1-2. Yisinke ga tanterere muengeli vakadi ava va zire kontoko zaJesus ntani yisinke ga va tanterere Jesus konyima?

APA lya sire ezuva mo-16 Nisan momvhura 33, kambunga kovakadi ava va hara Karunga ava va kere noruguwo, kwa zire kontoko oku va horekere Hompa Jesus Kristusa. Apo kwa pitire po ezuva limwe noharufa kutunda apa Jesus va mu vhumbikire. Vakadi owo kwa here va ka gwaveke simpu saJesus noyikwaedumba, nye awo kwa ka gwene ntoko siporongwa. Muengeli kwa va tanterere asi Jesus ana vhumbuka koufe ntani age kwa va tanterere hena asi: “Age ta mu hovere kuza koGalireya. Kwina yiko nye ngomu ka mu monena.”—Mat. 28:1-7; Ruk. 23:56; 24:10.

² Konyima zapa vakadi owo va tundire kontoko, Jesus kwa va monekerere nokuvatantera asi: “Zendeni mu ka tantere vamumbya vange, va ze koGalireya. Kwina yiko nye ngava ka monena nge.” (Mat. 28:10) Mokumona asi Jesus kwa hovere kuwapaika epongo novarongwa vendi konyima zapa ga vhumbukire, eyi kulikida asi ga kere nombudi zomulyo ezi ga here kuvatantera!

3-4. Morwasinke tuna kuuyungira asi mpangera ezi za kara mwaMateusa 28:19, 20, kapi za tembe tupu kovapositoli velike? (Tara efano lyopontunda.)

³ Resa Mateusa 28:16-20. Apa Jesus ga pongere kumwe novarongwa vendi, age kwa va tanterere kuhamena sirugana esi sava ndindilire komeho, esi sa lifana nesi tuna kurugana naina. Age kwa va tanterere asi: “Yipo nye nomu zira konomuhoko nadinye, mu ka di ninke di kare varongwa vange . . . ka di rongeni, di ka limburukwire nayinye eyi na mu rekera.”

⁴ Jesus kuna hara varongwa vendi navenye va zuvhise.  Mpangera ezi kapi tupu ga zi geve kovapositoli vendi wovalimburukwi 11. Morwasinke tuna kuuyungira ngoso? Apa Jesus ga geve mpangera zokutulisa po varongwa pondundu zaGalireya, kapisi vapositoli vendi velike va kere po pepongo olyo. Diworoka asi muengeli kwa tanterere vakadi ava va zire kontoko asi: “Kwina [koGalireya] yiko nye ngomu ka mu monena.” Eyi kulikida asi vakadi owo wovalimburukwi, nawo yipo va kere pepongo olyo. Nye ou kapisi yiwo welike umbangi. Mupositoli Paurusa nage kwa tente asi Jesus kwa monekere “pwarumwe tupu vakwetetu wokupitakana mafere gatano.” (1 Kol. 15:6) Kupi va pongere vantu owo?

5. Morwasinke tuna kuuyungira asi Paurusa mo-1 Vakolinte 15:6, kwa tembe kepongo eli lya kere pondundu zaGalireya?

⁵ Twa kara nonokonda edi adi likida asi Paurusa kwa tembe kepongo eli lya kere moGalireya va tumbura mwaMateusa egaununo 28. Nokonda musinke odo? Zokuhova, sinzi sovarongwa vaJesus kwa kere Vagalireya. Yipo nye, ayo kwa kere ureru kombunga zonene mokupongera kondundu zomoGalireya, mevango lyokupongera membo lyomuntu moJerusarema. Zauvali, konyima zapa Jesus va mu vhumbwire, age ga pongere nare novarongwa vendi 11 monzugo moJerusarema. Yipo nye, nsene asi Jesus kwa here kutantera vapositoli vendi velike va zuvhise nokutulisa po varongwa, age ngano ga yi va tanterere apa va pongere kumwe moJerusarema mevango lyokuvapura va ka ponge kumwe novakadi ntani novarongwa wopeke moGalireya.—Ruk. 24:33, 36.

