1-3. Yininke musinke yimwe ayi ninkisa vantu vaJehova va lire?

SIRUWO musinke wa hura kulira? Poyiruwo yimwe, ose kulira morwa ruhafo. Nye yikando yoyinzi, ose kulira morwa ruguwo. Pasihonena, ose kuvhura tu lire apa gumwe ogu twa hara a dogoroka. Munazinyetu gomukadi Lorilei ogu ga tunga moAmerika kwa tjenge asi: “Poyiruwo yimwe ame kwa guvire unene morwa nomfa da munwange gomukadona, ano eyi kwa ninkisire nge nilizuvhe asi kwato eyi nayi retera nge ehengagwido. Poyiruwo yangoso ame kapi na gazarere asi nayi tompoka nge kulididimikira.” *

² Ose kuvhura hena kulira morwa nokonda dimwe. Munazinyetu gomukadi Hiromi, muzuvhisi gokukarerera gomoYapani kwa tanta asi: “Poyiruwo yimwe ame kuguva morwa vantu ava ani zuvhisire kapi ava hafere kupurakena mbudi zomoBibeli. Poyiruwo yimwe ame kulira nokupura Jehova a vatere nge ni gwane muntu ogu ana kupapara usili.”

³ Nove poyiruwo yimwe kulizuvha ngwendi vanavazinyetu wovakadi ava tuna tumbura ndi? Sinzi setu yimo atu lizuvhu ngoso. (1 Pet. 5:9) Ose tuna hara ‘kukarera HOMPA nehafo,’nye poyiruwo yimwe ose kulira morwa ruguwo, edompeso ndi maukaro gamwe aga aga heteke ulimburukwi wetu kwaKarunga. (Epis. 6:6; 100:2) Yisinke natu rugana nsene kuna kulizuvha ngoso?

4. Yisinke natu ka zogera mosirongwa esi?

⁴ Kuvhura tu lirongere ko kosihonena saJesus. Poyiruwo yimwe, nage kwa ligwanekerere nomaukaro gamwe aga ‘ga mu ninkisire  a lire.’ (Joh. 11:35; Ruk. 19:41; 22:44; Heb. 5:7) Tu zeni tu ka zogere yihorokwa oyo. Ngomu natu ka yi zogera, natu ka dimburura eyi natu lirongera ko. Ntani natu ka tara hena eyi natu rugana nsene kuna kuligwanekera nomaukaro aga aga tu ninkisa tu lire.

5. Yisinke tuna lirongere ko kuhamena Jesus, kosihorokwa esi sa kara mwaJohanesa 11:32-36?

⁵ Momvhura 32 posiruwo sokufu, kaume kaJesus Rasarusa kwa verere makura ta dogoroka. (Joh. 11:3, 14) Rasarusa kwa kere novampanza vendi vavali, Mariya naMalita ntani Jesus kwa here unene epata eli. Mariya naMalita kwa guvire unene morwa nomfa dampanzawo Rasarusa. Konyima zonomfa daRasarusa, Jesus kwa zire komukunda gwaBetani, omu va tungire oMariya naMalita. Apa Malita ga zuvhire asi Jesus kuna ku wiza, age kwa genderere kuza aka gwanekere naJesus. Gazara tupu ruguwo oru ga kere naro apa ga uyungire asi: “Hompa, ngano yipo ko kere, ngano mumbyange kapi ka fire.” (Joh. 11:21) Konyima tupu zosiruwo sosisupi apa Jesus ga mwene Mariya ntani navamwe kuna kulira, “Jesus makura ta lili.”—Resa Johanesa 11:32-36.

6. Morwasinke ga lililire Jesus apa Rasarusa ga fire?

⁶ Morwasinke ga lililire Jesus apa Rasarusa ga fire? Buke Insight on the Scriptures kwa gava elimbururo asi: “Nomfa da kaume kendi Rasarusa ntani noruguwo oru da retesere po movampanza vaRasarusa, kwa ninkisire Jesus a ‘guve unene makura ta lili.’” Jesus nampo kwa gazadarere ko kukora oku ga lizuvhire kaume kendi Rasarusa apa ga verere ntani noku gazadara ko omu ga lizuvhire apa ga mwene asi ana hara kufa. Jesus hena kwa lilire pokumona omu nomfa daRasarusa da kundamene Mariya naMalita. Nsene wa zumbanesa kaume koge gomunene ndi gumwe gekoro monomfa, twa sihuguvara asi nove wa ligwanekera nomalizuvho gokulifana. Ka koneke yirongwa yitatu eyi no vhura kulirongera ko kosihorokwa esi.

