1. Ngapi Ndafita ga lizuvhire kuhamena Jehova ntani yisinke ga rugene ko?

HOMPA NDAFITA kwa tjenge asi: “HOMPA munene, age ga fira kumufumadeka unene.” (Epis. 145:3) Ndafita kwa here Jehova, ano eharo olyo yilyo lya mu tumangedere a mu “hamberere” mombungakriste. (Epis. 22:22; 40:5) Ava va hara Jehova kukwatesa ko nonkango edi ga uyungire Ndafita asi: “HOMPA, Karunga gwazinyakurwetu Jakopo, va ku hamberere narunye-narunye!”—1 Hist. 29:10-13.

2. (a) Ngapi omu natu hamberera Jehova? (b) Udigu musinke va kara nawo vamwe ntani yisinke natu ka kona-kona?

² Nkedi zimwe omu natu hamberera Jehova naina kuna kara pokugava malimbururo komapongo. Vanavazinyetu vamwe kwa kara noudigu. Awo kwa hara kugava malimbururo komapongo, nye woma kulika. Yisinke nava rugana mokufunda po woma? Ntani yitwa musinke nayi tu vatera natuvenye tu gave malimbururo gomawa? Komeho tu ka zogere mapuro ogo, tanko tu konakoneni nokonda ne domulyo deyi atu gavere malimbururo komapongo.

3-5. (a) Kuliza noVahebeli 13:15, Morwasinke atu gavere malimbururo komapongo? (b) Natuvenye twa hepa kugava malimbururo gokulifana ndi? Faturura.

³ Jehova kwa tu pa natuvenye situmbukira sokumuhamberera. (Epis. 119:108) Malimbururo aga atu gava komapongo kuna kara “nzambo zompandu” atu gava kwaJehova,  kwato ogu nayi tu ruganena po. (Resa Vahebeli 13:15.) Jehova kapi a ndindire natuvenye tu gave nonzambo ndi malimbururo gokulifana.

⁴ Jehova ga diva asi ukaro wetu nevhuliko lyetu lyalisiga. Yipo nye, age kutara nonzambo detu nadinye asi mulyo. Gazara kuhamena nonzambo doVaisraeli edi nga tambura Jehova. Vaisraeli vamwe ngava gava nzwi ndi sikombo, nye muhepwe nga gava “nomputukuwa mbali ndi nonkutji mbali.” Nye nsene muntu kapi ana kugwana nomputukuwa mbali, age nga twara “nzambo zousura zokilogarama.” (Lev. 5:7, 11) Usura kapi wa kere ndiro nye Jehova nga hafere nzambo ozo zongwa.

⁵ Naina, Jehova simpe kutara nonzambo detu monkedi zokulifana. Apa atu gava malimbururo komapongo, age kapi a ndindire natuvenye tu kare vauyungi wovawa ngwendi Aporo naPaurusa. (Yirug. 18:24; 26:28) Nye Jehova kwa hara tu gave malimbururo gomawa kuliza nevhuliko lyetu. To diworoka mufisayendi ogu ga geve tumalivagona tuvali? Jehova kwa haferere nzambo zendi morwa age kwa geve nayinye eyi ga kere nayo.—Ruk. 21:1-4.

6. (a) Kuliza noVahebeli 10:24, 25, Ngapi aga tu kundama malimbururo govanavazinyetu? (b) Ntani ngapi no likida rupandu komalimburo gawo gomawa?

⁶ Ose kulikorangeda apa atu gava malimbururo. (Resa Vahebeli 10:24, 25.) Natuvenye kuhafera malimbururo gokulisiga-siga aga ava gava vanavazinyetu. Kuhafera hena malimbururo gomasupi ava gava vanona. Ayo hena kutukorangeda apa gumwe a faturura kuhamena yitwa eyi ka lirongere. Ntani ose kuhafa apa atu mono vamwe kuna kugava malimbururo nampili ngomu va kara nowoma ndi nampo kuna kulironga eraka lyetu. (1 Tes. 2:2) Ngapi natu likida rupandu kelituromo lyawo? Twa hepa kuvapandura komalimbururo gawo gomawa konyima zepongo. Nkedi zimwe kuna kara hena pokugava nose malimbururo getu. Twa hepa kugava malimbururo yipo vakwetu nawo va gwanene mo ekorangedo.—Rom. 1:11, 12.

