1. Morwasinke twa hepera mavyukiso gokutunda kwaJehova? Gava sihonena.

 GAZARA asi mowiza ono kara makura o zumbana. Ove kuna kara mosiponga morwa kuvhura o ligwanekere noyikorama ntani nomazoka. Ayo nayi kuhafesa nsene o kara ko nagumwe ogu ga diva nawa evango olyo, ogu na vhura kukupitisira nokukuvatera o henduke yiponga. Uzuni ou kwa fana wiza wangoso. Amo kuna kara mo yininke yoyinzi yoyidona eyi nayi vhura kutura elikwatakano lyetu naJehova mosiponga. Nye ose twa kara nomupitisili gomuwa Jehova. Age kutuvatera tu henduke yiponga noku tu pitisira yipo nga tu ka gwane mwenyo gwanarunye mouzuni woupe.

2. Ngapi omu Jehova a tu pitisire?

² Ngapi omu Jehova a tu pitisire? Pomuhowo age kutuvatera kupitira mononkango dendi Bibeli. Nye nampili ngoso, age hena kuruganesa vantu vendi va tu pitisire. Pasihonena, age kuruganesa “mukareli gokulimburukwa gonondunge” yipo a tu pe nondya dopampepo noku tu vatera tu ture po matokoro gomawa. (Mat. 24:45) Jehova kuruganesa hena vagara vamwe wonondunge yipo va tu pitisire. Pasihonena, vatareli wonombunga novakuronambunga kutupa makorangedo nomavyukiso aga aga tu vatere tu pite momaudigu. Ose kupandura unene kweyi Jehova a tu pitisire nawa moyiruwo yoyidigu ngomu tuna kuhedera pepi nouhura. Ano eyi kutuvatera tu twikire kukara vakaume vaJehova yipo tu hafere eparu ngesi ntani narunye.

3. Yisinke natu ka zogera mosirongwa esi?

³ Nye nampili ngoso, poyiruwo yimwe kuvhura yi tu digopere kukwama mavyukiso gaJehova unene po nsene kuna ku ga gava kupitira movagara wokudira kusikilira mo. Morwasinke? Morwa kuvhura tu dire kuhafera mavyukiso ogo. Ndi nampo kuvhura tulizuvhe asi mavyukiso ogo kapisi mawa ntani nokugazara  asi kapi gana tundu kwaJehova. Ano poyiruwo yangoso, ose twa hepa kuyipura nawa-nawa asi Jehova yige ana kupitisira vantu vendi ntani ngatu gwanena mo mauwa nsene tu kwama mavyukiso gendi. Mokutuvatera tu nkondopeke epuro lyetu, sirongwa esi tasi ka zogera (1) omu Jehova ga pitisilire vantu vendi mosiruwo sanare, (2) omu ana ku tu pitisira neina, ntani (3) mauwa aga atu gwanene mo apa atu twikire kukwama mavyukiso gendi.

OMU JEHOVA GA PITISILIRE VAISRAELI

4-5. Ngapi omu Jehova ga yi likidire asi age kwa ruganesere Mosesa a pitisire Vaisraeli? (Tara lyopontunda.)

⁴ Jehova kwa horowere Mosesa yipo a pitisire Vaisraeli va tunde moEgipite. Ntani age kwa pere Vaisraeli maumbangi aga ga likidire asi age kwava pitisilire kupitira mwaMosesa. Pasihonena age kwa va pitisilire pokuruganesa ngundi zeremo mutenya ano masiku kwa ruganesere ngundi zomundiro. (Ex. 13:21) Mosesa kwa kweme nongundi edi da mu pitisilire kumwe noVaisraeli va ze kEfuta lyEgeha. Vantu kwa tukukire apa va dimbwilire asi awo kuna kara pokatji kefuta novakwayita vaEgipite ava va va tjidire. Awo kwa gazarere asi Mosesa kwa tulire po egano lyepuko kweyi gava retere kEfuta lyEgeha. Nye alyo kapi lya kere egano lyepuko. Jehova kwa ruganesere Mosesa a pitisire vantu va ze kevango olyo. (Ex. 14:​26-28.) Makura Karunga yipo ga parwire vantu vendi monkedi zokutetukisa.—Ex. 14:​26-28.

⁵ Monomvhura 40 edi da kwemeko, Mosesa kwa twikilire kuhuguvara mwaJehova asi age kwa ruganesere ngundi zeremo yipo a pitisire vantu vendi momburundu. a Posiruwo simwe Jehova kwa tulire ngundi peguru lyotende zaMosesa oku va vhulire kuzimona Vaisraeli navenye. (Ex. 33:​7, 9, 10) Jehova kwa uyungisire Mosesa kupitira mongundi, ano Mosesa yipo ga tanterere vantu eyi ga mu tanterere Jehova. (Epis. 99:7) Vaisraeli va yi limonene asi Jehova kwa ruganesere Mosesa yipo ava pitisire.

