1-2. (a) Morwasinke sinzi sovantu ayi va karere udigu kulimburukwa ava ava va pangere? (b) Yisinke natu kazogera mosirongwa esi?

NEINA sinzi sovantu kuvadigopera kulimburukwa ava ava va pangere. Awo kumona omu epangero ali popere vantu wonongawo nava wononkondo, nye vantu woruhepo kapi ava va vatere unene. Bibeli kuuyunga asi: “Mouzuni mwa kara vanankondo ava ava hepekere mo vakwaawo.” (Muud. 8:9) Ntani hena, vampitisili womaukerelikarunga kurugana yininke yoyidona, ano eyi kwa ninkisa vamwe va hageke kuhuguvara mwaKarunga. Yipo nye, nsene kuna kulironga Bibeli nagumwe, twa hepa ku mu vatera a huguvare mwaJehova ntani a huguvare movantu ava ga tura po Jehova va pitisire mbunga zendi pevhu.

² Nye nampili ngoso, varongwa woBibeli kapisi yiwo velike tupu nava huguvara mwaJehova ntani nomombunga zendi. Nampili yi kare asi ose kwa karera Jehova nomvhura dononzi, twa hepa kuyipura asi Jehova kurugana yininke monkedi zongwa. Poyiruwo yimwe, ose ngatu ligwanekere nomaukaro aga nampo nga ga tu heteka nsene yosili twa huguvara mwaJehova. Mosirongwa esi, tatu kazogera maukaro gatatu omu epuro lyetu nava vhura kuliheteka: (1) apa atu resa yihorokwa yimwe yomoBibeli, (2) apa atu gwana mavyukiso gokutunda kombunga zaJehova ntani (3) apa ngatu ligwanekera nomaudigu komeho.

3. Ngapi omu yihorokwa yimwe yomoBibeli nayi tu heteka nsene asi twa huguvara mwaJehova?

 ³ Ngomu atu resa Bibeli, ose nampo kuvhura tu li pure konda zeyi Jehova ga tekwilire vantu vamwe monkedi zapeke ntani konda  zeyi ga tulilire po matokoro gamwe. Pasihonena, mobuke zaNumeri ose kuresa mo mpangera ezi ga geve Jehova koVaisraeli asi va dipage Muisraeli ogu ga ka tjeve yitare mezuva lyEsabata. Mobuke zaSamwere gwauvali, ose kuresa mo asi konyima zonomvhura dononzi, Jehova kwa gusilire po hompa Ndafita konzo ezi ga tulire zokuhondera nokudipaga. (Num. 15:32, 35; 2 Sam. 12:9, 13) Nye nampo kuvhura tu li pure asi: ‘Morwasinke Jehova ga gusilire po Ndafita konzo ezi ga tulire zokuhondera nokudipaga nye a tokwere konomfa Muisraeli ogu ga tulire nzo ezi za dilire kukara mulyo unene?’ Mokukalimburura epuro olyo, ka koneke yininke yitatu eyi twa hepa kudiworoka nsene kuna kuresa Bibeli.

4. Ngapi omu etjangwa lyaGenesis 18:20,21 ntani Deuteronomium 10:17 naga tu vatera tu huguvare momatokoro aga a tulisa po Jehova?

⁴ Poyiruwo yimwe Bibeli kapi azi gava mauzera nagenye kuhamena sihorokwa songandi. Pasihonena, ose twa yi diva nawa-nawa asi Ndafita ga ya litezwilire koyininke yoyidona eyi ga rugene. (Epis. 51:2-4) Nye nkareso musinke ga kere nazo mugara ogu ga tezere po veta zEsabata? Ga lizuvhire unzoni konzo ezi ga tulire ndi? Age ngoso kapi nga limburukwa nare konoveta daJehova ndi? Age nga semburura nokunyokera po marondoro gokutunda kwaJehova ndi? Bibeli kapi za yi uyunga oyo. Nye nampili ngoso ose kuvhura kuyipura asi Jehova “kurugana eyi ya vyuka.” (Deut. 32:4) Jehova kutura po matokoro kuliza nomauzera nagenye, nye kapisi kuliza neyi ava uyunga vantu, ndi elitondororo ndi nkenye eyi nayi ninkisa vantu va kare nomutaro gepuko kuhamena ukaro wongandi. (Resa Genesis 18:20, 21; Deuteronomium 10:17.) Moomu tuna kulironga yoyinzi kuhamena Jehova nonompango dendi, yimo hena ngayi tu vatera tu huguvare momatokoro aga a tulisa po. Nampili ngomu atu dili kukwata egano yihorokwa yimwe yomoBibeli, ose twa diva yoyinzi kuhamena Jehova asi age “kuhungika nayinye eyi a rugana.”—Epis. 145:17.