6. Ngapi omu Mateusa 28:20, azi likida asi mpangera zokutulisa po varongwa kwa tamba hena kwetu ntani ngapi omu tuna ku zi sikisa mo?

⁶ Koneka hena konda zautatu zomulyo. Mpangera ezi ga geve Jesus zokutulisa po varongwa kapi tupu za tembe koVakriste wokuhova. Morwasinke tuna kuuyungira ngoso? Jesus kwa hagesere epongo olyo pokutantera varongwa vendi asi: “Ame neni ngani kara dogoro nokouhura wouzuni.” (Mat. 28:20) Sinzi sovarongwa vaJesus naina kuna kutulisa po varongwa ngamoomu ga yi va pangerere. Gazadara ko tupu! Nkenye mvhura vantu wokusika koyiha 300 000 kugwana ekuho ngoNombangi daJehova nokukara varongwa vaJesus Kristusa!

7. Yisinke natu ka zogera ngesi ntani morwasinke?

⁷ Sinzi sovantu ava ava lirongo Bibeli, konyima kuyagwana ekuho. Nye vamwe ava atu lirongo nawo Bibeli kukara nowoma wokukara varongwa vaJesus. Awo kuhafera kulironga Bibeli, nye kapi ava tura po marunduruko yipo va gwane ekuho. Nsene wa kara nomuntu ogu o lirongo nage Bibeli, tuna si huguvara asi ove ono hara kumuvatera yipo a ture pasirugana eyi ana kulironga ntani nokukara murongwa gwaKristusa. Sirongwa esi tasi ka zogera omu natu vatera varongwa vetu va hare Jehova ntani yipo va ture po ezokomeho. Morwasinke natu ka zogerera kuhamena yininke oyo? Morwa poyiruwo yimwe twa hepa kutokora nsene kuvhura tu twikire kulironga Bibeli nomurongwa gwetu ndi hawe.

8. Morwasinke ayi karere udigu pamwe kuvatera varongwa vetu va hare Jehova?

⁸ Jehova ana hara vantu va mu karere morwa kwa mu hara. Yipo nye, twa hepa kuvatera varongwa vetu va kwate egano asi Jehova kuvapakera mbili ntani ga va hara unene. Twa hepa kuvavatera va tare Jehova asi age “kupakera mbili nonsigwe, age kupopera vafisavayavawo.” (Epis. 68:5) Nsene varongwa woge va kwata egano omu Karunga ga va hara, ayo ngayi va ninkisa nawo va tameke kumuhara. Varongwa vamwe woBibeli kuvhura yi va digopere  kutara Jehova ngaGuhya geharo morwa vaguhya vawo kapi ngava va likida eharo. (2 Tim. 3:1, 3) Yipo nye, ngomu ono kulironga nawo Bibeli, demenena koyikara yaJehova yoyiwa. Va vatera va kwate egano asi Karunga gwetu geharo kuna va harere va ka gwane mwenyo gwanarunye ntani age ana liwapaikire mokuvavatera yipo va ka gu gwane. Yisinke hena natu rugana?

9-10. Nobuke musinke natu ruganesa yipo tu lironge novantu Bibeli ntani morwasinke?

⁹ Ruganesa nobuke “Yisinke azi rongo Bibeli?” ntani “Omu kare meharo lyaKarunga.” Nobuke odo kwa di wapaika nositambo sokuvatera varongwa woBibeli va hare Jehova. Pasihonena, egaununo lyokuhova mobuke Yisinke azi rongo Bibeli? kwa limburura mapuro aga: Karunga kutupakera mbili ndi kwato nkenda? Ngapi Karunga a lizuvhu apa vantu ava hepa? ntani Kuvhura o kare kaume kaJehova ndi? Ngapi kuhamena buke Omu kare meharo lyaKarunga? Buke ozo kwa zi wapaika yipo zi vatere murongwa goBibeli a kwate egano omu kukwama nompango domoBibeli nadi mu vatera meparu ntani nokumuvatera a hedere pepi naJehova.  Nampili wa lironga nobuke odo novarongwa wopeke, simpe wa hepa kuliwapaikira nawa nsene kuna kukalironga nomurongwa goge yipo o ka demenene kweyi ana hepa.

