1. Morwasinke sinzi sovantu neina va dilira kuhuguvara Bibeli?

 SINZI sovantu neina, kapi vana kara nehuguvaro. Awo kapi vana diva asi yilye ogu nava vhura kuhuguvara. Awo kapi vana diva nsene asi vantu ava va fumadeka, pasihonena vanapolitika, vadiviunsitwe ntani vanangesefa, kuhetekera ko nkenye apa mokuvaruganena yoyiwa po. Mokugwederera ko, awo kapi ava fumadeke vampitisili womaukarelikarunga ava ava litumbura asi Vakriste. Yipo nye, ayo kapi ayi tu tetukisa kweyi va dira kufumadeka Bibeli, buke ezi ava tanta vampitisili womaukarelikarunga asi awo ku zi kwama.

2. Kuliza nEpisarome 119:160, NW, yisinke twa hepa kupura?

² Ngovakareli vaJehova, ose twa yi pura nawa-nawa asi age ‘Karunga gosili’ ntani asi age nkenye apa kwa tu harera yoyiwa po. (Epis. 31:5; Jes. 48:17) Ose twa yi diva asi kuvhura tu huguvare eyi atu resa moBibeli, morwa “Nonkango nadinye daKarunga usili.” (Resa Episarome 119:160, NW.) Ose kukwatesa ko nonkango edi ga tjenge mulirongi gumwe goBibeli asi: “Kwato eyi Karunga ga uyunga asi ayo yipempa ndi asi ngayi dire kusika mo. Vantu vaKarunga kuvhura kuhuguvara mweyi a uyunga morwa va huguvara mwaKarunga ogu ga yi uyunga.”

3. Yisinke natu ka zogera mosirongwa esi?

³ Ngapi omu natu vatera wopeke yipo nawo va huguvare Nonkango daKarunga ngwendi moomu tupu twa di huguvara ose? Tu zeni tu ka zogere ko nokonda ntatu deyi natu huguvarera Bibeli. Ta tu ka zogera asi eyi va tjanga moBibeli kapi va yi tjindja ntani asi mauporofete gamo ga sikilira mo ntani nomu Bibeli za kara nononkondo dokutjindja eparu lyovantu.

4. Morwasinke vantu vamwe ava gazarere asi mbudi zomoBibeli kwa zi tjindja?

⁴ Jehova Karunga kwa ruganesere vagara wokusika ko-40 wovalimburukwi, yipo va tjange nobuke domoBibeli. Nye nampili ngoso, neina kapi pwa kara matjango ganare. b Ose kwa kara tupu nomatjangururo. Eyi kuninkisa vantu vamwe va lipure nsene asi eyi atu resa moBibeli neina ya lifana neyi ya kara momatjango ganare. Wa lipura rumwe konda zeyi natu karera nehuguvaro asi ayo ya lifana ndi?

5. Yisinke ya hamenene mo mokutjangurura Matjangwa goRuhebeli? (Tara efano lyopontunda.)

⁵ Mokuninka asi Jehova a popere mbudi zendi zomoBibeli, age kwa tanterere vantu va tjangurure mbudi zamo. Age kwa tanterere vahompa woVaisraeli va tjangurure Veta ntani kwa horowere Varevhi va ronge vantu Veta. (Deut. 17:18; 31:24-26; Neh. 8:7) Konyima zapa Vababironi va kwete Vajuda, kambunga kovalirongi woVeta kwa tamekere kutjangurura Matjangwa goRuhebeli. (Esir. 7:6) Vagara owo kwa takamesere ngomu va tjangwilire matjango ogo. Ano konyima, valirongi woVeta kwa tamekere kuvarura nonkango ntani nonondanda, yipo va divilise asi nayinye eyi va tjangwilire kwa kere youhunga. Nye nampili ngoso, morwa kudira kusikilira mo, momatjangururo gamwe kwa kere mo mapuko gongandi. Nye nampili ngoso, pwa kere matjangururo gomanzi gomatjangwa gokulifana. Yipo nye mapuko ogo va vhulire kuya ga dimburura konyima. Monkedi musinke?

6. Ngapi omu nampo va vhulire kudimburura mapuko momatjangururo goBibeli?

⁶ Valirongi womosiruwo setu, kwa ruganesa nkedi zongwa yipo va gwane mapuko aga va tulire vantu ava va tjangwilire mbudi zomoBibeli. Mokuyifanekesa, tu tante asi vagara 100 kuna va tantere va tjangurure nonkango edi dina kara pepenuno limwe. Ano gumwe govagara owo ta tura epuko lyenunu mweyi ana tjangurura. Nkedi zimwe omu natu dimburura epuko olyo kuna kara pokuhetakanesa etjangururo lyendi kumwe nomatjangururo gava wopeke. Mokulifana, pokuhetakanesa matjango gomanzi goBibeli ganare, valirongi kuvhura kudimburura mapuko ndi nonkango edi va gusa mo.

