SIRONGWA SELIRONGO 1
‘Ava ava limburukwa HOMPA nkenya apa kugwana yoyiwa’
ETJANGWA LYETU LYOMVHURA 2022: ‘Ava ava limburukwa HOMPA nkenye apa kugwana yoyiwa.’—EPIS. 34:10.
RUSUMO 4 “Jehova Musita gwange”
ETWAROMO *
Ndafita kwa lizuvhire asi ga gwene ‘nkenye apa yoyiwa’ nampili moyiruwo yoyidigu (Tara paragarafu 1-3) *
1. Ukaro musinke woudigu ga ligwanekerere nawo Ndafita?
NDAFITA kwa tjwayukire morwa kwa here kumudipaga. Hompa gwaIsraeli Sauru ogu ga kere nononkondo dononene, kwa tokomenene kumudipaga. Apa Ndafita ga hepere nondya, age kwa zire mositata saNobo, omu ga hundilire mupristeli Ahimereki nomunhwi ntano domboroto. (1 Sam. 21:1, 3) Ano konyima, Ndafita novagara vendi kwa gwene epopero mekombombo. (1 Sam. 22:1) Ngapi omu Ndafita ga gendere aya kare moukaro ou?
2. Ngapi omu Sauru ga litulire mwene mosiponga? (1 Samwere 23:16, 17)
2 Sauru kwa fililire mfudu Ndafita morwa sinzi sovantu kwa mu here ntani rorunzi nga fundu moyita. Sauru ga yi divire asi kudira kulimburukwa kwendi kwa ninkisire Jehova a mu nyoke ngahompa gwaIsraeli ntani nokuhorowora Ndafita a kare hompa gokomeho. (Resa 1 Samwere 23:16, 17.) Apa Sauru ga kere hompa gwaIsraeli, age kwa kere novakwayita wovanzi ntani novakwatesi ko wovanzi, ano eyi kwa ninkisire Ndafita a tjwayuke yipo a popere eparu lyendi. Ngoso Sauru kwa gazarere asi kuvhura a hagekese Karunga mokuhorowora Ndafita a kare hompa ndi? (Jes. 55:11) Bibeli kapi za yi uyunga oyo, nye eyi twa diva yeyi asi Sauru kwa litulire mwene mosiponga. Yipo nye, ava ava rwanesa Karunga kapi ava fundu nkenye apa!
3. Ngapi omu Ndafita ga lizuvhire apa ga kere momaukaro gosiponga?
3 Ndafita kwa kere mugara gokulinunupika. Age kapi ga lihorowere mwene a kare hompa gwaIsraeli. Nye Jehova yige ga mu horowere a kare hompa. (1 Sam. 16:1, 12, 13) Sauru kwa ya nyengere unene Ndafita. Nye Ndafita kapi ga pere Jehova usima kweyi ga kere mosiponga ndi a sivanene Jehova kweyi ga kere nonondya dononsesu ndi kweyi ga ka vende mekombombo. Nye mevango lyokuyirugana oyo, apa ga kere mekombombo age nampo kwa tjenge rusumo roruwa rwehamberero omu mwa kara nonkango edi dina lizi netjangwa lyosirongwa esi asi: ‘Ava ava limburukwa HOMPA nkenye apa kugwana yoyiwa.’—Epis. 34:10.
4. Mapuro musinke natu ka konakona ntani morwasinke gana karere nomulyo?
4 Neina sinzi sovakareli vaJehova kwa ligwanekera nesesupo lyonondya ntani noyihepwa yawo yimwe eyi va hepa yipo va paruke. * Eyi yiyo ya horokera sinzi sovakareli vaJehova, unene po mosiruwo souvera woCorona. Ntani hena yininke nga yi digopa unene ngomu tuna kuhedera pepi ‘noudigu wounene.’ (Mat. 24:21) Yipo nye, ayo yina kara nomulyo tu ka gwane malimbururo komapuro aga gane: Monkedi musinke Ndafita ga ‘gwene nkenye apa yoyiwa?’ Morwasinke nayi tu gwanena po eyi twa kara nayo? Morwasinke natu karera nehuguvaro asi Jehova ngatu pakera mbili? Ntani ngapi omu natu liwapaikira ngesi kuhamena maudigu gokomeho?
