1, 2. Yisinke nampo va lipulire vapositoli apa Jesus ga tengwire meguru?

VAPOSITOLI vaJesus kwa sikeme pondundu zoMauzwe va tare keguru. Awo kwa tere hekurwawo nakaume kawo Jesus omu ana kuronda meguru nokumukudumika eremo. (Yirug. 1:9, 10) Ure wonomvhura mbali, Jesus kwa va rongere nokuvakorangeda nokuvapitisira. Nye konyima ta tengura meguru. Yisinke va hepere kurugana?

² Jesus kwa geve mpangera kovasikuli vendi asi: “Ngomu kare nombangi dange moJerusarema nomoJudeya nazinye nomoSamaliya, dogoro nokooku wa ka twa uzuni.” (Yirug. 1:8) Ngapi va vhulire kusikisa mo sirugana oso? Jesus kwa va tumbwidilire asi awo ngava gwana mpepo zokupongoka. (Yirug. 1:5) Nye pwa hepere gokuvhura kugendesa nokupitisira yirugana yokuzuvhisa uzuni mudima. Posiruwo sanare, Jehova kwa ruganesere vagara vamwe mokupitisira vantu vendi. Yipo nye, vapositoli nampo va  lipulire asi: ‘Jehova na horowora gumwe mokutupitisira ndi?’

3. (a) Apa Jesus ga tengwire meguru, etokoro musinke lyomulyo va tulire po vapositoli? (b) Mapuro musinke natu ka konakona mosirongwa esi?

³ Apa Jesus ga tengwire meguru, varongwa vendi kwa paparere mavyukiso moMatjangwa nokuhundira evatero kwaKarunga mekanderero makura tava horowora Matiyasa a pinganene po Judasa Isikalyoto yipo va kare vapositoli 12. (Yirug. 1:15-26) Morwasinke ya karerere mulyo kwawo ntani kwaJehova mokuhorowera po mupositoli gumwe? Awo va yi dimbwilire asi va hepere kukara vapositoli 12. * Sitambo esi Jesus ga horowerere vapositoli vendi kapisi sokuza tupu nawo mokuzuvhisa nye mokusikisa mo situmbukira somulyo mombunga zaKarunga. Situmbukira musinke ntani ngapi Jehova naJesus va va vaterere? Ngendeseso musinke zokulifana zina kara mo naina mombunga zaKarunga? Ngapi omu natu ‘diworoka vapitisili vetu’ unene po ava va hamena ‘momukareli gokulimburukwa gonondunge’?—Heb. 13:7; Mat. 24:45.

4. Situmbukira musinke va kere naso vapositoli novakuronambunga vamwe moJerusarema?

⁴ Momvhura 33 poPentekoste, vapositoli yipo va tamekere kupitisira mombungakriste. Sikando simwe, “Peturusa ta sikama novakwawo vena murongo nagumwe” nokutantera mbunga zoVajuda novantu wokulikarera nonkango domwenyo. (Yirug. 2:14, 15) Sinzi sawo tava kara vapuli. Konyima, Vakriste owo “tava ligava mo merongo lyovapositoli.” (Yirug. 2:42) Vapositoli yiwo ngava pungura yimaliwa yomombungakriste. (Yirug. 4:34, 35) Awo ngava rongo vantu vaKarunga pokutanta asi: “Ose tu kerere ko nye yeeyi yokukanderera nokuudisa nonkango daKarunga.” (Yirug. 6:4) Ntani awo ngava tumu Vakriste vamwe va ka zuvhisire konomukunda dapeke. (Yirug. 8:14, 15) Mwaza siruwo, vakuronambunga vapeke wovagwavekwa kwa lipakerere novapositoli mokupitisira mombungakriste. Ngombungagendesi, awo ngava gava mavyukiso konombungakriste nadinye.—Yirug. 15:2.

5, 6. (a) Ngapi omu mpepo zokupongoka za vaterere mbungagendesi? (Tara efano pepenuno 23.) (b) Ngapi omu vaengeli va vaterere mbungagendesi? (c) Ngapi omu Nonkango daKarunga da vaterere mbungagendesi?

