1. Morwasinke natu kare poMurarero gwaHompa nkenye mvhura?

 JEHOVA kwa tu pa uhwi wouwa pokututumina Munendi aya tu fire. (2 Kol. 9:15) Morwa Jesus ga tu fira, ose kuvhura kukara nelikwatakano lyewa naJehova ntani nokukaparuka narunye. Twa kara nonokonda dononzi deyi natu pandwira Jehova kweyi ga tu pa sizoweseso morwa ga tu hara. (Rom. 5:8) Mokuninka asi tu twikire kukara norupandu, ngano tu diworoke nkenye apa eyi ga tu ruganena Jehova naJesus. Jesus kwa tu pangera tu kare poMurarero gonomfa dendi.​—Ruk. 22:19, 20.

2. Yisinke natu ka zogera mosirongwa esi?

² Mvhura ezi Murarero gwaHompa nga gu kara moMapeu 12 Kudumogona 2025. Tuna si huguvara asi natuvenye kuna kuliwapaikira yipo nga tu kare po. Komeho nga gu kare Murarero gwaHompa ntani konyima zoMurarero gwaHompa, ose kuvhura ngatu gwanene mo mauwa nsene tu teda a ko kweyi ga tu ruganena Jehova naJesus. Mosirongwa esi tatu ka lironga eyi a si tu rongo sizoweseso kuhamena Jehova naMunwendi. Sirongwa sokukwama ko ngasi ka tu vatera omu natu gwanena mo uwa mosizoweseso ntani nomu natu likida rupandu rwetu.

 EYI A SI TU RONGO SIZOWESESO KUHAMENA JEHOVA

3. Ngapi nomfa domuntu gumwe da zowora vantu wovanzi? (Tara hena efano.)

³ Sizoweseso kuturonga asi Jehova muwa. (Deut. 32:4) Monkedi musinke? Gazadara ko kosihorokwa esi: Apa Adamu ga dilire kulimburukwa Jehova age kwa zonene ntani kwa ya fire. Morwa ose womoruvharo rwendi, nose twa pinga nzo ntani kufa. (Rom. 5:12) Jehova kwa tu mangurura kononzo nonomfa, apa ga tumine munendi aya tu fire. Nye ngapi nomfa domuntu gumwe gokusikilira mo da zowora vantu wovanzi? Mupositoli Paurusa kwa faturura asi: “Moomu tupu kudira kulimburukwa komuntu gumwe [Adamu] kwa ninkisa vantu wovanzi va kare vananzo, nokulimburukwa komuntu gumwe [Jesus] nako ngaku ninkisa vantu wovanzi va kare vahungami.” (Rom. 5:19; 1 Tim. 2:6) Paurusa kwa tembe asi vantu navenye vananzo ntani kufa morwa nzo zomuntu gokusikilira mo ogu ga dilire kulimburukwa Karunga. Yipo nye, pwa hepere muntu gokusikilira mo ogu ga limburukwire Jehova a tu zowore.

4. Morwasinke Jehova ga dilire kupulisira womoruvharo rwaAdamu ava va mu limburukwire va paruke narunye?

⁴ Jesus ga hepere sili kufa yipo a tu zowore ndi? Morwasinke Jehova ga dilire kupulisira womoruvharo rwaAdamu ava va mu limburukwire va paruke narunye? Kuvhura nampo tu gazare asi ezi kwa kere nkedi zongwa zokukohonona po udigu. Jehova ga hungama, ngano ga yi rugene ayo ngano kwa likidire asi Adamu kapi ga tulire nzo zonene ntani womoruvharo rwendi kapi va pinga nzo.

5. Morwasinke natu karera nehuguvaro asi Jehova nkenye apa nga rugana youhunga?

⁵ Jehova hena ngano kapi ga geve sizoweseso nokupulisira vantu womoruvharo rwaAdamu va paruke narunye nampili ngomu va dilire kusikilira mo, Jehova ngano ga ncenuna nompango dendi douhunga kuhamena yininke youhunga neyi yepuko, ano eyi ngano ya ninkisa vantu va kare nosinka asi kuvhura nga ncenune hena nompango dendi douhunga komeho, age kuvhura nga dire kusikisa mo eyi ga tumbwidira. Pasihonena, vantu kuvhura va lipure nsene asi Jehova nga sikisamo matumbwidiro gendi nagenye. Kapisi tu kare nosinka kuhamena yininke oyo. Mokumona asi Jehova ga rugana yininke youhunga pokugava munendi, ayo kutuhuguvaresa asi age nkenye apa nga rugana yininke youhunga.