7. Yisinke natu lirongera ko kuhamena Jehova apa Jesus ga lilire morwa vakaume vendi?

⁷ Jehova kukwata egano omu o lizuvhu.  Jesus “kulikida nawa-nawa yikara” yoGuhwe. (Heb. 1:3) Apa Jesus ga lilire, age kwa likidire omu Oguhwe ava lizuvhu nsene gumwe ana dogoroka. (Joh. 14:9) Nsene gumwe ogu wa hara ga dogoroka, kara nehuguvaro asi Jehova kapi tupu a mono ruguwo roge nye hena ayo kumuguvisa. Age ana hara kuverura mutjima goge goruguwo.—Epis. 34:18; 147:3.

8. Morwasinke natu yi pulira asi Jesus nga ka vhumbura vahali vetu ava va fa?

⁸ Jesus ana hara kukavhumbura vahali woge. Komeho Jesus a lire, age kwa hengagwidire Malita pokumuhuguvaresa asi: “Mumbyoge na pinduka.” Malita yipo ga yi pulire. (Joh. 11:23-27) Ngomukareli gwaJehova gomulimburukwi, Malita ga zuvhire kuhamena mavhumbuko ganare aga ga rugene muporofete Eliya naElisa. (1 Vah. 17:17-24; 2 Vah. 4:32-37) Ntani Malita ga zuvhire hena mavhumbuko aga ga rugene Jesus. (Ruk. 7:11-15; 8:41, 42, 49-56) Nove kuvhura o yi pure asi ngo ka mona hena vahali woge ava va fa. Apa Jesus ga lilire ngomu ga hengagwidire vakaume vendi ava va guvire, kuna kara umbangi ou una kulikida asi Jesus nga ka vhumbura ava va fa.

9. Ngwendi Jesus, ngapi omu no vatera ava vana guwu? Gava sihonena.

⁹ Ove kuvhura o kwatese ko ava vana guwu. Jesus kapi tupu ga lilisire ko oMariya naMalita nye hena age kwa va purakenene ntani noku va hengagwida. Nose kuvhura tu rugane yokulifana kovantu wokuguva. Mukuronambunga gedina Dan, ogu ga tunga moAustralia kwa tanta asi: “Konyima zapa mukadange ga dogorokere, ame na hepere evatero. Sinzi sovanavazinyetu wovagara novakadi vawo kwa liwapaikilire kupurakena nge nkenye apa. Awo kwa pulisilire nge ni pwagese ruguwo rwange ntani kapi yava fisire nomuga apa ngani lili. Awo hena kwa vaterere nge noyirugana yimwe, ngwendi kukuhwa etuwa lyange, kurandangera nge yihepwa yange ntani nokuterekera nge. Awo ngava yi rugana oyo poyiruwo eyi ngani dili kuvhura kurugana yininke pwanyamwange. Ntani awo ngava kanderere kumwe name yikando yoyinzi. Awo kwa yi likidire asi awo vakaume wousili ntani vapuli vakwetu ava ava kwafa ‘momaudigu.’”—Yis. 17:17.

10. Faturura sihorokwa esi sa kara mwaRukasa 19:36-40.

¹⁰ Jesus kwa ka sikire moJerusarema mo 9 Nisani, momvhura 33. Ngomu ga kere pepi nokusika mositata, mbunga zovantu kwa pongere ntani awo kwa zere yikoverero yawo monzira, yipo va mu tambure ngaHompa gwawo. Yosili oso kwa kere silika soruhafo. (Resa Rukasa 19:36-40.) Varongwa vendi nampo kapi va yi ndindilire eyi yaya kweme ko. “Apa [Jesus] ga sikire pepi nositata saJerusarema, tasi tara noku si lilira.” Ngomu Jesus ga lilire, age kwa uyungire kuhamena yininke yoyidona eyi yaya horokerere vantu wo moJerusarema.—Ruk. 19:41-44.