⁵ Vakriste momazuva govapositoli va yi divire asi Jehova Karunga kwa ruganesere mbungagendesi kupitira momupitisili gwawo Jesus. Ngapi omu va yi divire oyo? Sitwa sokuhova kuna kara asi mpepo zokupongoka kwa vaterere mbungagendesi. (Joh. 16:13) Mpepo zokupongoka kwa zi powomwenene Vakriste navenye wovagwavekwa nye unene po kwa vaterere vapositoli novakuronambunga moJerusarema mokusikisa mo situmbukira sawo ngovapitisili. Pasihonena, momvhura 49, mpepo zokupongoka kwa vaterere mbungagendesi zi ture po etokoro kuhamena vamba. Nombungakriste da tambwire etokoro eli va tulire po ntani ado “kwa di korekere mepuro, tadi kuru nkenye ezuva.” (Yirug. 16:4, 5) Mbilive ezi va tjenge kuhamena vamba kwa likidire asi mbungagendesi kwa kere noyikara yompepo zaKarunga ngwendi eharo nepuro.—Yirug. 15:11, 25-29; Gar. 5:22, 23.

⁶ Sitwa sauvali, vaengeli kwa vaterere mbungagendesi. Pasihonena, komeho Koroneliusa  a gwane ekuho gomuntu gokuhova va dira kurugana yovamba gomomuhoko gwapeke, age kwa mu tanterere muengeli a ka zigide mupositoli Peturusa. Apa Peturusa ga zuvhisilire Koroneliusa nava vembo lyendi, awo kwa va powomwenene mpepo zokupongoka nampili ngomu vagara owo va dilire kuvarugana yovamba. Sihorokwa oso kwa tumangedere vapositoli navamwe mokulimburukwa mpango zaKarunga nokutambura monombungakriste dawo vantu wokonomuhoko dapeke ava va dilire kurugana yovamba. (Yirug. 11:13-18) Ntani vaengeli kwa kwatesere ko sirugana sokuzuvhisa esi nga zi gendesa mbungagendesi. (Yirug. 5:19, 20) Sitwa sautatu, Nonkango daKarunga, kwa vaterere mbungagendesi. Vagara owo ngava ruganesa Matjangwa mokutura po matokoro kuhamena marongo gawo nokugendesa nombungakriste.—Yirug. 1:20-22; 15:15-20.

7. Morwasinke natu uyungira asi Jesus kwa pitisilire Vakriste posiruwo sovapositoli?

⁷ Nampili ngomu mbungagendesi za kere nononkondo posiruwo sovapositoli mokupitisira monombungakriste, awo va yi dimbwilire asi Mupitisili gwawo kwa kere Jesus. Mupositoli Paurusa kwa tjenge asi: ‘Kristusa kwa panga asi vamwe va kare vapositoli. Tu kure momalikwatakano gene-gene naKristusa. Age yige mutwe.’ (Efe. 4:11, 15) Mevango lyokulizigida vene kedina lyomupositoli gongandi ‘varongwa kwa ya va rukire asi Vakriste.’ (Yirug. 11:26) Mupositoli Paurusa ga dimbwilire mulyo gokukwama ‘marongo’ ndi Matjangwa aga ngava gava vapositoli novagara ava ngava pitisire. Nampili ngoso, age kwa tente asi: “Ame kuna mu harere mu kwate egano lyeyi asi, Kristusa yige mupangeli gwankenye mugara [kukwatera mo nkenye ogu ga hamena mombungagendesi], . . . ano Karunga yige mupangeli gwaKristusa.” (1 Kol. 11:2, 3) Jehova Karunga kwa tura Jesus Kristusa a pitisire mbungakriste.

8, 9. Kutamekera momvhura 1870, situmbukira musinke somulyo ga kere naso Russell?

