1. Yisinke ga hepere kurugana muntu ogu ga here kukauyunga nahompa gwaPeresiya?

GAZARA asi ove kuna kuparuka mosiruwo sanare mosirongo saPeresiya. Makura to tokora kuza kositata saSusa oku ga tunga hompa morwa ono hara kukauyunga nage. Nye ove kapi no tokora tupu kuza kwendi wa hana kugwana epulisiro lyendi, nsene o yi rugana oyo kuvhura vaka ku dipage!—Esit. 4:11.

2. Ngapi omu Jehova ana tu harere tu lizuvhe nsene tuna hara kuuyunga nage?

² Ose tuna hafa kweyi Jehova ga dira kukara ngwendi hompa gwaPeresiya. Jehova ga pitakana unene vapangeli navenye, nye nampili ngoso ose kuvhura tu uyunge nage nkenye apa tuna hara. Age ana hara tu lizuvhe emanguruko pokuuyunga kumwe nage. Pasihonena, nampili ngomu Jehova ava mu tumbura asi Musiti gwanayinye, Munankondo nadinye ntani Hompa gwanarunye, age ana hara tu uyunge nage pokuruganesa nkango zeharo “Tate” ndi “Guhyetu.” (Mat. 6:9) Ayo kutuhafesa sili pokudiva asi Jehova ana hara tu lizuvhe asi age Guhyetu ogu ga tu hara sili!

3. Morwasinke Jehova ga wapera kumutumbura asi “Guhyetu” ntani yisinke natu ka zogera mosirongwa esi?

³ Jehova ga wapera kumutumbura asi “Guhyetu” morwa yige ntundiliro zomwenyo. (Epis. 36:9) Mokumona asi age Guhyetu, ga fira kumulimburukwa. Nsene tu rugana eyi ga hara, ose ngatu hafera matungiko. (Heb. 12:9) Matungiko ogo kwa kwatera mo mwenyo gwanarunye komeho, yi kare asi ngatu ka parukira meguru ndi pevhu. Ose kuvhura hena tu gwane matungiko nampili ngesi. Sirongwa esi tasi ka zogera omu Jehova ayi likida asi age Guhya geharo ntani neyi natu  karera nehuguvaro asi age kapi ngatu sigilira. Nye pomuhowo tu zogereni eyi natu karera nehuguvaro asi Guhyetu Jehova ga tu hara ntani age kutupakera mbili.

4. Morwasinke vamwe ayi va karerere udigu mokutara Jehova ngaGuhyawo?

⁴ Ove kukudigopera mokutara Karunga ngwendi o tate woge ndi? Vamwe kuvhura va lizuvhe asi Jehova ga zeruka unene ntani ose kwato mulyo kwendi. Awo kapi ava yi pura asi Jehova ga kara nosinka kwawo. Nye Guhyetu geharo kapi ana tu harere tu lizuvhe ngoso. Age kwa tu pa eparu ntani ana tu harere tu mu hedere pepi. Paurusa nage ga uyungire kuhamena egano olyo. Age kwa tanterere Vaatena asi Jehova kapi ga ‘kara ure nose natuvenye.’ (Yirug. 17:24-29) Karunga ana hara natuvenye tu uyunge nage ngwendi moomu munona a uyunga novakurona vendi ava va mu hara ntani ava ava mu pakere mbili.

5. Yisinke tuna lirongere ko kosihorokwa samunazinyetu gomukadi?

⁵ Vamwe kuvhura yi va digopere kutara Jehova ngaGuhya geharo morwa nampo vaguhya vawo kapi ngava va likida eharo. Koneka nonkango edi ga uyunga munazinyetu gomukadi gumwe. Age kwa tanta asi: “Otate ngava ruganesa nonkango donondona. Apa na tamekere kulironga Bibeli, ayo kwa digoperere nge kutara Jehova ngaGuhya geharo. Nye apa na tamekere kumudiva, yininke kwa tamekere kulitjindja.” Nove yimo o lizuvhu ngoso ndi? Nsene yimo, kara nehuguvaro asi nove kuvhura yi ku tompoke mokutara Jehova ngaGuhya geharo lyenene po.

