Mary namugara gwendi John a kwa tunga mosirongo omu mwa kara vantu ava va tunda koFilipine va ya ruganene mosirongo sawo. Awo kuhafera kuzuvhisira vantu owo. Posiruwo soKorona, Mary kwa tamekere malirongo goBibeli mosirongo esi ga kara ntani nomoyirongo yokulisiga-siga. Ngapi omu ga yi rugene?

Mary kupura nkenye murongwa gwendi goBibeli asi, “Wa diva ko gumwe ogu ana hara kulironga Bibeli ndi?” Nsene va mu limburura asi kweli, age ku va pura nsene kuvhura a va bele. Kupura mapuro aga kuvhura kureta yitundwamo yoyiwa. Morwasinke? Morwa vantu ava ava tambura Nonkango daKarunga, kuhara kutantera ko vakaume ntani nekoro lyawo kuhamena eyi vana kulironga. Yitundwamo musinke ya kere pokupura epuro eli?

Murongwa gwaMary gedina Jasmin kwa tanterere Mary kuhamena vantu vane ava va here kulironga Bibeli. Gumwe kuna kara Kristine ogu ga haferere kulironga Bibeli ntani age kwa pulire Mary va lironge ruvali mosivike. Apa Mary ga mu pulire nsene ga diva ko ava vana hara kulironga Bibeli, Kristine yipo ga uyungire asi, “Nani ka tantera ko vakwetu.” Konyima zoyivike yongandi, Kristine yipo ga likidire Mary vakaume vendi vane ava va here kulironga Bibeli. Ano konyima zosiruwo Kristine yipo ga tanterere hena Mary kuhamena vakaume vendi vamwe ava nawo vahere kulironga Bibeli ntani nawo kwa geve madina gavamwe ava nampo va here kulironga Bibeli.

Kristine kwa here hena vemepata lyendi ava va kere moFilipine va lironge Bibeli. Yipo ga uyungire namunendi gomukadona Andrea. Pomuhowo Andrea kwa gazarere asi ‘Nombangi daJehova ukarelikarunga ou wa dira kudivikwa, kapi va pura mwaJesus ntani awo kuruganesa Bibeli zetestamende lyekurukuru.’ Nye konyima zapa ga lirongere Bibeli sikando sendi sokuhova, age ga dimbwilire asi eyi nga gazara kuhamena Nombangi daJehova nani kapisi usili. Nkenye apa nga lirongo yininke yoyipe moBibeli, age nga uyunga asi, “Nsene moBibeli va yi tjanga, usili!”

Mwaza siruwo, Andrea kwa tanterere Mary kuhamena vakwawo vavali novarugani vakwawo ava va tamekere nawo kulironga Bibeli. Andrea kwa kere hena namumbya goguhwe gomukadi Angela. Age kwa kere mutwiku ntani nkenye apa nga kara pelirongo lyoAndrea. Makura Ezuva limwe Angela ta tantere Andrea a ka tantere Mary nsene kuvhura aya lironge nage Bibeli. Angela kwa haferere eyi ga lirongere. Mokwedi  kumwe, age kwa kwete matjangwa gomanzi momutwe ntani kwa here kulironga rune mosivike! Nevatero lyaAndrea, age kwa tamekere kukara momapongo nkenye apa kupitira kovidiyo.

Apa Mary ga dimbwilire asi Joshua mugara gwaKristine nga hingire pepi nelirongo lyawo lyoBibeli, yipo ga mu pulire nsene nage ana hara kulironga. Joshua kwa limbwilire asi: “Tani purakene tupu, nye waha pura nge mapuro, nsene no pura nge tani tundu po.” Monominute ntano edi da kweme ko, Joshua kwa pulire mapuro gomanzi kupitakana Kristine ntani ga here kutwikira kulironga Bibeli.

Epuro lyaMary kwa twaredesere komalirongo goBibeli gomanzi. Mokumona asi age kwa kere novarongwa wovanzi woBibeli, yipo ga pulire ko vanavazinyetu vamwe va lironge nawo. Mary kwa tamekere malirongo goBibeli gokusika po-28 moyirongo yine.

Murongwa gwaMary gokuhova Jasmin kwa gwene ekuho mwaKudumogona 2021. Kristine kwa gwene ekuho mwaKudumonkuru 2022 ntani ga tengura kekoro lyendi koFilipine. Varongwa vavali ava Kristine ga reterere Mary nawo va gwana ekuho. Angela kwa ya gwene ekuho konyima zomakwedi gongandi, ano ngesi muzuvhisi gokukarerera. Joshua mugara gwaKristine namunawo gomukadona Andrea ntani novarongwa vamwe, kuna kutura po ezokomeho lyewa.

Posiruwo saJesus ntani sovapositoli, mbudi zongwa kwa lihene usimbu mokatji kovanekoro novakaume. (Joh. 1:41, 42a; Yirug. 10:24, 27, 48; 16:25-33) Pura varongwa woge woBibeli navamwe nsene vana diva ko ava vana hara kulironga Bibeli. Nsene o va pura, kuvhura ngo gwane vantu wovanzi ava vana hara kulironga Bibeli.