Konyima zomvhura 1920, vakondi vange kwa li rongere usili. Eyi kwa horokere komeho va likware. Ame kwa hampuruka nge mo-1939. Apa na kere mumati, ose kwa tungire moIngiranda ntani ngani zi novakondi vange komapongo ano konyima na ya tamekere kulihameka moSikora zoUkareli. Ame simpe kudiworoka apa na geve siuyungwa sange sokuhova ntani ame kwa sikeme pepakote yipo ni mone nawa. Nomvhura dange kwa kere ntazimwe ntani na kere nowoma apa na tere mombunga.

Kombinga zokuzuvhisa, otate ngava tjangere nge magano posikarata omu nani zuvhisa. Apa na zuvhisilire gumwe sikando sange sokuhova nyamelike, ame opo kwa kere nonomvhura ntantatu. Ayo kwa hafesere nge apa mugara gumwe ga resere eyi ya kere posikarata sange ntani age kwa tambwire buke “Let God Be True”! Makura yipo na dukilire oku va kere otate ni ka va tantere ko. Mapongo nokuzuvhisa kwa retera nge ruhafo nokuvatera nge ni hare kukarera Jehova mosirugana sosiruwo nasinye.

Apa otate va tamekere kugusira nge Maruhungu, usili womoBibeli kwa gumine nge unene komutjima. Ame ngani resa Maruhungu nsene gana ya siki. Ame kwa huguvarere unene Jehova, ano eyi kwa ninkisire nge ni ligave kwendi.

Ose kwa zire nepata lyetu kosigongi somo-1950 esi sa kere mo-Amerika sosiparatjangwa asi: “Theocracy’s Increase.” MoUne 3 Siwogedi, siparatjangwa sezuva kwa kere asi: “Ezuva lyovatumwa.” Mezuva olyo, munazinyetu Carey Barber ogu ga ya kere konyima moMbungagendesi, kwa geve siuyungwa sekuho. Apa ga geve siuyungwa sendi sekuho, ame kwa sikeme  nokulimburura asi “nhi!” konyima zokupura mapuro gavali gekuho. Ame kwa kere nonomvhura 11 ntani na yi dimbwilire asi alyo etokoro lyomulyo na tulire po. Nye na kere nowoma wokuza momema morwa kapi na divire kuzoga. Hekurwange kwa zire name kevango lyokukuhwira ntani kwa tanterere nge asi nayinye nayi wapa tupu. Yosili, ayo kwa gendere po nawa, nompadi dange kapi da ka lyete konhi zondama ezi va kuhwilire nge. Vanavazinyetu kwa vaterere nge, gumwe gokukuhwa ano gumwe kwa damwine nge. Kutunda ezuva olyo lyomulyo, Jehova kwa twikira kulikida nge nzira zouhunga.

Apa na mene sure, ame kwa here kukara muzuvhisi gokukarerera, nye vamitili vange kwa sininikire nge ni ze kounivesiti. Makura yipo na zire kounivesiti, nye nampili ngoso, na ya dimbwilire asi kapi tani vhuru kukwaterera nawa kousili ano posiruwo sooso hena ni demenene kosure, makura yipo na tokwere kusiga sure. Ame kwa kanderere kwaJehova ntani tani tjangere vamitili vange mbilive mokuvatantera asi tani sigi sure kehagero lyomvhura zange zokuhova. Ame kwa tamekere uzuvhisi wokukarerera morwa kwa huguvarere mwaJehova.

Ano mwaPembankuru 1957 yipo na tamekere sirugana sosiruwo nasinye modoropa zaWellingborough. Ame kwa pulire vanavazinyetu womoBeteli zaLondon va tume ko muzuvhisi gokukarerera ni ya zuvhise nage. Munazinyetugara Bert Vaisey kwa rongere nge yininke yoyinzi. Age kwa kere muzuvhisi goupampi ntani nga vatere nge omu nani litulira po siruwo sokuzuvhisa. Mombungakriste zetu kwa kere mo vakurupe ntazimwe wovakadi ntani namunazinyetu Vaisey ntani name. Kuliwapaikira mapongo nokulihameka mo kwa vaterere nge ni huguvare Jehova ntani ni zuvhisire ko wopeke.