6. Kuliza naMateusa 11:27, ngapi omu Jehova ga tu vatera yipo tu mu tare ngaGuhya geharo?

⁶ Nkedi zimwe omu Jehova ga tu vatera tu mu tare ngaGuhya geharo, kuna kara kupitira mweyi va tjanga moBibeli eyi ga uyungire Jesus neyi ga rugene. (Resa Mateusa 11:27.) Jesus nga honene nawa yikara yoGuhwe, eyi yiyo ya mu ninkisire a uyunge asi: “Ogu ga mona nge, ga mona hena Tate.” (Joh. 14:9) Yikando yoyinzi Jesus nga fatwilire vantu asi Jehova age Guhya. Jesus kwa ruganesere nkango “Tate” yikando yokusika koyiha 165 moMavangeli gane, mokutamba kwaJehova. Morwasinke Jesus nga uyungire yikando yoyinzi kuhamena Jehova? Konda zimwe kuna kara asi, morwa age kwa here kuvatera vantu va yi dive asi Jehova kuna kara Guhya geharo.—Joh. 17:25, 26.

7. Yisinke natu lirongera ko kwaJehova monkedi omu ga tekwire Munwendi?

⁷ Koneka eyi natu lirongera ko kwaJehova monkedi omu ga tekwire Munwendi Jesus. Jehova nga purakene komakanderero gaJesus nkenye apa. Age kapi tupu nga purakene makanderero gendi, nye age ngaga limburura. (Joh. 11:41, 42) Nampili ngomu Jesus ga ligwanekerere nomaudigu, age ga yi divire asi Oguhwe va mu hara ntani kumuvatera.—Ruk. 22:42, 43.

8. Mononkedi musinke Jehova nga vatere Jesus?

⁸ Jesus ga yi divisire asi Oguhwe yiwo va mu sita ntani ngava mu pakere mbili, apa ga uyungire asi: ‘Ame kwa kara nomwenyo morwaTate.’ (Joh. 6:57) Jesus kwa huguvarere unene Oguhwe ntani awo ngava mu vatere noyihepwa yendi yopanyama. Unene po, Jehova nga vatere Jesus a twikire kukara mulimburukwi.—Mat. 4:4.

9. Ngapi omu Jehova ga likidire Jesus asi age Guhya geharo?

⁹ Mokumona asi Jehova Guhya geharo, Jesus ga yi divire asi Oguhwe ngava mu vatera. (Mat. 26:53; Joh. 8:16) Nampili ngomu Jehova nga dili kupopera Jesus a dire kuligwanekera nomaudigu, nye age nga mu vatere yipo a ga lididimikire. Jesus ga yi  divire asi nkenye udigu ou nga ligwanekera nawo kwa kere wopokaruwogona. (Heb. 12:2) Jehova ga yi likidire asi age nga pakere mbili Jesus pokumupurakena nokumupa yihepwa yendi ntani pokumudeura nokumuvatera. (Joh. 5:20; 8:28) Ngesi tu tareni omu Guhyetu gemeguru a tu pakere mbili nose mononkedi dokulifana.

10. Kuliza nEpisarome 66:19, 20, ngapi omu Jehova a yi likida asi ga tu hara?

¹⁰ Jehova kupurakena komakanderero getu. (Resa Episarome 66:19, 20.) Age kapi ana hara tu sesupike makanderero getu, nye age kutukorangeda tu kanderere nkenye apa. (1 Tes. 5:17) Kuvhura tu kanderere kwaJehova nkenye apa ntani nkenye oku tuna kara. Age ga liwapaikira kutupurakena nkenye apa. Apa atu dimburura asi Jehova kupurakena komakanderero getu, ayo kututumangeda tu mu hare unene. Mutjangi gepisarome kwa tente asi: “Ame kwa hara HOMPA, yeeyi age kuzuvha nge.”—Epis. 116:1.