“NEISI NANI HEPA”
5-6. Ngapi omu Episarome 23:1-6 ali tu vatere tu kwate egano eyi ga tembe Ndafita apa ga uyungire asi vakareli vaJehova ‘nkenye apa kugwana yoyiwa?’
5 Yisinke ga tembe Ndafita apa ga uyungire asi vakareli vaJehova ‘nkenye apa kugwana yoyiwa?’ Age kwa ruganesere nonkango dokulifana apa ga tjenge Episarome egaununo 23. Yipo nye, episarome olyo nali ka tu vatera tu kwate egano eyi ga tembe. (Resa Episarome 23:1-6.) Ndafita kwa tjenge episarome olyo pokutameka nononkango edi asi: “HOMPA yige musita gwange, neisi nani hepa.” Monovelise dokukwama ko depisarome eli, Ndafita kwa tumbwire yininke yomulyo ngwendi yininke yoyiwa eyi ga mu pere Jehova morwa age kwa mu tambwire ngoMusita gwendi. Jehova kwa mu pitisilire “monzira za hungama” ntani age kwa mu kwatesere ko moyiruwo yoyiwa neyi yoyidona. Ndafita ga yi divire asi age nga ligwanekera nomaudigu meparu lyendi, nye ga yi divire hena asi Jehova nga mu pwizumukisa. Poyiruwo yimwe age nampo nga guwu ngwendi kuna kugenda “medamenena lyomundwire gonomfa” ntani ga yi divire asi nga kara nononkore. Nye Ndafita kapi ga ‘tjilire yuma yoyidona’ morwa Jehova kwa kere Musita gwendi.
6 Yipo nye, ayo yina tu vatere tu gwane elimbururo kepuro eli asi monkedi musinke Ndafita ga ‘gwene nkenye apa yoyiwa?’ Age ga kere nanayinye eyi ga hepere pampepo, yipo a kare pepi naJehova. Ruhafo rwendi kapi rwa korerere moyininke yopanyama. Age ya mu gwaneene po eyi ga mu pere Jehova. Eyi ya kere nomulyo kwendi kwa kere matungiko aga ga mu pere Jehova ntani nepopero eli ga mu pere.
7. Kuliza naRukasa 21:20-24, maudigu musinke va ligwanekerere nago Vakriste womosiruwo sovapositoli ava va tungire moJudeya?
7 Nonkango edi ga uyungire Ndafita kuna kutuvatera tu dimburure mulyo gokukara nomutaro gomuwa koyininke yopanyama. Ose kuvhura tu hafere nkenye yininke eyi twa kara nayo, nye kapisi tu yi ture yikare mulyo unene meparu lyetu. Owo kuna kara usili womulyo, ou va ya kwete egano Vakriste womosiruwo sovapositoli ava va tungire moJudeya. (Resa Rukasa 21:20-24.) Jesus kwa va rondwere asi siruwo ngasi wiza apa sitata saJerusarema ngava si “kundurukida vakwayita.” Apa sa sikire mo siruwo oso, awo va hepere ‘kutjwayukira konondundu.’ Awo ngano va twikilire kuparuka nsene tupu ngano va tundire mo mositata, nye awo va hepere kusiga yininke yawo yoyinzi. Nomvhura dongandi dina kapita, Ruhungu rumwe kwa uyungire asi: “Awo kwa sigire mapya gawo, mambo gawo ntani kwato yiweka eyi va simbire. Awo kwa huguvarere mwaJehova asi nava popera noku va vatera ntani hena awo kwa tulire muhowo ukareli wawo kupitakana yapeke.”
8. Sirongwa musinke somulyo natu lirongera ko kweyi ya horokerere Vakriste womosiruwo sovapositoli ava va tungire moJudeya?
8 Sirongwa musinke somulyo natu lirongera ko kweyi ya horokerere Vakriste womosiruwo sovapositoli ava va tungire moJudeya? Ruhungu oru tuna tumbura kwa uyunga asi: “Ose nampo kuvhura nga tu ligwanekere nomaheteko, aga ngaga likida omu atu tara yininke yopanyama. Ngatu tara yininke oyo yopanyama asi mulyo unene ndi ngatu tara ezoworo eli nga li tunda kwaJehova asi yiso sininke somulyo po unene kwetu? Apa uhura ngau wiza, ose nampo nga tu hepa kulididimikira maudigu ntani nokutura po malizambero. Ose ngatu hepa kuliwapaikira yipo ngatu rugane nkenye eyi ngayi kara hepero kurugana, ngwendi moomu tupu va yi rugene Vakriste womoJudeya womosiruwo sovapositoli ava vatjwayukire.”
