SIRONGWA SELIRONGO 3
RUSUMO 35 “Horowora yoyiwa po”
Tura po matokoro aga naga hafesa Jehova
“Etameko lyounongo kutjira HOMPA, ano ediwo lyomupongoki nondunge”—YIS. 9:10.
OKU SINA DEMENENE SIRONGWA
Omu natu ruganesa unongo nonondunge yipo tu ture po matokoro gomawa.
1. Udigu musinke atu ligwanekere nawo?
NKENYE ezuva ose kutura po matokoro, ngwendi eyi natu lya kongurangura ndi siruwo esi natu rara, matokoro ogo ureru kugatura po, nye gamwe udigu. Matokoro ogo kuvhura kukundama ukanguki wetu, ruhafo rwetu, vantu ava twa hara ntani omu atu karere Jehova. Tuna hara vekoro lyetu ntani nanyamwetu tu gwanene mo uwa momatokoro aga atu tura po. Nye yomulyo po unene, tuna hara matokoro getu ga hafese Jehova.—Rom. 12:1, 2.
2. Yisinke nayi kuvatera o ture po matokoro gomawa?
2 Ove ngo tura po matokoro gomawa nsene (1) o gwana mauzera nagenye, (2) o gazadara ko omu a lizuvhu Jehova kuhamena ukaro owo, ntani (3) nsene o gazadara ko nawa. Sirongwa esi nasi ka zogera magano aga gatatu ntani nasi ka tu vatera tu dive omu natu ruganesa nondunge detu.—Yis. 2:11.
GWANA MAUZERA
3. Gava sihonena asi morwasinke natu gwanena mauzera komeho tu ture po etokoro?
3 Mokutura po etokoro lyewa pomuhowo wa hepa kugwana mauzera. Ayo mulyo sili unene. Gazadara ko kosihonena esi tu tante asi muveli ta zi kwandokotora a ka mu pure kuhamena uvera wendi. Ndokotora kuvhura a ture po etokoro kuhamena nomutji edi na pa muveli ga hana kumupura eyi ana kuvera ndi? Hawe. Nove ngo tura po matokoro gomawa kuhamena ukaro ou ono kuligwanekera nawo nsene o gazadara ko komauzera aga gana lizi noukaro woge. Ngapi noyirugana?
4. Kuliza noYisewe 18:13, ngapi omu no divilisa asi ono gwana mauzera nagenye? (Tara hena efano.)
4 Kuvhura o gwane mauzera nsene o pura mapuro. Tu tante asi vana kuzigida kepongasano. Ove ngo kare po ndi? Nsene kapi ono diva muntu ogu ana kuzigida ndi mawapaiko gokuhamena kepongasano kuvhura o pure muntu ogo asi: “Kupi nga likarera epongasano olyo ntani ezuva musinke nga likara? Vantu vangapi ngava kara po? Yilye ogu nga divilisa asi yininke nayinye kuna kugenda po nawa? Wolye ngava za ko? Mawapaiko musinke nga ga kara po? Pepongasano olyo ngapa kara marovhu ndi?” Malimbururo komapuro ogo ngaga kuvatera o ture po etokoro lyewa.—Resa Yisewe 18:13.
Gwana mauzera pokupura mapuro (Tara paragarafu 4) a
5. Yisinke norugana konyima zokugwana mauzera nagenye?
5 Konyima zokudiva mauzera nagenye, gazadara ko nawa koukaro naunye. Pasihonena, ngapi nsene ngo diva asi pepongasano olyo ngapa kara vantu ava ava dili kusikisa mo nompango domoBibeli ndi kapi ngapa kara muntu ogu nga divilisa asi vantu kapi vana kunwa unene marovhu? Epongasano olyo kuvhura ngali kare sipito sosidona ndi? (1 Pet. 4:3) Yisinke norugana nsene epongasano olyo ngali kuninkisa o dire kuza komapongo ndi mokuzuvhisa? Nsene ngo diva mauzera nagenye, ayo ngayi kuvatera o ture po etokoro lyewa. Nye koyili hena yimwe eyi wa hepa kurugana. Ove ono diva ukaro naunye; nye ngapi a lizuvhu Jehova kuhamena ukaro owo?—Yis. 2:6.
GAZADARA KO OMU A LIZUVHU JEHOVA
6. Kuliza naJakopo 1:5, morwasinke natu kanderera kwaJehova a tu vatere?
6 Pura Jehova a kuvatere o kwate egano omu a lizuvhu kuhamena ukaro owo. Jehova ga tu tumbwidira asi nga tu pa unongo nonondunge, yipo tu ture po matokoro aga naga mu hafesa. Age kugava unongo owo “kwanavenye nomutjima nagunye ga hana mutjimakoka.”—Resa Jakopo 1:5.
