SIRONGWA SELIRONGO 5
Yikara eyi ayi tu tumangeda tu wize komapongo
‘Twikireni kuudisa nomfa daHompa, dogoro noku nga wiza.’—1 KOL. 11:26.
RUSUMO 18 Rupandu kosizoweseso
ETWAROMO *
JEHOVA kumona yininke yoyinzi apa vantu ava pongo mouzuni mudima va diworoke nomfa daJesus. Age kumona mbunga zovantu ntani nankenye ogu a kara pepongo olyo. Pasihonena, age kumona navenye ava ava litura mo nkenye mvhura yipo va ya kare pepongo olyo nampili kuna kuligwanekera nomaudigu ndi mahepeko. Vamwe kapi ava wiza komapongo nkenye apa, nye awo kuwiza koMurarero morwa kugu tara asi mulyo. Jehova kumona hena ava ava wiza koMurarero sikando sokuhova, morwa kuhara kudiva eyi ayi pitire mo.
1-2. (a) Yisinke a mono Jehova apa vantu ava pongo poMurarero gwaHompa? (Tara efano lyopontunda.) (b) Yisinke natu ka zogera mosirongwa esi?
2 Jehova kuhafa apa a mono vantu wovanzi poMurarero gwaHompa. (Ruk. 22:19) Somulyo po kwaJehova kapisi sivaro sovantu nye konda zeyi ava wizire koMurarero. Mosirongwa esi tatu ka zogera epuro eli lyomulyo asi: Morwasinke atu wizire koMurarero gwaHompa nokomapongo?
(Tara paragarafu 1-2) *
ELINUNUPIKO KUTUTUMANGEDA TU WIZE KOMAPONGO
3-4. (a) Morwasinke atu wizire komapongo? (b) Sikara musinke atu likida apa atu wiza komapongo? (c) Kuliza 1 Vakolinte 11:23-26, morwasinke twa hepera kukara nkenye apa poMurarero?
3 Konda zomulyo po zeyi atu wizire komapongo kuna kara asi morwa aro ruha roukareli wetu. Ose hena kuwiza komapongo yipo a ya tu ronge Jehova. Vantu wokulinenepeka 3 Joh. 9) Nye ose tuna hara Jehova a tu ronge kupitira mombunga zendi.—Jes. 30:20; Joh. 6:45.
kulizuvha asi kapisi hepero va va ronge. (4 Apa atu wiza komapongo ayo kulikida asi twa linunupika ntani tuna hara Jehova a tu ronge. Ose kuwiza koMurarero gwaHompa morwa Jesus kwa tu pangerere asi: “Omu yi rugane mokudiworokera nge po.” (Resa 1 Vakolinte 11:23-26.) Epongo olyo kutuvatera tu kare nehuguvaro lyokomeho ntani kutudiworokesa omu Jehova ga tu hara unene. Nye Jehova ga yi diva asi twa hepa ekorangedo nehengagwido nkenye siruwo kupitakana tupu poMurarero. Yipo nye, age kwa tu wapaikira mapongo ntani kwa tu harera tu wize nkenye apa. Elinunupiko kutuvatera tu yi sikise mo oyo. Ose kuruganesa siruwo sosinzi mokuliwapaikira nokuwiza komapongo.
5. Ngapi vantu wokulinunupika ava tara ezigido lyaJehova lyokuvaronga?
5 Nkenye mvhura Jehova kuzigida vantu yipo ava ronge, ano wokulinunupika kutambura ezigido olyo. (Jes. 50:4) Awo kuhafera kukara poMurarero, ntani awo kutameka kuwiza komapongo. (Sak. 8:20-23) Natuvenye kumwe nava wovape kuyihafera apa Jehova ‘mukwafi gwetu nomuparuli gwetu’ a tu rongo. (Epis. 40:17) Yosili, aso sininke sosiwa mokuturonga Jehova naMunwendi Jesus ogu ga hara unene.—Mat. 17:5; 18:20; 28:20.
6. Ngapi omu elinunupiko lya vaterere mugara gumwe a wize koMurarero?
6 Nkenye mvhura, ose kulitura mo unene, tu zigide vantu wovanzi yipo va wize kediworoko lyonomfa daJesus. Vantu wovanzi wokulinunupika kwa gwanena mo uwa pokutambura ezigido lyetu. Tu tarurureni sihonena simwe. Nomvhura da ka pita, mugara gumwe kwa gwene simbapira sezigido, nye ta tantere munazinyetugara ogu ga si mu pere asi kapi na wiza ko. Munazinyetu ogo kwa tetukire apa ga mwene mugara ogo pezuva lyoMurarero. Age kwa haferere nkedi ezi va mu tambwire konyima yipo ga tamekere kuwiza komapongo. Momvhura nazinye yikando yitatu tupu ga dilire kuwiza komapongo. Yisinke ya mu ninkisire a ze komapongo nagenye? Elinunupiko lya mu vaterere a ture po erunduruko. Konyima munazinyetu ogu ga mu zigidire kwa ya tente asi: “Age muntu gokulinunupika.” Jehova yige ga kokere mugara ogu yipo a ya mu karere, age ngesi ga gwana ekuho.—2 Sam. 22:28; Joh. 6:44.
