1-2. (a) Siruwo musinke vamwe ava diworoka unene muhali gwawo ogu ga dogoroka? (b) Sininke musinke ga tulisire po Jesus momasiku gendi gokuhulilira pevhu komeho va ka mu dipage?

NAMPILI ngomu vantu ava twa hara va fa nare, ose simpe kuvadiworoka. Vamwe kudiworoka vahali vawo unene po mezuva eli va dogorokere.

² Nkenye mvhura, nose kukara vamwe womamiliyona ava atu diworoka nomfa daJesus Kristusa ogu twa hara unene. (1 Pet. 1:8) Ose ku ya ponga kumwe mokuyadiworoka ogu ga geve eparu lyendi ngosizoweseso pokutuzowora kononzo nokonomfa. (Mat. 20:28) Jesus kwa harerere varongwa vendi va diworoke nomfa dendi. Masiku gendi gokuhuliira pevhu komeho aka fe, age kwa tulisire po silika sokulikarera kumwe noku gava mpangera ezi asi: “Omu yi rugane eyi mokudiworokera nge po.”—Ruk. 22:19.

3. Yisinke natu ka zogera mosirongwa esi?

³ Sivaro sava ava kara poMurarero gwaHompa ava va kara nehuguvaro lyokukaparukira meguru sisesu. Nye sinzi somamiliyona gava va kara nehuguvaro lyokukaparukira pevhu nawo kukara poMurarero gwaHompa. Mosirongwa esi, ta tu ka zogera eyi vagwavekwa ntani nononzwi dapeke ava ndindilire nononkondo yipo va kare poMurarero gwaHompa nkenye mvhura. Natu ka zogera hena mauwa aga atu gwanene mo apa atu kara poMurarero gwaHompa. Pomuhowo tu tamekeni kuzogera nokonda dimwe deyi vagwavekwa ava karere poMurarero gwaHompa.

4. Morwasinke vagwavekwa ava lire komboroto nokunwa kovhinyu poMurarero gwaHompa?

⁴ Nkenye mvhura, vagwavekwa ava ava kara poMurarero gwaHompa kulya komboroto nokunwa kovhinyu. Morwasinke vagwavekwa ava lire komboroto nokunwa kovhinyu? Mokugwana elimbururo kepuro olyo, tu zeni tu ka tare eyi ya horokere mesiku lyaJesus lyokuhulilira pevhu komeho va ka mu dipage. Konyima zoPaska, Jesus kwa tulisire po silika esi sa divikwa asi Murarero gwaHompa. Age kwa pere vapositoli vendi wovalimburukwi 11 mboroto novhinyu kumwe noku va tantera va lye nokunwa. Jesus kwa uyungire nawo kuhamena magwanekero gavali, egwanekero lyepe ntani egwanekero lyoUhompa. * (Ruk. 22:19, 20, 28-30) Magwanekero ogo kwa pere mpito vapositoli vena ntani navamwe mokukakara vahompa ntani novapristeli meguru. (Ehor. 5:10; 14:1) Sivaro sovagwavekwa wovasesu ava vana hupu po pevhu, yiwo velike wokulya komboroto nokunwa kovhinyu poMurarero gwaHompa.

5. Yisinke va diva vagwavekwa kuhamena ehuguvaro lyawo lyokomeho?

⁵ Konda zimwe hena zeyi vagwavekwa ava karere poMurarero gwaHompa kuna kara asi: Silika esi kuvapa mpito yipo va gazadare ko kuhamena ehuguvaro lyawo lyokomeho. Jehova kwa va pa ehuguvaro lyewa mokukaparuka meguru awo va hana kufa nokukapangera kumwe naJesus ntani nava va hamena mosivaro so-144 000 ntani unene po ngava ka gwana mpito zokukamona Jehova. (1 Kol. 15:51-53; 1 Joh. 3:2) Vagwavekwa va yi diva asi awo kwa va zigida yipo ngava ka hafere yininke oyo meguru. Nye mokuninka asi ngava ka kare meguru, va hepa kutwikira kukara noulimburukwi dogoro konomfa dawo. (2 Tim. 4:7, 8) Ayo kuhafesa unene vagwavekwa apa ava gazadara ko kehuguvaro lyawo lyemeguru. (Tit. 2:13) Nye ngapi kuhamena “nonzwi dapeke”? (Joh. 10:16) Nokonda musinke dimwe deyi ava karere poMurarero gwaHompa?