7. Ngapi no diva omu a lizuvhu Jehova kuhamena ukaro wongandi? Yifanekesa.
7 Nsene ono kanderere kwaJehova a kuvyukise, nomena omu na limburura ekanderero lyoge. Mokuyifanekesa: Nsene ono zumbana ove ngo pura evatero komuntu ogu ga tunga kevango olyo, nye kapi ngo tunda po usimbu ga hana kukulimburura. Ove ngo purakena nawa apa nga ku vyukisa. Mokulifana, Konyima zokupura Jehova unongo, hetekera ko kudiva elimbururo lyendi pokudiva noveta nonompango domoBibeli edi dina lizi noukaro woge. Pasihonena, nsene to tokora asi to zi kepongasano eli tuna tumbura pomuhowo, kuvhura o gazadare ko eyi za uyunga ko Bibeli kuhamena yipito yoyidona, nonzogera donondona ntani mulyo gokutura Uhompa muhowo mevango lyokutura muhowo yininke eyi wa hara.—Mat. 6:33; Rom. 13:13; 1 Kol. 15:33.
8. Yisinke no rugana nsene ono hepa evatero yipo o gwane magano aga ono kupapara? (Tara hena efano.)
8 Poyiruwo yimwe, wa hepa evatero yipo o gwane magano aga ono kupapara. Munazinyetu gomugara ndi gomukadi ogu ga kara noudivi kuvhura a ku pe ko magano. Nye nampili ngoso, ove kuvhura o gwanene mo mauwa nsene o rugana ko mapaparo. Magano manzi ga kara moyiruganeso yetu yelirongo, ngwendi Buke zepaparo zoNombangi daJehova ntani buke Matjangwa aga naga vatera Vakriste. Sitambo setu kuna kara sokutura po matokoro aga naga hafesa Jehova.
Gazadara ko omu a lizuvhu Jehova (Tara paragarafu 8) b
9. Ngapi natu divilisa asi etokoro lyetu kuvhura lihafese Jehova? (Vaefeso 5:17)
9 Ose kuvhura kudivilisa asi matokoro getu kuvhura kuhafesa Jehova nsene tu mu diva nawa. Bibeli kutanta asi: “Etameko lyounongo kutjira HOMPA”. (Yis. 9:10) Nsene tu diva yikara yaJehova nositambo sendi ntani yininke eyi ga hara neyi ga nyenga, ose ngatu kara nounongo wene-wene. Lipura asi, ‘Kuliza neyi nadiva kuhamena Jehova, etokoro musinke nani tura po eli nali mu hafesa?’—Resa Vaefeso 5:17.
10. Morwasinke nompango domoBibeli da karera nomulyo unene kupitakana ekoro ndi mpo zomomukunda?
10 Nsene tuna hara kuhafesa Jehova, poyiruwo yimwe twa hepa kurugana yininke eyi nayi guvisa vantu ava twa hara. Pasihonena, mukurona kuvhura a sininike munendi gomukadona a kware mugara ogu ga kara noyimaliwa yoyinzi ndi ogu na vhura kufuta yigondwa yoyinzi nampili mugara ogo kapi ga kara nelikwatakano lyewa naJehova. Mukurona ogo ana hara munendi a ka paruke nawa, nye yilye nga vatera munendi nga ka kare nelikwatakano lyokupama naJehova? Ngapi Jehova a tara ukaro owo? Mateusa 6:33 za gava elimbururo, azo kukorangeda Vakriste va ‘hove kutura Uhompa waKarunga muhowo.’ Nampili ngomu twa fumadeka vakurona vetu novantu ava va kara momukunda gwetu, sitambo setu sosinene po kuna kara sokuhafesa Jehova.
GAZADARA KO KOMAGANO
11. Sikara musinke va tumbura moVafilipi 1:9, 10 esi nasi kuvatera o gazadare ko komagano goge?
11 Konyima zokugazadara ko konompango domoBibeli edi dina lizi netokoro lyoge, wa hepa kukonakona ko komagano goge. (Resa Vafilipi 1:9, 10.) Sikara sonondunge ngasi kuvatera o dive yitundwamo yankenye egano. Poyiruwo yimwe ureru kutura po etokoro, nye kapisi matokoro nagenye ureru kugatura po. Nondunge ngadi kuvatera o ture po matokoro gomawa nampili momaukaro goudigu.
12-13. Ngapi nondunge ngadi kuvatera o ture po etokoro lyewa kuhamena yirugana?
