1-2. Maudigu musinke nava vhura kuligwanekera nago vakareli vaJehova?

 EPARU lyetu kuvhura kulitjidja hararasi apa ayi horoka yininke yoyidona. Pasihonena, munazinyetu gomugara Luis a kwa mu kwatekere uvera wokankera. Ndokotora yipo ga mu tanterere asi makwedi gomasesu tupu gana hupu ko a fe. Monika namugara gwendi ngava litura mo unene va karere Jehova. Ano ezuva limwe, Monika kwa ya dimbwilire asi mugara gwendi ogu ga kere mukuronambunga kwa zonene mokahore-hore siruwo sosire. Munazinyetu gomukadi gomudike Olivia ga hepere kutjwayuka mo membo lyendi apa lya horokere ekundungu lyenene. Apa ga ka tengwire, age kwa ya gwene embo lyendi lina zunguruka. Eparu lyaLuis naMonika naOlivia, kwa litjindjire hararasi. Koyili yimwe eyi ya ku horokera nove eyi ya tjindja eparu lyoge ndi?

² Nampili ngomu a tu karere Jehova noulimburukwi, nose kuligwanekera nomaudigu ngwendi aga ava ligwanekere nago vantu navenye. Ntani kuvhura tu ligwanekere nomarwaneso ntani nomahepeko gokutunda kwava va nyenga vantu vaKarunga. Nampili ngomu Jehova a dili kutupopera komaudigu ogo, nye age kwa tumbwidira asi nga tu vatera. (Jes. 41:10) Nevatero lyendi, ose kuvhura kutwikira kuhafa nokutura po matokoro gomawa ntani nokutwikira kumulimburukwa nampili momaudigu gomanene. Mosirongwa esi, tatu ka zogera nonkedi ne omu Jehova a tu vatere apa a tu ligwanekere nomaudigu gomanene. Ta tu ka zogera hena eyi natu rugana yipo tu gwanene mo uwa mevatero eli a gava.

 JEHOVA NGA KU TAKAMESA

3. Yisinke nampo ayi tu karere udigu kurugana apa atu ligwanekere noudigu wounene?

³ Yisinke ayi tu digopere? Apa atu ligwanekere nomaudigu gomanene, ayo kutudigopera kugazara nawa nokutura po matokoro. Morwasinke? Morwa kuvhura tu guve unene nokukara nosinka. Ose kuvhura tu lizuvhe ngwendi tuna piyagana twa hana kudiva eyi natu rugana. Koneka eyi va uyungire vanavazinyetu wovakadi vavali ava vana tumbura, apa va li gwanekerere nomaudigu. Olivia kwa tanta asi: “Konyima zapa ekundungu lya zonagwire embo lyange, ame kwa piyaganene ntani kwa guvire unene.” Monika kwa uyungire kuhamena mugara gwendi gokudira kulimburukwa asi: “Ayo kwa dompesere nge unene. Ame kwa lizuvhire ngwendi kuna tu nge mbere. Ayo kwa digoperere nge kurugana yirugana yankenye ezuva. Kapi na gazarere asi ngayi horokera nge yininke yokukara ngoso.” Yisinke ga tumbwidira Jehova kuhamena omu nga tu vatera apa ngatu guva unene?

4. Kuliza noVafilipi 4:​6, 7, yisinke ga tu tumbwidira Jehova?

⁴ Ngapi omu Jehova nga tu vatera? Age kwa tumbwidira asi nga tu pa eyi azi tumbura Bibeli asi “mbili zaKarunga.” (Resa Vafilipi 4:​6, 7.) Mbili ezi kwa tamba pokukara tuna litura ntani azo kuwiza po tupu morwa twa kara nelikwatakano lyenene naJehova. Mbili ezi kapi ava ‘vhuru kuzikwata egano vantu’ morwa azo ngwa unene kupitakana omu natu yi gazarera. Pasihonena, wa kanderera kwaJehova, ano konyima ya ku tetukisire morwa wa lizuvhire asi ono litura ndi? Yosili ove kwa lizuvhire “mbili zaKarunga” morwa yige ga zi kupere.

5. Ngapi omu mbili zaKarunga a zi takamesa magazaro getu ntani nonomutjima detu?

⁵ Vafilipi 4:7 kutanta hena asi mbili zaKarunga nga zi “takamesa nomutjima nomagazaro geni.” Nkango zanare ‘kutakamesa’ ndi kukunga kwa kere nkango ezi za tembe kovakwayita ava ngava takamesa sitata noku si popera kononkore dawo. Vantu womositata esi ngava kungu, ngava rara mombili morwa va yi divire asi vakwayita kwa poperere sitata oso. Mokulifana, apa mbili zaKarunga azi takamesa nomutjima detu nomagazaro getu, ose kukara tuna litura morwa tuna diva asi mepopero tuna kara. (Epis. 4:8) Ngwendi Hana, nampili ukaro wetu u dire kulitjindja usimbu, ose simpe kukara nombili. (1 Sam. 1:​16-18) Ano apa atu litura, rorunzi ayo kutukarera ureru kugazara nawa ntani nokutura po matokoro gomawa.

