1. Yisinke ava rugana sinzi sovantu neina?

 NAMPO wa yi dimburura asi sinzi sovantu neina kukondjera uwa wavene mevango lyokukondjera uwa wovakwawo. Pasihonena, vantu vamwe kulikanganga vene kupitira kointaneta ntani kutura ko yininke eyi vana kurugana. Nye nampili ngoso, vantu wovasesu tupu ava hamberere Jehova neina. Mosirongwa esi, tatu ka zogera mo eyi ayi tanta kuhamberera Jehova ntani neyi nayi tu tumangeda tu mu hamberere. Tatu ka lironga hena omu natu hamberera Jehova nomu nga yererepeka edina lyendi komeho.

YISINKE AYI TANTA KUHAMBERERA JEHOVA?

2. Ngapi Jehova ga likidire nonkondo dendi poNdundu zaSinayi? (Tara hena efano lyopontunda.)

² Bibeli kutanta asi Jehova age Karunga gononkondo. Age kwa likidire nonkondo dendi, konyima zokuzowora Vaisraeli ava va kere vapika moEgipite. Gazadara ko kosihorokwa esi: Mamiliyona goVaisraeli kuna pongo pepi noNdundu zaSinayi yipo va purakene kwaKarunga. Makura eremo lyesovagani ta likudumike ndundu, hararasi tupu evhu ta litameke kukankama ntani ta kuhagara sindundumo nomaruvadi nomuhagaro goruvinga. (Ex. 19:16-18; 24:17; Epis. 68:8) Nampo Vaisraeli kwa tetukire apa va mwene yirugana yaJehova yononkondo.

3. Ngapi omu natu hamberera Jehova?

³ Nose kuvhura tu hamberere Jehova. Nkedi zimwe omu natu yi rugana kuna kara pokutantera ko wopeke kuhamena yirugana yaJehova yononkondo ntani yikara yendi yoyiwa. Ose hena kuhamberera Jehova pokumupa efumano koyininke nayinye twa sikisa mo morwa nonkondo dendi. (Jes.  26:12) Hompa Ndafita kuna kara gumwe gosihonena sosiwa ogu ga hamberere Jehova. Age kwa kanderere komeho zombunga zoVaisraeli asi: “Ove o munene nomunankondo, mufumadekwa nomufundi nomupangeli. Nkenye esi sa kara meguru ndi pevhu soge, ove o Hompa nomupangeli gomunene gwanayinye.” Apa Ndafita ga mene kukanderera, “mbunga nazinye makura tazi pandura Hompa Karunga”​—1 Hist. 29:11, 20.

4. Ngapi omu Jesus ga hamberere Jehova?

⁴ Apa Jesus ga kere pevhu, age kwa hambererere oGuhwe pokutantera ko wopeke asi Jehova yige nga mu pe nonkondo dokurugana yitetu. (Mar. 5:18-20) Jesus nga hamberere hena Johova monkedi omu nga uyunga kuhamena oGuhwe ntani nomu nga tekura vantu. Sikando simwe Jesus kwa rongere mosinagoge. Mokatji kovantu ava va purakenene kwaJesus, kwa kere mo mukadi ogu za veresere mpepo zondona ure wonomvhura 18. Mpepo zondona kwa mu ninkisire a dire kusikama kuvyukilira. Jesus ga yi kwete egano asi ayo kwa mu koresere ntani ga here kuvatera mukadi gwina, yipo ga mu hederere noku mu uyungisa nombili asi: “Mukadi, ono veruka kouvera woge.” Makura Jesus ta mu kambeke mawoko gendi, poopo ngoso ta vyukilire kusikama “makura ta hamberere Karunga.” (Ruk. 13:10-13) Mukadi gwina ga kere nokonda zongwa zeyi ga hamberere Jehova, nose kuvhura tu hamberere Jehova kweyi ga tu ruganena.

YISINKE AYI TU TUMANGEDA TU HAMBERERE JEHOVA?

