1. Morwasinke Jehova ga tu pera uhwi wononkwara?

 JEHOVA “Karunga goruhafo,” nose ana tu harere tu hafe. (1 Tim. 1:11) Age kwa tu pa mauhwi gomanzi yipo tu hafere eparu. (Jak. 1:17) Uhwi umwe kuna kara nonkwara. Apa mugara nomukadi ava likwara, awo kulitumbwidira asi ngava lihara nokulifumadeka ntani ngava lihafera. Valikwali kukara noruhafo apa ava twikire kunkondopeka eharo lyawo.​—Yis. 5:18.

2. Ngapi omu sinzi sovagara ava tekura vakadi vawo?

² Neina mouzuni, valikwali wovanzi kapi ava sikisa mo eyi va litumbwidilire pezuva lyawo lyononkwara, eyi kuvaninkisa va dire kukara noruhafo. Erapoto lyokutunda koMbunga zoUhaku zoMouzuni kwa tanta asi sinzi sovagara kutoona vakadi vawo nokuvauyungira nonkango donondona ntani kuvahepeka pamalizuvho. Mugara ogu a rugana yininke eyi nampo kuvhura a tekure mukadendi monkedi zefumadeko komeho zovantu, nye kembo kapi a mu tekura monkedi zongwa. Sinzi sovagara kutarera mafano goruhonda, ano eyi kuninkisa mukadi a lizuvhe asi kapi va mu hara ntani kumuretera sinka.

3. Morwasinke vagara vamwe ava tekwire vakadi vawo monkedi zonyanya?

³ Yisinke ayi ninkisa vagara vamwe va tekure vakadi vawo monkedi zonyanya? Nampo awo kwa va rera guhyawo gonyanya makura awo kugazara asi kapisi epuko kutekura mukadi monkedi zonyanya. Vagara vamwe kutekura vakadi vawo monkedi zonyanya morwa sinzi sovagara yiyo ava rugana mompo zawo. Vagara ava kulizuvha asi va hepa kutekura vakadi vawo monkedi zonyanya, yipo mukadendi a yi dive asi age ga kara nononkondo. Vagara vamwe kapi va va ronga asi ngapi omu nava pangera malizuvho gawo, kukwatera mo ehandu. Ano vamwe va kara nomutaro gepuko kuhamena vakadi ntani eligwanekero panyama morwa kutarera nkenye apa mafano goruhonda. Marapoto kulikida asi posiruwo souvera woKorona, maudigu aga kwa ligwederera unene. Nye yininke eyi kapisi yininkise mugara a tekure mukadendi monkedi zonyanya.

4. Yisinke nava nyokera po vagara woVakriste ntani morwasinke?

 ⁴ Vagara woVakriste kapisi va pulisire nkareso ezi zomouzuni zi va ninkise nawo va kare nomutaro gomudona kuhamena vakadi. a Morwa eyi a gazara muntu kumutwaredesa ayi ture pasirugana. Mupositoli Paurusa kwa rondwere Vakriste wovagwavekwa ava va kere moRoma asi “hagekeni kuhonena yininke yomouzuni ou.” (Rom. 12:1, 2) Apa Paurusa ga tjangerere Varoma mbilive, vantu womombungakriste ozo kwa kere nare Vakriste nomvhura dongandi. Nye nonkango daPaurusa kulikida asi vamwe simpe kwa kweme nompo ntani neyi ngava gazara vantu womouzuni. Eyi yiyo ga va pukwilire va rundurure magazaro nonkareso zawo. Vagara woVakriste nawo va hepa kusikisa mo epukururo eli. Nye vagara vamwe kukwama magazaro nonkareso zovantu womouzuni ntani awo kwa tekura vakadi vawo monkedi zonyanya. b Ngapi omu Jehova ga harera mugara a tekure mukadendi? Elimbururo kuvhura kuligwana metjangwa omu sina tundu sirongwa esi.

5. Kuliza na-1 Peturusa 3:7, ngapi mugara na tekura mukadendi?

⁵ Resa 1 Peturusa 3:7. Jehova kutantera vagara va fumadeke vakadi vawo. Mugara ogu a fumadeke mukadendi nga mu tekura monkedi zongwa ntani zeharo. Mosirongwa esi tatu ka zogera asi ngapi mugara na yilikida asi ga fumadeka mukadendi. Nye pomuhowo tu zogereni yininke eyi na dira kurugana mugara kwamukadendi.

