VANTU vana hara kukara noruhafo meparu. Nye ehudi ose kuna kuparuka pomazuva gopouhura, “yiruwo yoyidigu.” (2 Tim. 3:1) Nyanya, mauvera, epiro yirugana, ruguwo ntani yinka kuvhura kudonganesa vantu va dire kukara noruhafo. Nampili vakareli vaJehova nawo kuvhura ga va dompese maukaro ogo nokuyadira kukara nehafo. Nsene ya ku horokera oyo, ngapi no kara hena noruhafo?

Mokulimburura epuro olyo, tanko twa hepa kukwata egano asi yisinke ehafo lyosili ntani ngapi omu wopeke va twikira kukara noruhafo nampili momaudigu. Ntani tatu ka lironga hena eyi natu rugana mokutwikira kukara nehafo.

Kuzoragana ndi kumenya-menya kapi ayi tanta asi wa kara noruhafo. Pasihonena: Muntu ogu ana korwa kuvhura a zoragane unene. Nye apa na kororokwa kapi ta zoragana hena, ntani ta tameke hena kudiworoka maudigu gendi. Kuzoragana kwendi nemenya-menyo lyendi kapisi ruhafo rosili.—Yis. 14:13.

Ehafo lyosili kuna kara malizuvho gomomutjima. Ago kwa ga singonona asi “malizuvho aga atu kara nago apa atu gwana ndi apa atu ndindire yininke yoyiwa.” Kukara nehafo kutanta asi kuhafa moyiruwo yoyiwa neyi yoyidona. (1 Tes. 1:6) Muntu kuvhura simpe a kare nehafo nampili pa kare madonganeso. Pasihonena, vapositoli kwava toonene morwa ngava zuvhisa kuhamena Kristusa. Nampili ngoso, “tava tundu po posigongi nehafo lyeyi asi Karunga kwa va tere asi va fira kuvahepekera edina lyaJesus.” (Yirug. 5:41) Awo kapi va hefe morwa yeeyi va va toonene. Nye morwa awo kwa kwaterere koulimburukwi wawo.

Kapi vatu reta nehafo, ntani sikara esi kapi asi wiza po tupu. Morwasinke? Morwa ehafo siyimwa sompepo zokupongoka. Nevatero lyompepo zokupongoka, kuvhura tu ‘guse muntu gomupe,’ kukwatera mo kukara noruhafo. (Efe. 4:24; Gar. 5:22) Apa ngatu tunga po ehafo, ngali tu vatera tu lididimikire yinka yankenye ezuva.

Jehova kwa here pevhu pa horoke yininke yoyiwa, nye kapisi yoyidona eyi tuna kumona momazuva aga. Nampili ngomu vantu ava rugana yoyidona, Jehova simpe kwa kara nehafo. Bibeli kutanta asi: ‘Unankondo nehafo kwa zura montembeli zendi.’ (1 Hist. 16:27) Ntani hena, yininke yoyiwa eyi ava sikisa mo vakareli vendi ‘kumuhafesa.’—Yis. 27:11.

Ose kuhonena Jehova apa atu twikire kukara nehafo nampili yininke kapi yina kuhoroka moomu twa yi ndindira. Mevango lyokukara nosinka, ngano tu demenene kweyi yoyiwa eyi tuna kara nayo ngesi nokundindira nedidimiko meho zongwa. *

 MoBibeli mwa kara yihonena yoyinzi yava va twikilire kukara nehafo nampili momaudigu. Abirahamu kwa twikilire kukara nehafo apa eparu lyendi lya kere mosiponga ntani apa wopeke va mu reterere maudigu. (Gen. 12:10-20; 14:8-16; 16:4, 5; 20:1-18; 21:8, 9) Momaukaro nagenye ogo Abirahamu kwa twikilire kukara nehafo. Ngapi ya mu tompokere oyo? Age kwa gazadarere ko kehuguvaro lyokukaparuka mouzuni woupe mepangero lyaMesiyasa. (Gen. 22:15-18; Heb. 11:10) Jesus kwa tente asi: “Zinyakurweni Abirahamu, kwa haferere asi a mone ezuva lyange.” (Joh. 8:56) Ose kuvhura kuhonena Abirahamu, pokutwikira kuteda ko koruhafo oru ngatu ka kara naro komeho.—Rom. 8:21.

Paurusa naSirasa kwa honenene Abirahamu pokudemenena komatumbwidiro gaKarunga. Awo kwa kere nepuro lyokupama ntani va kere nehafo nampili momaudigu. Pasihonena, konyima zokuvatoona nokuvatura modorongo, “pokatji komasiku tava tameke kukanderera oku tava dimbi nonsumo dehamberero.” (Yirug. 16:23-25) Kutwikira kugazadara ko komatumbwidiro gaKarunga ntani kudiva asi kuna kuvahepekera morwa kukara varongwa vaKristusa, kwava reterere ruhafo. Ngwendi Paurusa naSirasa, ngano tu gazadare ko komauwa aga tundu mokulimburukwa Karunga.—Fil. 1:12-14.

Nampili naina, pa kara yihonena yoyinzi yovanavazinyetu ava va twikira kukara noruhafo nampili momaudigu. Pasihonena, mwaMangundu 2013, ekundungu lyenene kwa zonagwire mambo goNombangi dokupitakana po-1 000 moPhilippines. George, ogu ga zumbanesere embo lyendi mositata Tacloban, kwa tente asi: “Nampili momaudigu nagenye aga, vanavazinyetu vana hafa. Ose tuna hafa unene.” Nsene tu teda ko kweyi gatu ruganena Jehova nokukara norupandu ngayi tu vatera tu kare nehafo nampili momaudigu gomanene. Yisinke hena ga tu ruganena Jehova ayi tu hafesa?

