1, 2. (a) Ngapi omu Nombangi daJehova da lisiga nomaukarelikarunga gapeke? (b) Yisinke natu lironga mosirongwa esi ntani nesi sokukwama ko?

VANTU kwa hara kupura Nombangi daJehova asi: “Yilye mupitisili gweni?” Momaukarelikarunga gomanzi, mugara ndi mukadi yige a pitisire mo. Mokulisiga, ose kulizuvha mfumwa kutantera vantu asi ogu atu pitisire kwa sikilira mo. Ose kutupitisira Kristusa ogu nage a limburukwa oGuhwe, Jehova.—Mat. 23:10.

² Nampili ngoso, pwa kara mbunga zovagara ava ava tumbura asi “mukareli gokulimburukwa gonondunge,” ava ava pitisire vantu vaKarunga naina. (Mat. 24:45) Ngapi omu twa yi diva asi Jehova yige a tu pitisire kupitira mwaMunwendi? Mosirongwa esi nesi sokukwama ko tatu ka lironga omu Jehova ga ruganesa vantu mokupitisira mbunga zendi. Ntani ngatu ka lironga maumbangi gatatu aga gana kulikida asi Jehova yige ga vaterere vantu mokupitisira mombunga zendi posiruwo sanare ntani nanaina.—Jes. 58:11.

3. Yisinke ya vaterere Mosesa a pitisire Vaisraeli?

³ Mpepo zokupongoka kwa vaterere vagara ava va karerere po Karunga. Tu tareni pasihonena Mosesa ogu va pere situmbukira sokupitisira Vaisraeli. Yisinke ya mu vaterere a sikise mo situmbukira oso sosinene? Jehova kwa geve “mpepo zendi  kwaMosesa.” (Resa Jesaya 63:11-14.) Yipo nye, Jehova mwene yige ga pitisilire vantu vendi morwa mpepo zendi yizo za vaterere Mosesa.

4. Ngapi Vaisraeli va vhulire kudiva asi mpepo zokupongoka yizo za vaterere Mosesa? (Tara efano pepenuno 18.)

⁴ Mokumona asi mpepo zokupongoka kuna kara nonkondo daKarunga, ngapi Vaisraeli va vhulire kudiva asi yizo za vaterere Mosesa? Mpepo zokupongoka kwa vaterere Mosesa a rugane yitetu nokudivisa edina lyaKarunga kwaFarawo. (Ex. 7:1-3) Azo hena kwa vaterere Mosesa a tunge po yikara yoyiwa ngwendi eharo, elinunupiko nelididimiko yipo a pitisire Vaisraeli. Age kwa lisigire novampitisili womonomuhoko dapeke ava va kere wonyanya nokuligazara tupu vene. (Ex. 5:2, 6-9) Yosili, pwa kere umbangi asi Jehova yige ga horowere Mosesa a pitisire vantu vendi.

5. Faturura omu Jehova ga vaterere vagara vamwe woVaisraeli va pitisire vantu vendi.

⁵ Konyima, mpepo zaJehova zokupongoka kwa vaterere vagara vamwe ava ga horowere mokupitisira vantu vendi. “Josuwa zaNunu kwa zulire ukonentu.” (Deut. 34:9) ‘Ngidiyona kwa zulire mpepo zaKarunga.’ (Vap. 6:34) Ntani “mpepo zaKarunga kwa kere naNdafita.” (1 Sam. 16:13) Vagara owo kwa huguvarere mompepo zaKarunga mokuvavatera va rugane yirugana eyi va dilire kuvhura ngano kusikisa mo mononkondo danyamwawo. (Jos. 11:16, 17; Vap. 7:7, 22; 1 Sam. 17:37, 50) Ngoyitundwamo, yirugana eyi va rugene kwa reterere Jehova efumano.

6. Morwasinke Karunga ga harerere Vaisraeli va fumadeke vagara ava ngava va pitisire?

⁶ Yisinke Vaisraeli ngano va vhulire kurugana apa va mwene maumbangi asi vagara vena kwa va vaterere mpepo zokupongoka? Apa vantu va tangwinisire Mosesa, Jehova yipo ga pulire asi: “Dogoro siruwoke ngava nyoka nge vantu ava?” (Num. 14:2, 11) Jehova kwa horowere Mosesa naJosuwa naNgidiyona ntani Ndafita mokumukarera po ngoMupitisili. Apa vantu ngava limburukwa vagara owo, awo kwa limburukwire hena Jehova ngoMupitisili gwawo.

