1. Yisinke natu rugana yipo tu hafese Jehova?

 GAZARA asi to pe muntu ogu wa hara uhwi wouwa, ou nau vhura kumuvatera, nye age tau pungura nokuudivara. Ove nampo nayi kuguvisa. Nye ngapi nsene a likida rupandu pokuruganesa uhwi owo? Yosili, ove nampo nayi kuhafesa sili! Yisinke natu lirongera ko kosifanekeso esi? Jehova kwa tu pa Munendi aya tu fire. Yipo nye, age nga hafa nsene tu likida rupandu kweyi ga tu pa uhwi owo wosizoweseso morwa ga tu hara.​—Joh. 3:16; Rom. 5:7, 8.

2. Yisinke natu ka zogera mosirongwa esi?

² Ngomu dina kupita nomvhura, ose kuvhura tu hageke kulikida rupandu kouhwi wosizoweseso. Nsene tu dira kulikida rupandu, ayo ngayi fana ngwendi kuna kupungura uhwi ou ga tu pa Karunga nokuudivara. Mokuyinyokera po oyo, twa hepa kugazadara ko nkenye apa koyininke eyi ga tu ruganena Karunga naJesus. Sirongwa esi nasi tu vatera omu natu yi rugana. Tatu ka zogera omu natu gwanena mo uwa mosizoweseso ngesi ntani nokomeho. Tatu ka zogera hena eyi natu rugana mokulikida rupandu kwaJehova, unene po mokwedi koMurarero gwaHompa.

OMU NATU GWANENA MO UWA NGESI

3. Uwa musinke atu gwanene mo mosizoweseso ngesi?

³ Ose kuna kugwanena mo uwa ngesi monzambo zaKristusa zosizoweseso. Pasihonena, Jehova kutugusira po nonzo detu kupitira mosizoweseso. Age kapisi hepero a tu gusire po, nye age kwa hara kuyirugana. Mutjangi gEpisarome kwa likidire rupandu kwaJehova morwa yeeyi a gusire po vantu, age kwa  tente asi: “HOMPA, ove o muwa, hena kudongonona po nonzo.”​—Epis. 86:5; 103:3, 10-13.

4. Vantu musinke ga pa Jehova sizoweseso? (Rukasa 5:32; 1 Timoteusa 1:15)

⁴ Vamwe kulizuvha asi Jehova kapi ga fira kuvagusira po. Nye usili wouwa asi natuvenye kapi twa fira egusiro po lyaJehova. Mupositoli Paurusa kwa lizuvhire asi ‘kapi ga fira kumutumbura asi mupositoli.’ Age kwa tente hena asi: “Nye konkenda zaKarunga zonene na ya gwana situmbukira esi.” (1 Kol. 15:9, 10) Apa atu litezurura kononzo detu, Jehova kutugusira po. Morwasinke? Morwa age ga tu hara, nye kapisi morwa twa fira kutugusira po. Nsene ove kulizuvha asi kwato mulyo, diworoka asi Jehova kwa gava sizoweseso kovananzo ava ava litezurura, nye kapisi kovantu ava va sikilira mo. ​—Resa Rukasa 5:32; 1 Timoteusa 1:15.

5. Ya wapa kugazara asi Jehova ga hepa kutugusira po morwa ya tu tumbukira ndi? Faturura.

⁵ Nampili ngomu twa karera Jehova siruwo sosire, twa ha lizuvha asi ayo ya tu tumbukira asi Jehova ga hepa kutugusira po. Yimo, Jehova kuhafa apa a diworoka omu twa mu karera noulimburukwi. (Heb. 6:10) Age kwa tu pa Munendi ngouhwi, nye kapisi yipo a tu fute kweyi a tu mu karere noulimburukwi. Nsene tu gazara ngoso, ayo ngayi moneka asi sizoweseso kwato mulyo ntani Jesus kwa fililire mawoko-woko.​—Hetakanesa Vagarata 2:21.

6. Morwasinke Paurusa ga ruganene Jehova noupampi?

⁶ Paurusa ga yi divire asi Karunga kapi nga mu gusira po. Morwasinke nye ga ruganene Jehova noupampi? Age kwa ruganene yipo a likide rupandu kwaJehova kweyi ga mu likidire nkenda zonene, nye kapisi yipo va mu gusire po. (Efe. 3:7) Nose kurugana unene ngwendi Paurusa yipo tu likide rupandu nye kapisi yipo va tu gusire po.

7. Nkedi musinke hena zimwe atu gwanene mo uwa mosizoweseso? (Varoma 5:1; Jakopo 2:23)

⁷ Nkedi zimwe hena atu gwanene mo uwa mosizoweseso kuna kara asi ose kuvhura tu kare nelikwatakano lyenene naJehova. a Ngomu tuna yi lirongo mosirongwa sina ka pita, ose kapi twa kere nelikwatakano naJehova apa va tu hampurukire. Nye morwa sizoweseso, ose kwa kara ‘mombili naKarunga,’ yipo nye, ose kuvhura kukara nelikwatakano nendi.​—Resa Varoma 5:1; Jakopo 2:23.

