1. Yisinke ga tanterere Jesus varongwa vendi kuhamena siruwo souhura wouzuni ntani erondoro musinke ga va pere?

 MAZUVA gongandi komeho Jesus va ka mu dipage, varongwa vendi vane kwa mu pulire asi: “Sidiviso musinke . . . nga si likida uhura wouzuni?” (Mat. 24:3) Varongwa owo nampo kwa pulire asi ngapi omu ngava yi diva siruwo esi Jerusarema nontembeli ngava yi zonagura po. Melimbururo eli ga geve Jesus, age kapi tupu ga uyungire kuhamena ezonauko lyaJerusarema nontembeli, nye age kwa uyungire hena kuhamena ‘uhura wouzuni’ ou tuna kuparuka ngesi. Jesus kwa uyungire kuhamena siruwo sopomazuva gopouhura asi: “Kwato ogu ga diva ezuva nosiruwo apa ngasi sika mo, novaengeli si vemeguru noMuna si, ntudi Guhya.” Makura yipo ga rondwere varongwa vendi navenye asi: “Vangarareni.”—Mar. 13:32-37.

2. Morwasinke ya karerere nomulyo koVakriste womosiruwo sovapositoli va kare vana vangarara?

² Vakriste woVajuda womosiruwo sovapositoli va hepere kuvangarara yipo va paruke. Jesus kwa tanterere varongwa vendi va nomene yininke eyi va hepere kudiva apa Jerusarema nontembeli va ya yi zonagwire po. Age kwa uyungire asi: “Apa ngomu mona Jerusarema vana zi kundurukida vakwayita, diveni asi ezonauko lyazo pepi lina kara.” Posiruwo oso, awo va hepere kupurakena kerondoro lyaJesus ntani ‘nokutjwayukira konondundu.’ (Ruk. 21:20, 21) Ava va purakenene kerondoro eli kwa parukire apa Varoma va ya zonagwire po Jerusarema.

3. Yisinke natu ka zogera mosirongwa esi?

³ Neina ose kuna kuparuka pomazuva gopouhura goyininke yoyidona yomouzuni ou. Yipo nye, nose twa hepa kuvangarara.  Mosirongwa esi tatu ka zogera omu natu kara nehetakano ngomu tuna kutara yihorokwa eyi yina kuhoroka mouzuni. Ntani tatu ka zogera omu natu litakamesa nyamwetu ntani nomu natu ruganesa nawa siruwo esi sina hupu ko.

4. Morwasinke natu hafera pokumona yihorokwa yomouzuni omu yina kusikisa mo mauporofete gomoBibeli?

⁴ Pwa kara nokonda dononzi deyi tuna kuhafera pokumona omu yihorokwa yantaantani yina kusikisa mo mauporofete gomoBibeli. Pasihonena, Jesus kwa tu tantera yininke eyi nayi tu vatera tu dive asi uhura wouzuni ou waSatana pepi una kara. (Mat. 24:3-14) Mupositoli Peturusa kwa tu korangedere tu nomene nawa omu mauporofete gana kusikilira mo yipo epuro lyetu linkondopare. (2 Pet. 1:19-21) Buke zokuhulilira moBibeli kwa tameka nononkango edi asi: “Nonkango edi kwa hamena koyininke eyi ga horwere Jesus Kristusa. Jesus kwa gwene yininke eyi kwaKarunga yipo a tantere vakareli vaKarunga yininke eyi ngayi horoka konyima zokaruwogona.” (Ehor. 1:1) Yipo nye, ose kuhafera yininke eyi yina kuhoroka ngesi mouzuni ntani pokudiva omu na yi vhura kusikisa mo mauporofete gomoBibeli. Ntani ose nampo kuvhura tu kare neharo lyokuzogera kuhamena yihorokwa oyo kumwe novakwetetu.

