Mapuro gokutunda kovaresi
Mupositoli Paurusa kwa tjenge asi Jehova “nokumutarerera si asi ga mu gwane maheteko aga ga pitakana nonkondo deni.” (1 Kol. 10:13) Ayo ngoso kutanta asi Jehova kutokora komeho zosiruwo maudigu aga natu vhura kulididimikira ndi?
Nsene asi yimo ya kara ngoso, tu tareni omu ngano ayi kundama eparu lyetu. Pasihonena, munazinyetugara ogu munwendi ga lidipagere kwa pulire asi: ‘Ngoso Jehova ga divire komeho zosiruwo nokutokora asi name namukadange ngatu vhura kulididikikira nomfa damunwetu ndi? Ayo ngoso kwa horokere morwa Karunga ga tokwere asi ngatu vhura kulididimikira ndi?’ Pwa kara umbangi ou au likida asi Jehova yige a gendesa yininke eyi ayi tu horokere ndi?
Ngomu natu ka konakona nonkango daPaurusa domo-1 Vakolinte 10:13 natu ka dimburura asi moBibeli kapi mwa kara umbangi ou au likida asi Jehova kutokora komeho zosiruwo maudigu aga natu vhura kulididimikira. Tu zeni tu tare nokonda ne eyi natu uyungira ngoso.
Konda zokuhova, Jehova kwa pa vantu umanguruki wokutura po matokoro. Age kuna tu harere tu horowore nyamwetu eyi tuna hara kurugana. (Deut. 30:19, 20; Jos. 24:15) Nsene tu tura po matokoro aga aga hafesa Jehova, kuvhura tu huguvare mwendi atu pitisire. Nye nsene tu tura po matokoro gomadona, ose ngatu ligwanekera noyitundwamo yoyidona. (Gar. 6:7) Nsene asi Jehova kutokora asi maudigu musinke natu ligwanekera nago, kapi tatu kara noumanguruki wokutura po matokoro.
Konda zauvali, Jehova kapi atu popere ‘komahudi aga aga horoka.’ (Muud. 9:11) Ehudi kuvhura kuhoroka pwankenye evango ndi siruwo twa hana kuyindindira. Jesus kwa uyungire kuhamena kehudi omu va fire vantu 18 apa rwa va gwililire ruhungu ntani age kwa yi likidire asi kapi va fire morwa asi yimo ga yi tokwere Karunga. (Ruk. 13:1-5) Kapi ya wapa kugazara asi Karunga kutokora komeho zosiruwo asi yilye na paruka ndi ogu na fa nsene ehudi lina horoka.
Konda zautatu, nkenye gumwe gwetu kwa hamena mo monompata doulimburukwi. Diworoka asi Satana kwa patanesa ulimburukwi wovantu ava ava kerere Jehova. Age kwa tente asi nsene tu ligwanekera nomaudigu ose ngatu hageka Joba 1:9-11; 2:4; Ehor. 12:10) Nsene Jehova a kandana po maudigu ga dire kutuhorokera morwa asi kapi natu vhura kugalididimikira, ayo nayi kwatesa ko nonkango daSatana edi ga uyungire asi ose kukerera Jehova morwa kugwanena mo mauwa.
kukarera Jehova. (Konda zaune, Jehova kapi a tokora kudiva nayinye eyi ayi horoka komeho. Karunga nsene ana hara kuvhura a dive eyi nayi horoka komeho. (Jes. 46:10) Nye Bibeli kulikida asi kapi a tokora kudiva nkenye eyi nayi horoka komeho. (Gen. 18:20, 21; 22:12) Jehova age muhungami ntani ga kare neharo, age kapi ga hara kutugusa umanguruki wetu wokutura po motokoro.—Deut. 32:4; 2 Kol. 3:17.
Yisinke ga tembe Paurusa apa ga uyungire asi: ‘Karunga nokumutarerera si asi ga mu gwane maheteko aga ga pitakana nonkondo deni’? Paurusa kwa singwenene eyi a rugana Karunga apa atu kara momaheteko nye kapisi komeho zomaheteko. * Nsene tu huguvara mwaJehova age ngatu vatera tu lididimikire maudigu getu. (Epis. 55:22) Tatu ka tara nokonda mbali eyi Paurusa ga uyungilire nonkango odo.
