SIRONGWA SELIRONGO 7
RUSUMO 15 Hamberereni Mbeli zaJehova!
Mauwa musinke atu gwanene mo apa Jehova a tu gusire po?
“Ove kutudongwenena po.”—EPIS. 130:4.
OKU SINA DEMENENE SIRONGWA
Tatu ka zogera yifanekeso yimwe va ruganesa moBibeli eyi ayi tu vatere tu dimburure omu Jehova ga tu gusira po. Sirongwa esi ngasi ka tu vatera tu kare norupandu kweyi Jehova ga tu gusira po.
1. Morwasinke ya karera udigu kudiva eyi a tamba muntu apa a uyunga asi nina ku gusire po?
OVE nampo kuhafa unene apa gumwe a ku tantere asi “nina ku gusire po.” Unene po nsene ono yi diva asi koyili eyi wa rugana ndi eyi wa uyunga eyi ya mu koresa. Nye yisinke azi tanta ntanto ezi asi “nina ku gusire po.”? Ngoso muntu ogo wa koresa kuna kuuyunga nonkango odo morwa ana hara mu tengwidire po ukaume kumwe nendi? Ndi age kuna tamba asi kapi ana hara hena kudiworoka eyi ya horoka ndi? Apa vantu ava uyunga asi nina ku gusire po, awo kutamba yininke yokulisiga-siga.
2. Ngapi omu Matjangwa ga faturura omu Jehova a tu gusire po? (Tara hena nonkango dokonhi.)
2 Monkedi omu Jehova a gusire po vantu ya lisiga nomu a tu gusire po wopeke. Jehova yige gelike a tu gusire po nawa-nawa. MuEpisarome kwa uyungire kuhamena Jehova asi: “Ove kutudongwenena po, asi tu ku tjire.” a (Epis. 130:4) Apa Jehova a gusire po, age kapi a yi diworoka. Age yige a tu likida eyi ayi tanta nawa-nawa kugusira po. Monovelise dimwe domoMatjangwa goRuhebeli, vatjangi woBibeli kwa faturura omu Jehova a gusire po pokuruganesa nkango ezi va dira kuruganesa mokufaturura omu vantu ava gusire po vakwawo.
3. Ngapi omu nkedi zaJehova zokutugisira po za lisiga nomu atu gusire po wopeke? (Jesaya 55:6, 7)
3 Apa Jehova a gusire po muntu, age kudongonona po nonzo dendi, eyi kutanta asi ose kuvhura simpe kukara nelikwatakano kumwe nendi. Jehova kutugusira po nawa-nawa ntani age kuyirugana yiruwo yoyinzi.—Resa Jesaya 55:6, 7.
4. Ngapi omu Jehova a tu vatere tu kwate egano eyi ayi tanta kugusira po nawa-nawa?
4 Nsene asi monkedi omu Jehova a gusire po vantu ya lisiga nomu atu gusire po wopeke, ngapi nye omu natu kwata egano eyi ayi tanta kugusira po nawa-nawa? Jehova kuruganesa yifanekeso mokutuvatera tu kwate egano omu a gusire po nawa-nawa. Mosirongwa esi, tatu ka zogera mo yifanekeso yimwe. Ayo tayi ka tu likida omu Jehova a tu dongwenene po ntani nomu a tu vatere tu tengwidire po elikwatakano kumwe nendi. Ngomu natu ka zogera yifanekeso eyi, tayi ka tu vatera tu ka likide rupandu rorunene kwaGuhyetu gemeguru gonkenda ogu a tu gusire po mononkedi dokulisiga-siga.
JEHOVA KUDONGONONA PO NONZO DETU
5. Yisinke ayi horoka apa Jehova a tu gusire po nonzo detu?
5 Yikando yoyinzi, Bibeli kwa hetakanesa nonzo komudigo. Hompa Ndafita kwa fatwilire kuhamena nonzo dendi asi: “Ame na pwire mo mononzo dange, mukumo gwado gomudigu guna ganda nge.” (Epis. 38:4) Nye Jehova kudongonona nonzo dovantu ava ava litezurura. (Epis. 25:18; 32:5) Nkango zoRuhebeli kugusira po, monovelise edi kutanta asi “kusimba ndi kudamuna.” Jehova kwa fana ngwendi muntu gononkondo unene ogu a tu gusa mudigo ndi nonzo poyipepe yetu.
