SIRONGWA SELIRONGO 5
“Ruganeseni nawa siruwo seni”
“Takameseni asi mwa ha kara ngwendi magova nye kareni ngwendi vanandunge, ruganeseni nawa siruwo seni.” —EFE. 5:15, 16.
RUSUMO 8 Jehova Mugameni gwetu
ETWAROMO *
1. Yisinke natu rugana yipo tu ruganese siruwo setu mokukarera Jehova?
OSE KWA hara kukara kumwe novantu ava twa hara. Valikwali kuhafera kulitulira po siruwo sokukara kumwe. Vadinkantu kuhafera kukara kumwe novakaume vawo wovanene. Ntani natuvenye kuhafera siruwo esi atu kara kumwe novanavazinyetu. Nye unene po ose kuhafera siruwo esi atu ruganesa mokukarera Jehova. Ose kuvhura kuyirugana eyi pokukanderera kwendi, pokuresa nonkango dendi Bibeli ntani pokuteda ko kositambo sendi ntani nokoyikara yendi yoyiwa. Siruwo esi atu ruganesa mokukarera Jehova kuna kara nomulyo unene!—Epis. 139:17.
2. Udigu musinke atu ligwanekere nawo ngomu atu twikire kukarera Jehova?
2 Ose kuhafera kukanderera ntani kulironga Bibeli, nye nampili ngoso, kapi ayi kara ureru nkenye apa. Ose kwa kara noyirugana yoyinzi, ano eyi kutudigopera kulitulira po siruwo soyininke yopampepo. Yirugana yetu, yitumbukira yemepata ntani nayimwe hena, kuvhura kumana siruwo setu. Ano eyi kuvhura kutuninkisa tu lizuvhe asi kapi tuna kara nosiruwo sokukanderera, sokulironga ntani siruwo sokuteda.
3. Sininke musinke simwe nasi vhura kumana siruwo setu?
3 Pwa kara hena sininke simwe esi asi mana siruwo setu. Nsene kapi tuna kutakamesa, ose kuvhura kurugana yininke eyi ayi dili kumoneka epuko, eyi nayi mana siruwo setu sokukarera Jehova. Pasihonena, ayo ya kara nomulyo tu litulire po siruwo sokulihafesa. Nye nsene tu ruganesa siruwo sosinzi Yis. 25:27; 1 Tim. 4:8.
koyilihafeso oyo, ose kapi ngatu kara nosiruwo sosinzi sokukarera Jehova. Nye twa hepa kudiworoka asi yilihafeso kapisi yiso sininke somulyo po unene.—4. Yisinke natu ka zogera mosirongwa esi?
4 Mosirongwa esi tatu ka zogera eyi twa hepera kutura muhowo yininke yomulyo po meparu lyetu. Ntani tatu ka zogera omu natu ruganesa nawa siruwo setu mokukarera Jehova ntani mauwa aga ngatu gwanena mo nsene tu ruganesa nawa siruwo setu.
TURA PO MATOKORO GOMAWA NOKU TURA YININKE YOMULYO MUHOWO
5. Ngapi omu etjangwa lyomoVaefeso 5:15-17 nali vatera mudinkantu yipo a ture po etokoro lyewa meparu lyendi?
5 Tura po etokoro lyewa lyeyi ono hara kurugana meparu. Rorunzi, vadinkantu kukara nosinka kuhamena eyi ngava rugana meparu lyawo. Vamitili ntani novanekoro wovahapuli, kuvhura vava korangede va ze kounivesiti yipo ngava gwane yirugana yoyiwa ntani nokutambura yimaliwa yoyinzi. Elirongo lyangoso kuvhura kumana siruwo sawo sosinzi. Ano koruha rumwe, vakurona ntani novakaume womombungakriste kuvhura kukorangeda vadinkantu yipo va ruganese nawa siruwo sawo mokukarera Jehova. Yisinke nayi vatera mudinkantu ogu ga hara Jehova yipo a ture po etokoro lyewa? Ayo ya kara nomulyo a rese nokuteda etjangwa eli lya kara moVaefeso 5:15-17. (Resa.) Konyima zokuresa novelise odo, mudinkantu kuvhura a lipure mwene asi: ‘Yisinke ana harere nge Jehova ni rugane? Etokoro musinke nali mu hafesa? Etokoro musinke ngali vatera nge yipo ni ruganese nawa siruwo sange?’ Diworoka asi “mazuva aga tuna kuparuka madona” ntani uzuni ou ana kupangera Satana ntaantani u ka hage po. Ayo nayi wapa kwetu pokuruganesa nawa eparu lyetu koyininke eyi nayi hafesa Jehova.
