Bibeli za yi zeresa asi Jehova kuvhura kupumba yokomeho. (Jes. 45:21) Bibeli kapi za gava mauzera gomanzi kuhamena omu ayi rugana ndi siruwo esi a yi rugana ntani a tokore asi yokuhura kupi ga hepa kudiva. Yipo nye, ose kapi twa diva mauzera nagenye kuhamena evhuliko eli ga kara nalyo Jehova lyokupumba yokomeho. Nye pwa kara yininke yoyisesu eyi twa diva.

Jehova kuvhura a rugane nkenye eyi ana hara, nye poyiruwo yimwe age kutokora a dire kurugana yuma yongandi. Age kuvhura kuruganesa unongo wendi wounzi yipo a pumbe nkenye eyi ana hara. (Rom. 11:33) Mokumona asi ga kara nelipangero, age kuvhura a tokore mokudira kudiva eyi ngayi horoka.

Jehova kuvhura kuninka mpango zendi zi sike mo. Ngapi omu sitwa esi sa likwatakana nevhuliko lyendi lyokupumba yokomeho? Jesaya 46:10 kwa faturura asi: “Kutunda ketameko ame kwa horora eyi ngayi wiza; kwanare na pumba eyi ngayi horoka. Ame kwa tanta asi magazaro gange kapi ngaga lilimba, ngani rugana nkenye eyi na panga kurugana.”

Konda zimwe zeyi Jehova ga karera nevhuliko lyokupumba yininke yokomeho morwa ga kara nononkondo dokuvhura kuninka yininke yi horoke. Jehova kapi ga hepa kudiva yokomeho ngwendi moomu tupu vantu poyiruwo yimwe ava resa kehagero lyobuke yipo va hare kudiva eyi ya horoka. Nye Jehova kuvhura a tokore asi yuma yongandi ngayi horoka posiruwo songandi ntani noku yi ninka yi horoke apa ngasi sika siruwo oso.—Ex. 9:​5, 6; Mat. 24:36; Yirug. 17:31.

Eyi yiyo nye Bibeli za uyungira nonkango edi asi “na yi liwapaikira” mokufaturura eyi a rugana Jehova kuhamena yihorokwa yokomeho. (2 Vah. 19:25; Jes. 46:11) Nonkango edi kwa di toroka konkango zanare ezi za li fana nonkango “erova” ndi muhongi gerova. (Jer. 18:4) Ngwendi moomu tupu muhongi gerova na vhura kuruganesa erova a honge sipako sosiwa, Jehova kuvhura kugendesa yininke a sikise mo sitambo sendi.—Efe. 1:11.

Jehova kupulisira vantu va ture po matokoro gavene. Age kapi a tokora asi yinke ngayi horokera nkenye muntu komeho. Ntani kapi a ninkisa vantu wovawa va rugane yininke eyi ngayi va twaredesa va ka zonauke. Age kupulisira nkenye ogu a tokore omu ana hara kuruganesa eparu lyendi, nye age kuvaronga omu nava paruka monkedi zongwa.

Koneka yihonena yivali. Sihonena sokuhova kuna kara sovantu ava va tungire moNinivhe. Jehova kwa pumbire asi sitata oso ngava si zonagura po morwa udona ou wa kere mo. Nye apa vantu va mo va litezwilire, Jehova “makura ta rundurura magazaro gendi ta hageke kuvafutisa, kapi hena ga rugene moomu ga yi tente.” (Jona 3:​1-10) Jehova kwa rundwilire magazaro gendi kuhamena eyi ga pumbire morwa Vaninivhe kwa tokwere kutura po malitjindjo apa va gwene marondoro gaJehova.

Sihonena sauvali kuna kara sahompa Koresi ogu ga ya mangwilire Vajuda mounkwate ntani nokuvatantera va ka tungurure ntembeli zaJehova. (Jes. 44:26–45:4) Hompa Koresi gwaPeresiya kwa sikisire mo uporofete owo. (Esir. 1:​1-4) Nye nampili ngoso, Koresi kapi nga karere Karunga gosili. Jehova kwa ruganesere Koresi yipo a sikise mo uporofete ou nye age kapi ga mu sininikire asi yilye ogu na karera.—Yis. 21:1.

Eyi kuna kara tupu yininke yoyisesu eyi ya hamena mo mevhuliko lyaJehova lyokupumba yokomeho. Kwato muntu gokuvhura kukwata egano eyi a rugana Jehova. (Jes. 55:​8, 9) Nye eyi twa diva kuhamena Jehova kunkondopeka epuro lyetu asi age nkenye apa kurugana yokuhungama kukwatera mo apa a pumbu yokomeho.