7. Yisinke ayi likida asi ava va tjangwilire matjango goBibeli ganare, kapi va tjindjire mbudi zamo?

⁷ Ava va tjangwilire matjango ganare goBibeli kwa litulire mo unene yipo va dire kutjindja mbudi zamo. Tu tareni sihonena esi asi kwatesa ko sitwa esi. Etjango lyanare lyokuhova lyoMatjangwa goRuhebeli eli va hovere kutjangurura, kwa litjenge momvhura 1008 ndi 1009. Alyo kulitumbura asi Leningrad Codex. Nye monomvhura edi dantani, matjango goBibeli ganare gomanzi kwa ya ga dimburura asi ago kwa kara po nomvhura 1 000, kupitakana etjango eli ava tumbura asi Leningrad Codex. Gumwe nampo kuvhura a gazare asi konyima zokutjangurura matjango ogo ure wonomvhura dokupitakana 1 000, eyi va tjanga metjango eli ava tumbura asi Leningrad Codex kuvhura kulisiga neyi va tjanga momatjango ogo ganare. Nye oyo kapisi usili. Apa Valirongi va hetakanesere matjango ganare naga gomape, awo kwa gwene mo tupu mapuko gomasesu mononkango nye mbudi zamo kapi za litjindja.

8. Elisigo musinke lyakara po pokatji komatjangururo goMatjangwa goRugereka ntani nonobuke dimwe dapeke domosiruwo sanare?

⁸ Vakriste womosiruwo sovapositoli, nawo kwa tjangwilire Matjangwa goRuhebeli. Awo kwa tjangwilire nawa nobuke 27 doMatjangwa goRugereka aga ngava ruganesa komapongo  gawo ntani mosirugana sokuzuvhisa. Mulirongi gumwe ogu ga hetakanesere matjango goMatjangwa goRugereka kumwe nonobuke dapeke edi va tjenge posiruwo sokulifana kwa tanta asi: “Sinzi somatjango goMatjangwa goRugereka yipo simpe ga kara kupitakana nobuke nonkwawo, . . . ntani ayo kumoneka asi ga pwa ku ga tjangurura.” Buke ava tumbura asi Anatomy of the New Testament kwa tanta asi: “Kuvhura tu kare nehuguvaro asi eyi atu resa momatoroko gantaantani [goMatjangwa goRugereka] ya lifana neyi va tjenge vatjangi womosiruwo sanare.”

9. Yisinke lya uyunga etjangwa lyomwaJesaya 40:8 kuhamena mbudi zomoBibeli?

⁹ Ure wonomvhura mafere, valirongi wovanzi woVeta kwa rugana unene yipo va tjangurure nawa Bibeli ezi atu resa neina nokuzilironga. c Ose twa yi diva asi Jehova kwa divilisire asi mbudi zendi va zi popere ntani azo kwavyuka. (Resa Jesaya 40:8.) Vantu vamwe kuvhura va uyunge asi nampili ngomu mbudi zomoBibeli za dira kulitjindja, ayo kapi ayi likida asi kwa tunda kwaKarunga. Ngesi tu zeni tu ka zogere maumbangi gamwe aga aga likida asi Bibeli kwa tunda kwaKarunga.

10. Gava sihonena souporofete ou wa sikilira mo ou au likida usili wononkango edi da kara mwa-2 Peturusa 1:21. (Tara mafano.)

¹⁰ MoBibeli kwa kara mo mauporofete gomanzi aga ga sikilira mo, ano gamwe kwa sikilire mo konyima zonomvhura mafere kutunda apa va ga pumbire. Ehistoli kulikida asi mauporofete ogo ga ya sikilire mo. Eyi kapi ayi tu tetukisa morwa twa yi diva asi mutjangi gomauporofete gomoBibeli kuna kara Jehova. (Resa 2 Peturusa 1:21.) Gazadara ko mauporofete gokuhamena kezonauko lyositata saBabironi sanare. Pokatji komvhura 778 ntani 732 komeho Jesus a wize pevhu, muporofete Jesaya kwa pumbire kuhamena omu sitata sononkondo saBabironi ngava si kwata. Age hena kwa uyungire asi mugara gedina Koresi nga funda sitata oso ntani kwa pumbire monkedi omu nga si funda. (Jes. 44:27–45:2) Jesaya kwa pumbire  hena asi sitata saBabironi ngava si zonagura po ntani kwato ogu nga tunga mo. (Jes. 13:19, 20) Oyo yiyo sili ya horokere. Vamede noVaperesiya kwa zonagwire po Babironi momvhura 539 komeho Jesus a wize pevhu. Ano evango apa sa kere sitata oso, ngesi erunda lina kara. Tara vidiyo Bibeli kwa pumba ezonauko lyaBabironi mobuke Hafera eparu narunye! ezi za kara morupe rosikwakonentu, sirongwa 3 sitwa sau-5.

