1. Yisinke ga pumbire Jehova eyi ngayi horoka momazuva getu?

JEHOVA kwa pumbire asi momazuva getu: “Vanayirongo murongo ngava wiza koMujuda gumwe va mu tantere asi: ‘Ose kuna hara tu kare mositambo soge, yeeyi ose kwa zuvha asi Karunga, neni ga kara.’” (Sak. 8:23) ‘Mujuda’ kwa fanekesa ava ga gwaveka Karunga nompepo zokupongoka. Awo hena kuvatumbura asi ‘muhoko gwaKarunga.’ (Gar. 6:16) “Vanayirongo murongo” kwa fanekesa ava va kara nehuguvaro lyokukaparukira narunye pevhu. Awo va yi diva asi Jehova kwa tungika mbunga zovagwavekwa ntani awo kulizuvha mfumwa mokumukarera kumwe nawo.

2. Ngapi omu “vanayirongo murongo” nava kara ‘mositambo simwe’ kumwe novagwavekwa?

² Nampili yi kare udigu kudiva madina govagwavekwa navenye ava vana kara ngesi pevhu, * nye nonzwi dapeke kuvhura di kare “mositambo” sawo. Monkedi musinke? Bibeli kutanta asi “vanayirongo murongo ngava wiza koMujuda gumwe va mu tantere asi: ‘Ose kuna hara tu kare mositambo soge, yeeyi ose kwa zuvha asi Karunga, neni ga kara.’” Nampili ngomu velise za tumbura Mujuda gumwe, azo kwa tamba kovantu wovanzi morwa kwa uyunga hena asi “neni ga kara.” Eyi kutanta asi Mujuda kapisi muntu gumwe tupu,  nye kwa fanekesa mbunga zovagwavekwa. Nonzwi dapeke kukarera Jehova kumwe novagwavekwa. Nye awo kapi ava tara vagwavekwa asi vapitisili vawo, morwa va yi diva asi Jesus yige Mupitisili gwawo.—Mat. 23:10.

3. Mapuro musinke nava ka limburura mosirongwa esi?

³ Mokumona asi vagwavekwa vamwe simpe poveli pevhu, vamwe kuvhura va lipure asi: (1) Nkareso musinke va hepa kukara nazo vagwavekwa? (2) Ngapi natu tekura muntu ogu a li komboroto nokunwa kovhinyu poMurarero? (3) Kuvhura tu kare nosinka nsene sivaro sava ava li komboroto nokunwa kovhinyu poMurarero kuna kuligwederera ndi? Sirongwa esi tasi ka limburura mapuro ogo.

4. Erondoro musinke lya kara mo-1 Vakolinte 11:27-29, va hepa kugazadara ko unene vagwavekwa, ntani morwasinke?

⁴ Vagwavekwa va hepa kugazadara ko unene kerondoro lyomo-1 Vakolinte 11:27-29. (Resa.) Ngapi omu mugwavekwa na vhura kulya komboroto nokunwa kovhinyu poMurarero “ponkedi zondona”? Nsene mugwavekwa a lya komboroto  nokunwa kovhinyu nye age kapi a sikisa mo nompango daJehova, age ngoso kuna kuyirugana ponkedi zondona. (Heb. 6:4-6; 10:26-29) Vagwavekwa va yi diva asi va hepa kutwikira kulimburukwa nsene vana hara kukagwana ‘mfeto ezi ga va zigidira Karunga mwaJesus Kristusa.’—Fil. 3:13-16.

5. Nkareso musinke va hepa kunyokera po vagwavekwa?

⁵ Mpepo zaJehova zokupongoka kuvatera vakareli vendi va linunupike, nye kapisi va linenepeke. (Efe. 4:1-3; Koros. 3:10, 12) Yipo nye, vagwavekwa kapi ava ligazara asi awo mulyo kupitakana wopeke. Awo va yi diva asi Jehova kapi a va pe mpepo zokupongoka zonzi kupitakana ezi a gava kovakareli vendi vapeke. Ntani kapi ava gazara asi awo va kwata nawa egano mausili gomoBibeli kupitakana wopeke. Awo hena kapi ava tantere muntu asi nage va mu gwaveka ntani asi kuvhura a tameke kulya komboroto nokunwa kovhinyu poMurarero. Nye awo kwa linunupika ntani va diva asi Jehova yige gelike gokuzigida vantu ngava ze meguru.

