YIKANDO yimwe vatjangi woBibeli ngava ruguruka nonkango. Tu tareni yininke yitatu eyi ya ninkisire vatjangi owo va yi rugane ngoso:

Posiruwo esi va di tjenge. Posiruwo soVaisraeli, sinzi sovantu kapi va kere noveta zavene ezi va tjenge. Rorunzi awo ngava va resere Veta apa ngava pongo monkongoronzugo. (Deut. 31:​10-12) Apo pwa kere madonganeso apa ngava purakene ntani nokusikama siruwo sosire mombunga zonene. (Neh. 8:​2, 3, 7) Momaukaro ogo, apa ngava ruguruka yitwa yomulyo ayo kwa kere ureru kovantu yipo va diworoke matjangwa noku ga tura pasirugana. Kuruguruka nonkango dimwe kwa va vaterere va diworoke noveta edi ga va pere Jehova.—Lev. 18:​4-22; Deut. 5:1.

Monkedi omu va zi tjenge. MoBibeli kwa kara mo nonsumo dononzi, pasihonena Mapisarome, Rusumo rokononsumo, ntani Malirankali. Poyiruwo yimwe mononsumo kwa kara mo nonkango edi va ruguruka ntani kuvatera varesi va kwate momutwe nonkango odo. Pasihonena tu tareni nonkango edi da kara mEpisarome 115:​9-11 edi adi ntanta asi: “Huguvareni HOMPA, one Vaisraeli! Age yige a mu kwafa, ta mu popere. Huguvareni HOMPA, one vapristeli vaKarunga! Age yige a mu kwafa, ta mu popere. Huguvareni HOMPA, namuvenye ava mwa mu tjira! Age yige a mu kwafa, ta mu popere.” Kuruguruka nonkango odo ya vhulire kuvatera vadimbi yipo va di diworoke.

Kunkondopeka yitwa yomulyo. Poyiruwo yimwe vatjangi woBibeli ngava ruguruka kutjanga nonkango domulyo. Pasihonena apa Jehova ga tanterere Vaisraeli asi kapisi va lye honde, Jehova kwa tanterere Mosesa a ruguruke kuuyunga nonkango odo yikando yoyinzi. Karunga kwa here a nkondopeke sitwa esi asi eparu kwa kara mohonde. (Lev. 17:​11, 14) Ano konyima apa vapositoli ntani vakuronambunga womoJerusarema va tjenge kuhamena eyi twa hepa kunyokera po yipo tu hafese Karunga, awo kwa rugurukire sitwa esi asi twa hepa kunyokera po honde.—Yirug. 15:​20, 29.

Nampili ngomu va ruguruka nonkango dimwe domoBibeli, Jehova kapi ana tu harere tu ruguruke nonkango domoBibeli apa atu di ruganesa. Pasihonena, Jesus kwa uyungire asi: “Nsene tomu kanderere, kapisi mu rugurure nonkango dokulifana.” (Mat. 6:7) Makura yipo ga tumbwire yininke eyi natu vhura kukanderera eyi ya liza nompango zaKarunga. (Mat. 6:​9-13) Nampili ngomu a tu dili kuruguruka nonkango dokulifana momakanderero getu, nye kuvhura tu ruguruke yitwa yokulifana.—Mat. 7:​7-11.

Bibeli kwa ruguruka nonkango dimwe morwa pwa kara nokonda dongandi. Azo kuna kara hena nkedi zimwe omu Murongi gwetu goMunene a tu rongo omu natu gwanena mo mauwa.—Jes. 48:​17, 18.