1, 2. (a) Yisinke ga tu horwera Jehova? (b) Etumbwidiro musinke atu gwana mwaJesaya 46:10, 11 ntani 55:11?

NONKANGO dokuhoverera moBibeli kwa uyunga ntanto ezi zomulyo asi: “Pomuhowo Karunga kwa sitire eguru nevhu.” (Gen. 1:1) Kapi twa mona yininke nayinye eyi ga sita Karunga ntani kapi twa kwata egano nayinye eyi ga sita. (Muud. 3:11) Nampili ngoso Jehova ga tu horwera sitambo sendi kevhu nokovantu. Evhu kwa lisitire li kare embo lyovantu ava va unga mosihwi saKarunga. (Gen. 1:26) Vantu va hepere kukara vana vaJehova, ano age a kare Guhyawo.

² Ngomu va yi faturura megaununo lyautatu lyaGenesis, sitambo saJehova kwa si donganesere. (Gen. 3:1-7) Nampli ngoso, kapi ya tente asi udigu wina Jehova kapi ga vhulire kuukohonona po. Kwato eyi yokuvhura kukondera sitambo saJehova. (Jes. 46:10, 11; 55:11) Yipo nye, kuvhura tu kare nehuguvaro asi sitambo saJehova nga si ka sika mo kuliza nosiruwo esi ga tura po.

3. (a) Marongo musinke gomulyo aga naga tu vatere tu kwate egano mbudi zomoBibeli? (b) Morwasinke natu ka zogera marongo ogo? (c) Mapuro musinke natu ka zogera?

³ Ose twa diva eyi azi rongo Bibeli kuhamena sitambo  saKarunga kevhu nokovantu ntani situmbukira saJesus Kristusa esi ga kara naso mositambo oso. Ogo kuna kara marongo gomulyo ntani yigo nampo twa hovere kulironga apa twa tamekere kulironga Bibeli. Nose tuna hara kuvatera vantu va dive marongo ogo gomulyo. Ngomu tuna kulironga sirongwa esi ngombungakriste, tuna kara nompito mokuzigida vantu wovanzi koMurarero gwaHompa. (Ruk. 22:19, 20) Ava ngava wiza kosilika oso ngava ya lironga yoyinzi kuhamena sitambo saKarunga. Ngomu Murarero guna kuhedera pepi, tu gazadareni ko mapuro aga natu pura varongwa vetu woBibeli nava wopeke yipo yi va tumangede va ya kare posilika esi somulyo. Tatu ka zogera mapuro gatatu aga: Sitambo musinke ga kere naso Karunga kevhu nokovantu? Yisinke ya horokere? Ntani morwasinke nzambo zaJesus zosizoweseso yizo zelike zokuvhura kukasikisa mo sitambo saKarunga?

4. Ngapi unsitwe au sanseke efumano lyaJehova?

⁴ Jehova Musiti gokutetukisa. Nayinye eyi ga sita ya li karera. (Gen. 1:31; Jer. 10:12) Yisinke natu lirongera ko kuhamena omu unsitwe wa fuura nomu ga u wapaika? Apa atu tara kounsitwe kututetura omu ya kara yisitwa nayinye yaJehova ntani ya kara nositambo somulyo seyi ga yi sitira. Vantu kuvatetura pokutara nombungurura ndi omu mankupi gekefuta aga yerauka ndi omu aga konkomoka mema. Ose kuhafera kutara yisitwa oyo morwa Jehova kwa tu sita nosikara sokunongonona yininke yoyiwa.—Resa Episarome 19:1; 104:24.

5. Yisinke ga rugana Jehova yipo yisitwa yendi yi ruganene kumwe?

⁵ Jehova kwa tura noveta mounsitwe wendi. Age kwa tura po noveta yipo nayinye eyi ga sita yi gende monaruwa. (Epis. 19:7-9) Nayinye eyi ga sita kwa kara nomavega gayo ntani kurugana kuliza nositambo saKarunga. Jehova kwa tura po nompango omu yisitwa yendi nayi ruganena kumwe. Nonkondo devhu nedi dezuva nokakwedi yido adi pangere mukarompepo ogu agu gendesa mema mefuta ntani kuninkisa yinamwenyo yi vhure kuparuka. Yisitwa nayinye, kukwatera mo vantu, kurugana kuliza nonoveta edi. Monkedi omu au rugana unsitwe kulikida asi Karunga ga kara nositambo kevhu nokovantu. Moyirugana yokuzuvhisa, kuvhura tu vatere vantu va dive ogu ga sita nayinye oyo.—Ehor. 4:11.