6. Yisinke natu rugana yipo tu gwane mbili zaKarunga? (Tara hena efano.)

⁶ Yisinke twa hepa kurugana? Ngwendi moomu tupu vantu womositata ngava pura evatero kovatakamesi, nose twa hepa kupura evatero  kwaJehova. Ngapi natu yi rugana? Kanderera dogoro o lizuvhe asi ono kara nombili zokutunda kwaKarunga. (Ruk. 11:9; 1 Tes. 5:17) Luis ogu tuna tumbura nare kwa faturura omu nage namukadendi Ana va lididimikilire udigu apa va dimbwilire asi makwedi gomasesu tupu gana hupu ko a fe. Age kwa tente asi: “Moukaro ou, ayo udigu unene kutura po matokoro kuhamena uhaku ntani noyininke hena yimwe. Nye kukanderera kwa tu vaterere tu kare nombili.” Luis namukadendi kwa tanta asi awo kwa kanderere unene yikando yoyinzi yipo va pure Jehova a va pe ko mbili, nokukara vana litura ntani a va pe ko unongo wokutura po matokoro gomawa. Ntani va dimbwilire omu Jehova ga va vaterere. Nsene asi ove kuna kuligwanekera noudigu, twikira kukanderera, makura ngo limonena omu mbili zaJehova nga zi takamesa mutjima goge nomagazaro goge.—Rom. 12:12.

JEHOVA NGA KU PAMEKA

7. Ngapi omu atu lizuvhu apa atu piti moudigu wounene?

⁷ Yisinke ayi tu digopere? Apa atu ligwanekere noudigu, ose kapi atu gazara nawa nokurugana yuma ngwendi moomu ya fira. Ngwendi moomu tupu sikepa esi sina kupita mekundungu a si yerauka komankupi, nose kuvhura ngatu kare nomalizuvho gokulisiga-siga ngwendi kuna kutuyeragura mankupi. Ana ogu tuna tumbura kwa uyunga asi age kwa kere nomalizuvho gokulisiga-siga apa Luis ga dogorokere. Age kwa tanta asi: “Poyiruwo yimwe ngani guwu ntani ngani lifire nyamwange nkenda. Ame hena ngani handuka morwa yeeyi ga dogorokere.” Ntani Ana nga lizuvhu mukuma nokuhanduka kweyi ga hepere kutura po matokoro ngwendi aga nga tura po Luis apa ga kere muzuni. Poyiruwo yimwe, nga lizuvhu ngwendi kuna kara mekundungu lyenene mefuta. Ngapi omu Jehova a tu vatere apa atu gazara yininke yoyinzi eyi ayi rorora nondunge detu?

8. Ngomu va yi tumbura mwa-1 Peturusa 5:​10, yisinke ga tu tumbwidira Jehova?

⁸ Ngapi omu Jehova nga tu vatera? Age kwa tu tumbwidira asi nga tu pameka. (Resa 1 Peturusa 5:10.) Apa sikepa asi ligwanekere nekundungu mefuta, aso kutameka kuzendaukira komaruha nagenye. Mokuninka asi sikepa si dire kuzendauka, konhi zosikepa kwa tura ko yivera komaruha nagenye gavali mokuvatera sikepa si dire kuzendauka. Ano yivera oyo kuvatera sikepa yipo si dire kuzendauka unene. Eyi yiyo vantu ava ava rondo mosikepa ava lizuvhire epopero ntani nokutwikira kuhafera rugendo. Nye yivera oyo ya kara konhi zosikepa, kurugana unene nsene sikepa kuna kugenda si ze komeho. Mokulifana, Jehova nga tu pameka nose ngomu tuna kutwikira kumukarera poyiruwo eyi yoyidigu.

