MOSIRUWO sanare, mugara ndi ekoro lyomugara ngava gava yigondwa kekoro lyomukadi apa ekoro lyomugara neli lyomukadi ngali tokora nsene asi kuvhura kulikwara. Moyigondwa oyo kwa kwaterere mo yininke yomulyo unene, yimuna ndi yimaliwa. Poyiruwo yimwe, yigondwa ngava yi gava pokurugana yirugana yongandi, pasihonena, moukaro waJakopo, age kwa ruganenene oguhwe vaRakera nomvhura ntambali yipo a kware Rakera. (Gen. 29:17, 18, 20) Konda musinke zeyi ngava futire yigondwa?

Mulirongi goBibeli Carol Meyers kwa tente asi: “Yigondwa kuvhura kufuta ekoro lyomukadi kweyi vana kugava munawo gomukadi ogu nga rugana unene [mounandima]. Yigondwa nampo ya vhulire hena kunkondopeka ukaume wopokatji kekoro lyomugara neli lyomukadi. Makoro ogo gavali ga vhulire kulivatera-vatera momaudigu. Mokugwederera ko, yigondwa kwa likidire asi mukadi vana mu vandekere ntani age nga tunda mepakero mbili lyoguhwe nokuka kara mepakero mbili lyamugara gwendi.

Kufuta yigondwa kapi ya tente asi mukadi kwa kere tupu sininke sokuranda ndi sokurandesa. Buke zedina Ancient Israel​—Its Life and Institutions kwa tente asi: “Kugava yigondwa yoyimaliwa ndi yininke yimwe kwa ninkisire nonkwara di moneke ngwendi sininke sokuranda. Nye ayo kumoneka asi [yigondwa] ngava yi tara asi yifutwa eyi ngava gava kekoro lyomukadi nye kapisi yimaliwa eyi ngava futu mokuranda mukadi.”

Neina, moyirongo yimwe, vantu kutwikira kukwama mpo zokugava yigondwa. Apa vakurona woVakriste ava pura yigondwa, awo kulikida ‘ugomoki’ wawo pokuruganesa nonduge dawo pokudira kupura yimaliwa yoyinzi ndi yifutwa yoyinzi. (Fil. 4:5; 1 Kol. 10:32, 33) Monkedi zangoso, awo kuyilikida asi kapi va “dowokera yimaliwa” ndi yininke. (2 Tim. 3:2) Mokugwederera ko, apa vakurona woVakriste ava dili kupura yigondwa yoyinzi, ayo kapi ngayi ninkisa mugara a rundurure nonkwara dogoro nga gwane yimaliwa yokugwanena po yipo a ka fute yigondwa. Ntani kapi ngayi ninkisa mugara a hageke uzuvhisi wokukarerera yipo asi a rugane mazuva gomanzi a gwane yimaliwa yokukafuta yigondwa yoyinzi eyi vana mu pura.

Maruha gamwe gouzuni, kufuta yigondwa kuna kara veta. Nsene asi vakurona voVakriste kuna kara moukaro wangoso, awo va hepa kulimburukwa koveta zangoso. Morwasinke? Morwa Nonkango daKarunga kundindira ko koVakriste va ‘limburukwe kepangero eli ali va pangere’ ntani nokulimburukwa noveta edi adi dili kulirwanesa nonoveta daKarunga.​—Rom. 13:1; Yirug. 5:29.