5. Ngapi omu kudira kusikilira mo a ku tu ninkisa tu dire kutara yininke monkedi zouhunga? (Tara kakende “ Kudira kusikilira mo kutuninkisa pamwe tu dire kutara yininke monkedi zouhunga.”)

⁵ Kudira kusikilira mo kutuninkisa pamwe tu dire kukwata egano yininke monkedi zouhunga. Karunga kwa tu sita nevhuliko lyokuhonena yikara yendi, yipo nye ose tuna hara  kutara vantu monkedi zokuhetakana. (Gen. 1:26) Nye morwa kudira kusikilira mo, ose kuvhura kutara yininke monkedi zepuko, nampili ngomu poyiruwo yimwe atu gazara asi tuna kara nomauzera nagenye. Pasihonena, Jona kwa guvire apa Jehova ga tulire po etokoro lyokulikida nkenda kovantu ava va tungire mositata saNinivhe. (Jona 3:10–4:1) Nye gazadara ko kweyi ya ya horokere konyima zapa Jehova ga likidire nkenda Vaninivhe. Vaninivhe wokupitakana po 120 000 kwa va parwire. Jona yige ga pangwire vantu mepuko nye kapisi Jehova.

6. Morwasinke ya dilira kukara hepero kwaJehova mokutufatwilira nokonda deyi a tulisire po matokoro?

⁶ Jehova kapi ga hepa kufatwilira vantu nokonda deyi a tulire po matokoro. Yimo, Jehova nga pulisire vakareli vendi va nare va mu tantere malizuvho gawo kuhamena matokoro aga ga tulisire po ndi aga ga here kutulisa po. (Gen. 18:25; Jona 4:2, 3) Ntani poyiruwo yimwe nga gava nokonda deyi nga tulisire po matokoro. (Jona 4:10, 11) Nye nampili ngoso, Jehova kapi ga hepa kutufatwilira nokonda deyi a tulisire po matokoro. Mokumona asi age Musiti gwetu, age kapi ga hepa epulisiro lyetu, komeho ndi konyima zo ku tulisa po etokoro.​—Jes. 40:13, 14; 55:9.

7. Sininke musinke nampo na si tu karera udigu ntani morwasinke?

⁷ Ose twa yi pura nawa-nawa asi Jehova kurugana nkenye apa youhunga. Nye nampili ngoso, ayo kuvhura yi tu karere udigu kuhuguvara ava ga horowora Jehova yipo va pitisire mbunga zendi pevhu. Ose nampo kuvhura tu lipure nsene asi ava ava pitisire mbunga zaJehova kukwama mavyukiso gokutunda kwaJehova ndi kukwama magano gavene tupu. Eyi yiyo nampo va gazarere vamwe ava parukire mosiruwo sanare. Tu zeni tu ka zogere yihonena eyi vana tumbura  moparagarafu 3. Vanekoro womugara ogu ga tezere po veta zEsabata nampo va li pulire nsene Mosesa ga pulire ko kwaJehova komeho mugara gwina va mu tokwere konomfa. Kaume kaUliya, ogu mukadendi ga honderere naNdafita, age nampo ga gazarere asi Ndafita kwa ruganesere nonkondo dendi ngahompa yipo a henduke etengeko lyokumudipaga. Jehova ga huguvara ava ga horowora yipo va pitisire mbunga zendi pevhu. Yipo nye, nsene kapi twa huguvara vagara owo, ose kapi tatu vhuru kuuyunga asi twa huguvara Jehova.