5. Nokonda usinke twa kara nado deyi natu fumadekera Jehova?

⁵ Ose kuhamberera Jehova morwa twa mu fumadeka unene. Twa kara nonokonda dononzi deyi natu mu fumadekera. Jehova ga kara nononkondo dononene dokurugana nkenye eyi ana hara ntani kapi a roroka. (Epis. 96:4-7) Unongo wendi kuumonenena moyininke eyi ga sita. Age kwa tu pa eparu nanayinye eyi twa hepa yipo tu paruke. (Ehor. 4:11) Age mulimburukwi. (Ehor. 15:4) Nkenye eyi a rugana kusika mo ntani age nkenye apa kusikisa mo matumbwidiro gendi. (Jos. 23:14) Eyi yiyo nye muporofete Jeremiya ga uyungire kuhamena Jehova asi: “Ove wa wapera kukufumadeka, kutupu ogu ga kufana mokatji kovanongo wonomuhoko ndi mokatji kohompa vawo!” (Jer. 10:6, 7) Twa kara nonokonda dononzi deyi natu fumadekera Guhyetu gemeguru. Ose kapi tupu atu fumadeke Jehova, nye ose hena twa mu hara unene.

6. Morwasinke twa harera Jehova?

⁶ Ose kuhamberera Jehova morwa twa mu hara unene. Tu zogereni ko yikara yimwe yaJehova eyi ayi tu ninkisa tu mu hare. Age nkenda. (Epis. 103:13; Jes. 49:15) Age kutufira nkenda apa atu ligwanekere nomaudigu ntani nage kumukoresa. (Sak. 2:8) Jehova kutuvatera tu mu dive ntani tu kare vakaume vendi. (Epis. 25:14; Yirug. 17:27) Age ga linunupika ntani “kunyongama a tare eguru nevhu. Age kukatura mo muhepwe mombundu.” (Epis. 113:6, 7) Nokonda nadinye edi kutuninkisa tu hamberere Karunga gwetu.​—Epis. 86:12.

7. Mpito musinke twa kara nazo?

⁷ Ose kuhamberera Jehova, morwa tuna hara vantu va mu dive. Sinzi sovantu kapi va diva usili kuhamena Jehova, morwa Satana kuuyunga yipempa kuhamena Jehova ntani vantu kupura yipempa oyo. (2 Kol. 4:4) Satana kuninkisa vantu va yi pure asi Jehova kapi a gusire po vantu ntani kapi a tu pakere mbili ntani age kuretesa po ruhepo oru tuna kuligwanekera naro mouzuni. Nye ose twa diva usili kuhamena Karunga gwetu! Ose twa kara  nompito zokutantera ko vakwetu kuhamena Jehova ntani noku va vatera va mu hamberere. (Jes. 43:10) Episarome 96 kwa uyunga mo kuhamena omu natu hamberera Jehova. Episarome eli nali ka tu vatera tu dive omu natu hamberera Jehova monkedi ezi azi mu hafesa.

NGAPI NATU HAMBERERA JEHOVA?

8. Nkedi musinke zimwe omu natu hamberera Jehova? (Epis. 96:1-3)

⁸ Resa Episarome 96:1-3. Kuvhura tu hamberere Jehova kupitira mweyi atu uyunga kumuhamena. Movelise ezi Jehova kuna kutantera vantu vendi va mu “dimbire”, va mu “hamberere,” va “sanseke mbudi zongwa asi ga tu parura” ntani va ‘udise efumano lyendi konomuhoko nadinye.’ Ose kuvhura kuhamberera Guhyetu gemeguru Jehova mononkedi nadinye edi. Vakareli vaJehova womosiruwo sanare, ngava tantere ko wopeke kuhamena yininke nayinye yoyiwa eyi ga va ruganenene Jehova ntani nomu ga poperere edina lyendi. (Ndan. 3:16-18; Yirug. 4:29) Nose kuvhura tu rugane yokulifana.

9-10. Yisinke ono lirongere ko kosihorokwa saAngelena? (Tara hena efano.)

⁹ Tu zogereni sihorokwa samunazinyetu gomukadi Angelena, a ogu ga tunga moAmerika. Age kwa likidire uradi pokutantera ko vakwawo wokoyirugana kuhamena Jehova. Mokumona asi Angelena kwa kere murugani gomupe, nage novarugani vakwawo wovape kwa va zigidire va ka kare pepongo, yipo va ka tantere ko varugani vakwawo nontundiliro dawo. Angelena yipo ga gazarere kuvalikida mafano gamwe kuhamena ruhafo oru ga gwana pokukara Mbangi zaJehova. Nye komeho a uyunge, murugani mukwawo kwa lidivisire mwene asi nage kwa mu rerere nga gumwe goNombangi daJehova. Mukwawo ogo kwa uyungire yininke yoyidona kuhamena Nombangi daJehova neyi da pura. Angelena kwa tanta asi: “Ame kwa kere nowoma. Nye yipo nali tanterere asi: Kapi ngani pulisira muntu a uyunge yimpempa kuhamena Jehova. Na hepa kuvatantera asi Jehova Karunga musinke.”

