Otate nonane kwa kere vaKatolika. Nye apa va lirongere moBibeli asi edina lyaKarunga yilyo Jehova, awo kwa ya kere Nombangi daJehova. Otate kwa ya hagekere kuhonga mafano gaJesus. Yipo va tameke kuruganesa udivi wawo wokuhonga pokuwapeka embo lyetu likare Sinyanga soUhompa sokuhova moSan Juan del Monte momukunda gwaManila moSitata saFilipine.

Konyima zapa va hampurukire nge mo-1952, vakurona vange kwa tamekere kuronga nge kuhamena Jehova ngwendi momu va rongere vakuru vange wovagara vane ntani vakuru vange wovakadi vatatu. Ngomu na kulire, otate kwa korangedere nge ni rese egaununo limwe moBibeli nkenye ezuva ntani kwa lirongere name yimbapiratjangwa yokulisiga-siga. Poyiruwo yimwe, vakondi vange ngava zigida vatareli wokudingura ntani vanavazinyetu wovagara ava ngava rugana koBeteli va ya kare pembo lyetu. Ngepata, ayo kwa tu hafesere ntani kwa tu korangedere apa va tu tanterere yihorokwa eyi va ligwanekerere nayo. Eyi kwa tu ninkisire tu ture sirugana saJehova muhowo meparu lyetu.

Kosihonena sovakondi vange ava ngava limburukwa Jehova, ame kwa lirongera ko yininke yoyinzi. Konyima zapa oyina vadogorokere morwa kwa verere, name notate kwa tamekere uzuvhisi wokukarerera mo-1971. Nye otate kwa dogorokere mo-1973 apa na kere nonomvhura 20. Apa na zumbanesere vakondi vange navenye, ame kwa lizuvhire mukuma ntani kwato mulyo. Nye ehuguvaro ‘lyakora ntani lyosili’ eli va tumbura moBibeli kwa vatera nge ni lididimikire nokuhehera pepi naJehova mevango lyokukara nosinka sosinene. (Heb. 6:19) Kapi pwa pitire siruwo sosire konyima zapa va dogorokere otate, ame kwa tambwire situmbukira sokukara muzuvhisi gosiruwo nasinye kosirudi esi sa kara ure naCoron, koruha sirongo saPalawan.

Apa na ka sikire koCoron, ame opo nomvhura dange 21. Mokumona asi ame kwa tungire moSitata,  ame kwa tetukire pokudiva asi posirudi oso kapi pwa kere rutjeno rokugwanena po nomema gomanzi ntani maugendero. Nampili ngomu pwa kere vanavazinyetu wovasesu, ame ngani zuvhisa nyamelike morwa kapi na kere namunazinyetu ogu nani zuvhisa nage. Kwedi kokuhova, ame kwa rongwere unene vantu vemepata lyetu ntani vakaume vange. Masiku, ame ngani tara nombungururu keguru ntani ngani lili. Ame kwa lizuvhire ngwendi ni hageke sirugana sange nokutengura kembo.

Posiruwo esi na kere nyamelike, ame ngani kanderere kwaJehova ntani ngani diworoka magano gokukorangeda aga na resere moBibeli nomoyimbapiratjangwa yetu. Ame kwa diworokere Episarome 19:14 ntani ame kwa dimbwilire asi nsene ni teda ko koyininke eyi ayi hafesa Jehova ngwendi yininke eyi ga rugana ntani yikara yendi, age nga kara “ugami wange noMuzowoli gwange!” Sirongwa somoRuhungu sosiparatjangwa asi “You Are Never Alone” a kwa vaterere nge sili. Ame ngani si ruguruka ku si resa. Apa ngani kara nyamelike, ame kwa lizuvhire ngwendi naJehova nina kara ntani ngayi penge siruwo sokukanderera nokulironga ntani nokuteda.

Konyima zapa na ka sikire moCoron, kwa tulire nge ni kare mukuronambunga. Mokumona asi nyamelike mukuronambunga na kere, ame ngani pitisire Sikora zoUkareli, Epongo lyoYirugana, Elirongo lyoBibeli lyombunga nElirongo lyoRuhungu. Ngani gava hena siuyungwa sanavenye nkenye sivike. Yininke nayinye eyi ngayi vatere nge ni dire kulizuvha mukuma.