Ame kwa kere modorongo siruwo sosisupi morwa kunyoka kulihameka moyita, ano konyima zapa na pwege mo yipo na ligwene naBarbara, munazinyetukadi ogu ga kere muzuvhisi gosiruwo nasinye. Ose kwa likwere mo-1959, ntani twa kere neharo lyokuza nkenye oku va here kututuma. Pomuhowo kwa tu tumine koLancashire koruha utokero waIngiranda. Ano mwaMurongagona 1961, kwa zigidire nge ni ka kare koSikora zoYirugana yoUhompa moBeteli zaLondon ure wokwedi. Konyima zosikora, ame kwa tetukire apa na gwene mbudi asi tava tumu nge mosirugana sokudingura nombungakriste. Ure woyivike yivali, ame kwa gwene edeuro komutareli gonombunga gumwe goudivi mositata saBirmingham ano Barbara nage kwa mu pulisire a ze name. Makura yipo twa zire tu ka tameke sirugana setu mosirongo saLancashire naCheshire.

MwaSiwogedi 1962, ose kwa gwene mbilive zokutunda koBeteli. Azo kwa kere mbilive zokutuzigida tu ze koSikora zaGiliyata. Konyima zokukanderera, name naBarbara tatu zwida  noforoma detu no ku di tuma hena koBeteli. Konyima zomakwedi gatano, ose kwa zire koBrooklyn moAmerika tu ka kare koSikora zaGiliyata zau-38 ezi za gusire makwedi murongo.

Ose kwa ka lirongere yininke yoyinzi koSikora zaGiliyata kuhamena Nonkango daKarunga, mbunga zendi ntani kuhamena vanavazinyetu. Ose kwa lirongerere ko hena yininke yoyinzi kovarongwa vakwetu. Ame kwa gwene mpito zokurugana maruha gamwe namunazinyetu Fred Rusk, gumwe govarongi vetu. Sirongwa simwe esi nga nkondopeke kuna kara asi nsene kuna kugava mapukururo ga gava kuliza noMatjangwa. Vamwe ava ngava tu pe yiuyungwa kuna kara munazinyetu Nathan Knorr, Frederick Franz ntani Karl Klein. Ntani twa lirongerere ko yoyinzi kwamunazinyetu gokulinunupika A. H. Macmillan, ogu ga geve siuyungwa kuhamena omu Jehova ga vaterere vantu vendi apa va ligwanekerere nomaudigu mo-1914 dogoro mo-1919.

Kouhura wosure zetu, munazinyetu Knorr kwa tu tanterere naBarbara asi ta va tu tumu koAfrika moBurundi. Makura tatu dukire usimbu monzugo zokupungwira nobuke tu ka tare moYearbook asi vazuvhisi vangapi va kara moBurundi. Nye ose kwa tetukire morwa kapi twa gwene sivaro sovazuvhisi ava va kara mo. Yosili, ose kwa zire kevango oku va dira kuzuvhisira rumwe ntani mosirongo esi twa dira kudiva nawa. Ose kwa kere nosinka. Kukanderera kwa tu vaterere tu kare tuna litura.

Ukaro kwa litjindjire mosirugana setu sosipe, twa hepere kudiva mukarompepo, mpo zovantu ntani eraka lyawo. Twa hepere hena kulironga Rufransa ntani twa ya ligwanekerere nomaudigu gamwe oku twa tungire. Konyima zomazuva gavali, gumwe govarongwa vakwetu wokoGiliyata Harry Arnott kwa tu dingwire ngomu ga kere morugendo rwendi rokutengura koZambia. Age kwa tu vaterere tu gwane nzugo oku natu kara. Ano nzugo ozo, yizo za kere embo lyetu lyokuhova ngovatumwa. Konyima, ose kwa ligwanekere nomarwaneso gokutunda kepangero, ava va dilire kudiva Nombangi daJehova. Konyima tupu zosiruwo, epangero kwa tu divisire asi kapi tatu vhuru kukara mosirongo twa hana mbapira zepulisiro. Twa hepere kutunda mo yipo tu ze koUganda.