6. Sikara musinke sa tumangedere Jehova a tume Munendi yipo a aya tu fire? (1 Joh. 4:9, 10)

⁶ Eharo kuna kara sikara esi sa tumangedere Jehova, yipo a tume Munendi Jesus a ya tu fire. (Joh. 3:16; resa 1 Johanesa 4:9,  10.) Jehova kwa tumine Munendi aya tu fire morwa ana hara nga tu ka paruke narunye ntani ana hara hena tu hame kepata lyendi. Apa ga zonene Adamu, age kapi ga heme kepata lyovakareli vaJehova. Eyi kwa tu ninkisa natuvenye tu dire kuhama kepata lyaKarunga. Nye nampili ngoso, Jehova kutudongwenena po nonzo detu kupitira mosizoweseso ntani vantu navenye ava ava likida epuro mwendi nokumulimburukwa kuvhura kuhama kepata lyendi. Ose ngesi kuvhura kukara nelikwatakano lyewa naJehova ntani novanavazinyetu. Yosili Jehova kwa tu hara unene!​—Rom. 5:10, 11.

7. Ngapi omu nomfa daJesus a di tu vatere tu kwate egano omu Jehova ga tu hara unene?

⁷ Kuvhura tu kwate egano asi Jehova ga tu hara pokugazadara omu ya mu koresere apa ga mwene Munendi kuna kuhepa. Satana kuuyunga asi kwato mukareli gwaJehova ogu nga twikira kumulimburukwa apa a ligwanekere nomaudigu. Jehova kwa pulisilire Jesus a hepe komeho a fe, mokuyilikida asi Satana mepuko ga kere. (Joba 2:1-5; 1 Pet. 2:21) Jehova ga mwene omu vantu va swawire Jesus, nomu va mu sopwere vakwayita noku mu pampara ntani ga mwene hena omu Munendi ga fire nomfa dokukoresa. (Mat. 27:28-31, 399) Jehova ngano ga poperere Munendi yipo a dire kuligwanekera noyininke eyi, morwa ga kara nononkondo. Pasihonena, apa varwanesi va tente asi: “Karunga, a mu popere nye, nsenesi sili ga mu hara.” (Mat. 27:42, 43) Ngano Jehova ga yi rugene oyo, Jesus ngano kapi ga tu fililire yipo a fute sizoweso ntani ngano kapi twa kara nehuguvaro lyokomeho. Yipo nye, Jehova kwa pulisilire Munendi a lididimikire mahepeko dogoro konomfa dendi.

8. Jehova ga lizuvhire kukora kokunene apa ga mwene Munendi kuna kuhepa ndi? Faturura. (Tara hena efano.)

⁸ Mokumona asi Karunga Munankondo nadinye, kapi ya kutanta asi kapi ga kara nomalizuvho. Age kwa tu sita nomalizuvho ntani Bibeli kuuyunga asi Karunga kwa tu sita tu mu fane, eyi kulikida asi nage ga kara nomalizuvho. Bibeli kuuyunga hena asi age kuzuvha ‘kukora’ ntani ‘kuhanduka.’ (Epis. 78:40, 41) Gazadara ko hena kosihorokwa saAbirahamu naIsaka. Nampo to diworoka apa Jehova ga tanterere Abirahamu a zambe munendi. (Gen. 22:9-12; Heb. 11:17-19) Gazara tupu kukora noruguwo oru ga lizuvhire Abirahamu ngomu ga liwapaikire kudipaga Isaka nombere. Eyi kulikida asi Jehova nage kwa lizuvhire kukora kokunene apa ga mwene omu vantu vana kuhepeka Munendi dogoro konomfa!​—Tara ko-jw.org vidiyo zosiparatjangwa Honena epuro lyawo​—Abirahamu, ruha rwauvali.