9. Ngapi omu epukururo lyaPaurusa eli ga tanterere Vahebeli nali kukorangeda?
9 Gazadara ko tupu omu ya digoperere Vakriste owo, mokusiga hambara yiweka yawo nainye noku ka tamekera ko eparu lyepe kevango lyapeke. Awo va hepere kukara nepuro nokuhuguvara mwaJehova asi age nga va vatera pokuvapa yihepwa yawo eyi va hepere. Nye pwa kere yuma yimwe eyi ya vhulire kuvavatera. Nomvhura ntano komeho Jerusarema va ya zi kundurukide Varoma, mupositoli Paurusa kwa tanterere Vahebeli epukururo eli asi: “Walye omu dowokere yimaliwa, nye yi mu gwanene po eyi muna kara nayo, yeeyi Karunga kwa tanta asi: ‘Kapi ngani mu siga ndi asi ni mu zumbe.’ Yipo nye, ose kuvhura tu uyunge nouradi asi: ‘Jehova yige mukwafi gwange, kapi ngani tjira, muntu a rugane nge yinke?’” (Heb. 13:5, 6) Yosili ayo kwa kere ureru koVakriste ava va tulire pasirugana epukururo lyaPaurusa, pokukara yina va gwanene po yininke yoyisesu eyi va kere nayo momambo gawo gomape. Awo va kere nehuguvaro nawa-nawa asi Jehova nga pakera mbili yihepwa yawo. Nonkango daPaurusa kutuhuguvaresa asi nose kuvhura tu kare nehuguvaro lyokulifana.
‘NGANO YI TU GWANENE PO MAKURA’
10. Sirongwa musinke ga li rongere Paurusa?
10 Paurusa kwa tanterere Timoteusa epukururo lyokulifana ntani nose twa hepa kusikisa mo epukururo olyo. Age kwa tjenge asi: “Yipo nye asi nsene tuna kara nonondya noyidwara, ngano yi tu gwanene makura.” (1 Tim. 6:8) Eyi ngesi kutanta asi kapi tatu vhuru kulya nondya donontovara ndi tu kare nembo lyewa ndi tu rande ko yikoverero yoyipe poyiruwo noyiruwo ndi? Nye oyo kapisi yiyo ana kuuyunga Paurusa. Age kuna kuuyunga asi yi tu gwanene po nkenye eyi twa kara nayo. (Fil. 4:12) Oso kuna kara sirongwa esi ga lirongere Paurusa. Sininke somulyo po unene kwetu kuna kara elikwatakano lyetu naKarunga, nye kapisi yininke yopanyama eyi twa weka.—Hab. 3:17, 18.
Vaisraeli kwa ‘gwene nkenye apa yoyiwa’ apa va kere nomvhura 40 momburundu. Kuvhura yi tu gwanene po eyi tuna kara nayo ngesi ndi? (Tara paragarafu 11) *
11. Sirongwa musinke natu lirongera ko kononkango edi Mosesa ga tanterere Vaisraeli kuhamena kukara yina tu gwanene po?
11 Apo nampo kuvhura pa kare elisigo pokatji komu atu tara yininke eyi tuna hepa nomu ayi tara Jehova. Tu tareni eyi Mosesa ga tanterere Vaisraeli konyima zapa va kere momburundu nomvhura 40. Age kwa va tanterere asi: “Hompa Karunga gweni kwa mu tungikira mwankenye eyi muna rugana. Age yige nga mu fire sinka, a mu vindakanese mburundu zonene ngesi. Nomvhura edi nomurongo ne pweni Deut. 2:7) Nomvhura 40 edi va kere momburundu, Jehova kwa pere Vaisraeli mana yipo valye. Ano yidwara yawo eyi va tundire nayo moEgipite kapi ya kurupire. (Deut. 8:3, 4) Nampili ngomu vamwe nampo va gazarere asi ayo kapi yava gwaneene po, Mosesa kwa diworokesere Vaisraeli asi awo va kere nanainye eyi va hepere. Jehova kumuhafesa nsene yi tu gwanena po eyi twa kara nayo. Age ana hara tu kare norupandu kwa nkenye yininke eyi ana kuturuganena ntani tu kwate egano asi awo kuna kara uhwi wokutunda kwendi.