 Ose kwa kere nowoma apa twa zire koUganda, nye twa huguvarere mwaJehova. Munazinyetu gokoKanada ogu nga zuvhisire oku kwa hepere vazuvhisi moUganda, kwa fatwilire ukaro wetu komunamberewa makura tava tu pe ko makwedi gongandi tu ture mo ehundiro lyombapira zepulisiro yipo tu tunge mosirongo sawo. Sihorokwa oso kwa tu likidire asi Jehova kwa tu vaterere.

Ukaro womoUganda kwa lisigire nou womoBurundi. MoBurundi kwa kere mo vanavazinyetu ava ngava zuvhisa nampili ngomu mwa kere tupu Nombangi 28 mosirongo nasinye. Ose ngatu ligwana novantu wokuuyunga Ruingilisa momukunda ogu ngatu zuvhisire. Nye twa dimbwilire asi mokuvatera vantu va ture po ezokomeho, twa hepere kulironga eraka limwe eli ngava uyunga vantu. Ose kwa tamekere kuzuvhisira mositata saKampala omu ngava uyunga unene eraka Luganda, makura tatu tokora kulironga eraka olyo. Ayo kwa tu gusire nomvhura dongandi komeho tu ya dive nawa eraka olyo, nye ayo ya tu vaterere tu zuvhise nawa. Twa ya dimbwilire eyi va hepere kulironga varongwa vetu woBibeli. Apa varongwa vetu va dimbwilire omu twa va here, ayo ya va tumangedere va tu tantere omu ngava lizuvhu kuhamena eyi ngava lirongo.

Ose kwa hefe unene apa twa vaterere vantu va lironge Bibeli. Nye twa hefe hena apa va tu tanterere tu rugane sirugana sokudingura nombungakriste mosirongo nasinye saUganda. Beteli zaKenya kwa tu tanterere tu gende mosirongo nasinye yipo tu papare mavango oku kwa hepere vazuvhisi wosiruwo nasinye. Yikando yoyinzi, vantu ava va dira kumona rumwe Nombangi daJehova kwa tu tambwire nawa. Awo kwa tu vaterere tu lizuvhe ngwendi vandambo ntani ngava tu terekere ko nondya.

Ezuva limwe, ame kwa kere hena morugendo rumwe. Ame kwa gendere mazuva gavali nehina lyorutenda ni tunde moKampala ni ze kezenga lyoyikepa lyedina Mombasa, kutunda opo yipo na ka twikilire nosikepa ni vyuke kosirongo saSeychelles, sirudi esi sa kara mefuta lyoVaindia. Ano konyima, kutundilira mo-1965 dogoro mo-1972, ame ngani zi kumwe naBarbara koSeychelles. Posiruwo sina vazuvhisi vavali ava va kere posirudi oso kwa lipakerere va kare kambungagona ano konyima kwa ya kere mbungakriste. Sikando simwe ame kwa kere hena morugendo rokudingura vanavazinyetu womoEritrea nomoEtiyopiya ntani Sudani.

Ukaro womoUganda kwa litjindjire konyima zapa mbunga zovakwayita za tamekere kupangera mosirongo. Nomvhura edi da kweme ko kwa kere doudigu ntani na lirongere asi ya wapa kukwama epukururo lyomoBibeli asi: “Omu futire hompa eyi ya tumbukira hompa.” (Mar. 12:17) Sikando simwe, vanayirongo navenye kwa va pulire va ka litjangese pomberewa zovaporosi. Ose kwa limburukwire. Konyima zomazuva gomasesu apa twa singire mositata saKampala, vaporosi kwa tu konderere, name nomutumwa gumwe. Ose kwa tukukire. Awo kwa tu rundilire asi ose vakorokotji makura tava tu twara kositasi sovaporosi oku twa ka fatwilire asi ose vatumwa wombili. Ose kwa va tanterere asi twa mana kulitjangesa nare kovaporosi, nye kapi va yi pulire. Awo kwa tu kwete nokututwara kositasi sovaporosi esi sa kere pepi nembo lyovatumwa. Ose kwa hefe sili apa twa ka gwene muporosi ogu ga divire asi tuna litjangesa nare. Age ga tu dimbwilire ntani nokutantera vaporosi ava va tu kwete asi va tu sige.