6, 7. Mauhwi musinke gamwe aga Jehova ga pere Adamu naEva?

⁶ Aso kwa kere sitambo saJehova asi vantu va tunge pevhu narunye. (Gen. 1:28; Epis. 37:29) Age kwa pere oAdamu naEva mauhwi gokulisiga-siga yipo va hafere eparu. (Resa Jakopo 1:17.) Jehova kwa va pere umanguruki wokutura po matokoro nokugazara ntani nokuhafera ukaume nokulihara. Musiti nga uyunga naAdamu nokumupa nompangera omu na likida ulimburukwi wendi. Adamu hena ga lirongere omu ga vhulire kupakera mbili yihepwa yendi nomu na takamesa yikorama nevhu. (Gen. 2:15-17, 19, 20) Jehova kwa sitire oAdamu naEva nevhuliko lyokumakera, lyokukwata, lyokumona, lyokuzuvha ntani neli lyokufumbwira yipo va vhure kuhafera eparu moParadisa. Adamu naEva awo ngano va vhulire kuhafera yirugana yoyinzi nokulironga yininke yokulisiga-siga narunye nanarunye.

 ⁷ Yisinke hena ya hamenene mo mositambo saKarunga? Jehova kwa sitire Adamu naEva vhure kureta vana wokusikilira mo. Sitambo saKarunga kwa kere asi vana vawo nawo va livhare va zwide evhu. Age hena kwa here asi Adamu naEva novakondi ava va ya kweme ko mokuhara vana vawo ngwendi moomu tupu Jehova ga here vana vendi wokuhova wokusikilira mo. Evhu nanayinye ya kara mo kwa yi va pere yi kare yawo.—Epis. 115:16.

8. Morwasinke Karunga ga pere veta Adamu naEva ezi za kara mwaGenesis 2:16, 17?

⁸ Yininke kapi ya gendere po kuliza nomu ga yi harerere Karunga. Morwasinke? Jehova kwa pere veta zoureru kwaAdamu naEva va dive apa wa hulira umanguruki wawo. Age kwa tente asi: “Yiyimwa yokositji nayinye yomosikunino kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera ngo fa lyoolyo ezuva.” (Gen. 2:16, 17) Ayo kapi ya kere udigu kwaAdamu naEva mokukwata egano veta ezi. Ntani kapi za kere udigu kuzilimburukwa morwa mosikunino mwa kere yiyimwa yoyinzi eyi va vhulire kulya.

9, 10. (a) Yisinke Satana ga rundilire Jehova? (b) Yisinke Adamu naEva va tokwere? (Tara efano pepenuno 3.)

⁹ Satana Muzonaguli kwa ruganesere ezoka mokukumbagera Eva a dire kulimburukwa oGuhwe Jehova. (Resa Genesis 3:1-5; Ehor. 12:9) Satana kwa tente yimpempa asi vana vaKarunga kapi va va pulisilire kulya “yiyimwa yokoyitji nayinye yomosikunino.” Monkango zimwe age kwa tente asi: ‘Kuvhura mu rugane nkenye eyi muna hara.’ Ta kumbagere hena Eva asi: “Ndangako asi ngomu fe one.” Satana kwa pukisire Eva a dire kulimburukwa Karunga, pokutanta asi: “Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge.” Monkango zimwe, Satana kwa tente asi Jehova kapi ga va harerere va lye kositji morwa ngano ya va pere nondunge. Satana ta uyunga hena etumbwidiro lyoyimpempa asi: ‘Ngomu fana Karunga, mokudiva yoyiwa neyi yoyidona.’