Ame kwa haferere sirugana sokuzuvhisa moCoron ntani varongwa vange vamwe woBibeli kwa ya gwene ekuho. Nye nampili ngoso, ame kwa ligwanekerere hena nomaudigu. Poyiruwo yimwe ame ngani gendi novili dononzi ni ze komukunda ogu ngava zuvhisire, na hana kudiva oku nani ka rara apa nani ka sika. Momukunda ogu ngazi zuvhisire mbungakriste ozo, kwa kere mo yirudigona yoyinzi. Nampili ngomu na dilire kudiva kuzoga, posiruwo somvhura ngani piti mefuta nosiniva. Jehova kwa vatera nge nampili ngomu na ligwanekerere nomaudigu gomanzi. Konyima ame kwa dimbwilire asi Jehova kwa wapaikilire nge situmbukira sosipe omu na ligwanekerere nomaudigu gomanene.

Mo-1978, kwa tumine nge ni ze koPapua New Guinea, komuzogo gwaAustralia. Papua New Guinea kuna kara sirongo esi sa kara nonondundu dononzi ntani unene wosirongo oso kwa sika hambara posirongo saSipanye. Ayo kwa tetwire nge pokudiva asi vantu wokusika pomamiliyona gatatu kuuyunga maraka gokupitakana po-800. Sinzi sovantu kuuyunga ruMelanesian Pidgin, eraka eli lya divikwa asi Tok Pisin.

Ame kwa tumine nge kombungakriste zoRuingilisa ezi za kara moPort Moresby. Konyima yipo na dirukilire kombungakriste zoruTok Pisin ntani ame kwa lirongere eraka olyo, ano ayo kwa vaterere nge mokuzuvhisa ntani ni dive usimbu eraka. Konyima zosiruwo, ame kwa geve siuyungwa moruTok Pisin ntani konyima zomvhura zimwe apa na ka sikire koPapua New Guinea, ayo kwa tetukisire nge apa va tulire nge ni kare mutareli gonombungakriste doruTok Pisin.

Na hepere kutulisa po yigongi yoyinzi yezuva limwe morwa nomukunda edi ngani dingura kwa kere ure. Apa na ka sikire, ame kwa lizuvhire sili  mukuma morwa kwa kere mosirongo sapeke omu ngava uyunga eraka na dilire kudiva ntani mpo zawo kwa lisigire nezi zange. Ame kapi ngani vhuru kugenda ni ze konombungakriste morwa mosirongo kwa kere mo nondundu nomamanya. Yipo nye, ame ngani zi nondira nkenye sivike. Poyiruwo yimwe nyamelike ngani kara mokandira kokanunu. Marugendo ogo ngaga ninkisa nge ni kare nosinka kupitakana apa ngani rondo mosikepa.

Vantu wovasesu tupu va kere nonoterefona, yipo nye ame ngani tjanga nombilive noku di tuma konombungakriste. Yikando yoyinzi nyame ngani howo kukasika konombungakriste komeho di ka sike nombilive. Ntani ngani pura vantu womomukunda ogo yipo va tantere nge oku da kara Nombangi daJehova. Apa ngani ligwana novanavazinyetu, awo ngava tambura nge noruhafo, eyi kwa ninkisire nge ni diworoke eyi na litulilire mo unene mokuvapapara. Jehova kwa vatera nge mononkedi dononzi ntani elikwatakano lyange kumwe nage lya nkondopara unene.

Epongo lyange lyokuhova lyoposirudi saBougainville, valikwali vamwe kwa hederere nge oku tava menyamenya nokupura nge asi “Kwa ku tu diworoka?” Ame kwa diworokere asi kwa va zuvhisilire apa na ka sikire moPort Moresby ntani ngani lirongo nawo Bibeli komeho ni va gave kwamunazinyetu gomugara ogu ga kere momukunda ogo. Ngesi navenye va gwana ekuho. Eli kuna kara etungiko limwe eli na gwana kwaJehova posiruwo esi na kere moPapua New Guinea nomvhura ntatu.