9. Ngapi omu etjangwa lyomoVaroma 8:32, 38, 39 ali likida omu ga tu hara Jehova?

 ⁹ Sizoweseso kuturonga asi Jehova kwa tu hara unene kupitakana omu va tu hara vanekoro ndi vakaume vetu wovanene. (Resa Varoma 8:32, 38, 39.) Age kwa tu hara unene kupitakana omu twa lihara nyamwetu. Jehova kuna tu harere ngatu ka paruke narunye kupitakana omu twa yi tokomena nyamwetu. Age hena kwa hara kutudongwenena po nonzo detu. Age kuna hepa ko tupu kwetu tu kare nepuro mwendi nokumulimburukwa. Sizoweseso kuna kara uhwi wounene ou au likida asi Jehova ga tu hara unene ntani ngatu ka lironga yoyinzi mouzuni woupe kuhamena omu ga tu hara Jehova.​—Muud. 3:11.

EYI A SI TU RONGO SIZOWESESO KUHAMENA JESUS

10. (a) Morwasinke Jesus ga guvilire? (b) Ngapi omu Jesus ga poperere edina lyaKarunga? (Tara hena kakende “ Nzambo zaJesus kwa likida asi Jehova mouhunga ga kere.”)

¹⁰ Jesus kwa kara nosinka kedina lyoGuhwe. (Joh. 14:31) Jesus kwa guvire kweyi vantu va gazarere yininke yoyidona kuhamena oGuhwe morwa yeeyi va mu dipagere ngwendi mukorokotji ntani muntu ogu a dili kulimburukwa Karunga. Eyi yiyo ga kanderere asi: “Tate, nsenesi kuvhura, ngano na ha nwa monkinda ezi.” (Mat. 26:39) Apa Jesus ga limburukwire Jehova dogoro konomfa dendi, age kwa yi likidire asi eyi ga uyungire Satana kuhamena Jehova kwa kere yipempa.

11. Ngapi omu Jesus ga yi likidire asi ga hara unene vantu? (Joh. 13:1)

¹¹ Sizoweseso kuturonga hena asi Jesus ga kara nosinka kovantu, unene po kovarongwa vendi. (Yis. 8:31; resa Johanesa 13:1.) Pasihonena, Jesus ga yi divire asi nga rugana yininke yimwe youdigu pevhu, unene po pokufa nomfa donondona. Nye nampili ngoso, Jesus  kwa sikisire mo sirugana sendi morwa ga hara vantu. Jesus kwa yi likidire asi ga hara vantu unene po pokuvazuvhisira nokuvaronga ntani nokuvavatera. Mezuva eli va mu dipagere, age kwa kuhwire nompandi dovarongwa vendi ntani kwa va hengagwidire nokuvakorangeda. (Joh. 13:12-15) Jesus kwa hengagwidire mukorokotji ogu va mu pamparere kumwe nendi ntani kwa tanterere Johanesa a pakere mbili ozina. (Ruk. 23:42, 43; Joh. 19:26, 27) Jesus kapi tupu ga likidire vantu eharo pokuvafira, nye hena pokuvatekura monkedi zeharo nonkenda.

12. Yisinke ana kuturuganena Jesus ngesi?

¹² Jesus kwa tu fira “rumwe tupu,” nye yininke yinzi simpe ana kuturuganena. (Rom. 6:10) Yininke musinke ana kuturuganena? Age kuna kuturuganena yininke yoyinzi yoyiwa morwa sizoweseso. Tu zogereni eyi ana kuturuganena ngesi. Age Hompa gwetu, Mupristeli gwetu goMunene ntani mutwe gombungakriste. (1 Kol. 15:25; Efe. 5:23; Heb. 2:17) Age kwa mu pa situmbukira sokupongaika vagwavekwa ntani nava va hamena kemukurumbunga, komeho udigu wounene ngau hage. b (Mat. 25:32; Mar. 13:27) Age hena kuruganesa mukareli gokulimburukwa yipo a tu pe eyi twa hepa yipo tu twikire kukarera Jehova. (Mat. 24:45) Jesus nga ka twikira kuturuganena yininke yoyiwa apa nga ka pangera nomvhura eyovi. Yosili Jehova kwa tu tumina Munendi yipo aya tu ruganene yininke yoyinzi!

