Nye nampili ngoso, Jehova kuna tu harere tu ndindire kwendi nelididimiko yipo nga rugane ko yuma posiruwo esi ga tura po. Morwasinke Jehova ana harere tu ndindire? Yisinke nayi tu vatera tu hafe ngomu tuna kundindira?

MORWASINKE JEHOVA ANA HARERE TU NDINDIRE?

Bibeli kutanta asi: ‘HOMPA kuna kundindira a mu fire nkenda. Age ana liwapaikire kumuzaverera, morwa age nkenye apa kurugana eyi ya hungama. Vantu woruhafo vaava ava ndindire mwaHOMPA.’ (Jes. 30:18) Pomuhowo nonkango edi daJesaya kwa tembe koVajuda ava ngava dili kuzuvha. (Jes. 30:1) Nye Vajuda vamwe kwa kere valimburukwi ntani nonkango odo kwava pere ehuguvaro. Nonkango edi kugava hena ehuguvaro kovakareli vaJehova wovalimburukwi neina.

Yipo nye, twa hepa kundindira nedidimiko morwa Jehova nage kuna kundindira nedidimiko. Age kwa tura po siruwo apa nga zonagura po uzuni ou ntani age kuna kundindira ezuva nosiruwo ngayi sikemo. (Mat. 24:36) Posiruwo oso, yininke eyi Satana ga rundira Jehova nava ava mu karere ngayi ka lilikida asi yimpempa. Jehova nga ka gusa po Satana ntani nava ava mu kwatesa ko, nye age ngaka tu ‘likida nkenda.’

Posiruwo esi, Jehova kuvhura a dire kugusa po maudigu getu, nye ga tu tumbwidira asi ose kuvhura tu hafe ngomu tuna kundindira. Ngwendi moomu ga yi uyungire Jesaya, ose kuvhura tu hafe ngomu tuna kundindira yininke yimwe yoyiwa ngayi ka horoke. (Jes. 30:18) Ngapi omu natu gwana ruhafo oro? Pwa kara yininke yine eyi nayi vhura kutuvatera tu hafe.

NGAPI OMU NATU GWANA RUHAFO NGOMU TUNA KUNDINDIRA?

Gazadara ko koyininke yoyiwa eyi yina kukuhorokera meparu. Hompa Ndafita nga mono yininke yoyidona meparu lyendi nalinye. (Epis. 37:35) Nye age kwa tjenge asi: “Mwena kosipara saHOMPA, ove o mu huguvare; wa ha dundumanena mutjima ava va kara nerago ndi vava ava sikisa mo yoyidona eyi ava gazara.” (Epis. 37:7) Ndafita nage kwa sikisire mo egano olyo apa ga demenene komatumbwidiro gaJehova asi nga mu vatera. Age hena kwa gazadarere  ko komauwa aga ga mu ruganene Jehova. (Epis. 40:5) Nsene tu gazadara ko yininke yoyiwa eyi a yi tu horokere meparu ntani nokunyokera po kugazadara yininke yoyidona, ngayi tu karera ureru kundindira mwaJehova.

Litura mo o hamberere Jehova. Ndafita ogu nampo ga tjenge Episarome 71 kwa tanterere Jehova asi: “Ame ngani ku huguvara nkenye apa; ngani ku tanga nye momunene.” (Epis. 71:14) Ngapi omu ga hamberere Jehova? Age ga tanterere ko wopeke kuhamena Jehova ntani ga dimbire nonsumo dokuhamberera Jehova. (Epis. 71:​16, 23) Ngwendi Ndafita nose kuvhura tu hafe ngomu tuna kundindira mwaJehova. Ose kumuhamberera apa atu zuvhisa, apa atu zogere novakaume nava vemepata ntani apa atu dimbi nonsumo detu. Sikando sokukwama ko apa ngo dimba nonsumo detu doUhompa, ngo gazadare ko kononkango da mo ntani nomu a di kuninkisa o hafe.

Gwana ekorangedo kovanavazinyetu. Apa Ndafita ga li gwanekerere nomaudigu age kwa uyungire asi: “Ame ngani udisa edina lyoge moyipafi yovantu woge.” (Epis. 52:9) Nose kuvhura kugwana ekorangedo kovanavazinyetu, kapisi komapongo nomokuzuvhisa kwelike nye hena pomapongasano.—Rom. 1:​11, 12.

Nkondopeka ehuguvaro lyoge. Episarome 62:5 kutanta asi: “Ame kwaKarunga kwelike na tara; mwendi yimo nina tura mutjima.” Ayo mulyo unene mokukara nehuguvaro lyokupama, unene po nsene uhura kapi una kuwiza usimbu ngwendi moomu tuna kuyigazarera. Twa hepa kuyipura asi matumbwidiro gaJehova ngaga ka sikamo yikare asi siruwo sokuhura kupi tuna kugandindira. Ose kuvhura kunkondopeka ehuguvaro lyetu pokulironga Nonkango daKarunga. Pasihonena pokugazadara ko omu mauporofete ga sikamo nomu yininke eyi va tjanga vatjangi woBibeli ya liza kumwe ntani nomauzera gokuhamena omu Jehova ga lihorora mwene. (Epis. 1:​2, 3) Ntani twa hepa kukanderera tu gwane “mpepo zokupongoka” yipo tu kare nelikwatakano lyewa naJehova ngomu tuna kundindira etumbwidiro lyomwenyo gwanarunye ngali ka sikemo.—Juda 20, 21.

Ngwendi hompa Ndafita, kara nehuguvaro asi Jehova kutara eho ava ava ndindire mwendi ntani age kuvalikida eharo lyanarunye. (Epis. 33:​18, 22) Twikira kundindira nelididimiko mwaJehova pokugazadara yininke yoyiwa eyi ya ku horokera meparu lyoge, pokumuhamberera, pokugwana ekorangedo kovanavazinyetu ntani pokunkondopeka ehuguvaro lyoge.