6. Etokoro musinke ga tulire po Mariya ntani morwasinke lya karerere etokoro lyewa?
6 Tura yininke yomulyo muhowo. Poyiruwo yimwe, mokuruganesa nawa siruwo setu kwa kwatera mo kuhorowora sininke simwe pokatji koyininke yivali eyi ya dira kukara epuko. Sitwa esi kwa si likida mosihorokwa saJesus apa ga ka dingwire Mariya naMalita. Malita kwa hefe kweyi Jesus gaya va dingwire ntani age kwa mu terekerere nondya dononzi. Nye Mariya kwa hingilire naJesus nokupurakena eyi ga uyungire. Eyi ga rugene Malita kapi ya kere epuko, nye Jesus kwa uyungire asi Mariya “kuna horowora yomulyo po.” (Ruk. 10:38-42, ftn.) Ngomu sa pitire siruwo, Mariya nampo ga divarere nondya edi va terekere ezuva olyo, nye tuna si huguvara asi age kapi ga divarere eyi ga lirongere kwaJesus. Ngwendi moomu tupu Mariya ga haferere siruwo esi ga kere kumwe naJesus, nose kuhafera siruwo esi atu ruganesa mokukarera Jehova. Ngapi omu natu ruganesa nawa siruwo oso?
RUGANESA NAWA SIRUWO SOGE MOKUKARERA JEHOVA
7. Morwasinke ya karera nomulyo tu kanderere, nokulironga ntani nokuteda ko?
7 Diva asi kukanderera, kulironga ntani nokuteda, kuna kara ruha roukereli wetu. Apa atu kanderere, ose kuuyunga naGuhyetu gemeguru ogu ga tu hara unene. (Epis. 5:7) Apa atu lirongo Bibeli, ose kulironga “yokuhamena kwaKarunga” ntundiliro zounongo naunye. (Yis. 2:1-5) Apa atu teda ko koyininke eyi atu lirongo kuhamena Jehova, ose kugazadara ko koyikara yendi yoyiwa ntani nokudiworoka yininke yoyiwa eyi nga ka ruganena vantu navenye. Ezi kuna kara nkedi zongwa omu natu vhura kuruganesa nawa siruwo setu. Yisinke nayi tuvatera yipo tu yi rugane oyo?
Kuvhura o papare ko evango lyokulimwenena yipo o rugane elirongo lyoge lyoBibeli ndi? (Tara paragarafu 8-9)
8. Sirongwa musinke natu lirongera ko kwaJesus monkedi omu ga ruganesere siruwo sendi apa ga kere momburundu?
8 Horowora evango lyokulimwenena nsene kuvhura. Tu zeni tu ka tare sihonena saJesus. Komeho a tameke sirugana sokuzuvhisa, age kwa kere mazuva 40 momburundu. (Ruk. 4:1, 2) Mevango olyo lyokulimwenena, Jesus nga kanderere kwaJehova nokuteda ko kompango zoGuhwe. Eyi kwa vaterere Jesus yipo a liwapayikire maheteko aga ga mu kere komeho. Ngapi omu sihonena saJesus nasi kuvatera? Nsene asi ove kwa kara mepata omu mwa kara vantu wovanzi, ayo nampo kapi ayi ku rerupire mokugwana evango lyokulimwenena. Yipo nye, nsene asi ove kwa kara moukaro owo, kuvhura o hetekere ko kugwana evango lyokulimwenena ponze. Eyi yiyo a rugana Julie, apa a kanderere kwaJehova. Nage namugara gwendi kwa tunga moFransa, monzugo zonunu. Ano ayo kuvakarera udigu kukara velike pwa hana madonganeso. Julie kwa tanta asi: “Yipo nye, ame kuza ni ka gendagure po nkenye ezuva kevango lyokupwizumukira. Kevango olyo ame ku ka kara nyamelike ntani nokuuyunga naJehova.”
