1. Mauwa musinke sa gava sizoweseso?

SIZOWESESO sonzambo zaJesus Kristusa kwa reta matungiko gomanzi. Sizoweseso kuna kara ewapaiko eli ali gava mpito kovana vaAdamu wovalimburukwi mokuyahamena mepata lyaKarunga. Ntani sizoweseso kutupa hena mpito zokukaparuka narunye noruhafo. Sizoweseso saKristusa kapi tupu sa gava mauwa kovantu wovalimbukwi. Apa Jesus ga fire noulimburukwi age kwa sikisire mo yininke yomulyo eyi ya kundama yisitwa nayinye.—Heb. 1:9.

2. (a) Yininke musinke ga tumbwire Jesus mekanderero eyi ya kundama yisitwa nayinye? (Tara efano.) (b) Yisinke natu ka konakona mosirongwa esi?

² Nomvhura mbali komeho Jesus a ka fe nokukagava nzambo zosizoweseso, age kwa rongere varongwa vendi va kanderere asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.’ (Mat. 6:9, 10) Mokutuvatera tu kare norupandu  rorunene kosizoweseso, tatu ka konakona omu sa likwatakana nepongoro lyedina lyaKarunga noUhompa waKarunga ntani nesikisomo lyositambo saKarunga.

3. Yisinke lya kwatera mo edina lyaJehova, ntani ngapi omu Satana ga swawire edina olyo lyokupongoka?

³ Sininke sokuhova ga tumbwire Jesus mekanderero lyosihonena kuna kara kupongora edina lyaKarunga. Edina lyaJehova kwa kwatera mo yikara yendi nayinye nefumano lyendi ntani upongoki wendi. Sikando simwe apa Jesus ga kanderere, age kwa tumbwire Jehova asi: “Tate goKupongoka.” (Joh. 17:11) Mokumona asi Jehova kwa pongoka, nompango nonoveta dendi nado kwa pongoka. Nye mosikunino saEdeni, Satana kwa rwanesere unankondo waKarunga wokupangera vantu. Pokutanta yimpempa kuhamena Jehova, Satana kwa swawire edina lyaKarunga lyokupongoka.—Gen. 3:1-5.

4. Ngapi omu Jesus ga pongwere edina lyaKarunga?

⁴ Jesus kwa fumadekere edina lyaJehova. (Joh. 17:25, 26) Age kwa rugene ko yuma mokupongora edina olyo. (Resa Episarome 40:8-10.) Kupitira momparukiso zendi, Jesus ga yi likidire asi nompangera daJehova kwa hungama ntani ado kuretera mauwa vantu. Nampili ngomu Jesus ga fire nomfa donondona, age kwa twikilire kulimburukwa koGuhwe. Pokulimburukwa, Jesus kwa likidire asi muntu gokusikilira mo kuvhura a limburukwe nompangera daKarunga.

5. Ngapi omu natu pongora edina lyaKarunga?

⁵ Ngapi natu yi likida asi twa hara edina lyaJehova? Kupitira monkareso zetu. Jehova kuna hara tu kare vapongoki. (Resa 1 Peturusa 1:15, 16.) Eyi kwa kwatera mo kukarera Jehova gelike ntani kumulimburukwa nomutjima nagunye. Nampili kuna kutuhepeka, twa hepa kuhetekera ko kulimburukwa nompango nonoveta dendi. Pokurugana yirugana yoyiwa, ose ngoso kuna kupulisira site setu si teme ano ayo kureta eyererepeko kedina lyaJehova. (Mat. 5:14-16) Ngovantu wokupongoka, ose kuyilikida momparukiso zetu asi noveta daJehova nongwa ano Satana munayimpempa. Apa atu lipuka, ose kulitezurura nokusiga nkareso ezi azi swaukisa Jehova.—Epis. 79:9.

6. Morwasinke Jehova a tu tekwire asi vahungami nampili ngomu twa dira kusikilira mo?

⁶ Jehova kudongwenena po nonzo dava ava tura epuro mosizoweseso. Age kutambura ava ava ligava kwendi ngovakareli vendi. Jehova kutambura Vakriste wovagwavekwa ngovana vendi ano ‘donzwi dapeke’ ngovakaume vendi. (Joh. 10:16; Rom. 5:1, 2; Jak. 2:21-25) Nampili ngesi, sizoweseso kutuvatera tu kare nelikwatakano lyewa naGuhyetu ntani tu pongore edina lyendi.

7. Mauwa musinke ngau reta Uhompa waKarunga kupitira mosizoweseso?

⁷ Mekanderero lyosihonena, Jesus kwa hundilire Karunga asi: “Uhompa woge au wize.” Ngapi omu sizoweseso sa likwatakana noUhompa waKarunga? Aso kwa gava mpito mokupongaika vantu wokusika po-144 000 yipo ngava ka kare vahompa novapristeli kumwe naKristusa meguru. (Ehor.  5:9, 10; 14:1) Monomumvho eyovi, Jesus nava nga ka pangera nawo moUhompa waKarunga, ngava ka pa vantu wovalimburukwi mauwa aga sa reta sizoweseso. Evhu ngali ka kara paradisa ano vantu navenye wovalimburukwi ngava ka sikilira mo, makura vakareli vaJehova vemeguru nava vepevhu ngava ka kara epata limwe. (Ehor. 5:13; 20:6) Jesus nga ka myona mutwe gezoka nokukagusa po urwanesi ou ga retesa po Satana.—Gen. 3:15.