KAPISI O RUGANE YININKE EYI NAYI KORESA MUKADOGE

6. Ngapi a lizuvhu Jehova kuhamena vagara ava ava toona vakadi vawo? (Vakorosi 3:19)

⁶ Mugara kapisi a toone mukadendi. Jehova kwa nyenga ava va hara nyanya. (Epis. 11:5) Age kwa nyenga vagara ava ava tekura vakadi vawo monkedi zonyanya. (Mara. 2:16; resa Vakorosi 3:19.) Kuliza netjangwa lya-1 Peturusa 3:7 omu sina tundu sirongwa, nsene mugara kapi a tekura mukadendi monkedi zongwa ayo ngayi kundama elikwatakano lyendi naKarunga. Jehova kuvhura nga dire kupurakena komakanderero gendi.

7. Kuliza noVaefeso 4:31, 32, nonkango musinke nava nyokera po vagara?

⁷ Mugara kapisi a harukire mukadendi. Vagara vamwe kuuyunga novakadi vawo nonkango dehandu ntani dokukoresa. Nye Jehova kwa nyenga ‘ehandu noukenya nokuliharukira-harukira nononkango donondona.’ c (Resa Vaefeso 4:31, 32.) Jehova kuzuvha nayinye. Monkedi ezi a uyunga mugara namukadendi nampili membo lyawo, mulyo unene kwaJehova. Mugara ogu a uyunga monkedi zonyanya namukadendi kapi tupu a zonagura po elikwatakano lyendi namukadendi, nye hena kuzonagura po elikwatakano lyendi naKarunga.​—Jak. 1:26.

8. Ngapi a lizuvhu Jehova kuhamena mafano goruhonda ntani morwasinke?

⁸ Mugara kapisi a tarere mafano goruhonda. Ngapi a lizuvhu Jehova kuhamena mafano goruhonda? Age kwa ga nyenga. Mugara ogu a tarere mafano gokunyata kuzonagura po elikwatakano lyendi naJehova ntani kapi a fumadeke mukadendi. d Jehova ana harere vagara va va huguvare vakadi vawo, kapisi moyininke eyi ava rugana tupu nye hena nomoyininke eyi ava gazara. Jesus kwa tente asi mugara ogu a tara mukadi gwapeke monkedi zokumudovaukira  nare ana hondere nendi “momutjima.” e​—Mat. 5:28, 29.

9. Morwasinke Jehova ga nyengera mugara ogu a sininike mukadendi a rugane yininke eyi ana dili kuhara apa nava ligwanekera panyama?

⁹ Mugara kapisi a sininike mukadendi a rugane yininke eyi ana dili kuhara apa nava ligwanekera panyama. Vagara vamwe kusininika vakadi vawo va ligwanekere nawo panyama monkedi ezi nazi va ninkisa va lizuvhe asi kuna kuvahepeka ndi kapi va va hara. Jehova kwa nyenga nkareso ezi zondona. Age kwa hara vagara va hare vakadi vawo nokuvahafera ntani nokufumadeka omu vana kulizuvha. (Efe. 5:28, 29) Ngapi nsene mugara goMukriste age nanare kusininika mukadendi a rugane yininke eyi ana dili kuhara apa nava ligwanekera panyama ndi kumutekura monkedi zonyanya ndi kutarera mafano goruhonda? Ngapi omu na rundurura eyi a gazara ntani neyi a rugana?

OMU MUGARA NA HAGEKA YIRUGANA YOYIDONA

10. Ngapi omu vagara nava gwanena mo uwa mosihonena saJesus?

¹⁰ Yisinke nayi vatera mugara a nyokere po nkareso zonyanya ntani zokudira kuwapera? Age kuvhura a hetekere ko kuhonena Jesus. Nampili ngomu Jesus ga dilire kukwara, vagara kuvhura kulirongera ko omu nava tekura vakadi vawo kosihonena saJesus monkedi omu ga tekwire varongwa vendi. (Efe. 5:25) Pasihonena, gazadara ko eyi nava lirongera ko vagara kwaJesus monkedi ezi ga tekwire vapositoli vendi ntani nomu nga uyunga nawo.