7. Ngapi omu vaengeli va vaterere Mosesa?

⁷ Vaengeli kwa kwa vaterere vagara ava va karerere po Karunga. (Resa Vahebeli 1:7, 14.) Jehova kwa ruganesere vaengeli mokuvatera Mosesa. Karunga kwa tumine Mosesa “a kare mupangeli nomudituli mokumukwafa muengeli, ogu ga mu monekerere mosihwa sokutwera.” (Yirug. 7:35) Veta ezi ga ruganesere Mosesa mokuronga Vaisraeli, Jehova kwa zi ‘hegumwisire’ kupitira movaengeli. (Gar. 3:19) Jehova kwa tanterere Mosesa asi: “Ano ntaantani zende o ka tware vantu kevega eli na ku tantera. Diworoka asi muengeli gwange nga mu pitisira komeho.” (Ex. 32:34) Bibeli kapi za uyunga asi Vaisraeli va mwene muengeli kuna kurugana yirugana oyo. Nye monkedi ezi Mosesa nga rongo nokupitisira vantu, kwa geve umbangi asi vaengeli yiwo va mu vaterere.

8. Ngapi omu vaengeli va vaterere Josuwa naHisikiya?

⁸ Josuwa nage kwa mu vaterere “mupitisili govakwayita” vaJehova mokukarwa yita nokukafunda Vakanani. (Jos. 5:13-15; 6:2, 21) Hompa Hisikiya nage kwa mu wizilire vakwayita woVaasiliya ava va here kuhomokera Jerusarema. Mesiku limwe, “muengeli ta zi kokamba zoVaasiliya makura ta dipaga mo vakwayita 185 000.”—2 Vah. 19:35.

9. Faturura eyi Vaisraeli va heperere kukwama vagara wokudira kusikilira mokuvapitisira.

⁹ Vaengeli kwa sikilira mo nye vagara ava va vaterere kapi va sikilira mo. Pasihonena,  sikando simwe Mosesa kapi ga pere Jehova efumano. (Num. 20:12) Josuwa nage kapi ga pulire mavyukiso gaKarunga komeho zokutulisa po elikwatakano noVangibiyoni. (Jos. 9:14, 15) Sikando simwe Hisikiya kwa “linenepekere unene.” (2 Hist. 32:25, 26) Nampili ngomu vagara owo va dilire kusikilira mo, Vaisraeli va hepere kuvakwama mokuvapitisira. Jehova kwa ruganesere vaengeli mokuvatera vagara owo. Yosili, Jehova yige ga pitisilire vantu vendi.

10. Ngapi omu Veta zaKarunga za vaterere Mosesa?

¹⁰ Nonkango daKarunga kwa vaterere vagara ava va karerere po Karunga. Bibeli kutumbura Veta ezi va pere Vaisraeli asi: ‘Veta zaMosesa.’ (1 Vah. 2:3) Nampili ngoso, Matjangwa kulikida Jehova yige ga geve Veta ozo, ano Mosesa nage nga zi limburukwa. (2 Hist. 34:14) Konyima apa Jehova ga mu tanterere omu na rugana nkongoronzugo, “Mosesa makura ta rugana nayinye, moomu tupu ga mu pangerere HOMPA, asi yimo na rugana.”—Ex. 40:1-16.

11, 12. (a) Yisinke Josuwa novahompa ava ngava pangere vantu vaKarunga va hepere kurugana? (b) Ngapi omu Nonkango daKarunga da vaterere vagara ava ngava pitisire vantu vaKarunga?

¹¹ Apa Josuwa ga tamekere kupitisira Vaisraeli, age kwa kere noveta zoNonkango daKarunga. Jehova kwa tanterere Josuwa asi: “O di tede mutenya nomasiku, asi o sikise mo nawa-nawa nayinye eyi va tjangera mo.” (Jos. 1:8) Konyima vahompa ava ngava pangere vantu vaKarunga nawo kwa rugene yokulifana. Awo kwa va pangerere va rese Veta nkenye ezuva nokuzitjangurura ntani ‘nokulimburukwa nawa-nawa kwankenye eyi va uyunga mo.’—Resa Deuteronomium 17:18-20.

¹² Ngapi omu Nonkango daKarunga da vaterere vagara ava ngava pitisire? Tu tareni sihonena sahompa Josiya. Konyima tupu apa va gwene buke zoVeta, hamutjanga gwaJosiya makura ta zi mu resere. * Yisinke ga rugene hompa Josiya? “Ano hompa apa ga zuvhire nonkango domobuke zoVeta, makura ta taura yikoverero yendi neguwo.” Nye koyili hena yimwe eyi ga rugane. Age kwa zonagwire po yikarunga nayinye yoyimpempa mosirongo ntani ta tura po mawapaiko gokudana sipito sosinene soPaska. (2 Vah. 22:11; 23:1-23) Mokumona asi Josiya novampitisili vamwe wovalimburukwi kwa kweme mavyukiso goNonkango daKarunga, awo va vhulire kutura po marunduruko nokufwatwilira mavyukiso aga va pere vantu vaKarunga. Marunduruko ogo kwa vaterere vantu vaKarunga va rugane kuliza nompango zendi.