Komeho zapa na tundire moCoron mo-1978, ame kwa ligwene namunazinyetu gomukadi Adel ogu ga kere nonkareso zokulizambera. Age kwa kere muzuvhisi gokukarera ntani nga pakere mbili vana vendi vavali Samuel naShirley ntani nga pakere hena mbili ozina wovakurupe. MwaKudumonkuru 1981, ame kwa tengwire koPhilippines tu ka likware naAdel. Konyima zokulikwara, ose kwa rugene kumwe uzuvhisi wokukarerera ntani ngatu livatere kupakera mbili epata lyetu.

Nampili ngomu na kere nepata lyange, mo-1983 kwa tulire nge ni kare hena muzuvhisi gosiruwo nasinye ntani kwa tumine nge posirudi saLinapacan momukunda gwaPalawan. Name nepata lyange kwa dirukilire komukunda ogu gwa dilire kukara Nombangi. Konyima zomvhura zimwe, ozina vaAdel kwa dogorokere. Nye nampili ngoso, ose kwa litulire mo unene mokuzuvhisa ntani ayo kwa tu vaterere tu lididimikire udigu owo. Ose kwa tamekere kulironga Bibeli novantu wovanzi ava va here kuza komapongo. Mokumona asi kapi twa kere noSinyanga soUhompa, ose kwa tokwere kudika sanyamwetu. Konyima zapa pwa pitire nomvhura ntatu, ose kwa hefe apa twa mwene vantu 110 ava va wizire koMurarero gwaHompa ntani wovanzi kwa gwene ekuho konyima zapa twa tundire po posirudi oso.

Mo-1986 kwa tumine nge posirudi saCulion, posirudi oso kwa kere po vantu ava ngava vere yingondwe. Konyima Adel nage kwa kere muzuvhisi gosiruwo nasinye. Pomuhowo ose kwa kere nowoma wokuzuvhisira vantu woyingondwe. Nye vanavazinyetu womomukunda ogo kwa tu tanterere asi vantu woyingondwe kwa gwana uhaku wouvera owo ntani udigu kuukagura. Vamwe ava va kere nouvera owo ngava pongere membo lyamunazinyetu  gomukadi. Ano konyima ose kwa yikire ukaro owo ntani mokumona asi vantu owo kwa lizuvhire ngwendi kwa va sigilira ntani Karunga kapi ga va hara, ose kwa tamekere ku va zuvhisira kuhamena matumbwidiro aga ga kara moBibeli. Awo kwa hefe apa va lirongere asi ezuva limwe ngava ka kara noukanguki wouwa ntani nose kwa tu hafesere unene.​—Ruk. 5:12, 13.

Vana vetu kwa yikire eparu lyomoCulion. Name naAdel kwa zigidire ko vanavazinyetu wovakadi vavali vaya kare kumwe nose moCoron yipo vana vetu vaya tulise po ukaume nawo nokuyahafera kumwe sirugana sokuzuvhisa. Samuel naShirley ntani novanavazinyetu owo vavali kwa haferere kuzuvhisa nokuvatera vanona wovanzi va lironge Bibeli. Ano name naAdel kwa lirongere Bibeli novakondi vawo. Ose kwa lirongere nomapata 11 ntani kwa lirongere Bibeli novantu wovanzi. Yipo nye yakere ureru kwetu kutulisa po mbungakriste zompe.

Pomuhowo, nyamelike mukuronambunga na kere momukunda ogo. Beteli yipo za pulire nge ni pitisire mapongo gomokatji kosivike moCulion omu mwa kere tupu va zuvhisi 8 ntani momukunda gwaMarily omu mwa kere vazuvhisi 9. Apo kusinga po novili ntatu nosiniva. Konyima zomapongo, name nepata lyange ngatu gendi novili dononzi monondudu yipo tu ka lironge novarongwa vetu woBibeli momukunda gwaHalsey.

Konyima zosiruwo, vantu wovanzi kwa lirongere Bibeli ntani ose kwa tungire Yinyanga moMarily nomoHalsey. Vanavazinyetu womoLinapacan kwalizamberere kuruganesa yiweka yawo ntani kwa lihamekeremo unene mokutunga. Sinyanga somoMarily ngava gwanekemo tupu vantu wokusika po-200, ano konyima yipo va si gwederere yipo tu ruganene mo yigongi.