9. Nampili ngomu Jesus ga kere noyirugana yoyinzi, ngapi omu ga tere elikwatakano lyendi naJehova?
9 Jesus kwa kere noyirugana yoyinzi apa ga kere pevhu. Apa nga zuvhisa, vantu wovanzi ngava mu kwama yipo va kare nendi. Sikando simwe, “vantu navenye womositata kwa ya pongere pevero lyonzugo” yipo va mu mone. Nye nampili ngoso, Jesus kwa li tulilire po siruwo sokunkondopeka elikwatakano lyendi naJehova. Komeho lise ezuva, Jesus kwa zire “kevango lyokudira vantu,” oku ga vhulire ku ka uyunga noGuhwe.—Mar. 1:32-35.
10-11. Kuliza naMateusa 26:40, 41, epukururo musinke ga pere Jesus varongwa vendi mosikunino saGesemani nye yisinke ya horokere?
10 Mesiku lyendi lyokuhulilira pevhu, Jesus kwa paparere hena evango lyokulimwenena oku na vhura ku ka tedera nokukanderera. Age kwa gwene evango olyo lyokulimwenena mosikunino saGesemani. (Mat. 26:36) Ezuva olyo, Jesus kwa tanterere varongwa vendi epukururo lyomulyo kuhamena kukanderera.
11 Tu zeni tu tare eyi ya horokere. Apa va ka sikire mosikunino saGesemani, alyo lya toko unene, nampo koyiha yopokatji komasiku. Jesus kwa tanterere varongwa vendi asi ‘vangarareni.’ Makura tazi a ka kanderere. (Mat. 26:37-39) Nye varongwa vendi kwa rere ngomu ga kanderere. Apa ga ka va gwene awo vana rara, Jesus yipo ga va tanterere asi: “Vangarareni oku tomu kanderere.” (Resa Mateusa 26:40, 41.) Age ga ya dimbwilire asi awo kwa kere nosinka sosinene ntani kwa rorokere. Jesus ga yi divire asi “rutu kapi rwa paka nonkondo.” Jesus simpe kwa zire yikando yivali a ka kanderere. Apa ga ka tengwire, age simpe kwa ya gwene varongwa vendi vana rara, mevango lyokukanderera.—Mat. 26:42-45.
Kuvhura o litulire po siruwo sokukanderera apa o dili kuroroka ndi? (Tara paragarafu 12)
12. Yisinke natu rugana nsene asi ose poyiruwo yimwe kulizuvha asi tuna kara nosinka ndi kulizuvha eroroko mokukanderera?
12 Horowora siruwo sosiwa. Poyiruwo yimwe kuvhura tu kare nosinka sosinene ndi tu lizuvhe eroroko pokukanderera. Nsene yimo o lizuvhu ngoso, diworoka asi sinzi savamwe yimo ava lizuvhu ngoso. Yisinke norugana ko? Vamwe ava va yika kukanderera kongurova, va yi dimburura asi kukanderera posiruwo esi ava dili kuroroka unene, kuvavatera. Vamwe va yi dimburura asi ayo ku va vatera unene nsene kuna kukanderera awo vana hingire ndi kuna tu nongoro. Nye ngapi nsene kuna kulizuvha asi ono kara nowoma ndi ono dompo pokukanderera? Tantera Jehova omu ono kulizuvha. Kara nehuguvaro asi Guhyetu gonkenda ngayi kwata egano.—Epis. 139:4.