6. Ngapi omu Vaisraeli va tere evyukiso lyaJehova? (Numeri 14:​2, 10, 11)

⁶ Sininke sokuguvisa seesi asi sinzi soVaisraeli kapi vapulire moumbangi ou walikidire asi Jehova kwa va uyungisire kupitira mwaMosesa. (Resa Numeri 14:​2, 10, 11.) Yikando yoyinzi, awo ngava nyoka kutambura upitisili waMosesa. Ano ngoyitundwamo, Jehova kapi ga va pulisilire va hwilire mosirongo setumbwidiro.—Num. 14:30.

7. Gava ko yihonena yavamwe ava va kweme mavyukiso gaJehova. (Numeri 14:24) (Tara hena efano.)

⁷ Nye nampili ngoso, Vaisareli vamwe kwa kweme mavyukiso gaJehova. Pasihonena Jehova kwa uyungire asi “Karebu . . . kwa limburukwa nge nomutjima nagunye.” (Resa Numeri 14:24.) Jehova kwa futire Karebu noku mu pulisira a horowore evango oku na ka tunga mosirongo setumbwidiro. (Jos. 14:​12-14) Vaisraeli ava va gwene mpito zokuza mosirongo setumbwidiro nawo kwa tulire po sihonena sosiwa mokukwama mavyukiso gaJehova. Apa Josuwa va mu tulire a kare mupitisili goVaisraeli mevango lyaMosesa, “vantu kwa mu fumadekere eparu lyendi nalinye.” (Jos. 4:14) Ngoyitundwamo Jehova kwa va tungikire ntani kwa va pere sirongo esi ga va tumbwidilire.—Jos. 21:​43, 44.

8. Faturura omu Jehova ga pitisilire vantu vendi mosiruwo sovahompa. (Tara hena efano.)

⁸ Konyima zonomvhura, Jehova kwa tulire po vapanguli va pitisire vantu vendi. Ano konyima zoyo posiruwo sovahompa, Jehova yipo ga tulisire po vaporofete va  pitisire vantu vendi. Vahompa ava ngava limburukwa Jehova ngava kwama mavyukiso gokutunda kovaporofete. Pasihonena, hompa Ndafita kwa tambwire evyukiso lyokutundilira komuporofete Natana. (2 Sam. 12:​7, 13; 1 Hist. 17:​3, 4) Hompa Jehosafata kwa kweme mavyukiso gaJahasiyeli ntani kwa korangedere Vajuda “va huguvare movaporofete vaKarunga.” (2 Hist. 20:​14, 15, 20) Apa hompa Hisikiya ga kere noudigu, age kwa pulire evatero komuporofete Jesaya. (Jes. 37:​1-6) Apa vahompa ngava kwama mavyukiso gaJehova nkenye apa, age ngava tungike ntani vantu navenye kwa kere mepopero. (2 Hist. 20:​29, 30; 32:22) Nkenye gumwe ga vhulire kuyidimburura asi Jehova kwa ruganesere vaporofete yipo va pitisire vantu vendi. Nye sinzi sovahompa ntani noVaisraeli kapi va purakenene kovaporofete vaJehova.—Jer. 35:​12-15.

OMU JEHOVA GA PITISILIRE VAKRISTE WOMOSIRUWO SOVAPOSITOLI

9. Wolye ga ruganesere Jehova yipo va pitisire Vakriste womosiruwo sovapostoli? (Tara hena efano.)

⁹ Jehova kwa tulisire po mbungakriste mosiruwo sovapositoli. Ngapi ga pitisilire Vakriste owo? Age kwa horowere Jesus a kare mutwe gombungakriste. (Efe. 5:23) Nye Jesus kapi nga uyungisa varongwa kuvyukilira. Age kwa ruganesere vapositoli ntani novakuronambunga moJerusarema va pitisire mbunga. (Yirug. 15:​1, 2) Ntani vakuronambunga ngava va horowora va pitisire nombungakriste.—1 Tes. 5:12; Tit. 1:5.

10. (a) Ngapi Vakriste womosiruwo sovapositoli va tere mavyukiso aga va gwene? (Yirugana 15:​30, 31) (b) Morwasinke vantu vamwe womosiruwo sanare va dilire kutambura mavyukiso gokutundilira kovantu ava ga horowere Jehova va pitisire? (Tara kakende “ Morwasinke vamwe ava nyokere kutambura mavyukiso aga aga tundu kovagara ava ga horowora Jehova vapitisire vantu vendi?”)