7. Ngapi eyi atu lirongo poMurarero neyi atu resa moBibeli ayi tu vatere tu linunupike?
7 Eyi atu lirongo komapongo neyi atu resa moBibeli kutuvatera tu linunupike. Moyivike yongandi komeho zoMurarero, mapongo getu kudemenena kosihonena saJesus ntani kosikara selinunupiko esi ga likidire apa ga geve eparu lyendi ngonzambo zosizoweseso. Mbunga zaJehova kutukorangeda tu rese ereso lyoBibeli lyoMurarero gwaHompa kuhamena eyi ya horokere komeho va ka mu dipage ntani apa va mu vhumbwire. Eyi atu lirongo poMurarero neyi atu resa moBibeli kutuvatera tu hare unene Jesus. Ano eyi kututumangeda tu honene elinunupiko lyendi nokurugana mpango zaJehova nampili momaudigu.—Ruk. 22:41, 42.
URADI KUTUVATERA TU WIZE KOMAPONGO
8. Ngapi omu Jesus ga likidire uradi?
8 Ose hena kuhonena Jesus pokukara nouradi. Age kwa likidire uradi mazuva gongandi komeho va ka mu dipage. Ga yi divire asi nonkore dendi ta di ka mu hepeka nokukamudipaga. (Mat. 20:17-19) Nye oyo kapi ya mu tjilisire. Apa sa sikire siruwo, age kwa tanterere varongwa ava ga kere nawo mosikunino saGesemani asi: “Katukeni, tu zeni. Ogu ana kuhorora nge googo ana kuwiza!” (Mat. 26:36, 46) Apa va wizire vantu asi va ya kwate Jesus, age kwa lihorowere mwene nokuvatantera va sige varongwa vendi va ze. (Joh. 18:3-8) Pokurugana oyo, age kwa likidire uradi. Emukurumbunga novagwavekwa nawo kukondja yipo va honene uradi ou ga likidire Jesus. Monkedi musinke?
Apa o likida uradi pokuwiza komapongo kukorangeda wopeke (Tara paragarafu 9) *
9. (a) Morwasinke twa hepera uradi mokuwiza komapongo nkenye apa? (b) Ngapi sihonena setu a si kundama vapuli vakwetu ava va tura modorongo?
9 Pokuwiza komapongo twa hepa kulikida uradi. Vanavazinyetu vamwe kuwiza komapongo nampili ngomu ava dompo mutjima ndi ava vere. Vamwe kuwiza komapongo nampili ngomu ava ligwanekere nomarwaneso gokutundilira kovanekoro ndi kepangero. Gazadara ko omu sihonena setu asi kundama vanavazinyetu ava va tura monodorongo morwa epuro lyawo. (Heb. 13:3) Apa ava zuvhu asi ose kuna kutwikira kukarera Jehova nampili momaudigu, ayo kuvankondopeka va twikire kukara nepuro nouradi ntani noulimburukwi. Eyi kwa horokerere mupositoli Paurusa. Nampili ngomu ga kere modorongo moRoma, age kwa hefe apa ga zuvhire asi vapuli vakwawo kuna kutwikira kukarera Jehova. (Fil. 1:3-5, 12-14) Konyima tupu zapa va mu pwagesere mo, age kwa tjangerere mbilive koVahebeli. Mombilive ozo, age kwa korangedere Vakriste vakwawo va ‘lihare-hare’ nokuza komapongo.—Heb. 10:24, 25; 13:1.
10-11. (a) Wolye natu zigida koMurarero? (b)Morwasinke natu yiruganena kuliza noVaefeso 1:17?
10 Ose kulikida uradi apa atu zigida vamusinda novarugani vakwetu ntani vanekoro koMurarero. Morwasinke atu va zigidire? Morwa ose kulimonena mauwa aga aga tundu mweyi ga tu ruganena Jehova naJesus. Tuna hara nawo ngava gwanene mo uwa ‘monkenda zaKarunga’ zosizoweseso.—Resa Vaefeso 1:7; Ehor. 22:17.
11 Apa atu likida uradi pokuwiza komapongo, ose kulikida hena sikara simwe somulyo, esi Jehova naJesus ava likida mononkedi dokulisiga-siga.
EHARO KUTUTUMANGEDA TU WIZE KOMAPONGO
12. (a) Ngapi mapongo aga tu vatere tu hare unene Jehova naJesus? (b) Ngapi natu honena Jesus kuliza no-2 Vakolinte 5:14, 15?