¹⁰ Apa murugani mukwawo ga mene kuuyunga, Angelena yipo ga kanderere usimbu momutjima. Makura ta tantere murugani mukwawo monkedi zongwa asi: “Natuvenye kwa tunda kontundiliro zokulifana. Name kwa rera nge nga gumwe goNombangi daJehova  ntani ame Mbangi zaJehova dogoro ngesi.” Nampili ngomu Angelena ga kere nowoma, age kwa litulire apa ga likidire varugani vakwawo mafano gendi kuhamena ruhafo oru ga gwana mokukarera Jehova kumwe novakaume vendi ntani age kwa fatwilire eyi ga pura monkedi zongwa. (1 Pet. 3:15) Yitundwamo musinke ya kere? Apa Angelena ga mene kuuyunga, mugara gwina ga uyungire Nombangi daJehova momudona kwa litulire. Mugara ogo kwa uyungire kuhamena yininke yoyiwa eyi ga haferere pounona apa ga kere Mbangi zaJehova. Angelena kwa uyunga asi: “Twa hepa kupopera Jehova. Ntani ayo kuhafesa pokutantera ko wopeke kuhamena edina lyendi.” Nose kuvhura kuhamberera Jehova, nampili wopeke va dire kumulimburukwa.

11. Ngapi omu vakareli wousili womosiruwo sanare va tulire pasirugana mpango ezi za kara mEpisarome 96:8?

¹¹ Resa Episarome 96:8. Kuvhura tu hamberere Jehova pokuruganesa yiweka eyi twa kara nayo. Vakareli vaJehova wousili, narunye kumuhamberera monkedi zangoso. (Yis. 3:9) Pasihonena, Vaisraeli kwa geve yimaliwa noyiweka kosirugana sokutunga ntembeli ntani va pakere mbili ntembeli. (2 Vah. 12:4, 5; 1 Hist. 29:3-9) Varongwa vamwe vaJesus kwa gusire ‘poyiweka yawo’ va yi gave kwaJesus novarongwa vendi va livaterese ko noyihepwa yawo. (Ruk. 8:1-3) Bibeli kututantera asi apa mouzuni mwa kere nzara zonene, Vakriste vamwe ava va tungire komavango gapeke kwa tumine yimaliwa koVakriste vakwawo ava va kere nonzara. (Yirug. 11:27-29) Nose kuvhura tu hamberere Jehova neina pokugava yigava kutundilira komutjima.

12. Ngapi omu atu hamberere Jehova kupitira moyigava yetu? (Tara hena efano.)

¹² Tu zogereni ko sihorokwa simwe esi asi likida omu atu hamberere Jehova kupitira moyigava yetu. Erapoto lyomo-2020 kwa fatwilire asi moZimbabwe kwa kere mo rukukutu siruwo sosire. Mamiliyona govantu kwa hepere konzara, kukwatera mo munazinyetu gomukadi Prisca, morwa kapi va kere nonondya. Posiruwo sorukukutu, munazinyetu Prisca kwa twikilire kuzuvhisa nkenye Utatu noUtano, nampili posiruwo sokulima. Vamusinda vendi ngava mu sindagura kweyi nga zi mokuzuhisa mevango lyokuza a ka lime. Awo kwa uyungire asi: “Ngo fa konzara.” Prisca yipo ga va limbwilire nouradi asi: “Jehova kapi a sigilire vakareli vendi.” Konyima zosiruwo sosisupi, mbunga zokuvatera moyimpagwa yipo za mu vaterere  pokumupa eyi ga hepere. Prisca kwa gwene yihepwa nayinye eyi ga hepere morwa yigava eyi atu gava. Eyi kwa tetukisire vamusinda zendi, makura yipo va mu tanterere asi: “Karunga kapi ga kusigilira, nose tuna hara kulironga ko koyinzi kuhamena Karunga.” Vamusinda zendi ntambali yipo va tamekere kuza komapongo getu.