13. Elisigo musinke lya kere po pokatji kava ngava pitisire vantu vaKarunga ntani wonomuhoko dapeke?

¹³ Vahompa vena wovalimburukwi kwa lisigire novampitisili wonomuhoko dapeke ngava kwama magano govantu. Pasihonena, vampitisili woVakanani novantu vawo ngava rugana yininke yokunyata ngwendi pokulirara mugara nomugara ndi mukadi nomukadi ndi nogu gekoro ndi nosimuna ndi kuzamba vana vawo ntani kukarera yikarunga yoyimpempa. (Lev. 18:6, 21-25) Ntani hena vampisitili woVababironi nava woVaegipite kapi ngava kwama noveta doukuhuki edi Karunga ga pere Vaisraeli. (Num. 19:13) Mokulisiga, vantu vaKarunga va mwene omu vampitisili vawo ngava va korangeda va kare vana kuhuka parutu nopamukaro ntani va nyokere po yikarunga yoyimpempa. Oyo kwa geve umbangi asi Jehova yige ga gendesere vagara owo.

14. Morwasinke Jehova nga piswire vamwe ava ngava pitisire vantu vendi?

 ¹⁴ Vahompa vamwe ava ngava pangere vantu vaKarunga vanare kapi ngava kwama mavyukiso gendi. Owo ngava dili kulimburukwa Jehova ngava nyoka kutambura evatero lyompepo zendi zokupongoka neli lyovaengeli ntani lyoNonkango dendi. Poyiruwo yimwe, Jehova nga pisura ndi nga pinganesere po vampitisili wopeke. (1 Sam. 13:13, 14) Konyima Jehova ga ya horowere mupitisili gokusikilira mo kupitakana vagara navenye owo.

15. (a) Ngapi omu vaporofete va yi likidire asi nga wiza mupitisili gokulikerera? (b) Yilye mupitisili gokulikerera ogu va pumbire?

¹⁵ Jehova kwa pumbire asi nga horowora mupitisili gokulikerera mokupitisira vantu vendi. Mosesa kwa tanterere Vaisraeli asi: “Mokatji keni novanavazinyeni HOMPA Karunga nga tumba mo muporofete gokufana nge, ngomu mu limburukwe.” (Deut. 18:15) Jesaya kwa pumbire asi muntu ogo nga kara “mupangeli nomugendesi.” (Jes. 55:4) Ntani Ndaniyera kwa tjenge kuhamena ewizo ‘lyomuhoroworwagendesi gwaKarunga.’ (Ndan. 9:25) Konyima, Jesus kwa litumbwire mwene asi “mupitisili” govantu vaKarunga. (Resa Mateusa 23:10.) Varongwa vaJesus kwa mu kweme, ntani awo va yi pulire asi age Jehova ga mu horowere. (Joh. 6:68, 69) Yisinke ya va ninkisire va yi pure asi Jesus Kristusa yige ga ruganesere Jehova mokupitisira vantu vendi?

16. Yisinke ya likidire asi Jesus kwa mu vaterere mpepo zokupongoka?

¹⁶ Mpepo zokupongoka kwa vaterere Jesus. Apa Jesus va mu kuhwire, Johanesa Mukuhwi kwa mwene ‘eguru tali zeguruka, mpepo tazi mu hegumukire ngwendi nkutji.’ Kutunda opo, ‘mpepo tazi mu twara komburundu.’ (Mar. 1:10-12) Apa ga kere Jesus pevhu, mpepo zokupongoka kwa mu vaterere a rugane yitetu nokuronga vantu. (Yirug. 10:38) Ntani hena, mpepo zokupongoka za vaterere Jesus a likide yikara ngwendi eharo, ruhafo, ntani epuro lyenene. (Joh. 15:9; Heb. 12:2) Kapi pwa kere hena mupitisili gumwe ogu za vaterere mpepo zokupongoka ngwendi Jesus. Umbangi owo kulikida asi Jesus kwa mu horowere Jehova.