8. (a) Ngapi omu Jesus ga vaterere varongwa vendi va mone mulyo goUhompa waKarunga? (b) Ngapi omu atu kwatesa ko Uhompa naina?

⁸ Apa ga ya kere pevhu, Jesus kwa vaterere varongwa vendi va mone mulyo goUhompa waKarunga. Konyima tupu apa ga gwene ekuho, Jesus kwa divisire ‘mbudi zongwa zoUhompa waKarunga’ moyitata yokulisiga-siga. (Ruk. 4:43) Komeho tupu a tengure meguru, Jesus kwa tanterere varongwa vendi va zuvhise ‘dogoro kooku wa ka twa uzuni.’ (Yirug. 1:6-8) Kupitira moyirugana yokuzuvhisa, vantu uzuni mudima kugwana mpito zokulironga kuhamena sizoweseso nokulimburukwa koUhompa waKarunga. Naina, ose kukwatesa ko Uhompa pokuvatera vamumbya vaKristusa va sikise mo sirugana sokuzuvhisa mbudi zongwa zoUhompa uzuni mudima.—Mat. 24:14; 25:40.

9. Morwasinke natu karera nehuguvaro asi Jehova nga ka sikisa mo sitambo sendi kovantu?

⁹ Yisinke ga tembe Jesus apa ga tente asi: ‘Mpango zoge ava zi sikise mo’? Jehova age Musiti. Nkenye eyi a tanta kusika mo. (Jes. 55:11) Jehova kapi nga pulisira urwanesi waSatana u kondere sitambo sendi kovantu. Kutunda ketameko, sitambo saJehova kwa kere asi evhu va li zwide novana wokusikilira mo vaAdamu naEva. (Gen. 1:28) Ngano Adamu naEva kwa fire va hana vana, ngano kapi sa sikire mo sitambo saKarunga. Yipo nye, konyima zapa Adamu naEva va zonene, Jehova kwa va pulisilire va rete vana. Kupitira mosizoweseso, Karunga kwa gava mpito kwanavenye ava ava likida epuro ngava ka sikilire mo nokukaparuka narunye. Jehova kwa hara vantu ntani mpango zendi kovantu wovalimburukwi kuna hara asi va paruke kuliza nositambo sendi.

10. Ngapi omu vafe ngava ka gwanena mo uwa mosizoweseso?

¹⁰ Ngapi kuhamena vantu ava va fa va hana kugwana mpito zokudiva Jehova nokumukarera? Sizoweseso sa gava mpito kovafe yipo ngava ka va vhumbure. Guhyetu gemeguru nga ka va pindura koufe nokukavapa mpito zokukalironga sitambo sendi yipo va ka gwane mwenyo gwanarunye. (Yirug. 24:15) Jehova kwa hara vantu va paruke narunye. Mokumona asi yige Ntundiliro zomwenyo, age Guhya gwanavenye ava ngava ka vhumbura koufe. (Epis. 36:9) Yiyo nye Jesus ga tu rongera tu kanderere asi: “Guhyetu gemeguru.” (Mat. 6:9) Jehova kwa pa Jesus situmbukira somulyo sokukavhumbura vafe. (Joh. 6:40, 44) Jesus yige “evhumbuko nomwenyo” ano moParadisa nga ka sikisa mo situmbukira sendi oso.—Joh. 11:25.

11. Yisinke mpango zaKarunga ‘kemukurumbunga’?

¹¹ Jehova kwa hara vantu navenye ngava ka gwanene mo mauwa, morwa Jesus kwa tente asi: “Nkenye ogu a sikisa mo mpango zaKarunga, yige mumbyange, yige mpanzange,  yige nane googo.” (Mar. 3:35) Azo kuna kara mpango zaKarunga asi “emukurumbunga” lyovantu wokutunda monomuhoko nomomaraka nomomarudi nagenye va kare vakareli vendi. Ava ava tura epuro mosizoweseso saKristusa nokurugana mpango zaKarunga ngava zigira asi: “Eparu lyetu kwa tunda kwaKarunga gwetu ogu ana hingire kosipundi souhompa nokoNzwigona!”—Ehor. 7:9, 10.

12. Ngapi omu sitambo saJehova kovantu va si likida mekanderero lyosihonena?

¹² Sitambo saJehova kovantu wovalimburukwi kwa si likida mekanderero lyaJesus lyosihonena. Kuliza nekanderero olyo, twa hepa kulitura mo unene mokupongora edina lyaJehova. (Jes. 8:13) Edina Jesus kutanta asi “Jehova Muzowoli,” ntani ezoworo lyetu kupitira mosizoweseso kureta mfumwa neyererepeko kwaJehova. Uhompa waKarunga ngau ka pa vantu wovalimburukwi mauwa aga sa reta sizoweseso. Yosili, ekanderero lyosihonena kutupa ehuguvaro asi kwato eyi ngayi kondera sitambo saKarunga mokusika mo.—Epis. 135:6; Jes. 46:9, 10.

