1-3. (a) Yisinke ya ninkisire Jehova a hare Saromo ntani matungiko musinke ga gwene? (b) Mapuro musinke natu ka zogera?

SAROMO kwa kere mudinkantu apa va mu tulire a kare hompa goVaisraeli. Jehova kwa mu monekerere monzodi nokumupura asi: “Yinke eyi ono hara, eyi nani ku pa?” Saromo ta limburura asi: “Ame ni munona nye unene, kapi na diva omu ava pangere. . . . Ano pe nge ko nye ukonentu ou na hepa mokupangera mbunga zoge.” (1 Vah. 3:5-10) Saromo kwa hundilire sininke sosiwa. Eyi yiyo ga mu harerere Jehova. (2 Sam. 12:24) Elimbururo lyaSaromo kwa hafesere Karunga, makura yipo ga mu pere “ukonentu nonondunge dononzi.”—1 Vah. 3:12.

² Saromo kwa gwene matungiko gomanzi apa nga limburukwa kwaJehova. Age kwa mu pere situmbukira sokutunga ntembeli “zokutongamenena HOMPA Karunga gwaIsraeli.” (1 Vah. 8:20) Age kwa divikwire morwa nondunge edi ga gwene kwaKarunga. Yininke eyi ga uyungire kwa yi tjanga monobuke ntatu domoBibeli. Zimwe zonobuke odo kuna kara Yisewe.

³ Nkango “mutjima” kwa zi tumbura yikando yokusika po 22 mobuke zoYisewe. Pasihonena, Yisewe 4:23, NW kutanta asi: “O takamese unene mutjima goge.” Kosinke za tamba nkango “mutjima” movelise ezi? Mosirongwa esi natu ka gwana elimbururo kepuro olyo nomapuro hena gavali aga gana kukwama ko. Ngapi omu Satana a hetekere ko kupukisa mutjima gwetu? Yisinke natu rugana yipo tu takamese mutjima gwetu? Twa hepa kugwana malimbururo  komapuro ogo yipo yi tu tompoke kutwikira kulimburukwa Karunga.

4-5. (a) Ngapi Episarome 51:6 ali tu vatere tu kwate egano eyi za tamba nkango “mutjima”? (b) Ngapi omu kukara tuna kanguka ayi likida eyi twa hepa kurugana yipo tu kare tuna kanguka pampepo?

⁴ Nkango “mutjima” ezi za kara moYisewe 4:23, NW kwa tamba komuntu gomonda. (Resa Episarome 51:6.) Azo kwa tamba hena komagazaro nomalizuvho getu ntani neyi twa hara. Nkango “mutjima” kwa tamba muntu gomonda nye kapisi emoneko lyetu lyoponze.

⁵ Koneka omu kukara muntu goukanguki ayi likida eyi twa hepa kurugana yipo tu kare tuna kanguka pampepo. Pomuhowo, mokuninka asi tu kare tuna kanguka, twa hepa kulya nondya doukanguki nokuyomberesa rutu rwetu nkenye apa. Mokulifana, nsene tuna hara tu kanguke pampepo, twa hepa kuresa Bibeli nkenye ezuva noyimbapiratjangwa yetu nokuyilikida asi twa kara nepuro mwaJehova. Eyi kutanta asi twa hepa kusikisa mo eyi tuna kulironga nokutantera ko wopeke kuhamena Jehova. (Rom. 10:8-10; Jak. 2:26) Sauvali, emoneko lyetu lyokontunda kuvhura li tu ninkise tu gazare asi tu va waawa nampili tu kare nouvera. Mokulifana, kuvhura tu lizuvhe asi tuna pama mepuro morwa kuza komapongo nomokuzuvhisa ntani kuresa Bibeli, nye madowo gomadona kuna kukura momutjima gwetu. (1 Kol. 10:12; Jak. 1:14, 15) Twa hepa kudiworoka asi Satana kuna hara kutupukisa. Ngapi omu a yi rugana? Yisinke natu rugana yipo tu lipopere?