¹⁰ Adamu naEva va hepere kutokora nsene asi tava limburukwa Jehova ndi tava purakene ezoka. Awo va tokwere mokudira kulimbukwa Karunga. Mokurugana ngoso awo kwa kwatesere ko urwanesi waSatana. Awo kwa nyokere Jehova ngaGuhyawo ntani kapi va kere hena mepopero lyendi.—Gen. 3:6-13.

11. Morwasinke Jehova a dilire kupulisira urwanesi?

¹¹ Adamu naEva kwa zumbanesere eparu lyawo lyokusikilira mo, morwa kwa rwanesere Jehova. Ntani urwanesi wawo wa va ninkisire va kare nonkore daJehova morwa ‘meho gendi kwa pongoka unene mokutara koudona.’ Age kapi a ‘tarerere vantu wovadona.’ (Hab. 1:13) Ngano Jehova kapi ga rugene ko yuma kweyi va rugene oAdamu naEva, ayo ngano ya kundamene yisitwa nayinye. Ntani ngano ya retere masinganyeko kovaengeli novantu va dire kuhuguvara nonkango dendi. Nye Jehova age muhungami, kusikisa mo eyi a uyunga. (Epis. 119:142) Nampili ngomu Adamu naEva va kere noumanguruki, kapi ya tente asi awo kuvhura va teze po veta zaKarunga. Morwa urwanesi wawo, awo va fire nokutengura mevhu omu va tundire.—Gen. 3:19.

12. Yisinke ya horokera ruvharo rwaAdamu?

 ¹² Apa Adamu naEva va lire kositji, Karunga kapi ga va tambwire va kare hena vamwe vemepata lyendi. Age kwa va tjidire mo mosikunino saEdeni ntani kapi va va pulisilire va ka tengwire mo hena. (Gen. 3:23, 24) Mokurugana ngoso, Jehova kwa va sigire va limonene yitundwamo yetokoro lyawo. (Resa Deuteronomium 32:4, 5.) Morwa kudira kusikilira mo awo kapi va vhulire kuhonena yikara yaKarunga nawa-nawa. Adamu kapisi gelike ya kundamene, nye ruvharo rwendi kwa pinga nzo nonomfa nokudira kusikilira mo. (Rom. 5:12) Age kwa ninkisa ruvharo rwendi ru dire kuparuka narunye. Ntani hena, Adamu naEva kapi va vhulire kureta vana wokusikilira mo, ano vana vawo nawo kapi va vhulire kuyareta vana wokusikilira mo. Kutunda apa Satana ga pukisire Adamu naEva, age kwa twikira simpe kupukisa vantu dogoro naina.—Joh. 8:44.

13. Yisinke ana hara Jehova kovantu?

¹³ Eharo lyaKarunga kovantu kapi ali haga. Nampili ngomu Adamu naEva va zonene, Jehova kuna hara vantu va kare nelikwatakano lyewa nendi. Ntani kapi ga hara vantu va fe. (2 Pet. 3:9) Yipo nye, apa tupu Adamu naEva va rwanesere, Karunga kwa tulire po mawapaiko mokuvatera vantu va tengwidire po elikwatakano lyawo nendi, nye ga hana kuteza po noveta dendi. Ngapi omu Jehova ga yi sikisire mo oyo?

14. (a) Kuliza naJohanesa 3:16, ewapaiko musinke ga tulire po Karunga mokutengwidira po elikwatakano lyendi novantu? (b) Epuro musinke natu vhura kuzogera novantu?

¹⁴ Resa Johanesa 3:16. Apa atu zigida vantu koMurarero gwaHompa, ose kuvaresera etjangwa olyo. Nye epuro kuna kara asi: Ngapi omu nzambo zaJesus azi gava mwenyo gwanarunye? Ose kugwana mpito mokuvatera vantu va kwate egano elimbururo kepuro olyo apa atu va zigida koMurarero gwaHompa, napa ava ya kara posilika oso ntani apa atu ka va dingura konyima zosilika oso. Apa vantu ava ya kwata egano kuhamena sizoweseso awo kuyadimburura omu Jehova ga hara unene vantu ntani nounongo ou ga kara nawo. Yitwa musinke kuhamena sizoweseso natu vhura kuvatantera ko?