5. Yisinke twa hepa kunyokera po, nye yisinke twa hepa kurugana? (Tara hena mafano.)

⁵ Nsene kuna kuzogera kuhamena mauporofete gomoBibeli, twa hepa kunyokera po kugazarera eyi ngayi vhura kuhoroka. Morwasinke? Morwa kapi tuna hara kuzogera nkenye eyi nayi vhura kuninkisa mbungakriste zi dire kukara mouumwe. Pasihonena, ose nampo kuvhura tu zuvhe kuhamena vampitisili womouzuni omu vana kuuyunga kuhamena omu nava vhura kukohonona po ediro kulizuvha lyongandi ntani nokuretesa po mbili nompora. Mevango lyokugazarera asi nonkango odo kusikisa mo uporofete ou wa kara mo-1 Vatesaronika 5:3, twa hepa kudiva mauzera aga va pwagesa monomvhura dantani. Apa atu kara nononzogera edi da li za noyininke eyi ya kara moyimbapiratjangwa yetu eyi za pwagesa mbunga zaJehova, ose kuvatera mbungakriste zi kare “mouumwe momagazaro nomositambo simwe.”—1 Kol. 1:10; 4:6.

6. Yirongwa musinke natu lirongera ko ketjangwa lya-2 Peturusa 3:11-13?

⁶ Resa 2 Peturusa 3:11-13. Mupositoli Peturusa kutuvatera tu kare nomutaro gokuhetakana nsene kuna kukonakona mauporofete gomoBibeli. Age kutukorangeda tu “diworoke ezuva lyaJehova eli lina kuwiza.” Morwasinke? Kapisi asi tuna hara kudiva ezuva nosiruwo apa Jehova nga reta Harumagedoni, nye morwa tuna hara kuruganesa siruwo esi sina hupu ko yipo tu kare tuna pongoka ntani tu yi likide ‘moyirugana yetu asi twa ligava kwaKarunga.’ (Mat. 24:36; Ruk. 12:40) Monkango zimwe, tuna hara kukara nonkareso zongwa ntani nokudivilisa asi nayinye eyi atu ruganene Jehova kuna ku yi rugana morwa twa mu hara. Mokuninka asi tu twikire kudemenena koyininke oyo, twa hepa kulitakamesa nawa nyamwetu.

7. Ngapi omu atu yi likida asi ose kuna kulitakamesa nyamwetu? (Rukasa 21:34)

⁷ Jesus kwa tanterere varongwa vendi asi kapisi va li takamese tupu koyihorokwa yomouzuni, nye hena va li takamese vene. Sitwa oso kwa si zeresa nawa merondoro eli lya kara mwaRukasa 21:34. (Resa. ) Konekeni nonkango edi ga uyungire Jesus. Age kwa uyungire asi: “Litakameseni nyamweni.” Muntu ogu a litakamesa mwene kuvangarara kwankenye sininke esi nasi vhura kutura elikwatakano lyendi naJehova mosiponga ntani age kurugana ko yuma yipo a yi nyokere po. Monkedi ezi, age kutwikira  kukara meharo lyaKarunga.—Yis. 22:3; Juda 20, 21.

8. Erondoro musinke ga geve mupositoli Paurusa koVakriste?

⁸ Mupositoli Paurusa kwa rondwere Vakriste va li takamese vene. Pasihonena, age kwa tanterere Vakriste womoEfeso asi: “Takameseni asi mwa ha kara ngwendi magova, nye kareni ngwendi vanandunge.” (Efe. 5:15, 16) Satana kuna kuhetekera ko kuzonagura po ukaume wetu naJehova, yipo nye Bibeli kutuvyukisa apa azi uyunga asi ‘tu kwate egano eyi ana tu harere Jehova tu rugane’ yipo tu lipopere nyamwetu komahomokero nagenye gaSatana.—Efe. 5:17.