11. Faturura omu uporofete ou wa kara mwaNdaniyera 2:41-43 una ku sika mo neina.

¹¹ Mauporofete gomoBibeli kapi ga sikilire mo tupu mosiruwo sanare, nye ose kuna kumona hena omu gana kusikilira mo mosiruwo setu. Pasihonena, gazaradara ko omu una kusikilira mo uporofete waNdaniyera wokuhamena epangero lyononkondo lyaAmerika naBritaniya. (Resa Ndaniyera 2:41-43.) Uporofete owo kwa pumbire asi epangero lyaBritaniya naAmerika, ruha rumwe ngaru kara “nonkondo” ngwendi sivera, ano ruha rumwe “kapi ngaru paka nonkondo” ngwendi erova. Uporofete owo usili. Britaniya naAmerika kuna kara epangero lyononkondo ngwendi sivera, eli lya lihamekere mo unene apa va fundire Yita nayinye yoUzuni mudima ntani alyo kwa kara novakwayita wononkondo. Nye vanamvharerwa vepangero olyo, kwa sesupika nonkondo dalyo. Nonkondo dalyo kwa sesupa morwa vantu ndi vanamvharerwa ava ava rwanesa epangero ndi nongesefa kupitira monombunga edi adi popere varugani ntani dountu womuntu. Mulirongi gumwe ogu ga lironga kuhamena upolitika wouzuni mudima kwa tanta asi: “Udemokrasi mouzuni kwa ku sesupa nonkondo, nye unene po moAmerika va li gaunuka unene paupolitika.” Ntani Britaniya, ogu ga kara ruha rwepangero eli lyononkodo po unene uzuni mudima, nawo monomvhura edi dantani vana ligaunuka morwa yirongo eyi na yi kara va kaume vawo, eyi ya kara mombunga zaEuropa. Maligaunuko aga kwa ninkisa epangero lyaBritaniya naAmerika yi va digopere mokurugana ko yuma usimbu.

12. Ngapi omu mauporofete gomoBibeli aga ga sika mo aga tu vatere?

¹² Sinzi somauporofete aga ga sikilira mo nare, kunkondopeka ehuguvaro lyetu momatumbwidiro gaKarunga gokomeho asi ngaga ka sika mo. Ose kulizuvha ngwendi muepisarome ogu ga kanderere kwaJehova asi: “Nina roroka kundindira asi o parure nge, HOMPA; ame kwa huguvara nonkango doge.” (Epis. 119:81) Kupitira moBibeli, Jehova kwa tu pa ‘magazaro gokuhamena yokomeho eyi tuna kundindira.’ (Jer. 29:11) Ehuguvaro lyetu lyokomeho, kapi lya korera mweyi a rugana muntu, nye kwa korera momatumbwidiro gaJehova. Ngano tu twikireni kuhuguvara moNonkango daKarunga pokukara varongwa wovawa womauporofete gomoBibeli.

13. Kuliza nEpisarome 119:66, 138, konda musinke hena zimwe zeyi natu huguvarera moBibeli?

¹³ Konda zimwe zeyi twa hepera kuhuguvara Bibeli kuna kara asi, morwa azo kuvatera vantu apa ava kwama mavyukiso gamo. (Resa Episarome 119:66, 138.) Pasihonena, valikwali ava va here kulizumba, awo ngesi vana hafa morwa kwa tura pasirugana mavyukiso gomoBibeli. Vana vawo kuyihafera kweyi ava kulire mepata lyoSikriste, omu mwa kara vakondi ava ava va pakere mbili ntani nokuvahara.—Efe. 5:22-29.

