NKANGO zanare va toroka moBibeli asi “karukara” kuvhura kutamba koyikarukara yokulisiga-siga. (Yirug. 8:​28, 29, 38) Nye ayo kumoneka asi erenga kwa rondere mokarukara kokanene kupitakana yikarukara eyi ngava ruganesa moyita ndi momarumbasano. Koneka nokonda dimwe deyi tuna kuuyungira ngoso.

Mugara gomuEtiyopiya kwa kere erenga ogu ga gendere sinano sosire. Age “kwa kere mepangero lyahompa gomukadi gwaEtiyopiya, Kandake, ntani nga takamesa emona lyahompa ogo.” (Yirug. 8:27) Sirongo saEtiyopiya sanare, ngesi kwa kwatera mo sirongo saSudan ntani ruha rourundu waEgipite. Nampili ngomu a yi moneka asi erenga olyo kapi lya genderere mokarukara kamwe tupu morugendo narunye, alyo nampo kwa kere nonomurongero dononzi morugendo oro rorure. Yikarukara yimwe eyi ngava ruganesa mosiruwo sanare mokusimba vantu kwa kere nomakoso ga ne. Buke Acts kwa tanta asi: “Moyikarukara yangoso ngava simbire mo nomurongero dononzi ntani rugendo ngaru gendi po nawa ntani nampo vantu ngayi va tompoka kugenda sinano sosire.”

Mugara gomuEtiyopiya kwa resere apa Filipusa ga mu hederere. Sihorokwa oso kwa tanta asi: “Filipusa makura ta duka pepi nako, ta mu zuvhu kuna kuresa mobuke zomuporofete Jesaya.” (Yirug. 8:30) Yikarukara eyi ngava ruganesa morugendo kapi va yi rugene yikare yokugenderera unene. Mokumona asi yikarukara yangesi ngayi gendi kuliwora, ayo kwa ninkisire erenga lirese ntani Filipusa a duke pevhu dogoro a ka gwane sikarukara.

Erenga kwa ninkire “Filipusa a ronde a hingire nendi.” (Yirug. 8:31) Vantu ava ngava rondo moyikarukara yomarumbasano, ngava sikama. Nye moyikarukara eyi ngava gendere vantu, mwa kere yipundi eyi lya hingilire erenga ntani Filipusa.

Kuliza noYirugana egaununo 8 ntani nomaumbangi gamwe ganare, yimbapiratjangwa yetu ngesi kulikida mafano gerenga lyomoEtiyopiya alyo kuna rondo mokarukara kokanene kupitakana sikarukara somoyita ndi somarumbasano.