ga kere, one kwa gwene nayinye, nkenye tupu eyi mwa hepere.” (KARA NEHUGUVARO ASI JEHOVA NGA KUPAKERA MBILI
12. Yisinke yina kulikida asi Ndafita kapi tupu ga lihuguvarere mwene, nye kwa huguvarere mwaJehova?
12 Ndafita ga yi divire asi Jehova mulimburukwi ntani age kupakera mbili ava va mu hara. Nampili ngomu ga kere mosiponga apa ga tjenge Episarome 34, age kwa kere nepuro asi ‘muengeli gwaJehova kwa mu poperere.’ (Epis. 34:7) Nampo Ndafita kwa hetakanesere muengeli gwaKarunga komukwayita ogu ga vangarara nkenye apa, noku tarera oku dina kutundilira nonkore dendi. Nampili ngomu Ndafita ga kere mukwayita gouradi moyita ntani nampili ngomu Jehova ga mu tumbwidilire asi nga kara hompa, Ndafita kapi ga huguvarere mokamanya kendi kokuzugumisa ndi asi a ruganese rufuro yipo a fundise ko nonkore dendi. (1 Sam. 16:13; 24:12) Ndafita kwa huguvarere mwaKarunga ntani ga kere nehuguvaro asi muengeli gwaJehova ‘kupopera ava ava mutjira.’ Yimo, ose neina kapi atu ndindire ko kwaJehova a rugane yitetu mokutupopera. Nye ose twa yi diva asi navenye ava ava huguvara mwaJehova ngava ka gwana mwenyo gwanarunye nampili vafe ngesi.
Poudigu wounene, vakwayita vaGogo zaMagogo kuvhura ngava hetekere ko kutuhomokera momambo getu. Nye ayo kutuhengagwida pokudiva asi Jesus novaengeli vendi ngava mona eyi ngava hetekera ko kurugana vakwayita owo vaGogo zaMagogo ntani ngava tu popera (Tara paragarafu 13)
13. Apa Gogo zaMagogo nga homokera vantu vaKarunga, morwasinke ngayi monekera ngwendi kwato gokutupopera ntani morwasinke ngayi dilira kututjilisa? (Tara efano lyopontunda.)
13 Komeho, ehuguvaro lyetu lyomwaJehova lyo ku ya tu popera ngava liheteka. Apa Gogo zaMagogo ndi elipakerero lyonomuhoko ngava homokera vantu vaKarunga, eparu lyetu nga li moneka ngwendi mosiponga lina kara. Ose ngatu hepa kuyipura nawa-nawa asi Jehova ngatu zowora. Ose ngatu moneka konomuhoko ngwendi nonzwi edi dina dili kukara nomusita gokudipopera. (Hes. 38:10-12) Ose kapi ngatu kara noyirwiso ntani kapi ngatu hepa kutudeura yipo ngatu rwe yita. Nomuhoko nga di gazara asi ayo ngayi kara ureru kutufunda. Awo kapi va yi diva asi vaengeli vaJehova vana liwapaikire mokutupopera, nye ose twa yi diva eyi morwa twa kara nepuro. Nomuhoko kapi nga di yidimburura eyi morwa ado kapi da kara nepuro mwaJehova. Ayo ngayi va tetukisa unene apa vakwayita vemeguru ngava tu rwira po!—Ehor. 19:11, 14, 15.
LIWAPAIKIRA NGESI KWEYI YINA KARA KOMEHO
14. Yisinke natu rugana ngesi yipo tu liwapaikire eyi yina kara komeho?
14 Yisinke natu rugana ngesi yipo tu liwapaikire eyi yina kara komeho? Pomuhowo, twa hepa kukara nomutaro gomuwa koyininke yopanyama morwa ezuva limwe ngatu hepa kuyisiga. Twa hepa hena kukara yina tu gwanene po eyi twa kara nayo ntani twa hepa kuhafera elikwatakano lyetu naJehova. Ngomu tuna kudiva nawa Karunga, ayo ngayi tu vatera tu yi pure nawa-nawa asi age nga tu popera apa Gogo zaMagogo nga tu homokera.
15. Yininke musinke ga ligwanekerere nayo Ndafita apa ga kere mudinkantu, eyi ya mu ninkisire a dimburure asi Jehova nga mu vatera nkenye apa?