9. Ngapi omu yiruganeso yetu yepaparo nayi tu vatera tu kare tuna litura? (Tara hena efano.)

 ⁹ Yisinke twa hepa kurugana? Nsene kuna kuligwanekera nomaudigu, rugana paapa wa hulira yipo o kanderere noku wiza komapongo ntani mokuzuvhisa. Yimo, nampo kapi no vhura kurugana yoyinzi ngwendi moomu ngo yi rugana nare, nye diworoka asi Jehova kapi ana kundindira ko kwetu tu rugane yoyinzi kupitakana eyi natu dira kusikisa mo. (Hetakanesa Rukasa 21:​1-4.) Ntani litulira po siruwo sokurugana elirongo lyanyamoge lyoBibeli ntani nokuteda ko. Morwasinke? Kupitira mombunga zendi, Jehova kwa tu pa yirongwa yoyiwa ntani nonovidiyo edi nadi tu vatera tu kare tuna litura poyiruwo yomaudigu. Mokugwana yirongwa ndi novidiyo edi ono hara, kuvhura o ruganese yiruganeso eyi, pasihonena JW Library^® app, Watch Tower Publications Index ntani buke zepaparo zoNombangi daJehova. Monika ogu tuna tumbura kwa tanta asi age kwa ruganesere yiruganeso oyo konyima tupu zapa ga tamekere kulizuvha kukora kokunene morwa ukaro wendi. Pasihonena, age kwa rugene epaparo kuhamena nkango ezi asi “ehandu.” Ano poyiruwo yimwe, age kwa rugene epaparo konkango ezi asi “ulimburukwi.” Makura nga resa dogoro apa nga lizuvhu ko hansa. Age kwa tanta asi: “Nampili ngomu na kere nosinka sosinene, nye apa na tamekere kurugana epaparo, Jehova kwa vaterere nge. Ngomu na resere, ame kwa ya dimbwilire asi Jehova kukwata nge egano omu ani lizuvhu ntani age kwa vaterere nge.” Evatero lyangoso eli a gava Jehova, kuvhura kukuvatera nove o kare ono litura.—Epis. 119:​143, 144.

JEHOVA NGA KU VATERA

10. Ngapi omu atu lizuvhu apa atu piti moudigu wounene?

¹⁰ Yisinke ayi tu digopere? Apa yininke yokuguvisa unene a yi tu horokere, mazuva gamwe kuvhura tu lizuvhe eroroko parutu ntani monondunge detu. Kuvhura tu lizuvhe ngwendi muduki gomunene ogu ga remana, a gendi kuhunyangera. Kuvhura yi tu digopere kurugana yirugana eyi ngayi tu rerupire nare ntani kuvhura tu dire kukara neharo lyokurugana yirugana eyi ngatu rugana nare. Ngwendi Eliya, kuvhura tu lizuvhe asi udigu unene kupinduka ntani kuvhura tu lizuvhe ngwendi twa hepa tupu kurara. (1 Vah. 19:​5-7) Yisinke ga tu tumbwidira Jehova eyi nga rugana apa a tu lizuvhu asi kapi tuna kara nononkondo?

11. Nkedi musinke hena zimwe omu Jehova a tu vatere? (Episarome 94:18)

¹¹ Ngapi omu Jehova nga tu vatera? Age kwa tumbwidira asi nga tu vatera. (Resa  Episarome 94:18.) Ngwendi moomu muduki ogu ana remana a hepa evatero lyagumwe yipo a gende, nose twa hepa evatero yipo tu twikire kulitura mo mosirugana saJehova. Jehova kwa tu tumbwidira momaukaro gangoso asi: “Nyame HOMPA Karunga goge; ogu ani ku nkondopeke nina kutanta asi: ‘Wa ha tjira, ame tani ku kwafa.’” (Jes. 41:13) Hompa Ndafita nage ga gwene evatero lyokufana ngoso. Apa ga ligwanekerere nomaudigu ntani nononkore dendi, age kwa tanterere Jehova asi: “Ove HOMPA kupopera nge.” (Epis. 18:35) Ngapi omu Jehova a tu vatere?

12. Wolye nampo na ruganesa Jehova yipo va tu vatere nsene tuna guwu?

¹² Yikando yoyinzi, Jehova kutuvatera pokutumangeda wopeke yipo va ya tu vatere. Pasihonena, apa Ndafita ga guvire, kaume kendi Jonatana kwa mu nkondopekere nokumukorangeda. (1 Sam. 23:​16, 17) Mokulifana, Jehova kwa horowere Elisa yipo a vatere Eliya. (1 Vah. 19:​16, 21; 2 Vah. 2:2) Neina, Jehova kuvhura kuruganesa vemepata lyetu, vakaume vetu ndi vakuronambunga yipo va tu vatere. Nye nampili ngoso, apa a tu guwu unene ose nampo kwa hara kukara nyoselike. Ayo kapisi epuko. Yisinke natu rugana yipo Jehova a tu vatere?