13. Ngapi omu natu hamberera Jehova kupitira moyirugana yetu? (Episarome 96:9)

¹³ Resa Episarome 96:9. Kuvhura tu hamberere Jehova kupitira moyirugana yetu. Vapristeli ava ngava rugana kontembeli zaJehova va hepere kukara vana kuhuka parutu. (Ex. 40:30-32) Nose twa hepa kukuhuka parutu, kapisi pokuzeresa marutu getu tupu nye nopokunyokera po kurugana yininke eyi ga nyenga Jehova. (Epis. 24:3, 4; 1 Pet. 1:15, 16) Twa hepa kurugana paapa twa hulira yipo tu huture “muntu gomukuru” eyi kutanta asi kunyokera po nkareso noyirugana yoyidona ntani twa hepa kudwara “muntu gomupe,” eyi kutanta asi twa hepa kugazara nokurugana monkedi ezi nazi likida asi kuna kuhonena yikara yaJehova. (Koros. 3:9, 10) Jehova kuvhura kuvatera nampili muntu ogu a rugana yininke yoyidona ntani yonyanya a litjindje nokudwara muntu gomupe.

14. Yisinke ono lirongere ko kosihorokwa saJack? (Tara hena efano.)

¹⁴ Tu tareni sihorokwa saJack, mugara ogu ga kere nonyanya ntani ngava mu tambura asi Mpepo zondona. Jack kwa mu tokwerere nomfa morwa ukorokotji. Ngomu ga ndindilire siruwo sokumudipaga, munazinyetu gomugara ogu nga dingura dorongo ezi ga kere kwa pulire Jack nsene kuvhura va tameke kulironga nage Bibeli, makura Jack yipo ga tamekere kulironga Bibeli. Nampili ngomu Jack nga rugana yininke yoyidona, age kwa hutwire muntu gomukurukuru ntani konyima kwa ya gwene ekuho. Jack kwa tjindjire nkareso zendi zondona, ano apa lyasikire ezuva lyokumudipaga, vanomeni vamwe wodorongo kwa lilire ngomu va mu rekerere. Mukwayita gumwe ogu nga rugana modorongo ozo kwa tente asi: “Jack kwa kere muntu gomudona po unene modorongo ezi. Nye ngesi yige muntu gonkareso zongwa po unene.” Apa vanavazinyetu va zire kodorongo va ka rugane epongo lyomokatji komosivike, sivike esi sa kweme ko kutunda apa va dipagere Jack, gumwe govanadorongo kwa pongere sikando sendi sokuhova. Yisinke ya mu tamangedere a ponge? Nkareso zaJack za mu tetukisire kutunda apa ga hagekere kurugana  yininke yoyidona ntani gumwe govanadorongo vena kwa here kudiva eyi na rugana yipo a karere Jehova. Eyi kulikida asi ose kuvhura kuhamberera Guhyetu gemeguru kupitira moyirugana yetu!​—1 Pet. 2:12.

NGAPI OMU JEHOVA NGA YEREREPEKA EDINA LYENDI KOMEHO?

15. Ngapi omu Jehova nga yererepeka edina lyendi komeho? (Episarome 96:10-13)

¹⁵ Resa Episarome 96:10-13. Novelise dokuhulilira demEpisarome 96 kusingonona Jehova asi age Mupanguli gouhunga ntani Hompa. Ngapi omu Jehova nga yererepeka edina lyendi komeho? Pokupangura pauhunga. Ntaantani tupu nga ka zonagure po Babironi zonene ezi za retera eswau edina lyendi lyokupongoka. (Ehor. 17:5, 16; 19:1, 2) Vantu vamwe ava ngava mona Babironi zonene kuna kuzizonagura po nampo kuvhura ngava lipakerere nose moukareli wousili. Ano poHarumagedoni, Jehova nga ka zonagura po uzuni waSatana ntani novantu navenye ava ava mu rwanesa nokuswara edina lyendi. Nye Jehova nga popera vantu ava va mu hara ntani ava ava mu limburukwa noku mu hamberera. (Mar. 8:38; 2 Tes. 1:6-10) Kehagero lyonomvhura eyovhi depangero lyaKristusa, Jehova nga pongora edina lyendi. (Ehor. 20:7-10) Posiruwo oso “evhu ngali zura unongo nefumano lyaHOMPA moomu lya zura efuta mema!”​—Hab. 2:14.

16. Yisinke ono tokomene kurugana? (Tara hena efano.)

¹⁶ Pevhu ngapa kara sili ruhafo rorunene apa vantu navenye ava ngava parukira pevhu ngava hamberera Jehova! Nye komeho ngali wize ezuva olyo, ose kuvhura kurugana ko ruha rwetu mokuhamberera Karunga gwetu pokuruganesa nkenye mpito. Mokutuvatera tu demenene kositumbukira esi somulyo, Mbungagendesi za horowora Episarome 96:8 li kare etjangwa lyetu lyomvhura 2025: “Hamberereni edina lyaHOMPA lya fumana.”