15. Ngapi Jesus ga lisigire naAdamu?

¹⁵ Jehova kwa geve muntu gokusikilira mo a kare sizoweseso. Muntu ogo ga hepere kulimburukwa kwaJehova nokugava mwenyo gwendi a zowore vantu. (Rom. 5:17-19) Jehova kwa tumine Munwendi gomuhoverera koyisitwa nayinye a wize pevhu. (Joh. 1:14) Yipo nye, Jesus kwa ya kere muntu gokusikilira mo ngwendi moomu ga kere Adamu. Nye age kwa lisigire naAdamu, ngomuntu gokusikilira mo age kwa limburukwire Jehova. Nampili momaudigu gomanene, Jesus kapi ga zonene ndi a teze po noveta daKarunga.

16. Morwasinke sizoweseso sa karera uhwi wouwa?

¹⁶ Ngomuntu gokusikilira mo, Jesus ga zowere vantu kononzo nokonomfa pokuvafira. Age ga vhulire kusikisa mo nayinye eyi ngano ga hepere kurugana Adamu ngomuntu gokusikilira mo (1 Tim. 2:6) Jesus kwa ya kere sizoweseso esi sa gava mpito kovantu ‘wovanzi’ mokukaparuka narunye. (Mat. 20:28) Sitambo saKarunga nga si ka sika mo morwa sizoweseso. (2 Kol. 1:19,  20) Sizoweseso kugava ehuguvaro lyokukaparuka narunye kovantu navenye wovalimburukwi.

17. Mpito musinke atu gwana morwa sizoweseso?

¹⁷ Jehova kwa geve sizoweseso sondiro unene. (1 Pet. 1:19) Age kwa hara unene vantu yiyo ga tumine Munwendi gelike a huru a ya tu fire. (1 Joh. 4:9, 10) Jesus kwa pinganene po muntu gopomuhowo, Adamu. (1 Kol. 15:45) Pokuyirugana oyo, Jesus kapi tupu ga tu pa mpito zokukaparuka narunye, nye hena zokutengura kepata lyaKarunga. Kupitira monzambo zaJesus zosizoweseso, Jehova kuvhura kutambura vantu kepata lyendi ga hana kuteza po noveta dendi. Gazadara tupu omu ngatu ka hafa apa vantu navenye wovalimburukwi ngava ka sikilira mo. Ngapa ka kara uumwe pokatji koruha rwemeguru noruha rwepevhu rwepata lyaKarunga. Makura natuvenye ngatu ka kara vana Karunga.—Rom. 8:21.

18. Siruwoke Jehova nga ka kara “gelike mupangeli goyininke nayinye”?

¹⁸ Urwanesi waSatana kapi wa ninkisire Jehova a hageke kuhara vantu ndi u kondera vantu wokudira kusikilira mo mokulimburukwa Jehova. Kupitira mewapaiko lyosizoweseso, Jehova nga vatera vana vendi navenye ngava kare vahungami. Gazara tupu omu eparu ngali ka kara apa ‘nkenye ogu a mono Muna, nye a mu pure,’ nga ka gwana mwenyo gwanarunye. (Joh. 6:40) Morwa Jehova ga hara unene vantu ntani ga kara nounongo, age nga ka sikisa mo sitambo sendi pokukavatera vantu va ka sikilire mo. Makura Jehova nga ka kare “gelike mupangeli goyininke nayinye.”—1 Kol. 15:28.

19. (a) Nsene twa kara norupandu kosizoweseso, yisinke ngatu rugana? (Tara kakende “ Tu papareni vantu wovawa.”) (b) Yisinke ngatu ka zogera mosirongwa sokukwama ko?

¹⁹ Nsene twa kara norupandu kosizoweseso, ngayi tu tumangeda mokutantera ko wopeke kuhamena mauwa aga nava vhura kugwanena mo mouhwi wosizoweseso. Vantu va hepa kudiva asi, kupitira mosizoweseso, Jehova kwa pa vantu navenye mpito zokukagwana mwenyo gwanarunye. Nye kapisi yiyo yelike nga si sikisa mo sizoweseso. Sirongwa sokukwama ko ngatu ka zogera omu nzambo zaJesus za kohonona po nompata edi ga retesere po Satana mosikunino saEdeni.