6. Morwasinke nonzwi dapeke adi karere poMurarero gwaHompa nkenye mvhura?

⁶ Nonzwi dapeke kukara poMurarero gwaHompa yipo va kwatese ko silika oso noruhafo, nye kapisi mokulya komboroto nokunwa vhinyu. Mo-1938, vantu ava va kara nehuguvaro lyokukaparukira pevhu kwa va zigidire sikando sawo sokuhova yipo va ka kare poMurarero gwaHompa. Ruhungu romo-1 Nsinano 1938 kwa tente asi: “Ayo ngayi wapa [kononzwi dapeke] mokukara posilika oso yipo va tarere omu ava yi rugana. . . . Aso kuna kara siruwo esi ngava vhura kuhafera nawo.” Ngwendi moomu vantu ava ava zigida kosipito sononkwara ava hafa mokukara posipito, nonzwi dapeke nado kuhafa nokukwatesa ko silika soMurarero gwaHompa.

7. Morwasinke nonzwi dapeke adi ndindilire nononkondo mokukakara poMurarero gwaHompa?

⁷ Nonzwi dapeke nado kugazadara ko kehuguvaro lyado. Awo kundindira nononkondo siuyungwa soMurarero gwaHompa morwa yininke yoyinzi eyi ava zogere mo kwa demenena kweyi Kristusa nava 144 000 ngava ka ruganena vantu wovanzi wovalimburukwi monomvhura eyovi. Kupitira mwaHompa gwawo Jesus Kristusa, ava ngava kapangera meguru ngava ka vatera mokukaninka evhu li ka kare paradisa ntani noku ka vatera vantu yipo ngava ka sikilire mo. Mamiliyona  govantu ava ava kara posilika soMurarero gwaHompa mokukwatesa ko, awo kuvahafesa pokugazadara ko apa ngaga ka sika mo mauporofete aga ga kara mwaJesaya 35:5, 6; 65:21-23; ntani Ehororo 21:3, 4. Apa ava ligazara vene mouzuni woupe kumwe novahali vawo, ayo kunkondopeka ehuguvaro lyawo lyokomeho ntani awo kutokomena kukarera Jehova dogoro narunye.—Mat. 24:13; Gar. 6:9.

8. Konda musinke hena zimwe zeyi nonzwi dapeke adi karere poMurarero gwaHompa?

⁸ Tu tareni konda zimwe hena zeyi nonzwi dapeke adi karere poMurarero gwaHompa. Awo kwa hara kulikida eharo kovagwavekwa ntani noku va kwatesa ko. Nonkango daKarunga kwa pumba asi vagwavekwa ntani novantu ava va kara nehuguvaro lyokukaparukira pevhu ngava ruganena kumwe. Monkedi musinke? Tu zeni tu ka zogere ko yihonena yimwe.

9. Kuliza nouporofete ou wa kara mwaSakaliya 8:23, ngapi omu nonzwi dapeke adi lizuvhu kuhamena vagwavekwa?

⁹ Resa Sakaliya 8:23. Uporofete ou kwa faturura omu nonzwi dapeke adi lizuvhu kuhamena vapuli vakwawo wovagwavekwa. Nkango “Mujuda” ntani “neni ga kara” kwa tamba kovagwavekwa ava vana kara simpe pevhu. (Rom. 2:28, 29) “Vanayirongo murongo” kwa fanekesa nonzwi dapeke. Awo kuyalipakerera kumwe novagwavekwa moukareli wousili. Yipo nye, pezuva lyoMurarero gwaHompa, nonzwi dapeke kulikida elikwatakano lyenene eli va kara nalyo novagwavekwa.

