1. Morwasinke wa karera norupandu koBibeli?

 OSE kupandura unene Jehova Karunga kweyi ga tu pa Bibeli! Kupitira moBibeli, age kutupa mavyukiso aga naga tu vatera tu lididimikire maudigu aga tuna kuligwanekera nago naina. Age hena kwa tu pa ehuguvaro lyewa lyokomeho. Somulyo po unene, Jehova kwa ruganesa Bibeli yipo a horowore yikara yendi yoyinzi. Apa atu teda ko koyikara yendi yoyiwa, ayo kutuguma unene komutjima ntani kututumangeda tu hedere Karunga gwetu pepi pokutulisa po ukaume kumwe nendi.—Epis. 25:14.

2. Mononkedi musinke dokulisiga-siga omu Jehova ga lidivisa mwene kovantu?

² Jehova kuna hara vantu va mu dive. Mosiruwo sanare, age kwa lidivisire mwene kupitira mononzodi, momamoneko ntani movaengeli. (Num. 12:6; Yirug. 10:3, 4) Nsene asi ngano kapi va yi tjanga, ose ngano kapi a yi tu tompoka kulironga kuhamena nonzodi odo nomamoneko ntani nonombudi edi da tundilire kovaengeli. Ano eyi yiyo nye Jehova ga ruganeserere vagara yipo va ‘tjange mobuke’ yininke eyi ga tu harerere tu dive. (Jer. 30:2) Mokumona asi “nzira zaKarunga kwa hungama,” ose kuvhura tu kare nehuguvaro asi nkedi ezi a ruganesa mokuuyunga kumwe nose ngwa unene ntani nga zi tu vatera.—Epis. 18:30.

3. Ngapi omu Jehova ga divilisa yipo tu kare noBibeli dogoro neina? (Jesaya 40:8)

³ Resa Jesaya 40:8. Nonkango daKarunga kwa gava mavyukiso gomawa kovagara novakadi wovalimburukwi nomvhura dononzi. Ngapi omu ya tompoka oyo? Olyo kuna kara epuro lyewa sili, morwa pomuhowo Bibeli kwa zi tjenge monobukegango ntani poyipapa eyi ya ya zonaukire po konyima. Yipo nye, neina ose kapi twa kara nonobuke danare ntani noyipapa. Nye Jehova kwa divilisire asi vantu va hepere kutjangurura nonkango dokupongoka.  Nampili ngomu vagara ava va tjangwilire Nonkango daKarunga va dilire kusikilira mo, awo kwa takamesere nawa ngomu va di tjangwilire. Pasihonena, mulirongi gumwe kwa tjenge kuhamena Matjangwa goRuhebeli asi: “Kwato hena buke zapeke zomosiruwo sanare ezi va tjangurura nawa.” Yipo nye, nampili ngomu Bibeli va zi tjenge nare-nare poyininke eyi ayi zonauka ntani nampili ngomu vantu ava va zi tjenge va dilire kusikilira mo, ose kuvhura kukara nehuguvaro asi nonkango edi atu resa moBibeli neina, kwa kara mo magano goMutjangi gwazo, Jehova.

4. Yisinke natu kazogera mosirongwa esi?

⁴ Jehova yige a tu pe “nkenye uhwi wouwa ou wa sikilira mo.” (Jak. 1:17) Bibeli kuna kara uhwi umwe wouwa po unene ou ga tu pa Jehova. Apa gumwe a tu pe uhwi, uhwi wangoso kulikida asi age ga tu diva nawa ntani ga diva yihepwa yetu. Ayo ya lifana noMugavi ogu ga tu pa Bibeli. Apa atu kona-kona uhwi owo, ose kulironga yoyinzi kuhamena Jehova. Ose kulironga asi age ga tu diva nawa ntani ga diva eyi twa hepa. Mosirongwa esi, tatu ka lironga omu Bibeli azi likida yikara yitatu yaJehova: unongo wendi, uhungami wendi ntani eharo lyendi. Pomuhowo tu konakoneni nonkedi dimwe omu Bibeli azi likida unongo waKarunga.

5. Nkedi musinke zimwe omu Bibeli azi likida unongo waKarunga?

⁵ Jehova ga yi diva asi twa hepa mavyukiso gendi. Ntani uhwi wendi Bibeli, kwa zura mo unongo wendi. Mavyukiso gomoBibeli kukundama vantu monkedi zongwa. Bibeli kutjindja eparu lyomuntu. Apa nobuke dokuhova domoBibeli va di tjenge, Mosesa kwa tanterere vantu vaKarunga, Vaisraeli asi: “Marongo aga kapisi nonkango tupu domawoko-woko, nani nye ago mwenyo gweni gwene-gwene.” (Deut. 32:47) Ava va limburukwire Matjangwa ya va tompokere meparu ntani va kere neparu lyoruhafo. (Epis. 1:2, 3) Nampili ngomu Nonkango daKarunga va di tjenge nare-nare, ado simpe kwa kara nononkondo dokutjindja eparu lyovantu. Pasihonena, ko-jw.org, koruha “Bibeli kurundurura eparu lyovantu,” kuvhura kugwana ko yihonena yovantu yokupitakana po-50, ava va vhulire kutura po malitjindjo gomanene ntani nokurundurura eparu lyawo morwa va tamekere kulimburukwa mavyukiso gomoBibeli.—1 Tes. 2:13.