13. Yisinke twa hepa kurugana yipo Jehova a tu vatere? (Tara hena efano.)

¹³ Yisinke twa hepa kurugana? Nyokera po kukara nyovelike. Apa atu likarere nyoselike mevango lyokukara novakwetu, ose kuligazara tupu nyamwetu ntani kugazara tupu udigu ou tuna kuligwanekera nawo. Ayo kuvhura kutuninkisa tu dire kutura po matokoro gomawa. (Yis. 18:1) Yimo, natuvenye twa hepa siruwo sokukara nyoselike unene po apa ayi tu horokere yininke yoyidona meparu. Nye nampili ngoso, nsene tu likarera nyoselike siruwo sosire, ayo kuvhura yi tu ninkise tu dire kugwana evatero lyovantu ava ana kuruganesa Jehova mokutuvatera. Yipo nye, nampili apa a tu ligwanekere nomaudigu, tambura evatero lyokutunda kwava vemepata lyoge, kovakaume woge ntani kovakuronambunga. Va tara asi Jehova kuna kuvaruganesa yipo va ku vatere.—Yis. 17:17; Jes. 32:​1, 2.

JEHOVA NGA KU HENGAGWIDA

14. Yininke musinke nayi vhura kututjilisa?

¹⁴ Yisinke ayi tu digopere? Ose kuvhura tu pite moukaro ou na u tutjilisa. MoBibeli, vakareli vaJehova wovalimburukwi kwa uyunga kuhamena yiruwo apa va kere noruguwo ntani noutjirwe morwa nonkore dawo ndi maudigu hena gapeke. (Epis. 18:4; 55:​1, 5) Mokulifana,  nose kuvhura tu ligwanekere nomarwaneso kosure, koyirugana, kovanekoro ndi kepangero. Nampo kuvhura hena tu kare noutjirwe asi ta tu fu morwa uvera. Poyiruwo yangoso, kuvhura tu lizuvhe ngwendi munona ogu na dira kurugana ko yuma. Ngapi omu Jehova a tu vatere moyiruwo yangesi?

15. Kuliza nEpisarome 94:​19, yisinke nga tu ruganena Jehova?

¹⁵ Ngapi omu Jehova nga tu vatera? Age kutuhengagwida nokututendeka. (Resa Episarome 94:19.) Episarome eli kuvhura kutuninkisa tu gazadare ko mukadonagona ogu ana kara noutjirwe ntani kapi ana kurara morwa ekundungu lyenene lina kara ko. Kuvhura tu mone momagano getu omu oguhwe vana kuza va ka mu damune nokumukwaterera dogoro apa na rara. Nampili ekundungu olyo li twikire , mukadona ogo ta lizuvhu epopero ntani nehengagwido morwa kuna kara momawoko goguhwe. Apa atu ligwanekere nomaudigu gokutjilisa, ose twa hepa Guhyetu gemeguru a tu kwaterere momawoko gendi gopasifanekeso dogoro tu kare tuna litura. Ngapi natu gwana ehengagwido lyangoso lyokutunda kwaJehova?

16. Yisinke natu rugana yipo tu gwane ehengagwido lyokutunda kwaJehova? (Tara hena efano.)

¹⁶ Yisinke twa hepa kurugana? Li tulira po nkenye apa siruwo sokukanderera kwaJehova ntani nokuresa Bibeli. (Epis. 77:​1, 12-14) Makura apa ngo kara nosinka, sininke sokuhova esi ngo rugana nampo kuna kara mokupura evatero kwaGuhyetu gemeguru. Tantera Jehova kuhamena yinka yoge ntani noutjirwe ou ono kara nawo. Mu purakena pokuresa Nonkango dendi, makura ngo limonena omu nga ku hengagwida. (Epis. 119:28) Nsene o resa nobuke dimwe domoBibeli, apa ngo kara noutjirwe ngo gwana ehengagwido. Pasihonena, kuvhura o gwane ekorangedo mobuke zaJoba, moMapisarome, moYisewe, ntani mononkango daJesus edi da kara mwaMateusa egaununo 6. Ngomu ngo kanderera kwaJehova nokuresa Nonkango dendi, ove ngo gwana ehengagwido.

17. Ehuguvaro musinke twa hepa kukara nalyo?

¹⁷ Ose kuvhura kukara nehuguvaro asi Jehova nga tu vatera moyiruwo yomaudigu. Age kapi nga tu sigilira. (Epis. 23:4; 94:14) Jehova kwa tumbwidira mokutupopera, nokutupameka nokutuvatera ntani nokutuhengagwida. Jesaya 26:3 kwa uyunga kuhamena Jehova asi: “Ove HOMPA, gava mporazuni kwava va kora mositambo sawo yiyo va huguvara moge.” Yipo nye, huguvara mwaJehova ntani rugana paapa wa hulira yipo o gwanene mo uwa mononkedi nadinye edi a ruganesa Jehova mokukuvatera. Nsene o yi rugana, ngo gwana nonkondo nampili moyiruwo yomaudigu.