OTATE Arthur Guest apa va kere vadinkantu kwa here kukara mupitisili mongereka zoVamatodiste. Nye tava ya rundurura magano gawo apa va resere yimbapiratjangwa yoValirongi woBibeli nokutameka kuponga kumwe nawo. Momvhura 1914 yipo va gwene ekuho awo nomvhura dawo 17. Siruwo oso yita yokuhova youzuni yina tameke makura tava va zigida va ze koukwayita. Apa va nyokere, tava va tomene makwedi murongo modorongo zomoKanada. Apa va ka pwege mo, tava tameke kurugana uzuvhisi wokukarerera.

Momvhura 1926 otate yipo va kwere munazinyetukadi Hazel Wilkinson, ogu ozina va gwene usili momvhura 1908. Ame kwa hampurukire nge momazuva 24 Kudumogona 1931. Ose tuvane va tu reta ano ame sikwamambeli. Epata lyetu kwa litulire mo unene mokukarera Jehova ntani eharo eli va kere nalyo otate koBibeli nose lya tu tumangedere tu hare Nonkango daKarunga. Ose ngatu litura mo mokuzuvhisa tunda embo zende embo.—Yirug. 20:20.

Momvhura 1939, yipo ya tamekere yita yauvali youzuni ano mvhura zokukwama ko yipo va hagekesere yirugana yoNombangi daJehova moKanada. Konosure depangero ngava ninki vanasure va djamene erembe nokudimba rusumo rosirongo. Name namukurwange Dorothy ngava tu pwagesa mo monkondwarongero apa ngava rugana ukareli owo. Ezuva limwe mitili gwetu kwa swawire nge pokuuyunga asi ame egova. Apa twa pwege kosure, vakwetu tava toona nge nokugandera nge pevhu. Nye ehomokero olyo lya nkondopekere etokokomeno lyange ‘lyokulimburukwa unene Karunga, kupitakana vantu.’—Yirug. 5:29.

 Momvhura 1942 mwaPembankuru, apa na kere nonomvhura 11 yipo na gwene ekuho mondama zomema pofarama. Nkenye pepato lyosure ngani rugana uzuvhisi wokuvatera. Mvhura zimwe ame kwa zire novanavazinyetugara vatatu tu ka zuvhisire vagara ava ngava tete yitji momukunda gwaOntario.

Mezuva 1 lyaKudumonkuru momvhura 1949 yipo na tamekere nouzuvhisi wokukarerera. Morwa koBeteli zomoKanada kwa kere ko sirugana setungo tava zigida nge ni ka vatere, ano mezuva 1 lyaSindimba yipo va tambwire nge ni kare moBeteli. Ame kwa ka pere nge sirugana sokunduruka yimbapiratjangwa. Yivike yoyinzi ngani rugana masiku, mokuduruka simbapiratjangwa omu va tjenge mahepeko aga va pitire vantu vaJehova moKanada.

Konyima tani ya rugana moDepartamende zoyirugana yokuzuvhisa. Ame kwa pere nge situmbukira sokupuragera vazuvhisi wokukarerera ava va here kuza kositata Quebec omu mwa kere mahepeko gomanene. Gumwe govazuvhisi owo kwa kere Mary Zazula gomositata, Alberta. Nage namukurwendi Joe kwa nyokere kuhageka kulironga Bibeli, makura yipo va va tjidire mo membo vakondi vawo ava va hamenene kongereka zaOrthodoksi. Momvhura 1951, mwaPembagona yipo va gwene ekuho ano konyima zomakwedi ntazimwe tava tameke nouzuvhisi wokukarerera. Pokusimwitira nawo, na dimbwilire asi Mary kwa here Jehova unene. Yipo na uyungire momutjima asi: ‘Nsene pwato malilimbo gongandi mukadona ogu yige nina hara kukwara.’ Konyima zomakwedi ntane yipo twa likwere momazuva 30 Murongagona 1954. Konyima zosivike, tava tu zigida kedeuro lyosirugana sokudingura nombungakriste, ano ure wonomvhura mbali ose ngatu dingura nombungakriste mositata Ontario.

Ngomu sa lihene sirugana sokuzuvhisa uzuni mudima, tapa kara hepero zovatumwa. Ose twa yi divire asi kuvhura tu ka paruke mwankenye ukaro, morwa twa yikire utenda wounene nonomwe pokwenye moKanada. Momvhura 1956 mwaPembankuru yipo twa ka mene koSikora zaGiliyata ano mwaMangundu yipo va tu tumine koBrazil.