6. Yisinke ana tu harere Satana ntani ngapi omu a yi rugana?

⁶ Satana kuna hara tu mu honene mokulihara nyamwetu nokurwanesa nompango daJehova. Age kapi a vhuru kutusininika tu mu honene. Yipo nye, age kuruganesa nonkedi dapeke yipo a tu pukise. Pasihonena, age kuninkisa vantu  ava ga pukisa va kare pepi nose. (1 Joh. 5:19) Age ga kara nehuguvaro asi ngatu tulisa po ukaume kumwe nawo nampili ngomu twa diva asi vakaume wovadona “kuyipika” yirugana nomagazaro getu. (1 Kol. 15:33) Eyi yiyo ya horokerere hompa Saromo. Age kwa kwere vakadi wovapagani wovanzi ntani awo kwa ‘gusire mutjima gwendi kwaKarunga.’—1 Vah. 11:3.

7. Yisinke a ruganesa Satana mokuhanesa magano gendi ntani morwasinke twa hepera kulitakamesa?

⁷ Satana kuruganesa nomuvi nomalikwamo gokoTivi yipo a hanese magano gendi. Age ga yi diva asi masimwititi kapi tupu aga tu hafesa nye ago kukundama magazaro noyirugana yetu. Jesus nga ruganesa masimwititi apa nga rongo vantu. Pasihonena, gazara kuhamena sifanekeso soMusamaliya gonkenda ntani nomumati ogu ga zonagwire po emona lyendi lyoupingwa. (Mat. 13:34; Ruk. 10:29-37; 15:11-32) Vantu ava ga pukisa Satana kuruganesa masimwititi yipo va zonagure nkareso zetu. Twa hepa kuruganesa nondunge. Nomuvi nomalikwamo gokoTivi kuvhura kuturonga nokuturetera ruhafo ga hana kuzonagura magazaro getu. Nye twa hepa kutakamesa. Nsene kuna kutarera yuma, wa hepa kulipura asi: ‘Ezi muvi ndi elikwamo lyokoTivi kuna kuronga nge eyi ya hungama ndi?’ (Gar. 5:19-21; Efe. 2:1-3) Yisinke norugana nsene o dimburura asi eyi ono kutarera kuna kukorangeda magano gaSatana? Wa hepa kuyinyokera po ngwendi moomu o likungu kehamba lyomukagu.

8. Ngapi omu vakurona nava popera vana vawo?

⁸ Vakurona, one kwa kara nositumbukira sokupopera vana veni kwaSatana ogu ana hara kupukisa nomutjima dawo. One kurugana unene paapa mwa hulira  yipo mu kunge vana veni komahamba gomukagu. Pasihonena, one kuzeresa mambo geni nokuzuguma nkenye eyi nayi vhura kuninkisa vana veni va vere. Mokulifana, mwa hepa kupopera vana veni konomuvi nokomalikwamo gokoTivi nomaudano gokoserefoni nokoIntaneta oku a ku pitire magano gaSatana aga naga vhura kuvapukisa. Jehova kwa mu pa situmbukira sokuvatera vana veni va kare vakaume vendi. (Yis. 1:8; Efe. 6:1, 4) Yipo nye, mwa hepa kutulira po vana veni noveta edi da liza nonompango domoBibeli. Tantera vana woge eyi nava tarera neyi nava dira kutarera ntani konda zeyi ono kuuyungira ngoso. (Mat. 5:37) Ngomu vana kukura, va deura va dive kuhangura yoyiwa neyi yoyidona kuliza nonompango daJehova. (Heb. 5:14) Ntani diworoka asi vanona kulirongera ko yoyinzi kosihonena soge kupitakana eyi o va tantere.—Deut. 6:6, 7; Rom. 2:21.