Elikwatakano lyetu naJehova kutupa ehafo. Gazadara ko tupu: Ose twa diva mupangeli gwanayinye. Age yige Karunga gwetu, Guhyetu, ntani kaume ketu.—Epis. 71:17, 18.

Ose kupandura hena Jehova kweyi ga tu pa uhwi weparu ntani nokutuvatera tu lihafere. (Muud. 3:12, 13) Morwa Jehova yige ga tu kokera kwendi, twa diva sitambo sendi kwetu. (Koros. 1:9, 10) Yiyo nye twa karera nositambo meparu. Nye sinzi sovantu kapi va diva sitambo separu. Mokufaturura malisigo aga, Paurusa kwa tjenge asi: “‘Eyi lya dira kumona eho, neyi kwa dira kuzuvha kutwi, ndi mutjima asi gu yi gazare, yiyo ga wapaikira Karunga ava va mu hara.’ Nye Karunga yige ga yi tu horwera moMpepo zendi.” (1 Kol. 2:9, 10) Ayo kutuhafesa apa atu kwata egano mpango zaKarunga nositambo sendi.

Tara hena eyi ga tu ruganena Jehova. Ayo kutuhafesa mokudiva asi nonzo detu kuvhura kudidongonona po. (1 Joh. 2:12) Morwa nkenda zaKarunga, ose twa kara nehuguvaro lyokukaparuka mouzuni woupe ou una kara pepi. (Rom. 12:12) Nampili ngesi, Jehova ga tu pa vakaume wovawa ava ava tu vatere tu mu karere. (Epis. 133:1) Jehova kutupopera hena kwa Satana nonondemone dendi. (Epis. 91:11) Nsene tu twikira kuteda ko komatungiko nagenye ga tu pa Karunga, ngatu gwederera kehafo lyetu.—Fil. 4:4.

Mukriste ogu ga kara nehafo, kuvhura simpe a gwederere ko koruhafo rwendi ndi? Jesus kwa tente asi: “Eyi kuna yi mu  tanterere asi ehafo lyange li kare mweni, ano ehafo lyeni li sikilire mo.” (Joh. 15:11) Eyi kulikida asi kuvhura tu gwederere ko koruhafo rwetu. Ehafo lyetu kuvhura kulihetakanesa komundiro. Wa hepa kutura yitare pomundiro yipo gu hwame unene. Mokulifana, wa hepa kunkodopeka elikwatakano lyoge naJehova yipo o gwederere koruhafo roge. Diworoka asi mpepo zaKarunga kutuvatera tu kare nehafo. Ove ngo gwederera kehafo lyoge pokuhundira nkenye apa Jehova a ku pe mpepo zokupongoka ntani nokuteda ko kononkango dendi edi za retesa po mpepo zendi.—Epis. 1:1, 2; Ruk. 11:13.

Ose kugwederera hena kehafo lyetu apa atu lihameke moyininke eyi ayi hafesa Jehova. (Epis. 35:27; 112:1) Morwasinke? Morwa Bibeli kutanta asi: “Tjira Karunga, ove o limburukwe koyipango yendi, yeeyi yangesi, yiyo va mu ungira muntu.” (Muud. 12:13) Nonkango edi kulikida asi ose kwa tu unga nositambo sokurugana mpango zaKarunga. Apa atu karere Jehova, ose kugwana ehafo lyene-lyene meparu. *

Ngomu tuna kugwederera kehafo lyetu, ngatu limonena mauwa gamwe hena. Pasihonena, ngatu hafesa Guhyetu gemeguru ngomu tuna kumukarera nehafo yi kare asi maudigu musinke natu ligwanekera nago. (Deut. 16:15; 1 Tes. 5:16-18) Ntani hena, morwa kukara nehafo lyosili ngatu demenena koUhompa waKarunga nokunyokera po kukondjera emona. (Mat. 13:44) Apa ngatu limonena mauwa gokurugana oyo, ehafo lyetu ngali ligwederera ntani ngatu hafesa wopeke.—Yirug. 20:35; Fil. 1:3-5.

Mukonakoni gokoUnivesiti zaNebraska moAmerika kwa tjenge asi: “Nsene o kara goruhafo nokukara yina ku gwanene po meparu, ngo kara noukanguki moukaro woge.” Bibeli kutanta asi: “Mutjima gehafo kukwafa mokuveruka.” (Yis. 17:22) Yosili, nsene o gwederera kehafo lyoge, ngo kara noukanguki wouwa.

Nampili ngomu tuna kuparuka moyiruwo yoyidona, ose kugwana ehafo lyosili apa atu gwana mpepo zokupongoka kupitira mokukanderera, kulironga nokuteda ko koNonkango daKarunga. Ose kugwederera hena kehafo lyetu pokuteda ko komatungiko aga tuna kuhafera ntani pokuhonena epuro lyava wopeke ntani pokurugana mpango zaKarunga. Nsene tu yi sikisa mo eyi ngatu limonena usili wononkango demEpisarome 64:10 asi: “Vahungami navenye ngava hafera eyi nga rugana HOMPA; ngava gwana utjiliro mwendi.”