8. Malifano musinke ga kara po pokatji keyi va tjanga moYirugana 16:4, 5 ntani nomu mbungakriste ava zi gendesa neina?

⁸ Neina Jehova kupitisira ruha rombunga zendi zepehvu kupitira ‘momukareli gokulimburukwa gonondunge.’ (Mat. 24:45) Ngwendi moomu tupu ngazi yi rugana mbungagendesi zomosiruwo sovapositoli, mukareli gokulimburukwa gonondunge nage kupitisira vantu vaKarunga uzuni mudima noku gava mavykukiso kovakuronambunga. (Resa Yirugana 16:4, 5.) Ano vakuronambunga, awo kudivilisa asi kuna kusikisa mo mavyukiso ogo mombungakriste. Ose kuyilikida asi twa huguvara monkedi omu Jehova a rugana yininke, pokulimburukwa komavyukiso aga atu gwana kombunga zendi ntani nokovakuronambunga.

9. Posiruwo musinke nampo nayi tu karera udigu kukwama matokoro aga ava tulisa po vakuronambunga ntani morwasinke?

⁹ Poyiruwo yimwe, ayo kuvhura yi tu karere udigu kukwama mavyukiso aga ava tulisa po vakuronambunga. Pasihonena, monomvhura edi dantani, monombungakriste dononzi kwa horoka mo malitjindjo. Momaukaro gamwe, vakuronambunga kwa pura vazuvhisi vamwe yipo va ka pongere konombungakriste dapeke mokukaruganesa nawa Yinyanga yetu yoUhompa. Nsene vana tu pura tu ka pongere kombungakriste zompe, ayo kuvhura yi tu karere udigu kusiga vakaume novanekoro vetu. Ngoso vakuronambunga kugwana mavyukiso aga aga va tantere  asi kombungakriste musinke na va tuma vazuvhisi ndi? Hawe. Yipo nye, eyi kuvhura kutukarera udigu kukwama mavyukiso aga atu gwana. Nye Jehova ga huguvara vakuronambunga mokutulisa po matokoro gangoso ntani nose twa hepa kuvahuguvara. *

10. Kuliza noVahebeli 13:17, morwasinke natu kwatesera ko matokoro aga ava tulisa po vakuronambunga?

¹⁰ Morwasinke natu kwatesera ko matokoro aga ava tulisa po vakuronambunga nampili ngomu aga dili kutuhafesa? Morwa nsene tu yi rugana ngoso, mbungakriste nga zi kara mouumwe. (Efe. 4:2, 3) Nombungakriste kugwanena mo mauwa apa natuvenye atu kwatesa ko matokoro govakuronambunga. (Resa Vahebeli 13:17.) Nye unene po, ose kuyilikida asi twa huguvara unene mwaJehova pokuruganena kumwe nava ga horowora yipo va tu pitisire.​—Yirug. 20:28.

11. Yisinke nayi tu vatera tu huguvare unene momavyukiso aga atu gwana kovakuronambunga?

¹¹ Ose kuvhura kuhuguvara unene momavyukiso gokutunda kovakuronambunga, nsene tu diworoka asi awo kukanderera yipo va gwane mpepo zokupongoka apa ava zogere yininke yokuhamena kombungakriste. Awo hena kukona-kona nawa nompango domoBibeli ntani nomavyukiso gokutunda kombunga zaJehova. Yosili vakuronambunga vana hara kuhafesa Jehova ntani noku pakera mbili vantu vendi. Vagara ava wovalimburukwi va yi diva asi Karunga kutara asi ngapi omu vana kupakera mbili vantu vendi. (1 Pet. 5:2, 3) Gazadareni ko kuhamena sitwa esi. Nampili ngomu mouzuni ou mwa kara maligaunuko gonomuhoko, gomaukarelikarunga ntani gomaupolitika, vantu vaJehova awo kukarera Karunga gumwe tupu mouumwe. Eyi kuvatompoka tupu morwa Jehova kukwatesa ko mbunga zendi.