11. Morwasinke Jesus ga lililire vantu womoJerusarema?

¹¹ Jesus kwa guvire morwa ga yi divire asi sinzi soVajuda kapi ngava tambura mbudi zoUhompa. Ngoyitundwamo, Jerusarema kwa ya zi zonagwire ntani nkenye Mujuda ogu ga parukire ezonauko lyositata sina kwa mu twere mounkwate. (Ruk. 21:20-24) Nye ehudi, ngomu Jesus ga yi uyungire, sinzi sovantu kwa nyokere kumupurakena. Ngapi omu vantu wovanzi womomukunda gweni ava tara mbudi zoUhompa? Nsene asi vantu tupu wovasesu ava purakene kousili ou omu va rongo, yisinke natu lirongera ko komahodi gaJesus? Ka konekeni yirongwa yitatu eyi natu lirongera ko.

12. Yisinke natu lirongera ko kuhamena Jehova komahodi ga Jesus morwa sinka esi ga kere naso kovantu?

 ¹² Jehova ga kara nosinka kovantu. Mahodi gaJesus kutudiworokesa sinka esi ga kara naso Jehova kovantu. Jehova kapi ga hara asi “ngapa ka zonauke nampili gumwe, nye age kwa hara asi navenye va litezurure.” (2 Pet. 3:9) Neina ose kuyilikida asi twa hara vantu ava atu zuvhisire, pokuhetekera ko nkenye apa yipo tu va vatere va lironge kuhamena mbudi zongwa zoUhompa.—Mat. 22:39. *

¹³ Jesus nga litura mo unene mosirugana sokuzuvhisa. Age kwa likidire eharo lyendi kovantu pokuvaronga nkenye apa ngazi moneka mpito. (Ruk. 19:47, 48) Yisinke ya mu tumangedere a ronge vantu? Jesus kwa va fililire nkenda. Poyiruwo yimwe, sinzi sovantu kwa here kupurakena kononkango daJesus, ano eyi kwa ninkisire Jesus novarongwa vendi ‘va dire kulya nondya.’ (Mar. 3:20) Apa mugara gumwe ga here kuuyunga naJesus masiku, Jesus kwa liwapaikilire yipo a ka zogere nendi. (Joh. 3:1, 2) Sinzi sovantu ava va purakenene kwaJesus kapi va ya kere varongwa vendi. Nye navenye ava va mu purakenene va zuvhire mbudi ezi ga zuvhisire. Neina ose tuna hara kuzuvhisira nkenye gumwe yipo a zuvhe mbudi zongwa. (Yirug. 10:42) Mokuyisikisa mo oyo, twa hepa kutjindja nkedi zetu zokuzuvhisa.

¹⁴ Tura po malitjindjo nsene hepero. Nsene tu zuvhisa posiruwo sokulifana nkenye apa, nampo kapi ngatu gwana vantu ava vana hara kuzuvha mbudi zongwa. Muzuvhisi gokukarerera Matilda kwa tanta asi: “Name namugara gwange kuhetekera ko kuzuvhisira vantu poyiruwo yokulisiga-siga. Kongurangura zonene ose kuzuvhisira komavango gonongesefa. Ano pometaha apa vantu wovanzi ava kara moyitarata, ose kuruganesa yitoroli. Ano kongurova ose kuzuvhisira vantu pomambo gawo.” Kapisi tu zuvhise tupu posiruwo esi atu mono asi siwa kwetu. Nye twa hepa kutura po malitjindjo, yipo tu zuvhise posiruwo esi atu gwana vantu wovanzi. Nsene tu yi rugana ngoso, ayo ngayi hafesa Jehova.

15. Ngomu va yi tumbura mwaRukasa 22:39-44, yisinke ya horokere mesiku lyaJesus lyokuhulilira komeho va ka mu dipage?

¹⁵ Kongurova mo 14 Nisani, momvhura 33, Jesus kwa zire mosikunino saGesemani. Apa ga kere mosikunino oso, age kwa kanderere kwaJehova. (Resa Rukasa 22:39-44.) Posiruwo oso, Jesus “kwa likwamberere nokukanderera oku ta kugu noruhodi.” (Heb. 5:7) Yisinke ga kanderere Jesus mesiku lyendi lyokuhulilira komeho va ka mu dipage? Age kwa kanderere yipo Jehova a mu pe ko nonkondo dokutwikira kumulimburukwa nokurugana mpango zendi. Jehova ga zuvhire ekanderero lyaMunwendi ntani ga tumine muengeli aya mu nkondopeke.