15 Tu tareni hena yimwe eyi ya vaterere Ndafita ntani nomu nose nayi tu vatera yipo tu liwapikire OMPA ngapi omu ga wapa! Verago vaava ava gwana uvando mwendi!” (Epis. 34:8) Nonkango odo kugava konda zeyi Ndafita ga heperere kuhuguvara mevatero lyaJehova. Ndafita nkenye apa nga huguvara mwaJehova ntani Karunga gwendi kapi nga mu sigilire. Apa Ndafita ga kere munona, age ga hepere ku ka rwa nomugara gomutundusika Golyata ogu ga kere Mufilisiti ntani age kwa tanterere mukwayita ogo gononkondo asi: “Naina eli HOMPA ta ku gava mokuwoko kwange.” (1 Sam. 17:46) Ano konyima, Ndafita kwa ya kere muntu gwahompa Sauru, ogu nga hetekere ko yikando yoyinzi asi a mu dipage. Nye ‘HOMPA pwa Ndafita ga kere.’ (1 Sam. 18:12) Mokumona asi Ndafita ga limoneene evatero lyaJehova, age ga yi divire asi Jehova ngamu vatera momaudigu.
maudigu. Ndafita kwa uyungire asi: “Hetekeni mu tare asi H16. Monkedi musinke natu ‘heteka’ uwa waJehova?
16 Moomu tuna kukwama mapukururo gokutunda kwaJehova ngesi, yimo hena ngatu kara nehuguvaro asi age ngaka tu popera komeho. Ayo kuhepa epuro lyenene ntani nokuhuguvara mwaJehova, yipo tu pure muhona gwetu a tu pe ko mazuva gongandi tu ka kare posigongi ndi tu pure muhona gwetu a tjindje mazuva aga atu rugana yipo tu ponge mapongo nagenye ntani nokukara nosiruwo sosinzi sokulihameka mokuzuvhisa. Ngapi nsene muhona a nyoka ehundiro lyetu nokuzumbanesa yirugana yetu? Ngatu kara nepuro mwaJehova asi age kapi ngatu siga ndi a tu zumbe ntani nokukara nehuguvaro asi nga pakera mbili yihepwa yetu eyi twa hepa ndi? (Heb. 13:5) Sinzi sava va kara mosirugana sosiruwo nasinye va limonena omu Jehova ga va vatera apa va hepere evatero lyendi unene. Jehova mulimburukwi.
17. Etjwangwa musinke lyomvhura ezi 2022 ntani morwasinke lina karere lyouhunga?
17 Pokudiva asi Jehova kwa hama kwetu, ose kapi ngatu kara nowoma kweyi ngayi horoka komeho. Karunga gwetu kapi ngatu sigilira nsene tupu tu tura muhowo Uhonpa wendi meparu lyetu. Mokutudiworokesa tu liwapaikire mazuva gomadigu aga gana tu kara komeho ntani nokuhuguvara asi Jehova kapi ngatu sigilira, Mbungagendesi kwa horowora Episarome 34:10 li kare etjangwa lyomvhura ezi 2022, eli ali uyunga asi: ‘Ava ava limburukwa HOMPA nkenye apa kugwana yoyiwa.’
RUSUMO 38 Nga ku nkondopeka
^ para. 5 Etjangwa lyetu lyomvhura 2022 kwa li gusa mEpisarome 34:10, eli ali uyunga asi: ‘Ava ava limburukwa HOMPA nkenye apa kugwana yoyiwa.’ Sinzi sovakareli vaJehova wovalimburukwi kwa kara noyimaliwa yoyisesu ndi yininke yoyisesu. Nye morwasinke natu uyungira asi awo ‘nkenye apa kugwana yoyiwa?’ Ngapi omu kukwata egano velise ezi nazi tu vatera tu liwapaikire yiruwo yoyidigu eyi yina kara komeho?
^ para. 4 Tara “Mapuro gokutunda kovaresi” moRuhungu romo-15 Sitarara 2014.
^ para. 53 EFANO PEPENUNO: Nampili ngomu Ndafita ana vanda mekombombo, age ga kere norupandu koyininke eyi ga mu ruganenene Jehova.
^ para. 55 EFANO PEPENUNO: Konyima zapa Vaisraeli va tundire moEgipite, Jehova kwa va pere mana yipo valye ntani yikoverero yawo kapi ya kurupire.