Wa yi diva ndi?
Morwasinke Jehova ga pulisilire Vaisraeli va zambe nonkutji nonomputukuwa?
VETA zaMosesa kwa pulisilire Vaisraeli va zambe nonkutji nonomputukuwa kwaJehova. Yidira eyi yivali ngava yi tumbura nkenye apa kumwe moveta zokuhamena nonzambo ntani simwe kuvhura kusiruganesa nsene sikwawo pwato. (Lev. 1:14; 12:8; 14:30) Mauwa musinke ga kere mo? Konda zimwe kuna kara asi nonkutji kapi ngava di gwana nkenye apa. Morwasinke?
Nkutji
Nonkutji kuna kara yidira eyi ngayi kara moIsraeli momakwedi goupyu. Nkenye mvhura pokurombo, ayo ngayi zi koyirongo yokourundu youpyu nokukatengura koIsraeli mosiruwo somangenyena. (Rus. 2:11, 12; Jer. 8:7) Eyi kutanta asi ayo kwa kere udigu mosiruwo sanare koVaisraeli mokugava nonzambo dononkutji posiruwo sokufu.
Mputukuwa
Nye koruha rumwe, nomputukuwa kapi ngadi dirauka, yipo nye ado ngadi kara moIsraeli mvhura nazinye. Ntani hena nomputukuwa ngava di weke. (Hetakanesa Johanesa 2:14, 16.) Kuliza nobuke Bible Plants and Animals kwa tente asi: “Nomukunda nonodoropa nadinye domoPalesitina kwa wekere nomputukuwa. Nkenye ogu ga wekere nomputukuwa kwa tjokwere ekero mekuma omu ngayi rara yidira.”—Hetakanesa Jesaya 60:8.
Mputukuwa kuna kara mekero eli va tjokwera mekuma
Jehova kwa likidire eharo nonondunge pokutambura nonzambo doyidira eyi va kere nayo Vaisraeli momvhura.