7. Mauwa musinke atu gwanene mo pokugava malimbururo komapongo?

 ⁷ Ose kugwanena mo uwa apa atu gava malimbururo. (Jes. 48:17) Ngapi ayi horoka? Uwa wokuhova, apa atu kara nositambo sokukagava elimbururo kepongo, ayo kututumangeda tu liwapaikire nawa. Apa atu liwapaikire nawa, ose kukwata egano nawa Nonkango daKarunga. Moomu tuna kukwata egano Nonkango daKarunga, yimo ngayi tu tumangeda tu ture pasirugana eyi tuna kulironga. Uwa wauvali, apa atu gava malimbururo ose hafera epongo morwa kuna kulihameka mo. Uwa wautatu, apa atu kondjo tu gave malimbururo komapongo ayo kutuvatera tu dire kugadivara nampili konyima zosiruwo.

8-9. (a) Kuliza naMarakiya 3:16, ngapi a lizuvhu Jehova kuhamena malimbururo getu? (b) Yisinke hena a yi tjilisa vamwe?

⁸ Malimbururo getu kuhafesa Jehova. Yosili Jehova kutupurakena ntani age kuyihafera apa atu kondjo yipo tu gave malimbururo komapongo. (Resa Marakiya 3:16.) Age kututungika apa atu kondjo tu mu hafese.—Mara. 3:10.

⁹ Yosili, ose twa kara nonokonda donongwa deyi natu gavera malimbururo komapongo. Nye nampili ngoso, vamwe simpe kukara nowoma wokulika. Nsene nove yimo o lizuvhu ngoso, ya ha ku dompesa. Ngesi tatu kakonakona nompango dimwe domoBibeli, noyihonena yimwe ntani neyi nayi tu vatera natuvenye tu gave malimbururo komapongo.

10. (a) Yisinke ayi tu tjilisa sinzi setu? (b) Sikara musinke wa kara naso nsene ove kulizuvha woma?

¹⁰ Ove kukankama nkenye apa o gazara kulika yipo o gave elimbururo ndi? Kapisi nyovelike o lizuvhu ngoso, sinzi setu kulizuvha nose woma apa atu gava malimbururo. Mokufunda po udigu ou ntudi wa hepa kudiva eyi ayi kuninkisa o kare nowoma. Ove kutjira asi kuvhura o divare  eyi ono hara kuuyunga ndi kuvhura o gave elimbururo lyepuko ndi? Ndi kulizuvha asi malimbururo govakweni mawa kupitakana goge? Nsene yimo o lizuvhu ngoso, ayo kulikida asi ove kwa linunupika ntani kutara vakweni asi va ku pita mekuto. Jehova kwa hara elinunupiko. (Epis. 138:6; Fil. 2:3) Nye age ana hara hena o mu hamberere nokukorangeda vanavazinyetu komapongo. (1 Tes. 5:11) Jehova ga ku hara ntani ana hara kukuvatera o kare nouradi.

11. Matjangwa musinke naga tu vatera?

¹¹ Tu tareni Matjangwa gamwe aga naga tu vatera. Bibeli kutanta asi natuvenye kupuka mononkango nomoyirugana. (Jak. 3:2) Jehova novanavazinyetu va yi diva asi kapi twa sikilira mo. (Epis. 103:12-14) Vanavazinyetu kwa tu hara ntani ose epata limwe. (Mar. 10:29, 30; Joh. 13:35) Awo va yi diva asi ose poyiruwo yimwe kuvhura tu lipuke momalimbururo getu.