16. Morwasinke Jesus ga guvilire apa ga kanderere mosikunino saGesemani?

¹⁶ Apa Jesus ga kanderere mosikunino saGesemani, age kwa lilire morwa vantu kwa mu tere asi kapi a fumadeke edina lyaKarunga. Age ga divire hena omu ya kere nomulyo mokutwikira kulimburukwa Oguhwe ntani nokuhungameka edina lyawo. Nsene asi ove kuna kuligwanekera noukaro ou una kuheteka ulimburukwi woge kwaJehova, yisinke no lirongera ko komahodi gaJesus? Ka koneneke yirongwa yitatu eyi nolirongera ko.

17. Yisinke natu lirongera ko kwaJehova monkedi omu ga limbwilire makanderero gaJesus gelikwambero?

¹⁷ Jehova kupurakena komakanderero goge gelikwambero. Jehova ga purakenene komahundiro gaJesus. Morwasinke? Morwa sinka sosinene po saJesus kwa kere sokulimburukwa oGuhwe ntani noku hungameka edina lyawo. Nsene sinka setu sosinene po sikara sokulimburukwa Jehova ntani noku hungameka edina lyendi, age nga limburura makanderero getu.—Epis. 145:18, 19.

18. Monkedi musinke omu Jesus ga kara kaume gomuwa ntani gokukwata egano?

¹⁸ Jesus kukwata egano malizuvho goge. Apa atu kara nosinka, ayo kutuhafesa pokukara nakaume ogu a kwata egano malizuvho getu, unene po ogu ga pita momaudigu gokulifana ngwendi getu. Jesus kuna kara kaume gwangoso. Age ga diva omu a lizuvhu muntu ogu ana guwu ntani ogu ana hepa evatero. Age kukwata egano maupirankondo getu ntani  nga divilisa asi tuna gwana evatero ‘posiruwo esi tuna lihepere.’ (Heb. 4:15, 16) Ngwendi moomu tupu Jesus ga tambwire evatero lyokutunda komuengeli mosikunino saGesemani, nose twa hepa kutambura evatero lyokutunda kwaJehova, yikare asi kupitira moyimbapiratjangwa, movidiyo, mosiuyungwa ndi mekorangedo lyokutunda komukuronambunga ndi lyakaume ketu ogu ga kura pampepo.

19. Ngapi omu nogwana nonkondo nsene kuna kuligwanekera noudigu ou una kuheteka ulimburukwi woge kwaKarunga? Gava sihonena.

¹⁹ Jehova nga kupa ‘mbili zendi.’ Ngapi omu Jehova ngatu nkondopeka? Pokukanderera, ose ngatu gwana mbili “ezi ava dili kuvhura kukwata egano vantu.” (Fil. 4:6, 7) Mbili ezi a gava Jehova, kutuvatera tu liture ntani tu gazare nawa. Eyi yiyo ga limoneene munazinyetu gomukadi Luz. Age kwa tanta asi: “Rorunzi ame ngani lizuvhu mukuma. Poyiruwo yimwe, malizuvho ogo ngaga ninkisa nge ni gazare asi Jehova kapi ga hara nge. Nye apa ngayi horoka oyo, ame ngani kanderere usimbu kwaJehova noku mu tantera omu nina kulizuvha. Makanderero kuvatera nge ni lizuvhe ko hansa.” Ngomu tupu tuna yi mono mosihonena saLuz, ose kuvhura kugwana mbili kupitira mekanderero.

20. Yirongwa musinke tuna lirongere ko komahodi gaJesus?

²⁰ Yosili tuna lirongere ko yirongwa yomulyo komahodi gaJesus! Twa lirongo asi twa hepa kuvatera vakaume vetu wokuguva ntani nokuhuguvara mwaJehova naJesus asi ngava tu vatera nsene ngatu fisa gumwe ogu twa hara. Sirongwa esi sa tu tumangeda hena tu zuvhise nokuronga nonkenda, morwa Jehova Karunga naJesus Kristusa nawo kulikida sikara esi. Ntani ya tu hengagwida hena pokudiva asi Jehova naMunwendi kukwata egano omu atu lizuvhu, kukwata egano maupirankondo getu ntani vana hara kutuvatera tu lididimikire maudigu. Ngano tu twikireni kutura pasirugana eyi tuna lirongo dogoro apa Jehova nga ka sikisa mo etumbwidiro lyendi poku ka ‘kokota mahodi nagenye komeho getu!’—Ehor. 21:4.