¹⁰ Yisinke no rugana nsene murongwa goge ana hara kudiva kuhamena sirongwa esi va zogera mosimbapiratjangwa esi atu dili kuruganesa mokuzuvhisa? Kuvhura o mu korangede a ka rese simbapiratjangwa oso pwamwene yipo o gwane siruwo sokutwikira kulironga nage Bibeli monobuke edi atu ruganesa mokuzuvhisa edi tuna tumbura.

11. Siruwo musinke no tameka kukanderera pelirongo lyoBibeli, ntani ngapi omu no fatwilira murongwa goge eyi ya karera nomulyo?

¹¹ Tameka elirongo lyoBibeli nekanderero. Ayo ya wapa kutameka kukanderera pelirongo lyoBibeli konyima tupu zoyivike yongandi. Twa hepa kuvatera murongwa goBibeli a dimburure asi kapi tatu vhuru kukwata egano Nonkango daKarunga pwa hana evatero lyompepo zokupongoka. Vanavazinyetu vamwe kufatwilira varongwa vawo konda zeyi atu kandererere pokuresa Jakopo 1:5, ezi za tanta asi: “Ntene pweli ogu ga pira nondunge, a di hundire kwaKarunga.” Konyima awo kupura murongwa asi “Monkedi musinke natu hundira nondunge kwaKarunga?” Eyi kuninkisa murongwa ayi kwate egano asi twa hepa kukanderera kwaKarunga.

12. Ngapi omu no ruganesa Episarome 139:2-4, yipo o vatere murongwa goge goBibeli a tantere Jehova omu ana kulizuvha?

¹² Ronga murongwa goge goBibeli omu na kanderera. Mu tantera asi Jehova ana hara kupurakena komakanderero gendi gokutundilira komutjima. Mu fatwilira asi ose kuvhura tu tantere Jehova omu tuna kulizuvha ntani nokumutantera yininke eyi ayi tu digopere kutantera vakwetu. Diworoka asi Jehova ga diva nare eyi atu gazara. (Resa Episarome 139:2-4.) Kuvhura hena tu mu korangede a hundire Jehova a mu vatere a sige magazaro gomadona ntani noyirugana yoyidona. Pasihonena, tu tante asi murongwa goge kwa hara sipito esi ava dili kudana Vakriste. Nampili ngomu ga yi diva asi silika oso kapi asi hafesa Jehova, nye age simpe kuhafera silika oso. Yipo nye, mu korangeda a tantere Jehova omu ana kulizuvha ntani a likwambere kwaJehova a mu vatere a nyenge eyi ga nyenga Karunga.—Epis. 97:10.

13. (a) Morwasinke natu zigidira usimbu varongwa vetu woBibeli komapongo? (b) Ngapi omu natu va vatera va dire kukara nowoma wokuwiza komapongo?

¹³ Zigida usimbu murongwa goge goBibeli komapongo. Yininke eyi a zuvhu murongwa kepongo neyi a mono, kuvhura kumutumangeda a karere Jehova. Mu likida vidiyo Yisinke atu rugana ko koSinyanga soUhompa? Ntani mu zigida mu ze kumwe komapongo. Nsene kuvhura, mu vatera yipo a gwane ugendero. Ayo ya wapa kuza novanavazinyetu wokulisiga-siga komurongwa goge goBibeli. Nsene o yi rugana, ayo ngayi mu vatera a lidive novantu womombungakriste, ntani ngayi mu vatera a dire kukara nowoma apa nga wiza komapongo.