12-13. Yisinke natu lirongera ko kosihonena saNehemiya naJona?

¹² Tarurura yihonena yimwe yomoBibeli eyi nayi kuvatera o funde po utjirwe. Simwe kuna kara saNehemiya. Age nga rugana mombara zahompa gononkondo. Apa Nehemiya ga zuvhire asi makuma gaJerusarema haga bamaukira ano nomuvero kapi va di wapukurura, age kwa guvire. (Neh. 1:1-4) Gazara tupu omu ga lizuvhire apa hompa ga mu pulire a mu tantere eyi ga guvilire! Nehemiya kwa kanderere usimbu-simbu komeho a limburure. Konyima, hompa kwa vaterere vantu vaKarunga. (Neh. 2:1-8) Sihonena simwe kuna kara saJona. Apa Jehova ga mu pulire aka udisire vantu womoNinivhe, Jona kwa tjwayukilire nakopeke morwa woma. (Jona 1:1-3) Nye nevatero lyaJehova age kwa zire nokukaudisira Vaninivhe. Mbudi ezi ga ka udisire kwa vaterere Vaninivhe. (Jona 3:5-10) Sihonena saNehemiya kuturonga mulyo gokukanderera komeho tu limburure. Ano saJona kuturonga asi Jehova nga tu vatera tu mu karere nampili ngomu twa kara noutjirwe. Yosili, kugava elimbururo komapongo kapisi udigu unene mokuyihetakanesa nombudi zompanguro ezi ga udusire Jona koVaninivhe.

¹³ Yisinke nayi ku vatera yipo o gave malimbururo gokukorangeda komapongo? Tu tareni yitwa yimwe eyi na yi tu vatera.

14. Morwasinke natu liwapaikilira nawa ntani siruwoke natu yi rugana?

¹⁴ Liwapaikira mapongo nagenye. Nsene o liwapaikira nawa, kapi ngo kara nowoma wokulimburura komapongo. (Yis. 21:5) Yosili, natuvenye kuliwapaikira poyiruwo yokulisiga kuliza nomaukaro getu. Eloise mufisayendi gonomvhura kupitakana po-80 kuliwapaikira Ruhungu  rwendi ketamekero lyosivike. Age kwa tanta asi: “Ame kuhafera mapongo unene po, apa ani liwapaikire komeho zosiruwo.” Joy ogu a rugana sivike nasinye, age kuliwapaikira Ruhungu rwendi moMapeu. Age kwa tanta asi: “Kuliwapaikira moMapeu kuvatera nge ni ka diworoke yitwa apa ngatu ka yi lironga.” Ike mukuronambunga ogu a rugana uzuvhisi wokukarerera kwa tanta asi: “Ayo kurerupira nge pokuliwapaikira noparagarafu dongandi mwaza sivike kupitakana kuliwapaikira sirongwa nasinye posikando simwe.”

15. Ngapi no liwapaikira nawa komapongo?

¹⁵ Yisinke ya hamena mo mokuliwapaikira nawa komapongo? Komeho o tameke kuliwapaikira, kanderera yipo o hundire Jehova a ku pe mpepo zokupongoka. (Ruk. 11:13; 1 Joh. 5:14) Kona-kona nawa siparatjangwa noyiparatjangwagona nomafano ntani tukende. Ngomu ono kuliwapaikira, resa sinzi soMatjangwa va tura motuhake. Teda ko ngomu ono kuliwapaikira unene po koyitwa eyi ono hara kukagava. Nsene o liwapaikira nawa, ove ngo gwanena mo uwa ntani ngayi kurerupira kugava malimbururo.—2 Kol. 9:6.