11. Ngapi omu Jehova a limburura makanderero getu?

¹¹ Guhyetu kapi tupu a purakene makanderero getu, nye age kugalimburura. Mupositoli Johanesa kwa tente asi: “[Karunga] ta tu zuvhu ntene tu mu hundira eyi yokuliza nompango zendi.” (1 Joh. 5:14, 15) Nampili ngoso, Jehova kuvhura a dire kulimburura makanderero getu monkedi ezi tuna yi harere. Age ga diva eyi ya tu wapera, yipo nye poyiruwo yimwe age kapi atu pe eyi atu mu hundire, ndi nampo ana hara tu ndindire komeho tu yi gwane.—2 Kol. 12:7-9.   

12-13. Mononkedi musinke Guhyetu gemeguru a tu pakere mbili?

¹² Jehova kutupa eyi twa hepa. Age kusikisa mo eyi a ndindire kovaguhya navenye. (1 Tim. 5:8) Jehova kupa vana vendi eyi va hepa yipo va paruke. Age kapi ana hara tu kare nosinka kuhamena eyi natu lya neyi natu dwara ntani noku natu rara. (Mat. 6:32, 33; 7:11) NgaGuhya geharo, Jehova ga tura po ewapaiko yipo nga ka tu pe nayinye eyi twa hepa komeho.

¹³ Nye unene po, Jehova kutupa eyi twa hepa yipo tu tunge po elikwatakano lyenene nage. Kupitira moBibeli, age ga horora usili wokuhamena kwendi nositambo sendi neyi ga tu sitira ntani neyi ngayi ka horoka komeho. Age kwa tu likida asi ga tu hara apa ga tu rongere usili kupitira movakondi vetu ndi gumwe gwapeke yipo tu mu dive. Ntani Jehova simpe kutuvatera yipo tu kare vakaume vendi kupitira movakuronambunga ntani navamwe ava va kura pampepo. Mokugwederera ko, Jehova kuturonga kupitira momapongo, oku atu lirongo kumwe novanavazinyetu. Jehova kuyilikida asi age Guhya ogu ga tu hara kupitira mononkedi odo ntani nadimwe hena.—Epis. 32:8.   

14. Morwasinke Jehova a tu dewire ntani ngapi omu a yi rugana?

¹⁴ Jehova kutudeura. Mokulisiga naJesus, ose kapi twa sikilira mo. Yipo nye, poyiruwo yimwe ose kutupukurura Guhyetu morwa ana hara kutudeura. Nonkango dendi kututantera asi: “Hompa kurungurura nkenye ogu ga hara.” (Heb. 12:6, 7) Jehova kutupukurura mononkedi dokulisiga-siga. Pasihonena, age kuvhura kutupukurura tu wapeke nkareso zetu kupitira moyininke eyi atu zuvhu komapongo ndi eyi atu resa moNonkango dendi. Ndi nampo kuvhura kutupukurura kupitira movakuronambunga. Yi kare asi monkedi musinke ana kutupukurura, Jehova age nkenye apa kuyirugana morwa ga tu hara.—Jer. 30:11.

15. Ngapi omu Jehova a tu vatere?

¹⁵ Jehova kutuvatera apa atu ligwanekere nomaudigu. Ngwendi moomu tupu  guhya ogu ga hara vana vendi ava pakere mbili nsene kuna kuligwanekera nomaudigu, Guhyetu gemeguru nage kutuvatera apa atu ligwanekere nomaudigu. Age kutupa mpepo zendi zokupongoka. Azo kutupopera kwankenye eyi nayi vhura kutura elikwatakano lyetu nage mosiponga. (Ruk. 11:13) Jehova kutuvatera hena nsene tuna dompo mutjima. Pasihonena, age kwa tu pa ehuguvaro lyewa lyokomeho. Ehuguvaro olyo kutuvatera yipo tu lididimikire maudigu. Diworoka asi, yi kare asi yininke musinke yoyidona yina kutuhorokera, Guhyetu geharo nga ka rugana ko yuma komeho a ka yi guse po. Nkenye udigu tuna kuligwanekera nawo kuna kara wopokaruwogona, nye matungiko aga atu gwana kwaJehova, ngaga karerera.—2 Kol. 4:16-18.