10. Yisinke ga rugana Jehova mokusikisa mo uporofete ou wa kara mwaHesekiyeli 37:15-19, 24, 25?

¹⁰ Resa Hesekiyeli 37:15-19, 24, 25. Jehova kwa sikisa mo uporofete owo, pokuninka vagwavekwa nononzwi dapeke va ruganene kumwe mouumwe. Uporofete owo kwa tumbura kuhamena nomuramu mbali. Ava va kara nehuguvaro lyokukaparukira meguru, kwa fanekesa muramu ‘goUntungi waJuda’ (aro kuna kara rudi omu va horowere vahompa womoIsraeli), ano ava va kara nehuguvaro lyokukaparukira pevhu, kwa fanekesa komuramu ‘goUntungi waIsraeli.’ * Jehova kwa gwanekedesa nombunga odo mbali yipo di kare “muramu gumwe.” Eyi kutanta asi awo kukarera Jehova mouumwe mepitisiro lyaHompa gwawo Jesus Kristusa. Nkenye mvhura, vagwavekwa nononzwi dapeke kukara poMurarero gwaHompa, ‘ngosiunda simwe’ mepitisiro ‘lyomusita gumwe.’—Joh. 10:16.

11. Ngapi omu “nonzwi” edi va tumbura mwaMateusa 25:31-36, 40 adi kwatesa ko vamumbya vaKristusa wovagwavekwa?

¹¹ Resa Mateusa 25:31-36, 40. “Nonzwi” edi ga uyungire Jesus kwa fanekesa kovantu wovahungami ava vana kuparuka posiruwo esi somazuva gopouhura ava va kara nehuguvaro lyokukaparukira pevhu, awo kuna kara nonzwi dapeke. Awo kukwatesa ko vamumbya vaKristusa wovagwavekwa ava vana hupu po ngesi pevhu, pokusikisa mo situmbukira sosinene sokuzuvhisa ntani nokutulisa po varongwa.—Mat. 24:14; 28:19, 20.

¹² Nkenye mvhura komeho zoMurarero gwaHompa, nonzwi dapeke kukwatesa ko vamumbya vaKristusa pokulihameka mo unene mokuzuvhisa yipo va zigide vantu wonomutjima donongwa koMurarero gwaHompa. (Tara kakende “ Ono liwapaikire mokukakara poMurarero gwaHompa ndi?”) Ado hena kuvatera  mokutulisa po mawapaiko, yipo nombungakriste nadinye uzuni mudima di kare nosilika soMurarero gwaHompa, nampili ngomu sinzi sonombungakriste da dira kukara novagwavekwa ava nava vhura kulya komboroto nokunwa kovhinyu. Nonzwi dapeke kuyihafera mokukwatesa ko vamumbya vaKristusa mononkedi dangoso. Nonzwi dapeke da yi diva asi Jesus kutara eyi ava ruganene vamumbya vendi wovagwavekwa asi yige vana kuyiruganena.—Mat. 25:37-40.

¹³ Nokonda musinke dimwe deyi atu karere poMurarero gwaHompa, yikare asi ehuguvaro musinke twa kara nalyo?

14. Ngapi omu Jehova naJesus va tu likida eharo lyenene?

¹⁴ Ose kupandura keharo lyenene eli ga tu likida Jehova naJesus. Jehova kwa tu likida eharo mononkedi dokulisiga-siga, nye pwa kara nkedi zimwe zomulyo unene omu Jehova ga tu likida eharo. Karunga gwetu kwa likida eharo lyendi lyenene kwetu pokutuma Munwedi yipo a ya hepe noku ya tu fira. (Joh. 3:16) Ntani Jesus nage kwa likida eharo lyendi lyenene kwetu pokugava eparu lyendi yipo a ya tu fire. (Joh. 15:13) Ose kapi tatu vhuru kufuta Jehova naJesus keharo lyawo eli va tu likida. Nye ose kuvhura kulikida rupandu rwetu kwawo, monkedi omu atu paruka nkenye ezuva. (Koros. 3:15) Ntani ose kukara poMurarero gwaHompa yipo tu diworoke eharo eli va tu likida ntani nomu nose natu va hara.

15. Morwasinke vagwavekwa nononzwi dapeke ava tarere uhwi wosizoweseso asi mulyo unene?

¹⁵ Ose kulikida rupandu kouhwi wosizoweseso. (Mat. 20:28) Sizoweseso kwa kara nomulyo unene kovagwavekwa, morwa aso kunkondopeka ehuguvaro lyawo lyokukaparukira meguru. Mokumona asi awo kwa tura ehuguvaro lyawo monzambo zaKristusa, Jehova kwa va varwira kovahungami ntani kuva tara ngovana vendi. (Rom. 5:1; 8:15-17, 23) Nonzwi dapeke nado kupandura kouhwi wosizoweseso. Mokumona asi awo va kara nepuro monzambo zaKristusa, awo va kara nelikwatakano lyewa naKarunga nokumukarera ntani va kara nehuguvaro lyokukapita “moudigu wounene.” (Ehor. 7:13-15) Nkedi zimwe omu vagwavekwa nononzwi dapeke ava likida rupandu rwawo kosizoweseso kuna kara pokukara poMurarero gwaHompa nkenye mvhura.