12. Yininke musinke va hepa kukona-kona vakuronambunga yipo va dive nsene muntu ana litezurura?

¹² Jehova kwa pa vakuronambunga situmbukira somulyo unene, sokuninka mbungakriste zi kare zina kuhuka. Nsene Mukriste ana tura nzo zonene, Jehova kundindira ko kovakuronambunga va tokore nsene asi muntu gwangoso kuvhura a twikire kukara mombungakriste. Yininke yinzi eyi va hepa kurugana. Awo va hepa kudivilisa nsene muntu ogo ana litezurura sili koyininke eyi ga rugana. Muntu ogo kuvhura a uyunge asi ana litezurura sili, nye age ngoso ga nyenga eyi ga rugana ndi? Age ana tokomene mokudira kutura nzo zokulifana ndi? Nsene asi vakaume vendi wovadona yiwo va mu ninkisire a zone, age ngoso ana tokomene kuhagekesa po ukaume novantu vangoso ndi? Vakuronambunga kukanderera kwaJehova noku kona-kona mauzera ntani neyi azi uyunga ko Bibeli, awo hena kukona-kona omu ana kulizuvha muntu ogo kweyi ga rugana. Makura awo kutokora nsene muntu ogo ga tura nzo kuvhura a twikire kukara mombungakriste. Poyiruwo yimwe, muntu gwangoso va hepa kumugusa mombunga.​—1 Kol. 5:11-13.

13. Sinka musinke esi natu vhura kukara naso nsene kaume ketu ndi gumwe gekoro lyetu va mu gusa mombunga?

¹³ Ukaro musinke ngau tu heteka ou ngau likida nsene asi twa huguvara vakuronambunga? Nsene asi muntu ogu va gusa mombunga kapisi kaume ketu ndi kapisi gumwe gekoro lyetu, ayo kuvhura ngayi tu karere ureru kutambura etokoro olyo lyovakuronambunga. Nye ngapi nsene asi ogu vana gusa mombunga kuna kara kaume ketu gomunene? Ose nampo kuvhura ngatu kare nosinka nsene asi vakuronambunga kava konakonene maumbangi nagenye, ndi kuvhura tu li pure nsene asi vakuronambunga ka va pangwire monkedi ezi ngano Jehova na vhura ku yi rugana. Yisinke nayi tu vatera tu kare nomutaro gomuwa ketokoro lyovakuronambunga lyokugusa gumwe mombunga?

14. Yisinke nayi tu vatera nsene vakuronambunga va tura po etokoro lyokugusa mombunga kaume ketu ndi gumwe gekoro lyetu?

 ¹⁴ Kugusa muntu mombunga kuna kara ewapaiko lyokutunda kwaJehova ntani mbungakriste kuvhura kugwanena mo uwa ntani alyo hena kuvhura kuvatera ogu ana zono yipo a li tezurure. Nsene muntu gokudira kulitezurura va dira kumugusa mombunga, age kuvhura kuninkisa wopeke va zone. (Gar. 5:9) Mokugwederera ko, ayo kuvhura yi mu ninkise a dire kudimburura omu nzo zendi zina kara nosiponga sosinene ntani kuvhura a gazare asi kapisi hepero a tjindje magazaro noyikara yendi yipo a hafese Jehova. (Muud. 8:11) Ose kuvhura tu kare nehuguvaro asi apa vakuronambunga ava tokora nsene gumwe kuvhura va mu guse mombunga, awo kugazadara ko nawa. Ngwendi vapanguli womosiruwo soVaisraeli, vakuronambunga va yi dimburura asi awo va hepa kutakamesa mokupangura kwawo morwa ‘kapisi nonkondo dosintu ava ruganesa nye nani nonkondo daHOMPA.’​—2 Hist. 19:6, 7.

15. Morwasinke twa hepera kuhuguvara unene ngesi mavyukiso gokutunda kwaJehova kupitakana nare?

¹⁵ Ngomu tuna kuhedera pepi nouhura wouzuni woyininke yoyidona, twa hepa kuhuguvara unene Jehova monkedi omu a rugana yininke. Morwasinke? Poudigu wounene, ose nampo kuvhura ngatu gwane mavyukiso aga ngaga moneka ngwendi udigu kugakwata egano ndi udigu unene kugakwama. Yimo, Jehova kapi nga tu uyungisa pasitetu. Nye age nga tu pa mavyukiso kupitira movantu ava ga horowora. Oso kapi ngasi kara siruwo sokulipura asi ‘ngoso aga mavyukiso kuna kutundilira kwaJehova ndi kuna kara magano govanavazinyetu ava ava tu pitisire?’ Ove ngo huguvara mwaJehova ntani nomombunga zendi posiruwo oso soudigu ndi? Monkedi omu o tara mavyukiso gokutunda kovantu ava ga horowora Jehova va pitisire ngayi kuvatera yipo o gwane elimbururo kepuro eli. Nsene o huguvara momavyukiso aga tuna kugwana ngesi ntani noku ga limburukwa, ayo ngayi ka kuvatera yipo ngoka rugane yokulifana poudigu wounene.​—Ruk. 16:10.