14. Yisinke nayi vatera murongwa goBibeli a ture po ezokomeho?

¹⁴ Sitambo setu kuna kara sokuvatera murongwa gwetu goBibeli a ture po ezokomeho. (Efe. 4:13) Apa muntu a tameke kulironga Bibeli nose, pomuhowo age kugazadara tupu omu nga gwanena mo uwa melirongo olyo. Nye ngomu nga ya hara unene Jehova, age nga tameka kugazadara omu na vatera vantu vapeke, kukwatera mo nava va kara mombungakriste. (Mat. 22:37-39) Yipo nye, nsene ono gwana  mpito, tantera murongwa goge kuhamena omu natu kwatesa ko yirugana yoUhompa kupitira moyigava.

15. Ngapi omu natu vatera murongwa gwetu goBibeli a dive eyi na rugana nsene kuna kuligwanekera noudigu?

¹⁵ Ronga murongwa goge goBibeli a dive eyi na rugana nsene kuna kuligwanekera noudigu. Tu tante asi murongwa goge goBibeli ngesi kuna kara muzuvhisi gokudira kugwana ekuho. Makura ta ku tantere asi pweli gumwe gomombungakriste ana mu handukisa. Mevango lyokumutantera asi yilye ana kara mepuko, mu vatera a dive eyi na rugana kuliza noMatjangwa. Age kuvhura a gusire po munazinyetu ogo, ano nsene kapi ana kuyivhura, ga hepa kuza komuntu ogo nokukauyunga nage monkedi zongwa zeharo nositambo ‘sokumukongwa.’ (Hetakanesa Mateusa 18:15.) Mu vatera hena a liwapaikire eyi na vhura kukauyunga. Mu likida omu na ruganesa JW Library^® app, Buke zepaparo zoNombangi daJehova ntani jw.org^® yipo a gwane nonkedi omu na kohonona po udigu owo. Nsene o deura murongwa goge goBibeli komeho a gwane ekuho, ayo ngayi mu vatera a kare nelikwatakano lyewa novapuli vakwawo mombungakriste konyima zokugwana ekuho.

16. Morwasinke ya karera nomulyo tu ze novazuvhisi vakwetu kovalirongi vetu woBibeli?

¹⁶ Pura womombungakriste ntani mutareli gonombunga a ze kumwe nove komurongwa goge goBibeli nsene kuna kudingura mbunga zeni. Morwasinke ya karera nomulyo? Kugusa ko nokonda edi tuna tumbura, vazuvhisi vamwe kuvhura va vatere murongwa goge mononkedi dimwe. Pasihonena, tu tante asi murongwa goge ana hara kuhageka kukoka makanya nye kapi a yi mu tompoka. Zende kumwe namunazinyetu ogu nage ya digoperere kusiga nkareso ozo. Munazinyetu ogo kuvhura a ka gave magano gomulyo aga naga ka vatera murongwa goge. Nsene asi kuna kulizuvha nomuga kulironga nomurongwa goge komeho zamunazinyetu ogu ga kara noudivi, mu pura a pitisire elirongo olyo. Nsene o za novanavazinyetu komurongwa goge goBibeli, murongwa goge nga gwanena mo mauwa gomanzi. Diworoka asi, sitambo setu kuna kara sokuvatera murongwa goBibeli a ture po ezokomeho.

17-18. Yisinke no tarurura komeho zokutokora nsene kuvhura o hageke kulironga Bibeli nomurongwa goge?