Kuvhura o nyokere po kulimburura nombudi nsene mepongo ono kara ndi? (Tara paragarafu 13-14)
13. Ngapi omu yikwakonentu nayi vhura kutudonganesa nsene kuna kukanderera, kuna kulironga ndi kuna kara mepongo?
13 Nyokera po madonganeso nsene kuna kulironga. Ekanderero kapisi yizo zelike nkedi natu nkondopeka elikwatakano lyetu naJehova. Kulironga Bibeli ntani kuwiza komapongo, kuvhura hena kutuvatera tu hedere Jehova pepi. Koyili hena yimwe eyi norugana yipo o ruganese nawa siruwo soge sokulironga Bibeli ntani nesi sokukara komapongo ndi? Lipura nyamoge asi: ‘Yisinke ayi donganesa nge nsene mepongo nina kara ndi nsene kuna kulironga?’ Nampo kuvhura yikare asi kutambura ngodi, kuresa nombudi ndi kuruganesa hena yikwakonentu yapeke. Neina mabiliyona govantu kwa kara noyikwakonentu oyo yokulisiga-siga. Valirongi vamwe kwa tanta asi apa atu hetekere ko kudemenena koyuma yongandi nye ose kuna kara noselefoni zetu popepi, ayo kuvhura kutudonganesa. Profesora gumwe kwa tanta asi: “Ove kapi ngo demenena kweyi ono kurugana nsene nondunge doge kuna
kugazara yininke yapeke.” Komeho zokutameka sigongi, ose nkenye apa kutudiworokesa tu dimise yikwakonentu yetu yipo yi dire kudonganesa wopeke. Kuvhura tu rugane yokulifana nsene nyoselike tuna kara yipo yikwakonentu yetu yi dire kutudonganesa ntani nsene kuna kuruganesa siruwo setu kwaJehova.14. Kuliza noVafilipi 4:6, 7, ngapi omu Jehova natu vatera yipo tu demenene kweyi tuna kurugana?
14 Pura Jehova a ku vatere yipo o demenene kweyi ono kurugana. Nsene asi ove kuna kurugana elirongo lyoge lyoBibeli ndi mepongo ono kara, nye nondunge doge kuna kugazara yapeke, pura Jehova a ku vatere. Nsene ono kara nosinka ndi nowoma, ayo kuvhura yi dire kukukarera ureru kuhageka kugazara yininke oyo nokudemenena koyininke yopampepo. Nye ya kara nomulyo o yi rugane ngoso. Kanderera kwaJehova a ku pe mbili ezi ngazi ‘takamesa mutjima nomagazaro goge.’—Resa Vafilipi 4:6, 7.
SIRUWO ESI ATU RUGANESA MOKUKARERA JEHOVA NGA SI TU RETERA MAUWA
15. Uwa musinke ngo gwanena mo nsene o litulira po siruwo sokukara kumwe naJehova?
15 Ove ngo gwanena mo mauwa nsene o litulira po siruwo sokuuyunga naJehova, sokumupurakena ntani sokugazadara ko kuhamena Jehova. Monkedi musinke? Sokuhova, ove ngo tura po matokoro gomawa. Bibeli kutuhuguvaresa asi “kara ukwawo novanongo ngo kare munongo.” (Yis. 13:20) Ngomu ono kulitulira po siruwo sokukara kumwe naJehova ntundiliro zounongo, ove ngo kara munongo. Ove ngo ya diva unene omu no mu hafesa ntani nomu ngo nyokera po matokoro aga ngaga mukoresa.
16. Ngapi omu kukanderera nokulironga Bibeli ntani kuwiza komapongo nayi tu vatera tu kare varongi wovawa?
16 Sauvali, ove ngo kara murongi gomuwa. Apa atu lirongo nagumwe Bibeli, sitambo setu simwe somulyo po kuna kara sokuvatera murongwa yipo a hedere Jehova pepi. Ngomu tuna kukanderera kwaJehova nokulironga kumuhamena, ose ngatu hara unene Jehova ntani ngatu vatera varongwa vetu woBibeli nawo va hare Jehova. Gazadara ko kosihonena saJesus. Age kwa uyungire yininke yoyiwa kuhamena oGuhwe. Ano eyi kwa ninkisire varongwa vendi nawo va hare Jehova.—Joh. 17:25, 26.