⁸ Kutamekera momvhura 1870, Charles Taze Russell novakwawo kwa litulire mo unene mokutwara komeho ukareli wousili. Mokuvavatera va gavere marongo goBibeli momaraka gokulisiga-siga tava totopo mbunga zopaveta Zion’s Watch Tower Tract Society momvhura 1884 ano munazinyetu Russell yige ga kere peresidende. * Age kwa konakonene nawa Matjangwa ntani kapi ga kere nowoma mokutura poruzera marongo goyimpempa ngwendi karunga mutatu gumwe ntani mwenyo gwa ha fu. Russell ga lirongere asi ewizo lyaKristusa kapi ngava li mona vantu ntani asi ‘siruwo sovapagani ndi sonomuhoko’ kwa hege momvhura 1914. (Ruk. 21:24) Ntani age kwa ruganesere siruwo nononkondo noyimaliwa yendi mokutantera ko wopeke usili womoBibeli. Yosili, Jehova naJesus kwa ruganesere munazinyetu Russell mokupitisira posiruwo sina.

⁹ Munazinyetu Russell kapi ga lipaparerere mfumwa. Momvhura 1896 age kwa tente asi: “Ose kapi tuna hara mfumwa ndi va tu kangangere kweyi atu rugana ndi va tu zigide koyitumbwisiso ngwendi Murongi. Ntani kapi tuna hara muntu va mu zigidise kedina lyetu.” Konyima ta ya tjanga hena asi: “Esi kapisi sirugana somuntu.”

10. (a) Siruwoke Jesus ga tulire po “mukareli gokulimburukwa gonondunge”? (b) Faturura omu va ya yi kwete egano asi Mbungagendesi kwa lisiga noWatch Tower Society.

 ¹⁰ Momvhura 1919, nomvhura ntatu konyima zonomfa damunazinyetu Russell, Jesus yipo ga tulire po “mukareli gokulimburukwa gonondunge.” Nositambo musinke? Mokupa vantu vendi “nondya posiruwo sado.” (Mat. 24:45) Monomvhura odo, kambunga kovanavazinyetugara wovagwavekwa ava ngava rugana komberewa zetu zonene moAmerika ngava gava nondya dopampepo kovasikuli vaJesus. Ntanto “mbungagendesi” kwa tamekere kumoneka moyimbapiratjangwa yetu konyima zomvhura 1940, ano vanavazinyetu ngava gazara asi azo kwa likwatakanene noWatch Tower Bible and Tract Society. Nye momvhura 1971, yipo va ya yi fatwilire asi Mbungagendesi kwa hamena kweyi yomoMatjangwa ano Watch Tower Society kweyi yopaveta. Mombungagendesi kwa hamenene mo vanavazinyetu wovagwavekwa ava va dilire kuhamena movagendesi woSociety. Monomvhura edi, vanavazinyetugara ‘wononzwi dapeke’ yiwo va kara vagendesi woSociety nonombunga dimwe edi ava ruganesa vantu vaKarunga, ano ayo kupa mpito Mbungagendesi zi demenene kweyi yopampepo. (Joh. 10:16; Yirug. 6:4) Ruhungu 15 Pembankuru 2013 kwa faturura asi “mukareli gokulimburukwa gonondunge” kuna kara kambungagona kovanavazinyetu wovagwavekwa ava va hamena moMbungagendesi.

11. Ngapi omu Mbungagendesi azi tura po matokoro?

¹¹ Mbungagendesi kutura po kumwe matokoro. Ngapi omu ava yi rugana? Awo kuponga nkenye sivike yipo va vhure kuliyonga nokuruganena kumwe. (Yis. 20:18) Nkenye mvhura awo kulipa marufo ogu na pitisira mapongo gawo morwa navenye womoMbungagendesi kwa hetakana kwato ogu ga pita mukwawo. (1 Pet. 5:1) Ayo ya lifana hena nomonokomitiye ntazimwe omu va hamena womoMbungagendesi namo kulipa marufo mokupitisira mapongo gawo. Ntani kwato gomombungagendesi ali zuvhu asi age yige mupitisili govakwawo, nye awo nawo ‘vantu’ ava a pe mukareli gokulimburukwa nondya dopampepo ntani awo kukwama mavyukiso gendi.