12 Eharo lyetu kwaJehova naJesus kututumangeda tu wize komapongo. Ano eyi atu lirongo komapongo kutuvatera tu hare unene Jehova naMunwendi. Komapongo, ose kuyalironga yoyinzi kuhamena eyi va tu ruganena. (Rom. 5:8) Murarero gwaHompa kutudiworokesa omu Jehova naJesus va tu hara unene, kukwatera mo nava va dira kukwata egano simpe eyi ga tu ruganena Jehova. Morwa twa kara norupandu kweyi va tu ruganena, ose kuhetekera ko kuhonena Jesus nkenye ezuva. (Resa 2 Vakolinte 5:14, 15.) Rupandu rwetu kosizoweseso kututumangeda hena tu hamberere Jehova. Kugava malimbururo komapongo kuna kara nkedi zimwe atu mu hamberere.
13. Ngapi natu yi likida asi twa hara Jehova naMunwendi? Faturura.
13 Ose kuvhura kulikida eharo lyetu kwaJehova naMunwendi pokutura po malizambero. Ose nkenye apa kutura po malizambero yipo tu wize komapongo. Sinzi sonombungakriste kukara nepongo kongurova konyima zoyirugana apa vantu ava roroka. Ano epongo limwe hena kukara mosikondovike, posiruwo esi vantu ava pwizumuka. Ngoso Jehova kutumona apa atu wiza komapongo neroroko ndi? Nhi. Jehova kuyihafera kweyi atu tura po malizambero yipo tu wize komapongo.—Mar. 12:41-44.
14. Ngapi omu Jesus ga tu tulira po sihonena selizambero?
14 Jesus kwa tu tulira po sihonena selizambero. Age kwa fililire varongwa vendi ntani nkenye apa age nga tura yihepwa yawo muhowo. Pasihonena, ezuva limwe age kwa kere kumwe novarongwa vendi nampili ngomu ga guvire nokuroroka. (Ruk. 22:39-46) Age nkenye apa nga ruganene vakwawo yuma mevango tupu lyokundindira va mu pe. (Mat. 20:28) Nsene tu hara unene Jehova novanavazinyetu ngwendi Jesus, ngatu lizambera pokukara poMurarero gwaHompa nokuwiza nkenye apa komapongo.
15. Wolye ava tuna hara kuvatera po unene?
15 Ose kwa hamena kombunga zousili, ntani ose kuyihafera apa atu zigida wovape tu ya lipakerere nawo. Nye tuna hara hena kuvatera “vapuli vakwetetu” unene po ava va tengura monyima. (Gar. 6:10) Apa atu va zigida komapongo unene po lyoMurarero, ayo kulikida asi twa va hara. Ngwendi Jehova naJesus, nose kutuhafesa apa atu mono ava va tengura monyima kuna kutengura kwaGuhyetu geharo Jehova.—Mat. 18:14.
16. (a) Ngapi omu natu korangeda wopeke ntani ngapi omu mapongo getu aga tu vatere? (b) Morwasinke kwedi oku kuna karere siruwo sosiwa kudiworoka nonkango daJesus domwa Johanesa 3:16?
16 Moyivike eyi yina kukwama ko, litura mo mokuzigida wovanzi va wize koMurarero ogu ngagu kara moutano 19 Kudumogona 2019. (Tara kakende “ Ngo va zigida ndi?”) Nsene tu wiza komapongo nkenye apa, ayo ngayi korangeda wopeke. Ngomu uzuni una kuhedera pepi, twa hepa kuwiza komapongo morwa ngayi tu vatera tu linunupike nokukara nouradi ntani neharo. (1 Tes. 5:8-11) Yipo nye, tu likideni rupandu kwaJehova naJesus morwa awo kwatu hara unene.—Resa Johanesa 3:16.
RUSUMO 126 Vangarareni, koreni, kareni vanankondo
^ para. 5 Murarero gwaHompa ngagu kara moUtano, 19 Kudumogona 2019, alyo ngali kara epongo lyomulyo po momvhura. Yisinke a yi tu tumangeda tu kare pepongo olyo? Morwa ose kwa hara kuhafesa Jehova. Mosirongwa esi tatu ka zogera yikara eyi ayi tu ninkisa tu kare poMurarero gwaHompa ntani nokuwiza komapongo.
^ para. 50 EFANO LYOPONTUNDA: Vantu wokusika pomamiliyona mouzuni mudima kuvatambura koMurarero gwaHompa
^ para. 52 EFANO: Munazinyetu ana kara modorongo kuna gwana ekorangedo kupitira mombilive vana mu tumine. Yina mu hafesa pokudiva asi epata lyendi kuna kutwikira kukarera Jehova nampili ngomu vana kuligwanekera nomarwaneso momukunda gwawo.