13. Yisinke atu likida apa atu gwana ekuho?

¹³ Nkedi zimwe omu natu likida rupandu kosizoweseso kuna kara pokuligava kwaJehova morwa epuro lyetu mosizoweseso ntani nokugwana ekuho. Pokugwana ekuho ayo kulikida asi ose kwaJehova “twa hamena.” (Rom. 14:8) Apa atu gwana ekuho, ose kuhundira kwaKarunga a tu pe ezwi lyewa lyomomutjima. (1 Pet. 3:21) Jehova kulimburura ehundiro olyo  pokuruganesa nzambo zaKristusa. Ose twa kara nehuguvaro asi nga ka tu pa nayinye eyi ga tumbwidira.—Rom. 8:32.

14. Morwasinke Jehova ga tu pera mpangera zokuhara vakwetetu?

¹⁴ Monkedi musinke hena atu likida rupandu kosizoweseso? Mokumona asi Jehova kurugana nayinye morwa eharo, azo mpango zendi asi vakareli vendi navenye va likide sikara seharo. (1 Joh. 4:8-11) Ose kulikida asi ose ‘vana vaGuhyetu gemeguru,’ pokuhara vakwetetu. (Mat. 5:43-48) Yipango yivali yoyinene po kuna kara asi kuhara Jehova ntani kuhara vakwetetu. (Mat. 22:37-40) Nkedi zimwe zomulyo omu atu likida asi twa hara vakwetetu kuna kara pokulimburukwa mpangera zokuzuvhisa mbudi zongwa zoUhompa waKarunga. Apa atu likida eharo kovakwetetu, ose ngoso kuna kuhonena Karunga. Apa atu sikisa mo mpangera zokuhara vakwetetu unene po vanavazinyetu, eharo lyetu lyokuhara Karunga nga li ‘sikilira mo.’—1 Joh. 4:12, 20.

15. (a) Mauwa musinke tuna kugwana ngesi kwaJehova? (b) Mauwa musinke tuna kundindira?

¹⁵ Ose kugwana egusiropo lyononzo detu nsene tu tura epuro mosizoweseso. Nonkango daKarunga kwa tumbwidira asi nonzo detu kuvhura va di ‘dongonone po.’ (Resa Yirugana 3:19-21.) Ngomu tuna yi zogere ketameko, kupitira mosizoweseso, Jehova kuninka vakareli vendi wovagwavekwa va kare vana vendi. (Rom. 8:15-17) Ose twa hamena ‘kononzwi dapeke,’ Jehova kuna kutuzigida ngatu hame kepata lyendi. Apa ngatu ka sikilira mo nokukapita meheteko lyokuhulilira, Jehova ntani nga ka tu tambura ngovana vendi vepevhu. (Rom. 8:20, 21; Ehor. 20:7-9) Eharo lyaJehova kovana vendi kapi ngali haga. Mauwa gosizoweseso kapi nga ga ka haga. (Heb. 9:12) Uhwi ou ngau ka twikira kukakara nomulyo. Kwato gokuvhura kuutugusa.

16. Kosinke sizoweseso sa tu mangurura?

¹⁶ Nsene tu litezurura nonzo detu, kwato eyi nga vhura kurugana Muzonaguli mokutukondera tu hame kepata lyaJehova. Jesus kwa wizire pevhu nokuyafira vantu “rumwe tupu.” Yipo nye, sizoweseso kwa si futa rumwe tupu ntani ngasi karerera. (Heb. 9:24-26) Aso kwa gusa po nzo ezi twa pinga kwaAdamu. Ose kupandura konzambo zaKristusa, morwa va tu mangurura mo mouzuni waSatana ntani kapi atu tjira hena nomfa.—Heb. 2:14, 15.

17. Ngapi ono kulizuvha keharo eli ga kara nalyo Jehova?

¹⁷ Matumbwidiro gaKarunga ngaga ka sika mo. Ngamoomu adi dili kurunduruka noveta edi ga tura po, Jehova nage kapi a runduruka. (Mara. 3:6) Jehova kapi tupu ga tu pa uhwi weparu welike. Age hena kwa tu hara. Bibeli kwa tanta asi: “Eharo eli ga tu hara Karunga twa li diva, ose hena twa li pura. Karunga yige eharo.” (1 Joh. 4:16) Evhu nalinye ngali ka kara paradisa, ano vantu navenye ngava ka honena Jehova nokulihara-hara. Ngano natuvenye tu kwatese ko yisitwa yemeguru yaKarunga youlimburukwi pokutanta asi: “Ehamberero nouyerere nounongo nepando nefumano nononkondo nepangero lyaKarunga gwetu narunye nanarunye! Amen.”—Ehor. 7:12.