 Mosiruwo sina, ose ngatu ligwanekere nomaukaro gokuguvisa. Vakwayita ngava kondere vantu moyitaura, unene po nsene vana korwa. Komeho va tu pulisire ose nkenye apa ngatu kanderere ntani ngatu lizuvhu mbili momutjima. Nye ehudi mo-1973, vatumwa navenye kwa va tanterere va tunde mo moUganda.

Ose kwa gwene hena situmbukira simwe. Sikando esi kwa tu tumine koCôte d’Ivoire koUtokero waAfrika. Eli kwa kere elitjindjo lyenene, twa hepere kulironga mpo zompe nokuuyunga hena Rufransa siruwo nasinye ntani twa hepere kuparuka kumwe novatumwa wokonontundiliro dapeke. Nye twa mwene omu Jehova ga tu vaterere morwa vantu wovawa kwa tambwire mbudi zongwa. Ose twa dimbwilire omu kuhuguvara mwaJehova ya tu vaterere tu mone nzira zouhunga.

Nye hararasi tupu, Barbara tava mu kwateke uvera wokankera. Ose ngatu zi koEuropa yikando yoyinzi, nye mo-1983 yipo twa dimbwilire asi kapi hena natu vhura kutwikira nosirugana setu moAfrika. Ayo kwa tu guvisire sili.

Apa twa kere moBeteli zaLondon, kankera zaBarbara kwa didire unene makura ta dogoroka. Epata lyoBeteli kwa vaterere nge. Valikwali vamwe kwa vaterere nge ni tambure ukaro wange nokutwikira kuhuguvara mwaJehova. Konyima zosiruwo, yipo na lidivire namunazinyetukadi ogu nga rugana koBeteli mazuva gamwe. Age kwa kere muzuvhisi gosiruwo nasinye ntani ga here unene Jehova. Ose kwa likwere naAnn mo-1989 ntani ose simpe kurugana moBeteli zaLondon.

Kutundilira mo-1995 dogoro mo-2018, ame kwa kere mukareli po gomberewa zonene (nare ngava si tumbura asi Mutareli goyirongo) pokudingura yirongo yokusika koyiha 60. Moyirongo nayinye oyo, ame na dimburura omu Jehova a tungike vakareli vendi apa ava piti momaudigu.

Mo-2017, ose kwa ka dingwire moAfrika. Na hefe sili kweyi na twere Ann a ka mone Burundi sikando sendi sokuhova ntani natuvenye ya tu tetukisire pokumona omu vantu wovanzi va tambwire usili. Mositaura esi na zuvhisire tunda embo zende embo mo-1964, ngesi kuna kara mo Beteli zongwa. Ntani mosirongo nasinye muna kara vazuvhisi wokupitakana po-15 500.

Ame kwa hefe unene apa na gwene elikwamo lyoyirongo eyi nani dingura mo-2018. Sirongo simwe kwa kere Côte d’Ivoire. Apa twa ka sikire mositata Abidjan, ame kwa lizuvhire ngwendi kuna wiza kembo. Apa na tere pombapira zonomora donoterefona dava va kara moBeteli, tani dimburura po asi munazinyetu ogu ga likundamene nonzugo zovagenda kwa kere munazinyetu Sossou. Makura tani diwororoka asi age kwa kere mutareli gomositata saAbidjan apa na kere mo. Nye mepuko na kere. Age kwa kere muna gwamunazinyetu Sossou.

Jehova ga sikisa mo nonkango dendi. Maudigu aga na pita kwa ronga nge asi apa atu huguvara mwaJehova, age kutulikida nonzira douhunga. Ngesi nina hara kukwama nzira zokudira kuhaga ezi ngazi ka wapa unene mouzuni woupe.—Yis. 4:18.