8. Morwasinke natu pandwira Jehova kweyi ga tu pa mpito zokukanderera kwendi?

⁸ Kukanderera kuna kara sininke simwe a tu hafere, morwa yeeyi twa kara nelikwatakano naJehova. Age kapi tupu a purakene komakanderero govantu vendi apa ava pongo kumwe, nye age kupurakena hena kekanderero lyankenye ogu nampili gelike ana kara. Kukanderera kapi tupu aku tu vatere tu lizuvhe ko hansa ndi tu kare nombili, nye hena kutuvatera tu nkondopeke ukaume wetu naKarunga. (Epis. 65:2; Jak. 4:8; 1 Joh. 5:14) Apa ga kere Jesus pevhu, age nga kanderere nkenye apa, morwa ga divire asi Jehova kupurakena komakanderero ntani ayo ngayi mu vatera a pameke elikwatakano lyendi noGuhwe. (Ruk. 5:16) Ose kupandura Karunga morwa nzambo zaJesus kutupa mpito zokukara vakaume vaJehova ntani nokukanderera kwaKarunga.

OMU NGATU GWANENA MO UWA KOMEHO

9. Uwa musinke ngava ka gwanena mo vakareli vaJehova wovalimburukwi mosizoweseso?

⁹ Uwa musinke ngava ka gwanena mo vakareli vaJehova wovalimburukwi mosizoweseso?  Awo ngava ka gwana mwenyo gwanarunye. Sinzi sovantu udigu kuyipura asi muntu kuvhura a paruke narunye morwa vantu kufa nkenye apa. Nye sitambo saJehova kwa kere asi vantu va paruke narunye. Adamu ngano kapi ga zonene, ngano kapi ayi digopere vantu va yi pure asi muntu kuvhura a paruke narunye. Nampili ngomu ayi tu digopere kuyipura, ose kuvhura tu yi pure asi ngatu ka paruka narunye, morwa Jehova ga gava Munendi ngouhwi yipo ngatu ka paruke narunye.​—Rom. 8:32.

10. Ehuguvaro musinke va kara nalyo vagwavekwa ntani nononzwi dapeke?

¹⁰ Nampili ngomu ngatu ka gwana mwenyo gwanarunye komeho, Jehova ana hara simpe tu gazadare ko kouhwi owo. Vagwavekwa kundindira nononkondo ngava ka parukire meguru apa ngava ka pangera vantu kumwe naKristusa. (Ehor. 20:6) Nonzwi dapeke kuna kundindira va ka parukire pevhu pwa hana yininke yokuvaretera kukora noruguwo. (Ehor. 21:3, 4) Nove gumwe gononzwi dapeke ogu ana kundindira kukaparukira narunye pevhu ndi? Ehuguvaro lyokukaparukira pevhu nalyo mulyo ngwendi ehuguvaro lyokukaparukira meguru. Jehova kwa sitire vantu va parukire pevhu. Yipo nye, kuparukira pevhu ngayi tu retera ruhafo rorunene.

11-12. Matungiko musinke ngatu ka gwana moParadisa? (Tara mafano.)

¹¹ Gazadara ko omu nga li ka fana eparu lyoge moParadisa pevhu. Ove kapi ngo kara nosinka sokuvera ndi sokufa. (Jes. 25:8; 33:24) Jehova nga ka pa nkenye ogu yininke eyi ga hara. Ono hara ngo ka lironge kuhamena unsitwe ndi kudimba nomusika ndi kufaneka ndi? Yosili, moParadisa mwa hepa vantu ava va diva kufaneka nokudika mambo ntani vanandima. Ntani hena ngapa ka hepa vantu ava va diva kurugana yikunino nokutereka nondya, kurugana yiruganeso ntani kupakera mbili yikunino. (Jes. 35:1; 65:21) Mokumona asi ose ngatu ka paruka narunye, ove ngo ka gwana mpito zokulironga nkenye udivi ono hara.

¹² Ose ngatu ka kara noruhafo rorunene apa  ngatu ka tambura vantu ava ngava ka vhumbura! (Yirug. 24:15) Gazara tupu hena omu ngo ka hafera kukonakona unsitwe waJehova. (Epis. 104:24; Jes. 11:9) Nye unene po, ose ngatu ka hafa unene, morwa ngatu ka karera Jehova twa hana kuzona ndi tu hundire egusiro po. Kuvhura o sige matungiko nagenye ogo yipo o ‘hafere karuwogona mononzo ndi’? (Heb. 11:25) Hawe! Matungiko ogo mulyo unene kupitakana malizambero aga atu tura po mouzuni ou. Diworoka asi ehuguvaro lyetu lyokukaparukira pevhu moParadisa ngali ka sika mo komeho. Nayinye eyi nga yi ka sika mo, morwa Jehova ga tu hara yiyo ga tu pera sizoweseso.