9. Egano musinke a korangeda Satana ntani morwasinke lya karera siponga?

⁹ Satana kuhetekera ko hena kupukisa mutjima gwetu pokutuninkisa tu kwame magano govantu mevango lyokukwama gaKarunga. (Koros. 2:8) Pasihonena, vantu kukorangeda asi kungawopa yiso sininke somulyo po unene meparu. Vamwe ava ava kwama egano olyo kuyakara nongawo ano vamwe kapi ayi va tompoka. Nampili ngoso, awo kukara mosiponga. Morwasinke? Morwa awo kukondjera tupu yimaliwa ano ayo kuvaninkisa va dire kukara nosinka sosinene koukanguki wawo nomapata gawo ntani nelikwatakano lyawo naJehova. (1 Tim. 6:10) Ose tuna hafa kweyi Jehova a tu vatere tu kare nomutaro gouhunga koyimaliwa.—Muud. 7:12; Ruk. 12:15.

10-11. (a) Yisinke natu rugana yipo tu litakamese nyamwetu? (b) Yisinke ngava rugana vanomeni mosiruwo sanare ntani ngapi omu ya lifana nezwi lyetu lyokomutjima?

¹⁰ Nsene tuna hara yi tu tompoke kutakamesa mutjima gwetu, twa hepa kudimburura yiponga nokurugana ko yuma usimbu. Nkango ‘kutakamesa’ ezi za kara moYisewe 4:23 kutudiworokesa sirugana somunomeni. Momazuva gahompa Saromo, vanomeni ngava kara keguru lyomakuma gositata nokurondora vantu nsene kuna kumona siponga. Sihonena esi kutulikida eyi twa hepa kurugana mokulipopera nyamwetu komagano gaSatana.

¹¹ Mosiruwo sanare, vanomeni ngava ruganene kumwe novarugani wopomarungavero. (2 Sam. 18:24-26) Awo ngava ruganene kumwe mokupopera sitata nokudivilisa asi vana pata marungavero nsene nonkore kuna kuwiza. (Neh. 7:1-3) Ezwi lyetu lyokomutjima * eli twa deura kwa kara ngwendi munomeni, alyo kuturondora nsene Satana ana hara kutupukisa. Nsene ezwi lyetu lyokomutjima kuna kuturondora, twa hepa kulipurakena nokurugana ko yuma usimbu ngwendi varugani wopomarungavero.

12-13. Ngapi omu nava vhura kutuheteka, nye yisinke twa hepa kurugana ko?

¹² Koneka omu natu vhura kulitakamesa  nyamwetu yipo Satana a dire kutupukisa. Jehova kuturonga asi tu “likare ure noruhonda nonyata nazinye nomawore gemona. Nampili kuuyunga yangoso ku dime mo nye mweni.” (Efe. 5:3) Yisinke ngatu rugana nsene varugani ndi vanasure vakwetu va tameka kusimwitira kuhamena ruhonda? Bibeli kututantera “tu zumbe udinikarunga nomadowo gopauzuni ou.” (Tit. 2:12) Munomeni gwetu ndi ezwi lyetu lyokomutjima kuvhura li tu rondore. (Rom. 2:15) Nye ngatu li purakena ndi? Poyiruwo yimwe kuvhura tu dire kulikwama nokutokora kupurakena kovakwetu ndi tu tarere mafano aga vana kutulikida. Nye aso kuna kara siruwo sokuhenduka siponga oso pokurundurura nzogera ndi kutunda po.

¹³ Twa hepa uradi mokunyokera po ekondjeso lyokutunda kovakwetu mokurugana yoyidona. Jehova kumona elituromo lyetu, ntani nga tu pa nonkondo nonondunge yipo tu nyokere po magano gaSatana. (2 Hist. 16:9; Jes. 40:29; Jak. 1:5) Yisinke hena twa hepa kurugana mokutakamesa mutjima gwetu?

14-15. (a) Ngapi natu vhura kuzegurura mutjima gwetu? (b) Ngapi omu Yisewe 4:20-22 ali tu vatere tu gwanene mo uwa wounzi mereso lyetu lyoBibeli? (Tara hena kakende “ Omu no gazadara ko.”)