16. Ngapi omu ehuguvaro lyetu mwaJehova ngava li heteka komeho?

¹⁶ Twa hepa hena kugazadara ko unene omu ngatu ka lizuvha apa Jehova nga ka pangura vantu pouhura wouzuni. Ngesi ose twa kara nehuguvaro asi vantu ava ava dili kukarera Jehova kukwatera mo vanekoro vetu, ngava tokora kukarera Jehova komeho uhura u wize. Nye poHarumagedoni, Jehova nga ka ruganesa Jesus mokukapangura nkenye muntu pamundinda. (Mat. 25:31-33; 2 Tes. 1:7-9) Ose kapi nga tu tokora asi wolye ava nga likida nkenda Jehova ntani nava nga dira kulikida nkenda. (Mat.  25:34, 41, 46) Ose nga tu huguvara mompanguro zaJehova ndi nga tu hageka kukarera Jehova morwa yeeyi ngatu dira kukwatesa ko matokoro gendi? Yosili, ose twa hepa kuhuguvara mwaJehova ngesi yipo ngatu ka mu huguvare unene komeho.

17. Ngapi omu mpanguro zaJehova nga zi ka tu retera mauwa kouhura wouzuni ou woudona?

¹⁷ Gazara tupu omu ngatu ka lizuvha mouzuni woupe apa ngatu ka mona yitundwamo yompanguro zaJehova. Kapi ngaku ka kara maukarelikarunga goyimpempa ntani kapi ngaku ka kara nongesefa doufuki ndi mapangero aga ga hepeka vantu nomvhura dononzi. Mauvera noukurupe nonomfa, kapi ngayi ka kara ko hena. Satana nonompepo dendi donondona ngava ka mu tura monomango nomvhura eyovi. Yininke nayinye yoyidona eyi ya wiza po morwa urwanesi wawo ngayi ka haga po. (Ehor. 20:2, 3) Ose ngatu ka hafa pokukadiva asi ose kwa huguvarere monkedi omu Jehova a rugana yininke!

18. Yisinke natu lirongera ko kosihonena soVaisraeli esi va tumbura mwaNumeri 11:4-6 ntani 21:5?

¹⁸ Ngoso mouzuni woupe ngatu ka ligwanekera nomaukaro aga nga ga ka tu heteka nsene asi twa huguvara monkedi omu Jehova a rugana yininke ndi? Pasihonena, koneka eyi ya horokere konyima tupu zapa Vaisraeli va va mangwilire moupika waEgipite. Vamwe kwa varekere kusivana morwa ngava rongora nondya donongwa edi ngava li moEgipite ntani awo kwa tere mana ezi gava pere Jehova asi yindya yoyidona. (Resa Numeri 11:4-6; 21:5.) Ngoso ose kuvhura ngatu kare nomagazaro gokulifana konyima zoudigu wounene ndi? Ose kapi tuna diva yirugana eyi ngatu ka rugana mokukazeresa evhu noku ka li ninka li ka kare paradisa. Mokulifana, apo ngapa ka kara yirugana yoyinzi yokukarugana ntani eparu kuvhura nga li dire kukakara ureru. Ose ngatu ka sivanena Jehova kuhamena yihepwa eyi nga ka tu pa posiruwo oso ndi? Sininke simwe esi tuna diva nawa-nawa sesi asi, nsene tu kara norupandu komawapaiko aga atu pe Jehova ngesi, ngayi ka tu vatera tu ka kare norupandu rorunene kweyi nga ka tu pa komeho.

19. Yitwa musinke yomulyo tuna zogere mosirongwa esi?

¹⁹ Jehova kurugana nkenye apa yininke monkedi zouhunga. Yipo nye, twa hepa kuyipura ngoso. Ntani twa hepa kukara nehuguvaro mwava ga huguvara Jehova mokusikisa mo mavyukiso gendi. Narumwesi tu divara nonkango edi ga uyungire Jehova kupitira momuporofere Jesaya, edi adi uyunga asi: “Tengureni, mu huguvare mwange nawa-nawa, makura ngomu nkondope tomu yoworoka.”​—Jes. 30:15.