9. Ngapi omu natu kwata nawa egano eyi ana tu harere Jehova tu rugane?

⁹ Bibeli kapi azi tu tantere kuhamena yininke nayinye eyi nayi vhura kuzonagwisa po ukaume wetu naJehova. Rorunzi ose twa hepa kutura po matokoro kuhamena maukaro aga va dira kuvyukilira kutumbura moMatjangwa. Mokuninka asi tu ture po matokoro gomawa, twa hepa kudiva eyi ana tu ‘harere Jehova tu rugane.’ Ose kuvhura kuyirugana eyi pokulironga kuhamena Nonkango daKarunga nkenye ezuva ntani nokuteda ko. Moomu tuna kukwata egano eyi ana tu harere Jehova tu rugane ntani nokuhetekera ko kukara nomagazaro gaKristusa, yimo hena ngatu kara vantu wononduge nampili apa atu dili kukara nonoveta edi nadi tu tantera eyi natu rugana. (1 Kol. 2:14-16) Poyiruwo yimwe kutukarera ureru kudimburura yininke eyi twa hepa kunyokera po, nye poyiruwo yimwe ku tu karera udigu.

10. Yininke musinke yimwe eyi twa hepa kunyokera po kurugana?

¹⁰ Yininke yimwe eyi twa hepa kunyokera po kwa kwatera mo yininke ngwendi, kulihoresa kwagumwe, kunwa unene yikorwesa, makurulya, kuuyunga yininke eyi nayi koresa wopeke, kutarera yilihafeso yonyanya, mafano goruhonda ntani nayimwe hena eyi ya li kwatakana nonyanya. (Epis. 101:3) Nkore zetu Satana kuna kutwikira kupapara nompito yipo a zonagwise po ukaume wetu naJehova. (1 Pet. 5:8) Nsene kapi tuna kutakamesa, Satana kuvhura kutura monondunge detu nomonomutjima detu, nkareso zomfudu, kudira kuuyunga usili, edowo lyokudowokera yininke, nyengo, kulinenepeka ntani nkoko. (Gar. 5:19-21) Pomuhowo ove nampo kuvhura kugazara asi malizuvho aga kwato siponga, nye nsene tu dira kurugana ko yuma yipo tu ga nyokere po, ago ngaga twikira kukura mwetu ntani kuvhura ngaga retese po udigu.—Jak. 1:14, 15.

11. Sininke musinke hena simwe esi twa hepa kunyokera po ntani morwasinke?

¹¹ Sininke simwe sosiponga kuna kara kulikwata ukwawo novantu wovadona Tu tareni ukaro ou una kukwama ko. Tu tante asi ove nampo kurugana nagumwe ogu ga dira kukara asi Mbangi zaJehova. Ove ono mu harere a kare nomutaro gomuwa kuhamena Nombangi daJehova, yipo nye ove no kara nombili ntani muntu gokuvatera. Ove hena nampo kulya kumwe muzuhwa nomuntu ogo poyiruwo yimwe. Ano mwaza siruwo ove to tameke kulya muzuhwa nomuntu ogo yikando yoyinzi. Yikando yimwe muntu ogo kuzogera yininke yoruhonda. Ketamekero, ove nampo kapi ono yi hafere, ano konyima to ya yiki nzogera ozo ntani to ya lizuvhu asi kapi zina kukupundukisa. Makura ezuva limwe murugani mukweni ta ku zigida asi mu ka nwe po yimwe konyima zoyirugana, makura ove to tambura ezigido olyo. Ano mwaza siruwo, nove to ya tameke kuyagazara ngwendi murugani mukweni. Ayo kapi ngayi gusa siruwo yipo nove o ya tameke kurugana yirugana eyi a rugana murugani mukweni. Yimo, ose twa kara nombili ntani kufumadeka nkenye gumwe nye twa hepa kudiworoka asi nose kuvhura kuyatameka kuyakara ngwendi vantu ava atu kara-kara kumwe nawo. (1 Kol. 15:33) Nsene tu li takamesa nyamwetu ngwendi moomu ga  yi korangedere Jesus, ose ngatu nyokera po kukara kumwe novantu ava ava dili kukwama nompango daJehova. (2 Kol. 6:15) Ose ngatu mona siponga ntani nokusinyokera po.