6. Morwasinke natu uyungira asi Bibeli za lisiga nonobuke dapeke?

⁶ Kwato hena buke zimwe ezi za fana ngwendi Nonkango daKarunga. Morwasinke ya karera ngoso? Morwa Mutjangi gobuke ozo, Jehova Karunga, age munankondo nadinye, gwanarunye ntani ga kara nounongo ou wa pitakana nkenye ogu. Nobuke dononzi kutwikira ku di resa, nampili konyima zapa vatjangi vado ava dogoroka. Nye mapukururo gomonobuke odo kapi aga ya kara hena nomulyo mwa za siruwo. Ano mokulisiga, nompango domoBibeli ado danarunye ntani kwa vatera vantu kutunda kwanare dogoro ngesi. Apa atu resa buke ozo zokupongoka ntani nokuteda ko kweyi tuna kulironga, Mutjangi gwazo kuruganesa mpepo zendi zokupongoka yipo zi tu vatere tu dimburure omu natu tura pasirugana mavyukiso gomoBibeli meparu lyetu. (Epis. 119:27; Mara. 3:16; Heb. 4:12) Yosili, Mutjangi goBibeli ana liwapayikire kukuvatera. Eyi ngano yi tu tumangede yipo tu kare neharo lyokuresa Bibeli nkenye apa!

7. Ngapi omu Bibeli za vaterere vantu vaKarunga womosiruwo sanare va kare mouumwe?

⁷ Koyili hena yimwe eyi ayi likida asi moBibeli kwa kara mo unongo waKarunga, ayo kuna kara asi Bibeli kuvatera vantu vaKarunga va kare mouumwe. Apa Vaisraeli va ka sikire moSirongo sEtumbwidiro, awo kwa ka tungire komavango gokulisiga-siga. Vamwe kwa  kere vakwati wonomfi, ano vamwe ka wekere nongombe, ntani hena vamwe kwa limine mapya. Vaisraeli ava va tungire mevango limwe, awo ngano va hagekere kugazadara ko Vaisraeli vakwawo ava va tungire komavango gapeke gomosirongo. Nye Jehova kwa tulisire po mawapayiko yipo Vaisraeli va ponge kumwe poyilika yokulisiga-siga yipo va purakene koNonkango dendi edi ngava va resere noku va fatwilira. (Deut. 31:10-13; Neh. 8:2, 8, 18) Gazara tupu omu ga lizuvhire Muisraeli gomulimburukwi apa ga ka sikire moJerusarema ntani nokumona nampo mamiliyona govakareli vakwawo ava va tundire komaruha gokulisiga-siga gosirongo! Monkedi ezi, Jehova kwa vaterere vantu vendi va twikire kukara mouumwe. Ano konyima, apa va tulisire po mbungakriste zokuhova posiruwo sovapositoli, amo kwa kere mo vagara novakadi ava ngava uyunga maraka gomanzi ntani ava va tundilire konontundiliro dokulisiga-siga, vamwe kwa kere nongawo ano vamwe ruhepo. Nye mokumona asi awo kwa here Matjangwa, awo ngava karere Karunga gousili mouumwe. Ava va ya kere vapuli, kwa kwete tupu egano Nonkango daKarunga kupitira mevatero lyovapuli vakwawo ntani mokuponga kumwe nawo.—Yirug. 2:42; 8:30, 31.

8. Ngapi omu Bibeli azi vatere vantu vaKarunga va kare mouumwe neina?

⁸ Karunga gwetu gounongo kutwikira kuturonga ntani nokuvatera vantu vendi va kare mouumwe, kupitira moBibeli. Azo kuna kara ntundiliro zonondya dopampepo edi atu hafere unene. Ose kuponga nkenye apa kumwe komapongo getu, koyigongi, nokupurakena koMatjangwa  aga ava resa nokufaturura ntani aga ava zogere. Yipo nye, Bibeli kuna kara siruganeso somulyo unene esi a ruganesa Jehova yipo a vatere vantu vendi va mu ‘limburukwe.’—Sef. 3:9.