TWIKIRA KULIRONGA YININKE YOYIPE

13. Ngapi omu kuteda nga ku kuvatera o twikire kulironga omu ga tu hara Jehova naJesus?

¹³ Nsene o twikira kuteda ko keharo eli ga tu likida Jehova naJesus Kristusa, ayo ngayi ku ninkisa o twikire kulironga. Kuvhura o rese Mavangeli aga ga zogera kuhamena Jesus komeho ngagu kare Murarero gwaHompa mvhura ezi. Kapisi ngo rese magaununo gomanzi posikando simwe, nye ngo rese kuliwora nokudimburura nokonda dimwe deyi twa hepera kuhara Jehova naJesus. Ntani ngo tantere ko vakweni eyi ngo lironga.

14. Kuliza nEpisarome 119:97, ngapi omu kurugana epaparo nayi tu vatera tu twikire kulironga kuhamena sizoweseso ntani nomarongo gamwe hena? (Tara hena efano.)

¹⁴ Nsene nare wa gusa kukarera Jehova, kuvhura o lipure nsene koyili yininke yoyipe eyi wa hepa kulironga kuhamena uhungami waJehova, eharo lyendi ntani sizoweseso. Ose  ngatu twikira kulironga yininke yoyipe kuhamena yininke oyo noyirongwa yimwe yapeke. Yisinke no rugana? Resa Bibeli noyimbapiratjangwa yetu. Rugana epaparo koyininke eyi ono kudira kukwata egano ngomu ono kuresa. Teda ko mwa za ezuva kweyi ono resa ntani neyi yina kukuronga kuhamena Jehova naMunendi ntani nomu ava kulikida eharo.​—Resa Episarome 119:97.

15. Morwasinke natu twikilira kupapara yininke yoyipe moBibeli?

¹⁵ Ya ha kudompesa nsene kapi o gwana yininke yoyipe ndi yokuhafesa nkenye apa o resa Bibeli ndi apa o rugana epaparo. Litura moukaro womuntu ogu ana kupapara ngorodo. Yikando yoyinzi, muntu ogu a papara ngorodo kuruganesa siruwo sosinzi ndi mazuva komeho a zi gwane. Age kulitura mo unene morwa nkenye karuha kongorodo aka ana gwana kwa kara nomulyo kwendi. Nkenye usili woupe ou atu lirongo moBibeli kwa pitakana ngorodo! (Epis. 119:127; Yis. 8:10) Yipo nye, twikira kuresa Bibeli nkenye ezuva nokupapara nkenye apa yininke yoyipe eyi no lirongera ko.​—Epis. 1:2.

16. Ngapi natu honena Jehova naJesus?

¹⁶ Ngomu ono kuresa Bibeli, papara nonkedi omu no tura pasirugana eyi ono kulironga. Pasihonena, kuvhura o honene uhungami waJehova pokutekura wopeke wa hana mpongo. Kuvhura o honene Jesus omu ga here oGuhwe ntani wopeke pokukuhepeka morwa edina lyaJehova ntani pokuvatera vanavazinyetu nampili ngomu ayi digopa poyiruwo yimwe. Kuvhura hena o honene Jesus pokuzuvhisira ko wopeke yipo nawo va gwane mpito zokutambura uhwi waJehova womulyo po unene.

17. Yisinke ngatu ka zogera mosirongwa sokukwakama ko?

¹⁷ Apa atu twikire kulironga kuhamena sizoweseso, yimo hena nga tu hara unene Jehovah naMunendi. Eyi ngayi va tumangeda nawo va tu hare unene. (Joh. 14:21; Jak. 4:8) Yipo nye, tu ruganeseni yininke eyi a tu pe Jehova yipo tu twikire kulironga kuhamena sizoweseso. Sirongwa sokukwama ko nga si ka zogera nonkedi dimwe omu natu gwanena mo mauwa mo mosizoweseso ntani omu natu likida rupandu keharo lyaJehova.