16. Yiruganeso musinke ga tu pa Jehova ntani ngapi noyiruganesa?

¹⁶ Kuvhura o ruganese yiruganeso eyi twa kara nayo meraka lyetu. Jehova kwa tu pa yiruganeso yoyinzi kupitira mombunga zendi yipo yi tu vatere tu liwapaikire komapongo. JW Library^® app kutuvatera tu kwateke yimbapiratjangwa yipo tu yi rese ndi tu yi purakene nkenye oku tuna kara. Vamwe kuruganesa JW Library^® app yipo va lironge posiruwo sometaha nokoyirugana nokosure ntani morugendo. Watchtower Library ntani BIBILIYOTEKA ZOKOINTERNETA^™ kutuvatera tu rugane mapaparo koyitwa eyi tuna hara kukaruganesa.

17. (a) Morwasinke no liwapaikira malimbururo gomanzi? (b) Yisinke ko lirongerere mo movidiyo Kara kaume kaJehova—Liwapaikira elimbururo?

¹⁷ Liwapaikira malimbururo gomanzi nsene kuvhura. Morwasinke? Morwa poyiruwo yimwe kapi tava kulike nampili kuna kuzerura. Ntani mupitisili kuvhura a like vakweni ava nawo vana zerura. Mokuninka asi epongo li pwe nosiruwo, mupitisili kusesupika malimbururo monoparagarafu dimwe. Ya ha kudompesa ndi o handuke nsene mupitisili kapi ana kulike apa ono zerura petameko. Nsene o liwapaikira malimbururo gomanzi, ove ngo gwana mpito zokulimburura nampili kapi vana kulike petameko. Kuvhura hena o liwapaikire kukaresa etjangwa. Ntani nsene kuvhura, liwapaikira elimbururo mononkango danyamoge. *

18. Morwasinke no gavera malimbururo gomasupi?

 ¹⁸ Gava malimbururo gomasupi. Malimbururo gomasupi nkenye apa ureru ntani kukorangeda. Yipo nye, supipika malimbururo goge. Hetekera ko kulimburura monosekonde 30. (Yis. 10:19; 15:23) Nsene nare wa gusa kugava malimbururo, tura po sihonena sosiwa pokugava malimbururo gomasupi. Nsene o gava malimbururo gomare, vamwe kuvhura va kare nowoma asi kapi tava vhuru kugava malimbururo ngwendi goge. Ntani kugava malimbururo gomasupi, kuvatera vamwe nawo va gwane mpito zokulimburura mepongo. Nsene nyove vana like pomuhowo, gava elimbururo lyesupi lyokuvyukilira positwa. Wa ha limburura yitwa nayinye eyi yina kara moparagarafu. Konyima zokuzogera elimbururo lyoparagarafu ozo, kuvhura nye o gwederere ko.—Tara kakende “ Ngapi omu nani limburura?”

19. Ngapi na kuvatera mupitisili, nye yisinke wa hepa kurugana?

¹⁹ Tantera mupitisili asi ono hara kukalimburura poparagarafu zongandi. Wa hepa kutantera mupitisili monkedi zongwa komeho li tameke epongo. Apa nasi sika siruwo soparagarafu ezi ono hara kulimburura, wa hepa kuzerura unene yipo mupitisili a ku mone.

20. Ngapi mapongo ga kara ngwendi nondya edi ono kulya novakweni?

²⁰ Tara mapongo ngwendi nondya edi o hafere novakaume wovawa. Gazara asi vakweni vamwe womombungakriste kuna kuwapaika epongasano makura tava ku pura o piture ko nkenye nondya. Ngapi no lizuvha? Nampo no kara nosinka, nye no hetekera ko kupitura nkenye eyi nava ka hafera navenye. Jehova nkenye apa age kutuwapaikira nondya donongwa dopampepo komapongo. (Epis. 23:5; Mat. 24:45) Age kuhafa apa atu gava kwendi uhwi woununu ou tuna kuvhura kugava. Yipo nye, liwapaikira nawa yipo o ka limburure paapa wa hulira. Makura ove kapi ngo ya lya tupu nondya edi ana tu wapaikire Jehova nye hena ngo reta uhwi ou ngatu ya hafera natuvenye mombungakriste.