16. Konda musinke hena zimwe zeyi atu karere poMurarero gwaHompa?

¹⁶ Konda zimwe hena zeyi atu karere poMurarero gwaHompa kuna kara asi morwa ose tuna hara kulimburukwa Jesus. Yikare asi ehuguvaro musinke twa kara nalyo, nkenye gumwe gwetu ga hepa kulimburukwa mpangera ezi ga geve Jesus apa ga tulisire po silika soMurarero gwaHompa, pokutanta asi: “Omu yi rugane eyi mokudiworokera nge po.”—1 Kol. 11:23, 24.

17. Ngapi omu Murarero gwaHompa agu tu hedesere unene pepi naJehova?

¹⁷ Ose kuhedera unene Jehova pepi. (Jak. 4:8) Ngomu tupu tuna lirongo, Murarero gwaHompa kutupa mpito tu gazadare ko kehuguvaro eli ga tu pa Jehova ntani nokuteda ko keharo lyenene eli ga tu likida. (Jer. 29:11; 1 Joh. 4:8-10) Apa atu teda ko kehuguvaro lyetu lyokomeho ntani nekeharo lyenene lyaJehova eli atu likida, ayo kutuvatera tu hare unene Jehova ntani kunkondopeka ukaume wetu kumwe nendi.—Rom. 8:38, 39.

18. Yisinke ayi tu tumangeda tu rugane apa atu teda ko kosihonena saJesus?

 ¹⁸ Ayo kututumangeda tu honene sihonena saJesus. (1 Pet. 2:21) Apa atu hedere pepi nosilika soMurarero gwaHompa, ose kudemenena koyihorokwa yomoBibeli eyi ya zogera kuhamena mazuva gaJesus gokuhulilira pevhu, nomfa dendi ntani nevhumbuko lyendi. Ano masiku gosilika soMurarero gwaHompa, siuyungwa kutudiworokesa eharo lyenene lyaJesus eli ga tu likida. (Efe. 5:2; 1 Joh. 3:16) Apa atu resa kuhamena sihonena saJesus selizambero nokuteda ko, ayo kututumangeda ‘tu gende ngamoomu nga gendi age.’—1 Joh. 2:6.

19. Yisinke natu rugana yipo tu twikire kukara vakaume vaKarunga?

¹⁹ Ayo kutuvatera tu tokomene kukara vakaume vaKarunga. (Juda 20, 21) Ose kutwikira kukara vakaume vaKarunga, apa atu hetekere ko kumulimburukwa, pokupongora edina lyendi ntani pokumuhafesa. (Yis. 27:11; Mat. 6:9; 1 Joh. 5:3) Murarero gwaHompa kututumangeda tu tokomene kuparuka nkenye ezuva ngwendi kuna kutantera Jehova asi ‘nina hara kukara meharo lyoge narunye!’

20. Nokonda musinke donongwa deyi twa hepera kukara poMurarero gwaHompa?

²⁰ Yikare asi ehuguvaro lyetu kuna kara lyokukaparukira narunye meguru ndi pevhu, ose twa kara nonokonda donongwa deyi natu karera poMurarero gwaHompa. Nkenye mvhura apa atu kara poMurarero gwaHompa, ose kudiworoka nomfa daJesus Kristusa ogu twa hara. Unene po, ose kudiworoka eharo lyenene eli ga tu likida Jehova, pokugava Munwendi ngosizoweseso. Mvhura ezi, Murarero gwaHompa nga gu kara moUtano kongurova mo 15 Kudumogona 2022. Ose kwa hara Jehova naMunwendi Jesus. Yipo nye, ayo ya kara nomulyo unene kukara pediworoko lyonomfa daJesus, poMurarero gwaHompa.