Mo-1993 apa vana vetu va kulire, name naAdel kwa tamekere sirugana soutareli moFilipine. Ano mo-2000 yipo na zire koSikora zedeuro vapitisili wombunga yipo va deure nge ni kare murongi goSikora ozo. Ame kwa lizuvhire asi kapi ya wapera nge kukara murongi gosikora ozo, nye Adel nga korangeda nge nkenye apa. Age nga diworokesa nge nkenye apa asi Jehova nga pa nge nonkondo  edi nina hepa yipo ni sikise mo situmbukira sange sosipe. (Fil. 4:13) Nonkango edi ga uyungire Adel usili morwa gayi limonenene ngomu ga sikisire mo situmbukira sendi nampili ngomu nga vera-vera.

Apa na rongere kosikora mo-2006, Adel kwa mu kwatekere uvera womononsipa. Ose kwa tukukire sili. Apa na here kuhageka situmbukira sange ni mu pakerembili, age kwa tanterere nge asi “Na kanderere paparera nge tupu ndokotora ogu na vhura kuvatera nge ntani Jehova na tu vatera tu twikire nositumbukira setu.” Nomvhura 6 edi daya kweme ko, Adel kwa twikilire kukarera Jehova ga hana kusivana. Apa ngayi mu digopere kugenda, age nga zuvhisire posipundi sendi sourema ntani apa ngayi mu digopere kuuyunga nawa, age nga gava elimbururo lyesupi. Vanavazinyetu wovanzi ngava mu tjangere nombudi mokumupandura kosihonena sendi sosiwa selididimiko dogoro apa ga ya fire mo-2013. Ame kwa hafera namukadange gomuwa gomulimburukwi nomvhura 30, nye kutunda apa ga dogoroka ame kuguva ntani kulizuvha mukuma.

Adel kwa here ni twikire sirugana sange, ano eyi yiyo na rugene. Mokumona asi ame kwa litulire mo unene mosirugana sange, ayo kwa vaterere nge ni dire kulizuvha mukuma unene. Kutundilira momvhura 2014 dogoro mo-2017, kwa pere nge situmbukira sokukadingura nombungakriste deraka lyoruTagalog koyirongo eyi va silika sirugana sokuzuvhisa. Konyima yipo na zire ni ka dingure nombungakriste doruTagalog moTaiwan nomoAmerika ntani moKanada. Mo-2019 kwa rongere noSikora doVazuvhisi woUhompa moIndia nomoTairanda, meraka lyoRuingilisa. Ame kwa hafera yitumbukira yange nayinye ntani kuhafesa nge unene apa ani litura mo unene mosirugana saJehova.

Nkenye situmbukira esi na gwene kwa vaterere nge ni hare unene vanavazinyetu ava ngani ligwana nawo, ano eyi kapi ya kere ureru ku va siga. Na hepere kulironga kuhuguvara mwaJehova poyiruwo oyo. Nkenye apa ngani mono omu Jehova ga vatera nge, ayo ngayi vatere nge ni tambure nkenye malitjindjo. Ngesi ame muzuvhisi gosiruwo nasinye moFilipine. Ame ngesi kuna kara mombungakriste zompe ezi zina kuvatera nge nokupakera nge mbili. Ayo kuhafesa nge hena apa ani mono Samuel naShirley kuna kuhonena epuro lyonane vawo.​—3 Joh. 4.

Meparu lyange kwa ligwanekera nomaudigu gomanzi kukwatera mo apa na mwene mukadange kuna kuhepa kouvera wounene dogoro taya fu. Na hepere hena kulididimikira maudigu gamwe gomape. Na limonena asi Jehova kapi ga kara “ure nankenye gumwe gwetu.” (Yirug. 17:27) Nye nampili ngoso, Jehova kukwafa vakareli vendi nampili tu kare nyoselike. (Jes. 59:1) Jehova mupopeli gwange ntani age kwa vatera nge meparu lyange nalinye. Tani mu pandura unene morwa kapi ga sigilira nge.