Apa twa ka sikire koBeteli zomoBrazil, yipo twa ka tamekere kukalironga Ruputu. Konyima zokudiva ko nonkango dongandi omu nomulikunda nomuntu ntani nomu no zuvhisa, yipo twa tamekere kuza moyirugana yokuzuvhisa. Ose kwa gwene mavyukiso asi nsene muntu kuna kulikida elituromo twa hepa kumuresera matjangwa aga ga faturura omu ngali ka fana eparu moUhompa waKarunga.  Ezuva lyetu lyokuhova mokuzuvhisa moBrazil, mukadi gumwe kwa purakenene sili nawa, tani mu resere Ehororo 21:3, 4, makura tani pwilire. Rutu rwange kapi simpe rwa yikire upyu wamo ano udigu owo kwa twikilire mwaza siruwo.

Ose kwa ka kere vatumwa mositata Campos, ano ngesi kuna kara mo nombungakriste 15. Apa twa ka sikire mo, amo kwa kere mo kambungagona mositata ntani nembo lyovatumwa omu mwa kere vanavazinyetukadi vane: Esther Tracy, Ramona Bauer, Luiza Schwarz, ntani Lorraine Brookes (ngesi Wallen). Situmbukira sange membo olyo kwa kere sokuvatera kukuhwa yidwara nokukatjava yitare. Ezuva limwe moMandaha apa twa mene kulironga Ruhungu kongurova, koyili eyi ya horokere. Mukadange kwa pwizumukire pesofa oku tatu simwitire. Apa ga kankwire mutwe gwendi asi a pinduke, ezoka tali tundu komusato, ose kwa tukukire unene makura tani li dipaga.

Konyima zokulironga Ruputu ure womvhura, yipo va tulire nge ni kare mutareli gonombunga. Komukunda oku twa tungire kapi twa kere norutjeno, ose ngatu rara pomarwarwa ntani ngatu gendere ponkambe nokarukara. Apa ngatu zi komavango gokoure, ngatu rondo mehina lyorutenda ntani ngatu ruganesa nonzugo dokuhehera. Beteli ngazi tu tumine yimbapiratjangwa yokusika po-800 tu ka yi ruganese mokuzuvhisa. Ngatu zi nkenye apa koposa tu ka simbe mapakote goyimbapiratjangwa tu yi tware oku ngatu rara.

Momvhura 1962 yipo va rugene Sikora zoYirugana yoUhompa moBrazil omu mwa hamenene vanavazinyetugara novanavazinyetukadi wovatumwa. Ure womakwedi ntazimwe ame kwa zire nyamelike ni ka ronge kosikora ozo pwa hana mukadange. Ame kwa rugene sikora ozo moyitata Manaus, Belém, Fortaleza, Recife, ntani Salvador. Ntani na wapaikire sigongi sosinene mevango lya divikwire mositata Manaus. Mvhura zonene kwa nyatekere mema gokunwa ntani kapi twa kere nevango lyewa lyokuterekera. (Momazuva gena, ngava gavere nondya kosigongi.) Yipo na toonenene ngodi mberewa zovakwayita ano yipo va tulire po mawapaiko mokuturetera ko mema gokunwa gomawa ntani tava tumu vakwayita va ya tomeke notenta mbali dononene tu ya terekere mo.

Siruwo oso na ka kere oko, mukadange nga zuvhisire momukunda omu ngava ruganene unangesefa omu mwa kere ava ngava uyunga Ruputu, ano vantu vamo kwa litulire mo unene moyimaliwa. Age kapi ga gwene mpito zokutameka nzogera nampili nagumwe, makura ta tantere Vabeteli vamwe asi: “Ame kapi ngani ka lya ta ko koPortugal.” Nye konyima tatu ya gwana mbilive zokutuzigida tu ze koPortugal. Posiruwo sina yirugana yokuzuvhisa kwa yi silikire mosirongo oso, nye twa tambwire  ezigido olyo nampili ngomu pomuhowo ya tukukisire mukadange.

Ose kwa ka sikire moLisbon nkurusitata saPortugal momvhura 1964 mwaSiwogedi. Vanavazinyetu ngava va hepeke vaporosi womosirongo oso. Morwa oyo, apa twa ka sikire kapi va vhulire kuyatutambura ndi tu ligwane nawo. Siruwo esi twa ndindilire mbapira zokutupulisira tu tunge mosirongo ose kwa futilire nzugo zokurara. Apa twa gwene mbapira zepulisiro, yipo twa heherere nzugo omu twa vhulire kutunga. Konyima zomakwedi gatano momvhura 1965 mwaMurongagona, yipo twa vhulire kutoonena ngodi vanavazinyetu koBeteli zomoPortugal. Ose twa hefe apa twa zire kepongo.

