apa ga tulisire po Murarero gwaHompa kulikida asi ga hara varongwa vendi. Ngapi?
Jesus kwa tulisire po Murarero gwaHompa noyininke yoyisesu yipo varongwa vendi nawo va gu rugane yikare asi moukaro musinke vana kara (Tara paragarafu 14-16) *
14. Ngapi omu Jesus ga likidire varongwa vendi eharo?
14 Apa Jesus ga tulisire po Murarero gwaHompa noyininke yoyisesu, age kwa likidire eharo eli ga kere nalyo kovarongwa vendi wovagwavekwa. Konyima, varongwa vendi va hepere kurugana Murarero gwaHompa nkenye mvhura mwankenye ukaro va kere, kukwatera mo modorongo. (Ehor. 2:10) Morwa eyi, awo kwa sikisire mo eyi ga va rekerere Jesus.
15-16. Ngapi ya va tompoka vamwe kurugana Murarero gwaHompa nampili moukaro woudigu?
15 Nampili momazuva getu, Vakriste wousili kukondja yipo va diworoke nomfa daJesus. Awo kuhetekera ko paapa va hulira mokurugana Murarero gwaHompa ngwendi moomu ga yi rugene Jesus nampili moukaro woudigu vana kara. Gazadara ko koyihonena yina kukwama ko. Apa munazinyetu Harold King ga kere modorongo zaTjina gelike, age kwa rugene ko yuma yipo a diworoke Murarero gwaHompa. Age kwa wapaikire mboroto novhinyu mokahore-hore pokuruganesa yininke eyi ga kere nayo. Age kwa varwire hena pwamwene mazuva yipo a dive ezuva lyoMurarero gwaHompa. Apa sa sikire mo siruwo sokurugana Murarero gwaHompa, age kwa dimbire nokukanderera nokugava siuyungwa sagelike.
16 Sihonena simwe kuna kara sovanavazinyetukadi ava va tulire modorongo posiruwo soyita yauvali youzuni mudima. Awo kwa tulire maparu gawo mosiponga yipo nawo va diworoke nomfa daJesus. Mokumona asi Jesus kwa tulisire po Murarero noyininke yoyisesu, nawo ya va tompokere kurugana Murarero gwaHompa mokahore-hore. Awo kwa tanta asi: “Ose kwa sikeme kumwe nokukundurukida sitafura apa twa tulire
yininke yoMurarero eyi twa kudumikire nosikehe sosizera. Ose hena kapi twa ruganesere ramba, nye kwa ruganesere sera yipo va dire kutumona. Ose kwa kanderere kwaJehova a tu vatere tu lidimikire yipo tu pongore edina lyendi lyokupongoka.” Sihonena musi kouwa! Neina nose kuvhura tu rugane Murarero gwaHompa nampili momaukaro goudigu morwa eharo eli ga tu likida Jesus apa ga gu tulisire po noyininke yoyisesu.17. Mapuro musinke natu lipura nyamwetu?
17 Ngomu Murarero gwaHompa guna kuhedera pepi twa hepa kulipura asi: ‘Ngapi nani honena Jesus pokulikida eharo? Ame kugazadara ko unene koyihepwa yovapuli vakwetu kupitakana yange ndi? Ame kundindira ko yoyinzi kovanavazinyetu ndi?’ Tu tokomeneni kuhonena Jesus ‘nokulihara-hara.’—1 Pet. 3:8.
SIKISA MO EYI TUNA LIRONGO
18-19. (a) Yisinke ngayi ka horoka komeho? (b) Yisinke ono tokomene kurugana?
18 Ezuva limwe kapi hena ngatu ka rugana Murarero gwaHompa. Apa Jesus “nga wiza” poudigu wounene age nga ya pongaika “vahoroworwa vendi” va ze meguru, kapi hena ngatu kara noMurarero gwaHompa.—1 Kol. 11:26; Mat. 24:31.
19 Nampili ngomu vantu vaJehova ngava ka hageka kurugana Murarero gwaHompa, awo simpe ngava ka diworoka elinunupiko nouradi neharo eli ga likidire Jesus apa ga tulisire po Murarero gwaHompa. Vantu ava ava rugana Murarero gwaHompa monomvhura edi, awo ngava ka simwitira ko wopeke yipo va ka gwanene mo nawo mauwa. Yipo nye, nsene tuna hara kugwanena mo mauwa poMurarero gwaHompa ngesi, twa hepa kuhonena Jesus pokukara nelinunupiko nouradi ntani neharo. Nsene tu yi rugana, ngatu kara nehuguvaro asi Jehova ngaka tu futa.—2 Pet. 1:10, 11.
RUSUMO 13 Kristusa, sihonena setu
^ para. 5 Ntaantani ngatu kare nediworoko lyonomfa daJesus Kristusa. Silika esi kuturonga yikara yaJesus ngwendi elinunupiko nouradi ntani neharo. Mosirongwa esi tatu ka zogera omu natu honena yikara oyo.
^ para. 55 EFANO: Vakareli vaJehova wovalimburukwi kuna kurugana Murarero gwaHompa, mosiruwo sovapositoli, nomvhura dongandi komeho zomvhura 1900, mokamba zounkwate zaNazi ntani mosiruwo setu moSinyanga soUhompa moAmerika zokombindakano.