¹⁰ Ngapi Vakriste womosiruwo sovapositoli va tere mavyukiso gokutunda kwaJehova? Sinzi sawo kwa hefe pokukwama mavyukiso aga va gwene. Ntani ‘awo kwa haferere ekorangedo’ eli va gwene. (Resa Yirugana 15:​30, 31.) Ngapi omu Jehova a pitisire vantu vendi mosiruwo setu?

OMU JEHOVA A TU PITISIRE NEINA

11. Gava sihonena esi sina kulikida omu Jehova ga gendesere ava ava pitisire mosiruwo setu.

¹¹ Jehova kuna kutwikira kupitisira vantu  vendi neina. Age kuyirugana oyo kupitira moBibeli ntani naMunendi Jesus, mutwe gombungakriste. Ose kuna kumona maumbangi aga gana kulikida asi Jehova kuna kutwikira kuruganesa vantu ava ga horowora va pitisire vantu vendi ndi? Yimo. Pasihonena, gazadarako kweyi yahorokere konyima zomvhura 1870. Charles Taze Russell novakwawo kwa ya tamekere kukwata egano asi 1914 ngazi kara mvhura zomulyo kuhamena Uhompa waKarunga. (Ndan. 4:​25, 26) Mauporofete gomoBibeli yigo ga va vaterere va kwate egano mauzera ogo. Ngoso Jehova yige gava pitisilire va rugane epaparo moBibeli? Yimo. Eyi yahorokere mo-1914 kwa likidire asi Uhompa waKarunga kwa tamekere kupangera. Yita yokuhova youzuni mudima kwa tamekere ntani yipo kwa ya kweme mahamba gomukagu, makankamo gevhu ntani nondya kwa sesupire. (Ruk. 21:​10, 11) Yosili Jehova kwa ruganesere valirongi woBibeli yipo va vatere vantu vendi.

12-13. Mawapaiko musinke va tulisire po yipo sirugana sokuzuvhisa siligwederere poyita yauvali youzuni mudima?

¹² Tu zeni tu ka tare hena eyi ya horokere poyita yauvali youzuni mudima. Konyima zokukonakona Ehororo 17:​8, vanavazinyetu wovagara ava ngava pitisire komberewa zetu zonene kwa ya dimbwilire asi yita eyi kapi ngayi twaredesa koHarumagedoni, nye ayo ngayi twaredesa kosiruwo sombili apa yirugana yokuzuvhisa ngayi ligwederera. Awo kwa tulisire po sikora zaGiliyata vadeure vatumwa yipo va ka zuvhise nokuronga mouzuni mudima. Vatumwa kwa va tumine koyirongo nampili mosiruwo soyita. Mokugwedererako, mukareli gokulimburukwa kwa tulisire po Sikora zoUkareli b yipo va deure vazuvhisi navenye va kare vazuvhisi novarongi wovawa. Monkedi zangesi, vantu vaKarunga kwa va wapaikilire sirugana esi sa kere komeho.

¹³ Neina ose kuyimonenena nawa-nawa omu Jehova ga pitisilire vantu vendi posiruwo sina soudigu. Kutundilira poyita yauvali youzuni mudima, vantu vaJehova moyirongo yoyinzi kwa hafera kuzuvhisa noumanguruki. Sinzi sovantu va ya diva Jehova ntani vakareli vendi kuna kuzuvhisa mouzuni mudima.

14. Morwasinke natu huguvarera mavyukiso gokutunda kombunga zaJehova ntani kovakuronambunga? (Ehororo 2:1) (Tara hena efano.)

 ¹⁴ WomoMbungagendesi neina kuna kutwikira kupapara mavyukiso kwaKristusa. Vana hara asi mavyukiso aga ava pe vanavazinyetu ga li ze nomu Jehova naJesus ava tara yininke. Ntani awo kuruganesa vatareli wonombunga ntani vakuronambunga yipo va gave mavyukiso ogo monombungakriste. c Vakuronambunga wovagwavekwa kwa kara ‘mokuwoko kokorulyo kwa Jesus.’ (Resa Ehororo 2:1.) Vakuronambunga navenye kapi va sikiliramo ntani kutura mapuko. Mosesa naJosuwa poyiruwo yimwe nawo ngava tura mapuko ngwendi moomu va yi rugene vapositoli. (Num. 20:12; Jos. 9:​14, 15; Rom. 3:23) Nye ose kuyimonena asi Jesus kristusa kuna kupitisira nawa mukareli gokulimburukwa novakuronambunga ntani age nga twikira kuyirugana ngoso “dogoro pouhura wouzuni.” (Mat. 28:20) Yipo nye, ose twa kara nokonda zeyi natu huguvarera momavyukiso aga a tu pe kupitira mowo va horowora va pitisire.