12. Mokumona asi womoMbungagendesi kapi va sikilira mo, mapuro musinke natu lipura?

¹² WomoMbungagendesi kapi va sikilira mo. Yipo nye, nawo kuvhura kutura mapuko monkedi omu ava faturura marongo gomoBibeli ndi omu ava gendesa mbunga zaJehova. Mombapira Watch Tower Publications Index kwa kara mo siparatjangwa “Ewapukururo lyomapuliro,” omu mwa kara elikwamo lyomarunduruko mekwatogano lyetu lyoMatjangwa kutundilira momvhura 1870. Jesus kapi ga tu tanterere asi mukareli gwendi gokulimburukwa kapi nga tura mapuko. Ngapi nye natu limburura epuro lyaJesus asi: “Yilye nani mukareli gokulimburukwa gonondunge?” (Mat. 24:45) Yisinke yina kulikida asi Mbungagendesi kuna kara mukareli gokulimburukwa? Tu konakoneni yitwa yitatu eyi ya vaterere mbungagendesi mosiruwo sovapositoli.

13. Ngapi mpepo zokupongoka za vatera Mbungagendesi?

¹³ Mpepo zokupongoka. Azo kwa vatera Mbungagendesi mokukwata egano marongo gomoBibeli aga va dilire kukwata egano pwanare. Pasihonena, tara elikwamo eli tuna tumbura moparagarafu 12. Kwato muntu gokuvhura kukwata egano nokufaturura ‘magazaro gaKarunga aga ga horama konhiinhi,’ pwa  hana evatero lyendi. (Resa 1 Vakolinte 2:10.) Mbungagendesi kulizuvha ngwendi mupositoli Paurusa ogu ga tjenge asi: “Nose yiyo tuna kuyiuyungira, kapisi nononkango derongo lyounongo wopasintu, nye werongo lyoMpepo zoKupongoka.” (1 Kol. 2:13) Nampili ngomu pwa kere varwanesi usili ntani marongo goyimpempa kwa lihene, kutundilira 1919 Jehova kwa ruganesa mpepo zendi zokupongoka mokuvatera Mbungagendesi zi vhure kufaturura usili womoBibeli.

14. Kuliza nEhororo 14:6, 7, ngapi omu vaengeli ava vatere naina vantu Karunga?

¹⁴ Vaengeli. Naina Mbungagendesi kuna kara nositumbukira sosinene mokugendesa yirugana yokuzuvhisa uzuni mudima omu mwa hamena vazuvhisi wokupitakana pomamiliyona ntantatu. Yisinke ya ninkisa sirugana oso si tompoke? Konda zimwe kuna kara evatero lyovaengeli. (Resa Ehororo 14:6, 7.) Moyihorokwa yoyinzi, vaengeli kwa pitisira vazuvhisi va ze kovantu ava va kandererere kwaKarunga va pure evatero. Nevatero lyovaengeli, sirugana sokuzuvhisa nokutura po varongwa kuna kuza komeho nampili ngomu moyirongo yimwe mwa kara marwaneso gomanene.