PANDURA KWEYI JEHOVA GA KULIKIDA EHARO

13. Ngapi natu pandura Jehova kweyi ga tu likida eharo? (2 Vakolinte 6:1)

¹³ Ngapi natu pandura Jehova kweyi ga tu pa sizoweseso? Ose kuvhura tu mu pandre nsene tu yi likida asi kukarera Jehova yiso sininke somulyo po meparu lyetu. (Mat. 6:33) Jesus kwa fire “yipo asi ava vana kuparuka kapisi va paruke moomu vana hara nye va paruke kuliza nomu ga hara ogu ga va fira yiyo va mu pindura koufe.” (2 Kol. 5:15) Yipo nye, twa ha hepeka nkenda zonene ezi ga tu likida Jehova.​—Resa 2 Vakolinte 6:1.

14. Monkedi musinke natu kwama mavyukiso gaJehova?

¹⁴ Ose kuvhura tu pandure Jehova kweyi ga tu likida eharo pokumuhuguvara nokukwama mavyukiso gendi. Ngapi natu yi rugana? Nsene tatu tura po matokoro kuhamena elirongo ndi yirugana ndi yilihafeso, twa hepa kugazadara ko eyi ana tu harere Jehova tu rugane. (1 Kol. 10:31; 2 Kol. 5:7) Apa atu likida epuro lyetu, ose kuyahuguvara Jehova unene ntani ukaume wetu nage kuyankondopara. Ano ehuguvaro lyetu lyokuparukira pevhu nalyo kunkondopara.​—Rom. 5:3-5; Jak. 2:21, 22.

15. Ngapi natu likida rupandu rwetu posiruwo soMurarero gwaHompa?

¹⁵ Pozili hena nkedi zimwe omu natu pandura Jehova kweyi ga tu likida eharo. Kuvhura tu likide rupandu kosizoweseso pokurugana unene moyivike eyi ngayi kara pepi noMurarero gwaHompa ntani konyima zoMurarero gwaHompa. Kugusa ko kukara poMurarero gwaHompa, kuvhura hena tu zigide ko wopeke va wize koMurarero gwaHompa. (1 Tim. 2:4) Fatwilira vantu ava ono kuzigida eyi ayi horoka poMurarero. Ayo ngayi va vatera nsene o va likida novidiyo Morwasinke ga fililire Jesus? ntani Diworoka nomfa daJesus ko-jw.org. Vakuronambunga nawo va hepa kuzigida ava va tengura monyima. Gazara tupu ruhafo oru aru kara meguru nepevhu apa nzwi zaJehova ezi za zumbana azi tengura kombunga! (Ruk. 15:4-7) Pomurarero gwaHompa, twa hepa kumorora  vantu navenye kukwatera mo wovape ndi ava ava dili kuwiza nkenye apa komapongo nye kapisi vaava tupu twa diva. Tuna hara va lizuvhe asi tuna va tambura!​—Rom. 12:13.

16. Morwasinke natu litulira mo unene mosirugana sokuzuvhisa posiruwo soMurarero gwaHompa?

¹⁶ Kuvhura o liture mo unene mokuzuvhisa posiruwo soMurarero ndi? Nsene o litura mo, ayo kulikida asi wa kara norupandu kweyi ga kuruganena Karunga naJesus. Moomu tuna kulitura mo unene mosirugana saJehova, yimo hena ngatu limonena omu ana kutuvatera, ano ngoyitundwamo, ose ngatu mu huguvara unene. (1 Kol. 3:9) Resa ereso lyoMurarero gwaHompa eli lya kara moKonakona Matjangwa nkenye ezuva ndi mokarata ezi zina kara moMbapira zekepongo​—Eparu lyetu noyirugana yokuzuvhisa. Kuvhura o rugane ereso olyo melirongo lyanyamoge lyoBibeli.

17. Yisinke ayi hafesa Jehova? (Tara kakende “ Omu no likida rupandu keharo eli ga ku likida Jehova.”)

¹⁷ Ukaro woge kuvhura u dire kukupa mpito zokurugana eyi vana zogere mosirongwa esi. Diworoka asi Jehova kapi a hetakanesa eyi o mu ruganene neyi ava mu ruganene wopeke, age kumona eyi ya kara momutjima goge. Age kuhafa apa a mono omu ono kulikida rupandu kosizoweseso esi ga ku pa ngouhwi.​—1 Sam. 16:7; Mar. 12:41-44.

18. Morwasinke twa karera norupandu kwaJehova naJesus Kristusa?

¹⁸ Morwa sizoweseso, ose kutugusira po nonzo detu nokukara vakaume vaJehova ntani ngatu ka gwana mwenyo gwanarunye. Ngano tu likideni rupandu keharo lyaJehova eli lya mu tumangedere atu pe matungiko aga tuna kuhafera ngesi. (1 Joh. 4:19) Ngano tu likideni hena rupandu kwaJesus ogu ga geve eparu lyendi, yipo tu ka gwane mwenyo gwanarunye morwa ga tu hara unene.​—Joh. 15:13.