14. Gava sihonena esi sina kulikida asi kutura pasirugana mavyukiso gomoBibeli kuvatera vantu va tjindje eparu lyawo.

¹⁴ Pokutura pasirugana mavyukiso gomoBibeli, nampili vakorokotji vaava wosiponga unene kwaya tjindja eparu lyawo. Tu tareni omu mapukururo gomoBibeli ga vaterere  munadorongo gumwe gedina Jack. d Age kwa kere gumwe govanadorongo wosiponga unene ogu va tomenene konomfa. Nye ezuva limwe, Jack kwa zire pelirongo lyoBibeli. Nkenda ezi va likidire vanavazinyetu wovagara ava va pitisilire elirongo olyo, kwa mu gumine unene komutjima, makura nage yipo ga tamekere kulironga. Ngomu ga tulire pasirugana usili womoBibeli, Jack kwa ya tjindjire yirugana nonkareso zendi. Mwaza siruwo, Jack kwa ya kere muzuvhisi gokudira kugwana ekuho, ano konyima yipo gaya gwene ekuho. Age nga zuvhisire ko vanadorongo vakwawo noupampi kuhamena Uhompa waKarunga ntani kwa vaterere vantu vane va lironge Bibeli. Apa lya sikire mo ezuva lyokumudipaga, Jack opo age ana litjindji. Gumwe govahahende vendi kwa uyungire asi: “Jack kapi ana kara hena muntu ogu na divire nomvhura 20 dina ka pita. Marongo goNombangi daJehova kwa mu vatera a tjindje eparu lyendi.” Nampili ngomu Jack va mu dipagere, sihonena sendi kulikida asi ose kuvhura kuhuguvara Nonkango daKarunga ntani asi ado da kara nononkondo mokutjindja eparu lyovantu.—Jes. 11:6-9.

15. Ngapi omu kutura pasirugana usili womoBibeli au vatere vantu vaJehova va lisige nava wopeke? (Tara efano.)

¹⁵ Mokumona asi Vantu vaJehova kutura pasirugana eyi ava lirongo moBibeli, awo kwa kara mouumwe. (Joh. 13:35; 1 Kol. 1:10) Mbili ntani uumwe ou twa kara nawo, kuyi monenena morwa sinzi sovantu neina kwa ligaunuka morwa maupolitika, marudi ndi morwa yeeyi vamwe nongawo ndi nohepwe. Mudinkantu gedina Jean kwa mu tetukisire apa ga mwene uumwe ou va kara nawo Nombangi daJehova. Age kwa kulira mosirongo simwe somoAfrika. Apa yita ya tamekere, age kwa lihamekere moukwayita, ano konyima yipo ga tjwayukilire kosirongo esi sa likara pepi nosirongo sawo. Age kwa ka ligwene noNombangi daJehova mosirongo oso. Jean kwa uyunga asi: “Ame kwa dimbwilire asi vantu ava va kara moukarelikarunga  wousili, kapi ava lihameke moupolitika ntani kapi va ligaunuka. Nye awo kwa lihara-hara.” Age kwa twikira ko hena asi: “Ame kwa rwililire po sirongo setu. Nye apa naya lirongere Bibeli, ayo kwa tumangedere nge yipo ni ruganese eparu lyange ni karere Jehova.” Jean kwa tura po marunduruko gomanene. Mevango lyokurwanesa vantu wokomarudi gapeke, age ngesi kutantera ko vantu ava a ligwana nawo usili womoBibeli. Mokumona asi mavyukiso gomoBibeli kwa vatera vantu wovanzi wokonontundiliro dokulisiga-siga, eyi kulikida nawa-nawa asi ose kuvhura kuhuguvara Nonkango daKarunga.

16. Morwasinke ya karera nomulyo tu nkondopeke ehuguvaro lyetu lyomoNonkango daKarunga?

¹⁶ Ngomu uzuni ou una kudonapa unene, kuvhura ngayi tu karere udigu unene kuhuguvara moNonkango daKarunga. Vantu kuvhura va hetekere ko kutuninkisa tu kare nomasinganyeko nsene asi Bibeli usili ndi nsene asi Jehova ga tura po mukareli gokulimburukwa yipo a pitisire vantu vendi neina. Nye nsene tu yi pura nawa nawa asi Nonkango daJehova ado nkenye apa usili, ngayi tu tompoka kunyokera po masinganyeko ogo kuhamena epuro lyetu. Ayo ngayi tuvatera tu tokomene kulimburukwa ‘nompango daJehova dogoro narunye.’ (Epis. 119:112) Ayo kapi ngayi tu fisa nomuga mokutantera ko wopeke usili womoBibeli ntani noku va korangeda va ture pasirugana mavyukiso gomoBibeli. (Epis. 119:46) Ayo hena ngayi tuvatera tu lididimikire ‘noruhafo’ maudigu gomanene kukwatera mo mahepeko.—Koros. 1:11; Epis. 119:143, 157.

17. Yisinke nali tu diworokesa etjangwa lyetu lyomvhura?

¹⁷ Tu na hafa sili unene kweyi Jehova ga tu pulisira tu dive usili womoBibeli. Usili ou kutuvatera tu kare tuna litura nokukara nehuguvaro ntani kuturonga omu natu vhura kuparuka mouzuni ou una kara mepiyagano. Awo kutupa ehuguvaro lyokomeho mepangero lyoUhompa waKarunga. Ngano etjangwa lyetu lyomvhura zo-2023 li tu vatere tu yi pure nawa-nawa asi Nonkango daKarunga nadinye usili.—Epis. 119:160, NW.