Konda zokuhova, maudigu aga atu ligwanekere nago “gaaga ga hwa kugwana vantu” navenye. Mokumona asi ose kuna kuparuka mouzuni waSatana, ngatu ligwanekera nomaudigu. Nye nsene tu huguvara mwaKarunga ose ngatu vhura kulididimikira maudigu ogo. (1 Pet. 5:8, 9) Ketamekero lyetjangwa lyo-1 Vakolinte 10, Paurusa kwa tumbwire maudigu ndi maheteko aga va ligwanekerere nago Vaisraeli momburundu. (1 Kol. 10:6-11) Vaisraeli owo va huguvarere nokulimburukwa Jehova va vhulire kulididimikira maudigu ogo. Nye yikando yine, Paurusa kwa uyungire asi “vamwe” kapi va limburukwire. Vaisraeli vamwe va gwililire momadowo morwa kapi va huguvarere mwaKarunga.
Konda zauvali, “Karunga mulimburukwi.” Pokukonakona yihorokwa omu Karunga ga pakera mbili vakareli vendi, tatu dimburura asi age kulikida eharo lyendi lyanarunye ‘kwa va va mu hara oku tava sikisa mo yipango yendi.’ (Deut 7:9) Yihorokwa oyo kulikida asi Karunga nkenye apa kusikisa mo matumbwidiro gendi. (Jos. 23:14) Mokumona eyi ga rugene nare, owo va hara Karunga nokumulimburukwa kuvhura va kare nehuguvaro asi mwankenye maudigu age nga sikisa mo matumbwidiro gendi aga gavali: (1) Age kapi nga tarerera udigu u va gwane dogoro pontambo ezi nava dira kuvhura kulididimikira ntani (2) age ngava ‘wapaikira evega lyokugahenduka.’
Jehova ‘kutukwafa ndi kutuhengagwida momaudigu getu nagenye’
Ngapi Jehova a wapaikire ava va mu huguvara evega lyokuhenduka maudigu? Age pamwe kuvhura kugusa po udigu. Nye diworoka nonkango daPaurusa asi: “Age [Karunga] kumuwapaikira evega lyokugahenduka, mu vhure kugadiinina po.” Momaukaro gomanzi age kuwapaika evega “lyokugahenduka” pokutupa eyi twa hepa yipo yi tu tompoke mokugalididimikira. Tara nonkedi dimwe omu Jehova na vhura kutuwapaikira evega lyokugahenduka.
-
Age ‘kutukwafa ndi kutuhengagwida momaudigu getu nagenye.’ (2 Kol. 1:3, 4) Jehova kutuhengagwida kupitira moNonkango dendi nomompepo zokupongoka ntani monondya dopampepo edi atu pe mukareli gokulimburukwa.—Mat. 24:45; Joh. 14:16, Rom. 15:4.
-
Age kuvhura kutupa mpepo zokupongoka zi tu pitisire. (Joh. 14:26) Nsene momaudigu, mpepo zokupongoka kuvhura zi tu vatere tu diworoke yihorokwa nonompango domoBibeli yipo tu ture po matokoro gomawa.
-
Age kuvhura kuruganesa vaengeli vendi va tu vatere.—Heb. 1:14.
-
Age kuvhura kuruganesa vapuli vakwetetu ava nava vhura ‘kutukwafa’ ndi kutuhengagwida kupitira mononkango nomoyirugana.—Koros. 4:11.
Yisinke tuna lirongere ko kononkango daPaurusa mo-1 Vakolinte 10:13? Jehova kapi a tokora maudigu aga natu ligwanekera nago. Nye nsene tu ligwanekere nomaudigu, tu kareni nehuguvaro asi: Age kapi nga pulisira maudigu ga pitakane nonkondo detu ntani age ngatu wapaikira evega lyokugahenduka yipo tu ga lididimikire nsene tu huguvara mwendi. Odo kuna kara sili nonkango dehengagwido.
^ para. 9 Nkango zoRugereka ezi va toroka “maheteko” kuvhura zi tante hena asi “maudigu.”