17. Ngapi omu kukanderera ntani elirongo lyanyamwetu lyoBibeli ayi tu vatere?
17 Sautatu, epuro lyoge ngali nkondopara. Koneka eyi ayi horoka apa o kanderere kwaKarunga yipo a ku pe ko mavyukiso, a ku hengagwide ndi a ku vatere. Nkenye apa Jehova a limburura makanderero goge, epuro lyoge kunkondopara. (1 Joh. 5:15) Yisinke hena nayi kuvatera yipo epuro lyoge li nkondopare? Elirongo lyanyamoge lyoBibeli. Diworoka asi “muntu kupura tupu konyima zapa a zuvhu nonkango.” (Rom. 10:17) Nye nampili ngoso, mokuninka asi tu kare nepuro lyokupama, twa hepa kurugana yoyinzi kupitakana tupu kulironga Bibeli. Yisinke hena twa hepa kurugana?
18. Faturura mulyo gweyi twa hepera kuteda.
18 Twa hepa kuteda ko kweyi tuna kulironga. Tu tareni eyi ya horokerere mutjangi gEpisarome egaununo 77. Age kwa guvire morwa kwalizuvhire asi nage noVaisraeli vakwawo, Jehova kapi ga va haferere. Age kapi nga rara masiku morwa yiyo yelike nga gazara. (Velise 2-8) Yisinke ga rugene? Age kwa tanterere Jehova asi: “Ame kugazara hena nayinye eyi wa rugana; kuna hara ni tede yirugana yoge nayinye.” (Velise 12) Yimo, muepisarome ga divire yininke eyi Jehova ga ruganene vantu vendi nare. Nye nampili ngoso, age kwa lipulire asi: “Karunga kuna lidivara nye kufira nkenda ndi? Ehandu yilyo nye lina pinganene mouzavereli wendi ndi?” (Velise 9) Mutjangi gepisarome kwa tedere ko koyirugana yaJehova nomu Jehova nga likida nkenda nare kovantu vendi. (Velise 11) Yitundwamo musinke yakere? Mutjangi gepisarome ga yi pulire nawa-nawa asi Jehova kapi nga sigilira vantu vendi. (Velise 15) Monkedi zokulifana, nsene o teda ko kweyi Jehova ga ruganena vantu vendi ntani kweyi ga ku ruganena, epuro lyoge ngali nkondopara.
19. Uwa musinke hena natu gwanena mo nsene tu kanderera nokulironga Bibeli ntani nsene tu wiza komapongo?
19 Saune, ntani somulyo po unene, ove ngo hara Jehova unene. Eharo ngali kutumangeda o limburukwe Jehova, nokutura po malizambero yipo o mu hafese ntani o lididimikire nkenye udigu. (Mat. 22:37-39; 1 Kol. 13:4, 7; 1 Joh. 5:3) Kwato eyi ya kara nomulyo unene kupitakana kukara nelikwatakano lyenene naJehova.—Epis. 63:1-8.
20. Ngapi omu no litulira po siruwo sokukanderera nokulironga Bibeli ntani sokuteda?
20 Diworoka asi kukanderera nokulironga Bibeli ntani kuteda kuna kara ruha roukareli wetu. Ngwendi Jesus, papara evango lyokulimwenena yipo o kanderere kwaJehova. Nyokera po madonganeso ga hana hepero. Nsene kuna kurugana yininke yopampepo, pura Jehova a ku vatere yipo o demenene koyininke oyo. Nsene o ruganesa nawa siruwo soge ngesi, Jehova nga ku futa pokukakupa eparu lyanarunye moparadisa.—Mar. 4:24.
RUSUMO 28 Tulisa po ukaume naJehova
^ para. 5 Jehova kaume ketu gomunene. Ose kuhafera ukaume ou twa kara nawo kumwe nendi ntani tuna hara kumudiva momunene. Ayo kugusa siruwo sosire mokudiva muntu gongandi. Ayo ya lifana nsene tuna hara kutwikira kutulisa po elikwatakano lyenene naJehova. Mokumona asi ose twa kara noyirugana yoyinzi momaparu getu, ngapi omu natu ruganesa siruwo setu yipo tu hedere Guhyetu gemeguru pepi ntani mauwa musinke ngatu gwanena mo nsene tu yi rugana ngoso?