Awo kwa va likidire eharo mombungakriste
YOMARA ntani novamumbya vendi wovamati vavali, oMarcelo naHiver, kwa tunga mokamukunda kokanunu moGuatemala. Yomara yige ga tamekere kulironga Bibeli kumwe noNombangi daJehova, ano konyima vamumbya vendi wovamati nawo yipo va ya lipakerere kumwe nage pelirongo lyoBibeli. Nye pwa kere udigu. Moutatu wawo navenye vatwiku, ntani kapi va vhulire kuresa eraka lyorutwiku. Yipo nye, murongi gwawo goBibeli ngava resere noparagarafu ntani nonovelise domoBibeli.
Ayo ngayi va karere hena udigu kuza komapongo. Ayo kapi ngayi va karere ureru pwavene mokugenda sinano sonominute 40 yipo va ze koSinyanga soUhompa sopopepi. Nye vanavazinyetu womombungakriste kwa tulire po mawapayiko yipo va va tware komapongo nagenye. Ntani moutatu wawo apa va tamekere kugava maruha momapongo gomokatji komosivike, vanavazinyetu ngava va vatere yipo va kwate momutwe maruha gawo.
MwaKudumonkuru 2019, mapongo gombungakriste yipo ga tamekere kukara momukunda gwawo. Posiruwo oso, valikwali vavali wovazuvhisi wokukarerera vana dirukire momukunda gwawo. Awo kapi va divire kuresa nokutjanga eraka lyorutwiku, nye awo kwa tokomenene kuronga vatwiku ava omu nava resa nokutjanga. Yipo va zire kevango eli ava pungwire nobuke, makura yipo va ka gwene ko nobuke demeraka lyorutwiku, yipo va lironge omu nava ronga wopeke omu nava di ruganesa.
Marcelo kuna kugava elimbururo mepongo lyombungakriste
Konyima zomakwedi gongandi, vatwiku ava vatatu va vhulire kuresa rutwiku noureru, ntani eyi kwa va vaterere va tunge po elikwatakano lyenene kumwe naJehova. a Ngesi Yomara naMarcelo ntani naHiver kuna kara vazuvhisi wokukarerera. Marcelo mukwafimbunga. Awo kulihameka mo unene moyininke yopampepo sivike nasinye. Awo kwa kara noupampi wounene mokukarera Jehova, ano eyi kuninkisa ava va va kundurukida yipo nawo va kare noupampi.
Vatwiku ava vatatu kupandura unene kevatero eli ava gwana kovanavazinyetu womombungakriste zawo. Yomara kwa uyunga asi: “Kutundilira ezuva lyokuhova eli twa ligwene noNombangi daJehova, awo kwa tu likida eharo lyosili lyoSikriste.” Marcelo kwa gwederera ko asi: “Ose kwa kara novakaume wovawa womombungakriste zetu ntani ose kwa hamena kepata lyomouzuni mudima eli lya kara mouumwe.” Yomara kumwe novambya vendi wovagara kuna kundindira nononkondo mokukamona omu Jehova nga ka tjindja evhu li ka kare paradisa.—Ps 37:10, 11; Jes 35:5.
a Mbapira zosiparatjangwa Learn to Read Braille kwa zi wapayikira vatwiku ndi vantu ava ava dili kumona nawa yipo va lironge omu nava resa nokutjanga eraka lyorutwiku.