¹⁷ Nsene murongwa goge kapi ana kutura po ezokomeho, wa hepa kulipura nsene kuvhura o hageke kulironga nage Bibeli ndi hawe. Komeho o ture po etokoro, wa hepa kugazadara ko koukaro womurongwa goge. Vantu vamwe kugusa siruwo sosire mokutura po marunduruko, nye vantu vamwe kapi ava gusa siruwo. Lipura nyamoge asi: ‘Kuliza noukaro womurongwa gwange, age kuna kutura po ezokomeho ndi?’ ‘Age kuna ‘kulimburukwa’ ndi kuna kutura pasirugana eyi ana kulironga ndi?’ (Mat. 28:20) Kuvhura yi guse siruwo komeho murongwa a ya kare  murongwa gwaKristusa, nye ga hepa kutura po marunduruko meparu lyendi.

¹⁸ Yisinke natu rugana nsene murongwa gwetu nare ga gusa kulironga Bibeli, nye kapi ana kulikida asi ga hara kulironga Bibeli? Pasihonena, tu tante asi murongwa goge ga mana kulironga buke Yisinke azi rongo Bibeli? Ntani nampo ga tameka kulironga buke Omu kare meharo lyaKarunga, nye kapi ga za rumwe kepongo nampili koMurarero gwaHompa kooku! Ntani age nkenye apa kurundurura elirongo lyeni lyoBibeli morwa nokonda da hana mulyo. Nsene murongwa goge yiyo a rugana eyi, ya wapa kuzogera nendi kuhamena udigu owo. *

19. Yisinke no vhura kuuyunga nsene murongwa goge kumoneka ngwendi kapi a tara elirongo lyoBibeli asi mulyo ntani yisinke wa hepa kutarurura?

¹⁹ Kuvhura o mu pure asi, ‘Yisinke ayi kuninkisa yipo yi ku karere udigu kukara gumwe goNombangi daJehova?’ Kuvhura nampo a limburure asi, ‘Ame kuhafera kulironga Bibeli, nye kapi nina hara kukara Mbangi zaJehova!’ Nsene asi nare wa gusa kulironga Bibeli nage, nye yimo ana kulizuvha ngoso, hepero simpe o twikire kulironga nage ndi? Murongwa goge kuvhura a ku tantere hena eyi ayi mu kondere. Pasihonena, nampo age kulizuvha asi kapi ta vhuru kuzuvhisa tunda embo zende embo. Konyima zokudiva omu ana kulizuvha, ove ngo diva eyi no rugana yipo o mu vatere.

20. Ngapi omu Yirugana 13:48, azi tu vatere tu dive nsene kuvhura tu hagekese po elirongo lyoBibeli nomuntu ndi hawe?

²⁰ Varongwa vamwe woBibeli kwa fana ngwendi Vaisraeli womomazuva gaHesekiyeli. Jehova kwa tanterere Hesekiyeli asi: “Kwawo awo ove ngwendi muntu tupu ogu a dimbi nonsumo deharo ndi gokusika siumba. Awo kupurakena nonkango doge nadinye, nye nokulimburukwa po si nampili zimwe.” (Hes. 33:32) Ayo kapisi ureru kutantera muntu asi tatu hageke kulironga nage Bibeli. Nye siruwo esi sina hupu ko “sisupi.” (1 Kol. 7:29) Yipo nye, mevango lyokuhepeka siruwo setu mokulironga Bibeli nomuntu ogu ana kudira kutura po ezokomeho, twa hepa kupapara vantu vapeke ava ava likida asi awo kwa va “tumbukira mwenyo gwanarunye.”—Resa Yirugana 13:48.

21. Yisinke etjangwa lyetu lyomvhura 2020, ntani yisinke lina kutuvatera tu rugane?

²¹ Momvhura 2020, etjangwa lyetu lyomvhura ngali tu vatera tu gazadare omu natu wapukurura monkedi omu atu tulisa po varongwa. Alyo kwa li gusa mononkango edi ga uyungire Jesus pepongo eli ga kere nalyo pondundu zaGalireya. Age kwa tente asi: ‘Yipo nye nomu zira mu ka ninke varongwa . . . , nokuvakuhwa.’—Mat. 28:19.