6. Kuliza no-1 Vakolinte 4:7, 8, nkareso musinke va hepa kukara nazo vagwavekwa?

⁶ Nampili ngomu vagwavekwa ava lizuvhu mfumwa kweyi va va zigida va ze meguru, awo kapi va hara wopeke va va tekure monkedi zokulikarera. (Fil. 2:2, 3) Awo va yi diva asi apa Jehova ga va gwavekere, age kapi ga yi divisire kovantu wopeke. Yipo nye, mugwavekwa kapi ayi mu tetura nsene vamwe va dira kuyipura pomuhowo asi age mugwavekwa. Age ga yi diva asi Bibeli kututantera asi walye atu pura usimbu-simbu muntu ogu ana kutanta asi Karunga kwa mu pa situmbukira sokulikarera. (Ehor. 2:2) Mugwavekwa kapi ga hara asi vantu va mu tekure monkedi zokulikarera, yipo nye, apa a ligwana nawo, age kapi ava tantere asi age mugwavekwa.—Resa 1 Vakolinte 4:7, 8.

7. Yisinke ava nyokere po kurugana vagwavekwa ntani morwasinke?

⁷ Vagwavekwa kapi ava lizuvhu asi awo va hepa kukara tupu novagwavekwa vakwawo. Kapi ava hetekere ko kugwana vagwavekwa vakwawo yipo va zogere yininke yokuhamena vagwavekwa ndi va tulise po kambunga mokulironga Bibeli. (Gar. 1:15-17) Nsene vagwavekwa va rugana yininke oyo, mbungakriste kapi ngazi kara mouumwe. Ntani ngava guvisa mpepo zokupongoka, ezi azi vatere vantu vaKarunga va kare mombili nomouumwe.—Rom. 16:17, 18.

8. Morwasinke twa hepera kutakamesa monkedi omu atu tekura vantu ava ava li komboroto nokunwa kovhinyu? (Tara nonkango dokonhi.)

⁸ Ngapi omu natu tekura vanavazinyetu wovagwavekwa? Ayo epuko kuhara unene muntu gumwe, nampili a kare asi mugwavekwa. (Mat. 23:8-12) Apa Bibeli azi uyunga kuhamena vakuronambunga, azo kutukorangeda tu “honene epuro lyawo,” nye kapi azi tu tantere tu tumbure nkenye muntu asi mupitisili gwetu. (Heb. 13:7) Yosili, Bibeli kutanta asi vamwe va fira ‘kuvafumadeka unene,’ kapisi morwa yeeyi awo vagwavekwa, nye morwa awo ‘kupitisira nawa’ ntani ‘kurugana unene mokuudisa nomokuronga.’ (1 Tim. 5:17) Nsene tu yererepeka unene vagwavekwa, ose kuvhura tu va fise nomuga. * Ndi tu va ninkise va linenepeke. (Rom. 12:3) Natuvenye kapi tuna hara kurugana yininke eyi nayi ninkisa vamumbya vaKristusa wovagwavekwa va ture epuko lyangoso.—Ruk. 17:2.

9. Ngapi natu yi likida asi ose twa fumadeka Vakriste wovagwavekwa?

⁹ Ngapi natu yi likida asi ose kufumadeka ava ga gwaveka Jehova? Pokudira kuvapura omu va ya kara vagwavekwa. Kapisi hepero tu yi dive. (1 Tes. 4:11; 2 Tes. 3:11) Ntani twa ha gazara asi mulikwali gwawo ndi vakurona vawo ndi vemepata lyawo nawo vagwavekwa. Muntu kapi a pingi ehuguvaro olyo kwava vemepata lyawo. Age kuligwana kwaKarunga. (1 Tes. 2:12) Twa hepa hena kunyokera po mapuro aga naga koresa wopeke. Pasihonena, kapisi tu pure mukadamugwavekwa omu a lizuvhu kuhamena kukaparukira pevhu pwa hana mugara gwendi. Diworokeni asi ose twa kara nehuguvaro asi mouzuni woupe, Jehova nga ka ‘kutika nayinye moufenkenda wendi.’—Epis. 145:16.

10. Monkedi musinke atu lipopere nyamwetu nsene tu nyokera po ‘kuhara’ unene muntu?

¹⁰ Nsene tu dira kutekura vagwavekwa monkedi zokulikarera kupitakana wopeke, ose ngatu lipopera nyamwetu. Monkedi musinke? Bibeli kututantera asi vagwavekwa vamwe nampo kapi ngava twikira kulimburukwa. (Mat. 25:10-12; 2 Pet. 2:20, 21) Nsene tu nyokera po ‘kuhara’ unene muntu, ose kapi ngatu kwama wopeke nampili va kare asi vagwavekwa ndi vantu ava va divikwa ndi ava va karera Jehova nomvhura dononzi. (Juda 16) Makura nsene ngava dira kulimburukwa ndi va sige mbungakriste, ose kapi ngatu zumbanesa epuro lyetu mwaJehova ndi tu hageke kumukarera.

11. Yisinke ya horokera sivaro sava ava li komboroto nokunwa vhinyu poMurarero?

¹¹ Monomvhura dononzi da ka pita, sivaro sava ava li komboroto nokunwa kovhinyu poMurarero kwa gurumuka. Nye ngesi kuna kuligwederera nkenye mvhura. Hepero tu kare nosinka ndi? Hawe. Ngesi tatu ka zogera nokonda dimwe deyi natu dilira kukara nosinka.