16. Yisinke ya horokere apa Adamu ga dilire kulimburukwa Oguhwe ava va mu here?

¹⁶ Eyi ga rugene Jehova apa Adamu ga dilire kumulimburukwa kulikida asi age ga tu hara. Apa Adamu ga dilire kulimburukwa Oguhwe vemeguru, nage novana vendi kwa zumbanesere mpito zokukara mepata lyaJehova lyoruhafo. (Rom. 5:12; 7:14) Nye Jehova kwa rugene ko yuma yipo a vatere ruvharo rwaAdamu.

17. Yisinke ga rugene Jehova konyima zapa ga dilire kulimburukwa Adamu?

¹⁷ Jehova kwa tengekere Adamu, nye age kwa rugene ko yuma yipo a vatere ruvharo rwaAdamu. Age kwa tumbwidilire asi vantu wovalimburukwi ngava gwana mpito zokukara hena mepata lyendi. (Gen. 3:15; Rom. 8:20, 21) Jehova kwa yi rugene eyi kupitira monzambo zosizoweseso saMunwendi Jesus ogu ga here. Apa Jehova ga geve Munwendi ngonzambo, age kwa yi likidire asi ga tu hara unene.—Joh. 3:16.

18. Morwasinke natu karera nehuguvaro asi Jehova kuna hara tu hame kepata lyendi nampili yi kare asi ose twa mu siga?

¹⁸ Nampili ngomu twa dira kusikilira mo,  Jehova ana hara tu kare mepata lyendi ntani kapi atu tara asi ose mudigo. Kuvhura tu mu guvise ndi tu mu sige, nye age ga kara nehuguvaro asi ngatu tengura kwendi. Jesus ga likidire eharo eli ga kara nalyo Jehova ngaGuhya, mesimwititi lyendi lyomumati gokuzumbana. (Ruk. 15:11-32) Guhya gomosifanekeso oso, kwa twikilire kukara nehuguvaro asi munwendi nga ka tengura. Apa munwendi ga ka tengwire, guhya ogo kwa mu tambwire nomawoko gavali. Nsene asi ose kwa siga Jehova nye twa litezurura, tu kareni nehuguvaro asi Guhyetu geharo ana liwapaikire kututambura.

19. Ngapi omu Jehova nga ka gusa po yininke nayinye yoyidona eyi ga retesa po Adamu?

¹⁹ Guhyetu nga ka gusa po yininke nayinye yoyidona eyi ga retesa po Adamu. Konyima zapa Adamu ga rwanesere Karunga, Jehova kwa tokwere kuhorowora vantu 144 000 yipo ngava ka kare vahompa novapristeli meguru kumwe naMunwendi. Mouzuni woupe, Jesus novantu owo ngava ka vatera vantu wovalimburukwi yipo va ka sikilire mo. Konyima zapa ngava pita eheteko lyokuhulilira, Karunga nga ka va pa mwenyo gwanarunye. Posiruwo oso, Guhyetu nga ka hafa pokumona evhu kuna zura po vana vendi wokusikilira mo. Aso ngasi ka kara siruwo soruhafo!

20. Ngapi omu Jehova a yi likida asi age ga tu hara unene ntani yisinke ngatu ka zogera mosirongwa sokukwama ko?

²⁰ Jehova ga yi likida asi age kwa tu hara unene. Age yige Guhya gomuwa po unene. Age kuzuvha makanderero getu ntani kutupa eyi twa hepa pampepo nopanyama. Age kutudeura ntani kutuvatera. Age hena kwa tumbwidira asi ngaka tu pa yininke yoyinzi komeho. Ayo kutuhafesa pokudiva asi Guhyetu kwa tu hara ntani kutupakera mbili. Sirongwa sokukwama ko ngasi ka zogera nonkedi dimwe omu natu likida rupandu kwaJehova kweyi ga tu hara.