9. Sikara musinke esi twa hepa esi nasi tu vatera tu kwate nawa egano mbudi zomoBibeli? (Rukasa 10:21)

⁹ Tu tareni umbangi umwe hena ou au likida unongo waJehova. Matjangwa gomanzi aga ga retesa po Jehova kwa ga tjanga monkedi omu nava vhura tupu ku ga kwata egano vantu wokulinunupika. (Resa Rukasa 10:21.) Nkenye oku koruha no za mouzuni mudima, vantu kuresa Bibeli. Mulirongi gumwe kwa uyunga asi “Bibeli kapisi buke tupu ezi ava resa po unene, nye hena azo kuna kara buke ezi ava resa po nawa konobuke nadinye.” Nye vantu wokulinunupika yiwo velike ava zi kwata nawa egano ntani noku tura pasirugana eyi azi tanta.—2 Kol. 3:15, 16.

10. Monkedi musinke hena zimwe omu Bibeli azi likida unongo waJehova?

¹⁰ Ose kulironga unongo waJehova moBibeli monkedi hena zimwe zapeke. Jehova kapi tupu a ruganesa Matjangwa pokuturonga ngombunga, nye hena kuturonga noku tu hengagwida pamundinda. Apa atu resa Nonkango daJehova, ose ku ya dimburura asi Jehova ga kara nosinka kwankenye gumwe gwetu. (Jes. 30:21) Apa o ligwanekere noudigu, yikando yokuhura kupi o gusa Bibeli noku resa velise ezi azi moneka asi nyove va zi tjangera? Nye nampili ngoso, Bibeli kuzihafera mamiliyona govantu. Ngapi omu moBibeli na mu kara nombudi edi dina lizi neyi ono hepa? Eyi kutompoka, morwa Mutjangi goBibeli kuna kara muntu gounongo.—2 Tim. 3:16, 17.

11. Ngapi omu Karunga ga yi likidire asi kapi ga kara nompongo apa Bibeli va zi tjenge?

¹¹ Uhungami kuna kara sikara simwe hena saJehova. (Deut. 32:4) Uhungami kwa likwatakana nokudira kukara mpongo ntani Jehova kapi ga kara nompongo. (Yirug. 10:34, 35; Rom. 2:11) Ose kuvhura ku yi monenena asi Jehova kapi ga kara nompongo monkedi omu va tjanga Bibeli momaraka gokulisiga-siga. Nobuke 39 dokuhova domoBibeli kwa di tjenge unene po moRuhebeli, eraka eli ngava kwata egano vantu vaKarunga posiruwo sina. Nye nampili ngoso, mosiruwo sovapositoli, sinzi sovantu ngava uyunga Rugereka, yipo nye nobuke 27 dokuhulilira domoBibeli kwa di tjenge unene po meraka olyo. Jehova kapi ga tokwere asi Nonkango dendi va di tjange meraka limwe tupu. Neina, vantu wokusika hambara komabiliyona ntantatu ava va tunga pevhu kuuyunga maraka gomanzi. Ngapi omu vantu wovanzi ngoso nava vhura kulironga yoyinzi kuhamena Jehova?

12. Monkedi musinke zimwe omu etjangwa lyaNdaniyera 12:4, NW, lyasikilira mo momazuva aga gopouhura?

¹² Kupitira momuporofete Ndaniyera, Jehova kwa tumbwidilire asi pomazuva gopouhura “ediwo lyousili” eli lya kara moBibeli “nga li vhuka.” Wovanzi ngava yi kwata egano. (Resa Ndaniyera 12:4, NW.) Nkedi zimwe omu ediwo olyo lya vhuka, kuna kara kupitira mokutoroka, mokuyipwagesa ntani pokugavera noBibeli noyimbapiratjangwa. Bibeli kuna kara buke ezi va toroka po unene ntani ezi va gavera po unene mouzuni mudima. NoBibeli edi ava nduruka vanangesefa poyiruwo yimwe kukara ndiro unene. Dogoro papa, vantu vaJehova kwa toroka Bibeli nazinye ndi nobuke dongandi domoBibeli momaraka gokupitaka po-240 ntani nkenye gumwe kuvhura kugwana Bibeli zamwene pwa hana mfuto. Ngoyitundwamo, vantu wokonomuhoko nadinye kuna kulironga “mbudi zongwa zoUhompa” komeho uwize uhura. (Mat. 24:14) Karunga gwetu gokuhungama, kuna hara kugava mpito kovantu wovanzi ngesi yipo va mu dive kupitira mokuresa Nonkango dendi. Age kuyirugana oyo morwa ga tu hara unene natuvenye.