Twa ya dimbwilire asi vaporosi ngava zi nkenye apa momambo govanavazinyetu va ka va homone. Mokumona asi Yinyanga yoUhompa kwa yi pete, mapongo ngava ga ruganene momambo govanavazinyetu. Mafere govanavazinyetu ngava va twara konosasiyona dovaporosi va ka va puragere. Awo ngava va hepeke yipo asi va tumbure madina gowo ngava pitisire mapongo. Ngoyitundwamo, vanavazinyetu yipo va tamekere kulizigida komadina gosiundambo ngwendi José ndi Paulo ga hana asi govaguhyawo. Nose yiyo twa rugene.

Sinka setu sosinene kwa kere sokupa vanavazinyetu nondya dopampepo. Mukadange nga topatopa yirongwa yoRuhungu noyimbapiratjangwa yimwe pokuruganesa ehina lyokunduruka yipepa yoyinzi.

Momvhura 1966 mwaPembagona, yipo mwa kere mpanguro zonene moLisbon. Mbungakriste nazinye zaFeijó omu mwa kere vantu wokusika po-49 kwa va twere kompanguro morwa kwa pongere mokahore-hore. Makura tatu liyomberesa nawo omu nava vhura kukauyunga, ano ame kwa kere ngwendi hahende. Twa yi divire asi kapi natu ka funda mpanguro, nye twa yi dimbwilire asi tayi ka gava umbangi wounene. Hahende gwetu kwa hulisire pokutemwinina nonkango daGamaliyeli goposiruwo sovapositoli. (Yirug. 5:33-39) Mpanguro ezi kwa zi pwagesere moyikwambudi, ano vanavazinyetu 49 vamwe kwa va tomenene modorongo kwedi kumwe ndi kupitakana opo. Ayo ya tu hafesere apa hahende gwetu ga tamekere kulironga Bibeli nokuza komapongo komeho a ya fe.

Momvhura 1966 mwaSindimba, yipo va tulire nge ni kare mutareli goBeteli ano ngani rugana unene kweyi yopaveta. Ose kwa kondjerere kugwana epulisiro lyokurugana ukareli wetu. (Fil. 1:7) Momazuva 18 mwaSindimba 1974 yipo twa  gwene epulisiro. Munazinyetu Nathan Knorr naFrederick Franz, wokomberewa zetu zonene, kwa wizire koPortugal va ya ponge nose pepongo lyenene moOporto ntani moLisbon ano natuvenye kwa ka sikire po-46 870.

Jehova kwa zegurura nonzira dononzi moyirudi yokulisiga-siga omu ava uyunga Ruputu, kukwatera mo Azores, Cape Verde, Madeira, São Tomé ntani Príncipe. Ano momvhura 1988 Beteli zetu va hepere kuzinenepeka. Momazuva 23 gaKudumogona mvhura zoozo munazinyetu Milton Henschel yige ga pitisilire silika sokutungika Beteli zetu ano vakalimo kwa ka sikire po-45 522. Ayo kwa tu hafesere apa vanavazinyetu 20 ava va ya kere vatumwa moPortugal va wizire va ya kare posilika oso.

Ose twa gwanenene mo uwa pokukara novanavazinyetu wovalimburukwi. Ame na lirongerere ko sitwa somulyo apa na zire namunazinyetu Theodore Jaracz tu ka dingure Beteli zimwe. Beteli ozo kwa kere noudigu wounene, ano womoKomitiye zoBeteli ozo va hetekerere ko kuukohonona po. Mokuvavatera, munazinyetu Jaracz kwa tente asi: “Ngesi sigeni mpepo zokupongoka zi mu pitisire.” Sikando simwe apa name namukadange twa zire koBrooklyn tatu ka tokwera namunazinyetu Franz ntani navamwe. Apa va mu pulire a uyunge ko kuhamena nomvhura nadinye edi ga karera Jehova, age kwa tente asi: “Kuna kumukorangeda asi: Kwateseni ko mbunga zaJehova mwankenye ukaro. Yizo zelike mbunga zina kusikisa mo mpangera ezi ga pere Jesus varongwa vendi zokuzuvhisa mbudi zongwa zoUhompa waKarunga!”

Name namukadange twa gwanena mo ruhafo pokukwatesa ko mbunga zaJehova. Ose kutuhafesa apa atu diworoka yiruwo eyi ngatu dingura noBeteli. Madinguro ogo ga tu pere mpito tu likide rupandu kovadinkantu novakondi ava ava kerere Jehova koBeteli nokuvakorangeda va twikire mosirugana sawo.

Ngesi tuna kurupa, name namukadange kuna kukokera konomvhura 90. Mukadange kuvera-vera. (2 Kol. 12:9) Maudigu ga nkondopeka epuro lyetu netokomeno lyetu lyokukara noulimburukwi. Pokugazadara ko keparu lyetu, yosili Jehova kwa tu likida nkenda mononkedi dononzi. *