MOMAZUVA 26 Nsinano 1937 yipo va ya sikire vagara vavali netuwa lyawo moSydney nkurusitata zaAustralia awo vana roroka. Awo kwa zire ure womvhura nokusinga sinano sonokilometa 19 300 monomukunda dokoure. Awo kapi va zire va ka gendagure tupu nokukatara mavango. Nye Arthur Willis naBill Newlands kwa kere vazuvhisi wokukarerera ava va twere mbudi zongwa zoUhompa waKarunga monomukunda dokoure daAustralia.

Nomvhura nadinye dogoro konyima zomvhura 1920, kambunga koValirongi woBibeli * moAustralia ngava zuvhisire tupu monodoropa dopopepi. Nye simpe pwa kere nomukunda dononzi dokoure unene. Vanavazinyetu va yi divire asi vasikuli vaJesus va hepere kugavera umbangi kumuhamena “dogoro nokooku wa ka twa uzuni,” kukwatera mo nomukunda dokoure daAustralia. (Yirug. 1:8) Ngapi omu va vhulire kusikisa mo sirugana oso sosinene? Awo va kere nepuro lyenene asi Jehova ngava tungika makura yipo va tokwere kurugana ko yuma.

Momvhura 1929, nombungakriste dimwe moAustralia kwa rugene matuwa yipo va vhure kukazuvhisira konomukunda dokoure. Matuwa ogo ngava ga singi vazuvhisi wokukarerera wononkondo yipo va vhure kukapita moyitaura nomononzira doudigu ntani kuvhura kugapangera nsene gana teka. Vazuvhisi owo ngava zi komavango oku va dira kuzuvhisira rumwe.

Vazuvhisi wokukarerera ava va dilire kuvhura kuranda matuwa awo ngava ruganesa nombasikora. Pasihonena, momvhura 1932, Bennett Brickell gonomvhura 23 kwa zire ure womakwedi gatano a ka zuvhisire konomukunda dokoure. Pombasikora zendi kwa simbilire po murongero gononguwo noyidwara nonondya ntani nonobuke. Apa makoso ngaga tomoka, age nga twikire norugendo rwendi nokuhuguvara mwaJehova asi nga mu gamena. Age kwa sindikire mbasikora zendi nokilometa 320 momavango omu vagara wovanzi ngava fu morwa enota. Nomvhura 30 edi da ya kweme ko munazinyetu Brickell nga gendi sinano sosire  unene mwaza Australia pokuruganesa mbasikora nosimoto ntani etuwa. Age kwa rongere vantu wovanzi nokutulisa po nombungakriste monomukunda, age hena kwa divikwire ntani vantu kwa mu fumadekere.

Australia kuna kara sirongo omu va kara vatungimo wovasesu, unene po konomukunda dokoure. Nampili ngoso, vantu vaJehova kwa litura mo unene kukazuvhisira vantu wokonomukunda dokoure mosirongo oso.

Vazuvhisi wokukarerera Stuart Keltie naWilliam Torrington kwa litulire mo unene mokuzuvhisa. Momvhura 1933, awo kwa pitire momburudu zaSimpson va ka zuvhisire modoropa Alice Springs ezi za kara moAustralia. Apa etuwa lyawo lya tekere, tava li sigi makura tava ruganesa nongameru va twikire kukazuvhisa nampili ngomu munazinyetu Keltie ga kere sirema. Awo va gwene mo yitundwamo yoyiwa mezuvhiso lyawo apa va ka zuvhisilire mugara ogu ga kere nongesefa zohotera. Mugara ogo gedina Charles Bernhardt konyima ga ya tambwire usili, ta randesa hotera zendi ntani age kwa rugene uzuvhisi wokukarerera gelike ure wonomvhura 15 konomukunda dimwe dokoure moAustralia.

Vazuvhisi owo wokukarerera va hepere uradi mokulididimikira maudigu aga va ligwanekerere nago. Arthur Willis naBill Newlands ava tuna tumbura ketamekero, apa va zire va ka zuvhise konomukunda dokoure moAustralia sikando simwe awo kwa kondjere kusinga nokilometa 32 ure woyivike yivali morwa mvhura zonene kwa ninkisire nzira zi kare netata lyenzi. Poyiruwo yimwe ngava sindike momutenya etuwa lyawo morwa muheke gomunzi ntani ngava singi monomuramba domamanya unene. Apa ngali teka etuwa lyawo, awo ngava gendi ndi ngava singi nombasikora mazuva gongadi va ze komukunda gumwe va ka papare yiparte yetuwa eyi pamwe ngava ndindire yivike yongandi. Momaudigu nagenye ogo, awo kwa likidire nkareso zoruhafo. Arthur Willis kwa temwinine ntanto ezi va tjenge mosifo The Golden Age asi: “Kwato nzira zondigu ndi zonde unene konombangi daJehova.”

Charles Harris muzuvhisi gokukarerera gwanare kwa faturura asi kukazuvhisira ure nokupita momaudigu kwa mu vaterere a hedere pepi naJehova. Age kwa tente asi: “Hansa kukara noyiweka yoyisesu meparu. Nsene asi Jesus nga rara pamwe ponze, nose twa hepa kuhafa mokurara ponze nsene hepero.” Oyo yiyo va rugene vazuvhsi wokukarerera wovanzi. Morwa elituromo lyawo, mbudi zongwa za lihene mosirongo saAustralia ntani awo va vaterere vantu wovanzi va hame koUhompa waKarunga.