13. Morwasinke natu uyungira asi Bibeli kulikida asi Jehova ga tu hara? (Johanesa 21:25)

¹³ Bibeli kutuvatera tu kwate egano asi sikara saJehova sosinene po kuna kara eharo. (1 Joh. 4:8) Tu tareni eyi Jehova ga tura moBibeli ntani neyi ga hupisa ko. Age kwa tura mo eyi twa hepa yipo tu kare nelikwatakano kumwe nendi, tu hafere eparu ngesi ntani tu ka gwane mwenyo gwanarunye. Nye nampili ngoso, mokumona asi Jehova ga tu hara, age kapi ga tu pa mauzera gomanzi aga twa dira kuhepa yipo tu mu karere.—Resa Johanesa 21:25.

14. Monkedi musinke hena zimwe eyi ya kara moBibeli ayi likida asi Karunga ga tu hara?

¹⁴ Jehova kwa tu likida hena eharo pokuuyunga nose monkedi zefumadeko. Age kapi ga tu tulira moBibeli noveta dokuvyukilira, kuhamena eyi natu rugana nawa-nawa ndi eyi natu dira kurugana meparu lyetu. Mevango lyoyo, age kuruganesa yihorokwa yosili yovantu ava va parukire nomauporofete gokuhafesa ntani nomavyukiso gomawa, mokutuvatera tu ture po matokoro gomawa. Mononkedi dangesi, Nonkango daKarunga kututumangeda tu mu hare ntani noku mu limburukwa kutundilira komutjima.

15. (a) Ngapi omu Jehova ga yi likida asi age kupakera mbili ava ava resa Nonkango dendi? (b) Kuliza nefano, muntu musinke gomoBibeli ogu ana kuteda ko mukadonagona, mudinkantu gomugara, ntani munazinyetu gomukadi gomukurupe? (Gen. 39:1, 10-12; 2 Vah. 5:1-3; Ruk. 2:25-38)

¹⁵ MoBibeli kwa likida mo asi Jehova kutupakera mbili unene. Monkedi musinke? MoNonkango dendi kwa kara mo yihorokwa yoyinzi eyi ayi likida omu ava lizuvhu vantu. Ose kuvhura tu kwate egano malizuvho govantu ava va tumbura moBibeli, morwa awo kwa kere vantu ava va kere ‘nomalizuvho ngwendi getu.’ (Jak.  5:17) Nye unene po pokudimburura omu Jehova nga tekura vantu, ayo kutuvatera tu yi kwate nawa egano asi “Jehova ga kara nonkenda zonene.”—Jak. 5:11.

16. Yisinke atu lirongo kuhamena Jehova apa atu resa moBibeli kuhamena vantu ava va tulire mapuko? (Jesaya 55:7)

¹⁶ Bibeli kwa likida nkedi zimwe hena omu Jehova ga tu hara. Matjangwa kutuhuguvaresa asi Karunga gwetu kapi nga tu zumba apa ngatu tura mapuko. Vaisraeli ngava zonene Jehova yikando yoyinzi, nye apa ngava litezurura kutundilira komutjima, Karunga ga va gusilire po. (Resa Jesaya 55:7.) Vakriste womosiruwo sovapositoli, nawo va yi divire asi Jehova kwa va here unene. Mupositoli Paurusa kwa tanterere vapuli vakwawo va gusire po nomutjima nagunye nokuhengagwida mugara ogu ga tulire nzo zonene, ogu ga litezwilire. (2 Kol. 2:6, 7; 1 Kol. 5:1-5) Ayo kuhafesa pokudiva asi Jehova kapi ga nyokere vakareli vendi asi morwa yeeyi va tulire mapuko! Nye mevango lyoyo, age kwa va likidire eharo pokuvavatera, pokuvapukurura ntani pokuvazigida va kare hena vakaume vendi. Age kwa tumbwidira mokurugana yokulifana kovananzo navenye ava ava litezurura neina.—Jak. 4:8-10.

17. Morwasinke Bibeli za karera uhwi wouwa?

¹⁷ Jehova kwa tu pa uhwi wouwa unene. Morwasinke Nonkango dendi da karera donongwa? Ose tuna lirongo asi Bibeli kulikida asi Karunga ga kara nounongo, ga hungama ntani ga tu hara unene. Buke ezi kulikida asi Jehova ana hara tu mu dive. Age ana hara tu kare vakaume vendi.

18. Ngapi natu yi likida asi twa kara norupandu “kouhwi wouwa” waJehova woBibeli?

¹⁸ Kapi tuna hara kudivara asi Nonkango daKarunga kuna kara “uhwi wouwa.” (Jak. 1:17) Yipo nye, tu twikireni kulikida rupandu kouhwi owo. Ose kuvhura ku yi rugana oyo pokuresa Nonkango dendi dokupongoka ntani nokuteda ko. Nsene tu yi rugana oyo, kuvhura tu kare nehuguvaro asi Mutjangi goBibeli nga tungika elituromo lyetu ntani ngatu “lironga yokuhamena kwaKarunga.”—Yis. 2:5.