OSE KUGWANENA MO MAUWA APA ATU TWIKIRE KUKWAMA MAVYUKISO GAJEHOVA

15-16. Yisinke ono lirongere ko koyihonena ya va va kweme mavyukiso gaJehova?

¹⁵ Apa atu twikire kukwama mavyukiso gaJehova, ose kugwanenamo mauwa nampili ngesi. Pasihonena, Andy naRobyn kwa tulire pasirugana egano lyokutunda komukareli gokulimburukwa pokurerupika eparu lyawo. Ngoyitundwamo, awo kwa vaterere kutunga mavango goukareli wetu. Robyn kwa tanta asi: “Poyiruwo yimwe ngatu kara momavango gomanunu omu mwa dilire kukara evango lyoku terekera. Ntani ame kwa randesere mafano gomanzi nampili ngomu na here kufaneka. Ame kwa lilire apa na ga randesere, nye ngwendi Sara, mukada Abirahamu ame kwa tokomenene kutara komeho nye kapisi eyi na zumbanesere.” (Heb. 11:15) Mauwa musinke va gwanenemo valikwali ava? Robyn kwa tanta asi: “Ose twa hafa unene kweyi twa ku gava kwaJehova nayinye eyi twa kara nayo. Apa atu rugana yirugana yaJehova yokulisiga siga, ayo kutudiworokesa omu eparu ngali ka fana komeho moparadisa.” Andy kwa tanta asi: “Ose tuna hafa kweyi tuna kuruganesa siruwo setu ntani nononkondo detu kosirugana saJehova.”

 ¹⁶ Mauwa musinke hena natu gwanena mo nsene tu kwama mavyukiso gaJehova? Apa Marcia ga mene sure age kwa here kukwama egano eli ga gwene yipo a kare muzuvhisi gokukarerera. (Mat. 6:33; Rom. 12:11) Marcia kwa tanta asi: “University zimwe kwa here kufutirange nomvhura ne. Morwa ame kwa here kurugana sirugana sosiruwo nasinye yipo na tokwere kukalironga yirugana yokomawoko yipo yivatere nge mosirugana oso. Eli kuna kara etokoro lyewa eli na tulire po. Ame ngesi kurugana uzuvhisi wokukarerera ntani kuvatera koBeteli mazuva gamwe ntani noyirugana yimwe mombunga zaJehova. Nayinye eyi kuyisikisamo morwa yirugana yange ku pa nge siruwo.”

17. Mauwa musinke hena ngatu gwanena mo nsene tu twikira kukwama mavyukiso gaJehova? (Jesaya 48:​17, 18)

¹⁷ Poyiruwo yimwe, ose kugwana mapukururo aga aga tu popere tu dire kuhara unene yimaliwa noku tu vatera tu limburukwe noveta daJehova. Momaukaro ogo ose ngatu gwanena mo mauwa nsene tu kwama mavyukiso gokutunda kwaJehova. Ose ngatu kara nezwi lyewa lyokomutjima ntani ngatu nyokera po maudigu. (1 Tim. 6:​9, 10) Ngoyitudwamo, ose ngatu karera Jehova nomutjima nagunye ntani ngayi tu retera ruhafo rorunene, nombili, ntani ngayi tu gwanena po.—Resa Jesaya 48:​17, 18.

18. Morwasinke natu kwamwena mavyukiso gaJehova?

¹⁸ Jehova nga twikira kuruganesa vantu yipo va gave mavyukiso poudigu wounene ntani monomvhura eyovi depangero lyaJesus. (Epis. 45:16) Ose ngatu twikira kukwama mavyukiso ogo nampili kapi tuna kuyikwatesako ndi? Nsene tu kwama mavyukiso gaJehova ngesi, ayo ngayi ka tu rerupira. Yipo nye, tutwikireni kukwama mavyukiso gaJehova kukwatera mo aga ava gava vagara ava va horowora va tu takamese. (Jes. 32:​1, 2; Heb. 13:17) Pokukwama mavyukiso, ose ngatu yi likida asi twa huguvara Jehova ogu atu vatere tu nyokere po kuzona kwendi yipo ngatu ka gwane mwenyo gwanarunye.