11. Monkedi musinke Jesus ga tekwire vapositoli vendi?

¹¹ Jesus nga tekura vapositoli vendi monkedi zongwa ntani zefumadeko. Age kapi ga kere nonyanya ndi ava pangere nampili ngomu ga kere Hompa gwawo ntani Hekurwawo. Mokumona asi Jesus kwa kere nononkondo kuvapitakana, age kapi ga ruganesere nonkondo dendi yipo va mu tjire. Mevango lyoyo, age kwa linunupikire pokukuhwa nompadi dawo. (Joh. 13:12-17) Age kwa tanterere varongwa vendi asi: “mu lirongere ko kwange, yeeyi ame kwa gomoka, yiyo na linunupika momutjima, ngomu gwane epwizumuko.” (Mat. 11:28-30) Konekeni asi Jesus kwa gomokere. Nsene muntu ga gomoka kapi ayi tanta asi kwato nonkondo, nye ayo kutanta asi age ga kara nelipangero. Apa muntu gougomoki a handuka age kulitura ntani kupangera malizuvho gendi.

12. Ngapi Jesus ga uyungire novantu?

¹² Jesus kwa ruganesere nonkango dendi mokuhengagwida nokukorangeda wopeke. Age kapi ga uyungire monkedi zonyanya novasikuli vendi. (Ruk. 8:47, 48) Nampili apa nonkore dendi ngadi mu swaura, “kapi nga ninki asi nage a va swaure.” (1 Pet. 2:21-23) Poyiruwo yimwe, Jesus kwa mwenene teete mevango lyokulimburura monkedi zonyanya. (Mat. 27:12-14) Esi kuna kara sihonena sosiwa sili kovagara woVakriste!

13. Kuliza naMateusa 19:4-6, ngapi omu mugara ‘na hama kwamukadendi’ (Tara hena efano.)

¹³ Jesus kwa rongere vagara yipo va va huguvare vakadi vawo. Age kwa temwinine oGuhwe ava va tente asi mugara “a hame kwamukadendi.” (Resa Mateusa 19:4-6.) Nkango zoRugereka ezi va ruganesa “a hame” azo kutanta asi “kukwatakanesa kumwe.” Yipo nye, eharo eli lya kara pokatji komugara nomukadi lya hepa kunkondopara unene yipo va kare ngwendi kwa va kwatakanesa kumwe. Nsene gumwe pokatji kawo ana rugana yininke eyi yina koresa mukwawo, navenye va hepa kuzuvha kukora. Mugara ogu ga hara unene mukadendi, nga nyokera po kutarera nkenye eyi ya hamena komafano goruhonda. Age nga nyokera po usimbu “kokupakera mbili eyi ya hana edumba.” (Epis. 119:37) Ngwendi Joba, age kapi nga tara mukadi gwapeke a mu dovaukire.​—Joba 31:1.

14. Ngapi omu mugara ogu a hepeke mukadendi na tengwidira po elikwatakano lyendi naJehova ntani namukadendi?

 ¹⁴ Mugara ogu a toona ndi ogu a ruganesa nonkango donondona kwamukadendi ga hepa kurugana ko yuma yipo a tengwidire po elikwatakano lyendi naJehova ntani namukadendi. Eyi yiyo yininke ga hepa kurugana, sokuhova ga hepa kuyidimburura asi ga kara noudigu wounene. Jehova kumona nayinye ntani kuzuvha nkenye eyi a uyunga. (Epis. 44:21; Muud. 12:14; Heb. 4:13) Sauvali, ga hepa kuhageka kutekura mukadendi monkedi zonyanya ntani ga hepa kutjindja nkareso zendi. (Yis. 28:13) Sautatu, ga hepa kuhundira egusiro po kwamukadendi ntani kwaJehova. (Yirug. 3:19) Mugara ga hepa hena kulikwambera kwaJehova yipo a mu pe ko eharo lyokutjindja nkareso zendi ntani yipo a vhure kugazara nokuuyunga ntani nokurugana monkedi ezi ga yi harera Jehova. (Epis. 51:10-12; 2 Kol. 10:5; Fil. 2:13) Saune, ga hepa kurugana kuliza nomakanderero gendi ntani ga hepa kurugana paapa ga hulira yipo a nyenge nkenye rupe ronyanya nononkango donondona. (Epis. 97:10) Sautano, ga hepa kuza usimbu kovakuronambunga yipo va ka mu vatere. (Jak. 5:14-16) Sauntazimwe, ga hepa kutura po ewapaiko eli nali mu vatera yipo nga dire kuyirugana hena nampili komeho. Mugara ogu a tarere mafano goruhonda nage ga hepa kurugana yokulifana. Jehova nga mu vatera yipo a rundurure nkareso zendi. (Epis. 37:5) Nye kapi ya gwanena po tupu komugara mokuhageka kurugana yininke eyi nayi koresa mukadendi. Mugara ga hepa hena kulironga omu na fumadeka mukadendi. Monkedi musinke nayi rugana?