12 Gazadara ko koukaro ou. Tu tante asi ove kuna kupapara yirugana yipo o pakere mbili epata lyoge, makura tava kutambura kuvali. Ove ngo konakona mauzera nagenye nokudivilisa asi yirugana musinke oyo, elikwamo lyoyirugana oyo ntani siruwo esi ngo genda yipo ngo ka sike, nayimwe hena. Momaukaro nagenye, yirugana oyo ya liza nonompango domoBibeli. Nampo kuvhura o hafere yirugana yokuhova morwa yiyo ono hara ndi nampo ayo kufuta nawa. Nye koyili yininke yimwe hena eyi wa hepa kugazadara ko komeho zokutura po etokoro.
13 Pasihonena, yirugana oyo kuvhura ngayi kuninkise ngo dire kuza komapongo ndi? Yirugana oyo kuvhura ngayi kuninkise o dire kugwana siruwo sokuvatera vemepata lyoge va lizuvhe epopero noruhafo ntani va hedere pepi naJehova ndi? Mapuro ogo ngaga kuvatera o dive asi kukarera Jehova ntani epata lyoge yiyo “yomulyo po unene” kupitakana kukondjera yimaliwa. Makura eyi ngayi kuninkisa o ture po etokoro eli nga tungika Jehova.
14. Ngapi kuruganesa nondunge nokulikida eharo nayi tu vatera tu dire kupundukisa wopeke?
14 Nondunge ngadi tu vatera hena tu gazadare ko asi ngapi etokoro lyetu na likundama wopeke, yipo tu dire “kupundukisa wopeke.” (Fil. 1:10) Esi kuna kara sininke somulyo nsene kuna kutura po etokoro kuhamena yininke eyi natu dwara ntani nomu natu liwapeka. Pasihonena, kuvhura tu hare kudwara ndi tu liwapeke monkedi zongandi. Nye ngapi nsene kapi nayi hafesa vantu womombungakriste ndi vantu ava va dira kukara mombungakriste? Nondunge ngadi tu vatera tu fumadeke omu ava lizuvhu wopeke ntani eharo ngali tu tumangeda tu kondjere uwa ‘wovakwetu’ ntani nokulinunupika. (1 Kol. 10:23, 24, 32; 1 Tim. 2:9, 10) Makura eyi ngayi tu ninkisa tu ture po etokoro eli ngali likida asi twa hara vantu wopeke nokuvafumadeka.
15. Yisinke wa hepa kugazadara ko komeho zokutura po etokoro lyomulyo?
15 Nsene kuna kutura po etokoro lyomulyo, gazadara ko asi ngapi omu ngo lisikisa mo. Jesus kututantera asi nkenye ogu “a varure yipo a tare nsene yina mu gwanene po.” (Ruk. 14:28) Yipo nye, gazadara ko kosiruwo noyininke eyi ngo hepa yipo ngo sikise mo etokoro lyoge. Momaukaro gamwe, kuvhura o zogere nava vemepata mu tare asi yisinke nga rugana nkenye gumwe yipo mu sikise mo etokoro olyo. Ewapaiko eli mulyo morwa ngali likida asi wa hepa kutjindja yimwe kuhamena etokoro lyoge ndi kuvhura ngo gwane ko egano lyapeke lyewa. Nsene o ruganena kumwe nava vemepata lyoge nokupurakena komagano gawo, awo ngava ruganena kumwe nove yipo ngomu sikise mo etokoro olyo.—Yis. 15:22.
TURA PO ETOKORO ELI NGO SIKISA MO
16. Yisinke no rugana yipo o ture po etokoro eli ngo sikisa mo? (Tara hena kakende “ Omu no tura po matokoro gomawa.”)
16 Nsene ove kurugana yininke eyi tuna zogere, ove ngoso kuvhura o ture po etokoro lyewa. Ove ono gwana mauzera nagenye ntani ono konakona nompango edi nadi kuvatera o ture po etokoro eli nali hafesa Jehova. Kuvhura o pure Jehova a kuvatere yipo o sikise mo etokoro lyoge.
17. Yisinke nayi kuvatera o ture po matokoro gomawa?
17 Unongo wokutunda kwaJehova yiwo nau kuvatera o ture po matokoro gomawa, nye kapisi nondunge doge ndi udivi ou wa kara nawo, nampili yikare asi ove nare ngo tura po matokoro gomawa. Jehova gelike gokuvhura kugava unongo wene-wene nonondunge ntani yige gelike gokukuvatera o kwate egano yininke, eyi kuna kara yininke yomulyo eyi nayi kuvatera o ture po matokoro gomawa (Yis. 2:1-5) Jehova kuvhura kukuvatera o ture po matokoro gomawa aga naga mu hafesa.—Epis. 23:2, 3.
RUSUMO 28 Tulisa po ukaume naJehova