17. Yisinke va rugene vaengeli mokuvatera Jesus?

¹⁷ Vaengeli kwa vaterere Jesus. Konyima tupu apa Jesus va mu kuhwire, “vaengeli tava wiza tava ya kerere Jesus.” (Mat. 4:11) Ano masiku komeho va ka mu dipage, “muengeli ta tundu meguru ta mu monekere, makura ta mu koreke.” (Ruk. 22:43) Jesus ga yi divire asi Jehova na tuma vaengeli va ya mu  vatere mokusikisa mo mpango zaKarunga.—Mat. 26:53.

18, 19. Ngapi Nonkango daKarunga da vaterere Jesus meparu ntani pokuronga vantu?

¹⁸ Nonkango daKarunga kwa vaterere Jesus. Kutunda apa ga tamekere kuzuvhisa, Jesus kwa kweme mavyukiso gomoMatjangwa. (Mat. 4:4) Age kwa limburukwire Nonkango daKarunga dogoro konomfa dendi. Komeho a ka fe age kwa uyungire nonkango edi va pumbire kuhamena Mesiyasa. (Mat. 27:46; Ruk. 23:46) Nye vampitisili womaukarelikarunga posiruwo sina kwa nyokere kutambura Nonkango daKarunga apa nga di li rwanesa nonompo dawo. Kuhamena vampitisili owo, Jesus kwa temwininine nonkango daJehova edi ga uyungire kupitira momuporofete Jesaya asi: “Ame Karunga muhoko ogu komarungu kwelike agu fumadekesa nge, nye nomutjima dawo ure name. Neisi ayi va kwafa pokufumadeka nge, morwa awo kuronga Veta zosintu ngwendi asi zaKarunga.” (Mat. 15:7-9) Jehova kapi ngano ga vhulire kuhorowora vagara vangoso va pitisire vantu vendi?

¹⁹ Jesus nga ruganesa Nonkango daKarunga pokuronga vantu. Apa vampitisili womaukarelikarunga ngava mu patanesa, age kapi nga va limburura kuliza nonondunge damwene ndi eyi ga divire meparu. Nye age nga va limburura kuliza noMatjangwa. (Mat. 22:33-40) Ntani mevango lyokutantera vantu kuhamena eparu lyendi lyemeguru ndi unsitwe, ‘age kwa mahwire nondunge dawo va zuvhe matjangwa.’ (Ruk. 24:32, 45) Jesus kwa here Nonkango daKarunga ntani age kwa here kutantera ko wopeke.

20. (a) Ngapi omu Jesus ga fumadekere Karunga? (b) Yisinke aga tu rongo malisigo pokatji kaJesus naHerodesa Agilipa?

²⁰ Nampili ngomu vantu va tetukire ‘nonkango donongwa’ edi ga va rongere Jesus, age kwa pere mfumwa kwaJehova ogu ga mu rongere. (Ruk. 4:22) Apa mugara gongawo ga here kufumadeka Jesus pokumutumbura asi “Murongi gomuwa,” Jesus kwa linunupikire nokumulimburura asi: “Yisinke yokutumbwira nge asi ni muwa? Patupu ogu ga wapa, ntudi gumwe tupu, Karunga googo.” (Mar. 10:17, 18) Jesus kwa lisigire naHerodesa Agilipa ogu ga ya kere hompa konyima zonomvhura ntantatu. Posilika simwe, Herodesa kwa dwere “mudwaro gwendi gosiuhompa.” Ano mbunga tazi zigire asi: “Ezwi eli lyaKarunga, kapisi lyomuntu!” Makura Herodesa ta linenepeke. Yisinke ya kweme ko? “Ga liharuka ko, muengeli ana di mu gwana, maginyo taga mu li, makura ta fu, yeeyi kapi ga fumadekere Karunga.” (Yirug. 12:21-23) Ayo ya geve umbangi asi Jehova kapi ga horowere Herodesa a kare mupitisili. Nye pwa kere umbangi wokupama asi Jesus kwa mu horowere Karunga ntani age nkenye apa nga fumadeke Jehova ngoMupitisili gomunene.

21. Mapuro musinke ngatu ka zogera mosirongwa sokukwama ko?

²¹ Jesus kapi tupu ga kere mupitisili nomvhura dongandi. Konyima zevhumbuko lyendi age kwa tanterere varongwa vendi asi: “Nonkondo nadinye demeguru, nedi depevhu nyame va di pa. Tareni, ame neni ngani kara dogoro nokouhura wouzuni.” (Mat. 28:18-20) Ngapi omu Jesus na pitisira vantu vaKarunga age opo kuna kara meguru? Wolye ava a ruganesa Jehova pevhu va karere po Jesus mokupitisira vantu vendi? Ntani ngapi omu Vakriste na va vhura kudimburura owo va mu karera po? Ngatu ka gwana malimbururo mosirongwa sokukwama ko.