15. Malisigo musinke ga kara po pokatji koMbungagendesi novampitisili womaukarelikarunga? Gava sihonena.

¹⁵ Nonkango daKarunga. (Resa Johanesa 17:17.) Tu konekeni eyi ya horokere momvhura 1973. Sifo soRuhungu 1 Pembagona kwa pulire asi: “Muntu ogu ga dira  kuhageka kukoka makanya, kuvhura a gwane ekuho ndi?” Elimbururo kwa kere asi: “Matjangwa ga yi likida asi muntu gwangoso kapi ta wapere ekuho.” Konyima zokutumbagura matjangwa gongandi, sifo soRuhungu kwa fatwilire eyi muntu gwangoso va hepera kumugusa mo mombunga. (1 Kol. 5:7; 2 Kol. 7:1) Sifo kwa tente hena asi: “Mpangera ezi kapisi zokutunda komuntu. Nye azo kwa tunda kwaKarunga ogu ga yi uyunga mwene moNonkango dendi.” Kogeli hena maukarelikarunga aga aga huguvara moNonkango daKarunga nampili yi kare asi vantu vawo tayi va digopere kukwama nompango doBibeli ndi? Buke zimwe kuhamena ukarelikarunga moAmerika kwa tanta asi: “Vampitisili womaukarelikarunga kwa rundurura marongo gawo yipo ga lize nomapuliro nomagano govantu ava ava va kwatesa ko.” Mbungagendesi kapi azi kwama magano govantu nye azo kukwama mavyukiso gomoNonkango daKarunga.

16. Nkedi musinke zimwe natu diworoka woMbungagendesi?

¹⁶ Resa Vahebeli 13:7. Ntanto “diworokeni” kuvhura kutanta hena asi “kutumbura.” Yipo nye, nkedi zimwe omu no vhura ‘kudiworoka vapitisili vetu’ kuna kara pokutumbura momakanderero goge Mbungagendesi. (Efe. 6:18) Awo kwa kara noyitumbukira yoyinzi ngwendi kugava nondya dopampepo nokugendesa yirugana yokuzuvhisa uzuni mudima ntani nokutara omu nava ruganesa yigava. Yipo nye, twa hepa kuvatumbura nkenye apa momakanderero getu.

17, 18. (a) Ngapi omu natu vhura kuruganena kumwe noMbungagendesi? (b) Ngapi omu atu kwatesa ko mukareli gokulimburukwa naJesus?

¹⁷ Nkedi zimwe hena natu diworoka woMbungagendesi kuna kara pokuruganena kumwe nawo. Awo kutupa mavyukiso nomapukururo kupitira moyimbapiratjangwa yetu nomomapongo nomoyigongi. Ntani awo hena kuhorowora vatareli wonombungakriste, ano vatareli owo yiwo ava horowora vakuronambunga. Vatareli wonombunga novakuronambunga kudiworoka womoMbungagendesi pokukwama mavyukiso aga ava va pe. Natuvenye kulikida efumadeko koMupitisili gwetu, Jesus, pokulimburukwa nokuzuvha vagara ava ana kuruganesa mokutupitisira.—Heb. 13:17.

¹⁸ Nkedi zimwe zapeke omu atu diworoka womoMbungagendesi kuna kara pokulitura mo unene mokuzuvhisa. Paurusa kwa korangedere Vakriste va honene epuro lyava ava va pitisire. Mukareli gokulimburukwa kwa likida epuro lyenene pokulitura mo unene mokuhanesa mbudi zongwa zoUhompa. Nove kuna kuvakwatesa ko mosirugana oso somulyo ndi? Ove ngo ka hafa, apa Jesus Mupitisili gwetu nga ka uyunga asi: “Eyi mwa ruganena gomununu po povamumbya vange, nyame mwa yi ruganena.”—Mat. 25:34-40.

19. Morwasinke ono tokomenene kukwama Mupitisili gwetu Jesus?

¹⁹ Apa Jesus ga tengwire meguru kapi ga sigililire vasikuli vendi. (Mat. 28:20) Age ga yi divire asi mpepo zokupongoka novaengeli noNonkango daKarunga yiyo ya mu vaterere ava pitisire apa ga kere pevhu. Yipo nye, age kugava evatero lyokulifana komukareli gokulimburukwa. Awo “kukwama Nzwigona nkenye oku zina vyuka.” (Ehor. 14:4) Yipo nye, nsene tu kwama mavyukiso gawo, ose ngoso kuna kukwama Mupitisili gwetu Jesus. Ntaantani nga ka tu tware komwenyo gwanarunye. (Ehor. 7:14-17) Kwato muntu gokuvhura kuyirugana oyo.