¹⁴ Mokutakamesa mutjima gwetu kapi ya gwanena po tupu kunyokera po yininke yoyidona, nye twa hepa hena kukondjera yoyiwa. Gazadara ko hena kosifanekeso sositata va kundurukida nekuma. Varugani wopomarungavero ngava zedire marungavero mokukondera nonkore, nye poyiruwo yimwe ngava ga zegurura yipo va hwilide nondya noyininke yimwe eyi ngava hepa vantu womositata. Ngano asi mavero kapi ngava ga zegurura, vantu womositata ngano va fire konzara. Mokulifana nose twa hepa kuzegurura mutjima gwetu nkenye ezuva yipo tu pulisire magazaro gaKarunga ga tu vatere.

¹⁵ Ose kugwana magazaro gaKarunga moBibeli, yipo nye apa atu zi resa ose ngoso kuna kupulisira magazaro gaKarunga ga kundame eyi atu gazara noyirugana yetu. Ngapi omu natu gwanena mo uwa wounzi mereso lyetu lyoBibeli? Kukanderera mulyo. Munazinyetukadi gumwe kwa tanta asi: “Komeho ni rese Bibeli, ame kukanderera kwaJehova yipo a vatere nge ‘ni mone yitetu yomoVeta zendi.’” (Epis. 119:18) Twa hepa hena kugazadara ko kweyi atu resa. Apa atu kanderere nokuresa nokugazadara ko koNonkango daKarunga ose ‘kupaka komutjima’ gwetu Nonkango daKarunga ntani nokuhara magazaro gendi.—Resa Yisewe 4:20-22; Epis. 119:97.

16. Mauwa musinke va gwanena mo wovanzi pokutarera elikwamo lyoJW Broadcasting?

¹⁶ Pokutarera eyi ya kara ko-JW Broadcasting^® nazo kuna kara nkedi zimwe omu atu pulisire magazaro gaKarunga ga tu kundame. Valikwali vamwe kwa tanta asi: “Ose kugwanena mo uwa melikwamo lyoJW Broadcasting lyankenye kwedi! Alyo kutukorangeda nokutuhengagwida apa atu dompo mutjima. Ntani ose kupurakena nkenye apa nonsumo domoBroadcast. Ose kudipurakena apa atu tereke napa atu zeresa ntani apa atu nu tiye.” Elikwamo eli kutuvatera tu takamese mutjima gwetu. Alyo kuturonga tu gazare ngwendi moomu a gazara Jehova nokutuvatera tu nyokere po maheteko gaSatana.

17-18. (a) Yisinke ayi horoka apa atu limburukwa Jehova ngomu va yi likida 1 Vahompa 8:61? (b) Yisinke natu lirongera ko kosihonena saHisikiya? (c) Kuliza nekanderero lyaNdafita lya kara mEpisarome 139:23, 24, yisinke natu hundira Jehova mekanderero?

 ¹⁷ Epuro lyetu kunkondopara apa atu limonene mauwa aga aga tundu mokulimburukwa Jehova. (Jak. 1:2, 3) Ose kulizuvha uwaawa apa atu hafesa Jehova ntani ayo kututumangeda tu mu limburukwe. (Yis. 27:11) Nkenye eheteko kutupa mpito tu likide nsene sili twa hara Jehova. (Epis. 119:113) Ose kulikida asi twa hara Jehova pokulimburukwa nompango dendi nokurugana mpango zendi.—Resa 1 Vahompa 8:61.

¹⁸ Mokumona asi kapi twa sikilira mo, kuvhura ngatu ture mapuko. Nsene ngayi horoka, ya wapa kudiworoka sihonena saHisikiya. Age kwa tulire mapuko nye ga litezwilire nokutwikira kukarera Jehova “nomutjima nagunye.” (Jes. 38:3-6; 2 Hist. 29:1, 2; 32:25, 26) Tu tokomeneni kunyokera po maheteko gaSatana ogu ana hara kutupukisa. Tu kanderereni kwaJehova yipo a tu vatere tu kare nomutjima gokulimburukwa. (1 Vah. 3:9; Resa Episarome 139:23, 24) Nsene tu takamesa mutjima gwetu, ayo ngayi tu tompoka kulimburukwa Jehova.