OMU NO FUMADEKA MUKADOGE

15. Ngapi mugara nayi likida asi ga hara mukadendi?

¹⁵ Likida mukadoge asi wa mu hara. Vanavanyinyetu vamwe wovagara ava va kara mononkwara doruhafo, awo kurugana nkenye ezuva yininke eyi nayilikida vakadi vawo asi va va hara. (1 Joh. 3:18) Mugara kuvhura a yi likide asi ga hara mukadendi pokurugana yininke yoyinunu ngwendi kukwata mukadendi kewoko ndi kumulidingira. Age kuvhura a mu tumine mbudi koterefona nokumutantera asi kwa kumurongora ndi kuvhura  a pure mukadendi asi ngapi lyamugendi po ezuva lyendi. Poyiruwo yimwe kuvhura a tjangere mukadendi sikarata a mu tantere asi ga mu hara. Apa mugara a rugana yininke eyi age kuyilikida asi ga fumadeka mukadendi ntani ayo kunkondopeka nonkwara dawo.

16. Morwasinke mugara na fumadekera mukadendi?

¹⁶ Tantera mukadoge asi age mulyo koge. Mugara ogu a fumadeke mukadendi age kumunkondopeka nokumukorangeda. Nkedi zimwe omu nayi rugana kuna kara pokupandura mukadendi kwanayinye eyi a rugana yipo a mu vatere. (Koros. 3:15) Apa mugara a pandadeke mukadendi kutundilira komutjima, ayo kuhafesa mukadendi. Mukadi nga lizuvha epopero ntani nga lizuvha asi mugara gwendi ga mu hara nokumufumadeka.​—Yis. 31:28.

17. Monkedi musinke mugara nayi likida asi ga fumadeka mukadendi?

¹⁷ Tekura mukadoge monkedi zombili ntani zefumadeko. Mugara ogu ga hara mukadendi age kumutara asi mulyo kwendi. Age kutara mukadendi asi uhwi womulyo wokutunda kwaJehova. (Yis. 18:22; 31:10) Ano eyi ngayi muninkisa a tekure mukadendi monkedi zongwa ntani zefumadeko, nampili apa nava ligwanekera panyama. Age kapi nga sininika mukadendi va ligwanekere nage panyama monkedi zonyanya ndi ezi nazi ninkisa mukadendi a lizuvhe asi kwa kumuhepeka ndi monkedi ezi nazi koresa ezwi lyamukadendi lyokomutjima. f Mugara nage kapi na hara kurugana yininke eyi nayi koresa ezwi lyendi lyokomutjima apa nava ligwanekera panyama namukadendi.​—Yirug. 24:16.

18. Yisinke vagara nava tokomena kurugana? (Tara hena kakende “ Nonkedi ne omu mugara na fumadeka mukadendi.”)

¹⁸ Vagara, Jehova kuhafa apa omu hetekere ko kufumadeka vakadi veni mwanayinye eyi omu uyunga neyi omu rugana. Tokomeneni kufumadeka vakadi veni pokunyokera po kurugana yininke eyi nayi va koresa ntani pokuvatekura monkedi zombili nokuvafumadeka ntani nokuvalikida eharo. Nsene mu yi rugana, one ngomu yilikida asi mwa hara vakadi veni ntani ngomu va tara asi awo mulyo kweni. Pokufumadeka vakadi veni, one ngomu popera elikwatakano lyeni naJehova.​—Epis. 25:14.