12. Morwasinke natu dilira kukara nosinka kuhamena sivaro sava ava li komboroto nokunwa kovhinyu poMurarero?

¹² Jehova “ga diva ava vendi mo.” (2 Tim. 2:19) Vanavazinyetu ava ava varura sivaro sowo ava li komboroto nokunwa kovhinyu poMurarero kapi va diva asi wolye sili ava va gwaveka. Yipo nye, sivaro oso kwa kwatera mo ava ava gazara asi nawo vagwavekwa. Pasihonena,  vamwe ava ngava li nare mboroto nokunwa kovhinyu va hageka kuyirugana. Vamwe kwa kara nouvera womouruvi ou a u va ninkisa va gazare asi nawo ngava ka pangera naKristusa meguru. Yipo nye, ose kapi twa diva nawa-nawa sivaro sovagwavekwa ava vana kara ngesi pevhu.

13. Bibeli za likida sivaro sovagwavekwa ava ngava kara pevhu apa ngau tameka udigu wounene ndi?

¹³ Apo ngapa kara vagwavekwa komaruha gomanzi pevhu apa Jesus nga wiza a ya va tware meguru. (Mat. 24:31) Bibeli kulikida asi pomazuva gopouhura, ngapa kara vagwavekwa wovasesu apa pevhu. (Ehor. 12:17) Nye kapi za tumbura sivaro sava ngava kara pevhu apa ngau tameka udigu wounene.

14. Yisinke tuna kulirongera mo moVaroma 9:11, 16, kuhamena omu ava va hororowora vagwavekwa?

¹⁴ Jehova yige a tokora siruwo esi na horowora vagwavekwa. (Rom. 8:28-30) Jehova kwa tamekere kuhorowora vagwavekwa konyima zevhumbuko lyaJesus. Ayo kumoneka asi mosiruwo sina, Vakriste navenye wousili kwa va gwavekere. Monomvhura edi da kweme ko, sinzi sava ngava tanta asi awo Vakriste kapi ngava kwama nawa-nawa Kristusa. Nampili ngoso, monomvhura odo, Jehova kwa gwavekere vantu wovasesu ava va kere Vakriste wousili. Awo kwa kere ngwendi yilya eyi ga uyungire Jesus asi ngayi kura mokatji komau. (Mat. 13:24-30) Pomazuva gopouhura, Jehova kwa twikira kuhorowora vantu ava ngava hamena mombunga zovantu 144 000. * Yipo nye, kapisi yi tu tetukise nsene Karunga a tokora kuhorowora vantu  vamwe komeho uhura u wize. (Resa Varoma 9:11, 16.) * Twa hepa kutakamesa asi kapisi tu kare ngwendi varugani womosifanekeso saJesus, ava va sivanene kuhamena omu muhona gwawo ga tekwire ava va ya rugene vili zimwe tupu.—Mat. 20:8-15.

15. Vagwavekwa navenye kwa hamena kombunga ‘zomukareli gokulimburukwa gonondunge’ ezi va tumbura mwaMateusa 24:45-47 ndi? Faturura.

¹⁵ Kapisi navenye ava va kara nehuguvaro lyokukaparukira meguru kwa hamena kombunga ‘zomukareli gokulimburukwa gonondunge.’ (Resa Mateusa 24:45-47.) Ngwendi mosiruwo sovapositoli, Jehova naJesus naina kuna kukutika ndi kuronga wovanzi kupitira mwava wovasesu. Vagwavekwa wovasesu tupu yiwo va rugenesere mokutjanga Matjangwa goRugereka goSikriste. Naina, vagwavekwa wovasesu tupu va pa situmbukira sokupa vantu vaKarunga “nondya posiruwo sado.”

16. Yisinke ono lirongo mosirongwa esi?

¹⁶ Yisinke tuna lirongo mosirongwa esi? Jehova kwa tokora kugava mwenyo gwanarunye kovantu vendi wovanzi ava ngava parukira apa pevhu, ano wovasesu ava ngava ka pangera naJesus ngava ka parukira meguru. Jehova nga futa vakareli vendi navenye, yi kare asi “Mujuda” ndi “vanayirongo murongo.” Age kwa hepa ko tupu kwawo va kwame noveta dokulifana nokutwikira kumulimburukwa. Navenye va hepa kulinunupika. Navenye va hepa kumukarera kumwe mouumwe. Ntani navenye va hepa kuruganena kumwe nombili mombungakriste. Ngomu tuna kuhedera pepi nouhura, ngano natuvenye tu twikireni kukarera Jehova nokukwama Kristusa ‘ngosiunda simwe tupu.’—Joh. 10:16.