12. Yisinke va rugene varongwa vaJesus ngomu va ndindilire ezonauko lyaJerusarema?

¹² Jesus kwa harerere varongwa vendi va rugane unene ngomu va ndindilire ezonauko lyaJerusarema. Jesus kwava pere sirugana esi va hepere kurugana. Age kwava pangerere va zuvhise mbudi zongwa “moJerusarema, moJudeya nazinye nomoSamaliya dogoro mouzuni naunye.” (Yirug. 1:6-8) Yosili varongwa vaJesus kwa gwene situmbukira sosinene esi ga va pere Jesus. Pokurugana paapa va hulira yipo va zuvhisire ko wopeke, ayo kwa likidire asi awo kwa ruganesere nawa siruwo sawo.

13. Morwasinke twa hepera kuruganesa nawa siruwo setu? (Vakorosi 4:5)

¹³ Resa Vakorosi 4:5. Mokuninka asi tu litakamese nyamwetu, twa hepa kugazadara ko omu a tu ruganesa siruwo setu. Ehudi kuvhura kuhorokera nkenye ogu. (Muud. 9:11) Ose kuvhura tu fe twa hana kuyindindira.

14-15. Ngapi omu natu ruganesa nawa siruwo setu? (Vahebeli 6:11, 12) (Tara hena efano.)

¹⁴ Ose kuvhura kuruganesa nawa siruwo setu pokurugana mpango zaJehova ntani pokunkondopeka ukaume wetu kumwe nendi. (Joh. 14:21) Twa hepa ‘kulikorerera, twa ha linyunganga,  ntani tu liture mo mosirugana saHompa.’ (1 Kol. 15:58) Yipo nye apa ngatu sika kehagero, yi kare asi kehagero lyonomfa detu ndi kehagero lyouhura wouzuni ou woudona, ose kapi ngatu livera.—Mat. 24:13; Rom. 14:8.

¹⁵ Neina Jesus kuna kutwikira kupitisira varongwa vendi ngomu vana kuzuvhisa kuhamena Uhompa waKarunga mouzuni mudima. Age ga rugana ko ruha rwendi. Kupitira mombunga zaJehova, Jesus kutudeura omu natu zuvhisa ntani age kutupa yiruganeso eyi twa hepa yipo tu zuvhise mbudi zongwa. (Mat. 28:18-20) Ose kurugana ko ruha rwetu pokulihameka nomupampi mosirugana sokuzuvhisa nokuronga ntani pokukara tuna vangarara ngomu tuna kundindira Jehova yipo a rete uhura woyininke yoyidona yomouzuni ou. Pokutura pasirugana epukururo eli lya kara moVahebeli 6:11, 12, ose ngatu kwaterera kehuguvaro lyetu dogoro ngayi sike mo nayinye eyi ‘twa ndindira.’—Resa.

16. Yisinke tuna tokomene kurugana?

¹⁶ Jehova ga tokora nare ezuva novili apa nga reta ehagero kouzuni ou woudona waSatana. Apa ezuva olyo ngali sika mo, Jehova nga sikisa mo mauporofete nagenye aga ga kara moNonkango dendi. Poyiruwo yimwe ayo kuvhura yi moneke ngwendi asi uhura wouzuni ou kapi una kuwiza usimbu. Nye nampili ngoso, kwato ogu nga ‘rangesa ezuva lyaJehova.’ (Hab. 2:3) Yipo nye, ngano tu tokomeneni ‘kutara kwaHOMPA ntani nokulikida nkareso zokundindira nehuguvaro mwaKarunga ogu a tu parura.’—Mika 7:7.