“Kudongwenena po” (Epis. 32:5)
6. Monkedi musinke omu Jehova a tu dongwenene po nonzo detu?
6 Bibeli kwa ruganesa hena sifanekeso simwe esi a si likida omu Jehova a tu dongwenene po nonzo detu. Episarome 103:12 kututantera asi: “Moomu wa kara Upumezuva ure noUtokero, nononzo detu yimo nga di paka ure nose.” Upumezuva kwa likara ure unene noUtokero. Upumezuva noUtokero kapi ngayi ligwanekera kumwe. Eyi kutanta asi Jehova kutugusira po nonzo detu kupitakana omu atu yi gazarere. Nonkango edi kutuhengagwida asi Jehova kutugusira po nawa-nawa.
“Moomu wa kara Upumezuva ure noUtokero.” (Epis. 103:12)
7. Ngapi omu Bibeli za singonona eyi a rugana Jehova kononzo detu? (Mika 7:18, 19)
7 Nampili ngomu Jehova a tu gusa nonzo detu poyipepe pasifanekeso, eyi ngesi kutanta asi age kutwikira kudikwaterera ndi? Hawe. Hompa Hisikiya kwa tjenge kuhamena Jehova asi: “Ove kwa zuguma nonzo dange nadinye.” (Jes. 38:9, 17, NW.) Eyi kutanta asi Jehova kuzuguma nonzo detu pasifanekeso ntani kapi a di diworoka. Nonkango edi kuvhura hena kuditoroka asi: “Ove kwa ninka nonzo dange di kare ngwendi asi kapi nadi rugana rumwe.” MoBibeli kwa uyunga mo sitwa sokulifana esi sa kara mwa Mika 7:18, 19. (Resa.) Novelise odo kuuyunga asi Jehova kuzuguma nonzo detu konhiinhi zefuta. Mosiruwo sanare sininke esi ngava zugumine konhiinhi zefuta kwato ogu ga vhulire kusigwana.
“Ove kwa dongonona po nonzo dange nadinye.” (Jes. 38:17)
‘Nonzo detu ngo di tuma konhiinhi zefuta!’ (Mika 7:19)
8. Yisinke tuna lirongo dogoro papa?
8 Yifanekeso eyi twa zogere yina tu vatere tu dive asi apa Jehova a tu gusire po, age kugusilira po nonzo detu nadinye. Ndafita kwa tente asi: “Vantu woruhafo vaava va gusira po yirugana yawo yoyidona ntani vaava va dongwenena po nonzo dawo, muntu goruhafo googu Jehova a dili kuvarwira nonzo dendi.” (Rom. 4:7, 8) Oyo yiyo ayi tanta kugusira po muntu nawa-nawa.
JEHOVA KUKUHURURA NONZO DETU
9. Sifanekeso musinke asi likida omu Jehova a tu gusire po?
9 Jehova kwa ruganesa hena sifanekeso simwe mokutuvatera tu kwate egano asi age kwa kuhurura po nonzo detu kupitira mosizoweseso. Jehova kwa mu faturura pasifanekeso asi age kuna kukuhwa nonzo detu ntani nokudikuhurura. Eyi kuninkisa munanzo a kuhuke. (Epis. 51:7; Jes. 4:4; Jer. 33:8) Jehova kwa faturura yitundwamo eyi ayi kara pokuuyunga asi: “Nonzo deni nampili di gehe ngwendi honde, ngadi zera ngwendi yiterengenze. Ado mpili kwa geha ngwendi purupuli ngadi, zera ngwendi nohuki dononzwi.” (Jes. 1:18) Ayo kapisi ureru kukuhwa sidwara sokutinta. Sifanekeso esi kutuvatera tu dimburure asi Jehova kwa tu tumbwidira asi nga kuhwa nonzo detu pasifanekeso yipo ngadi dire kumoneka nampili rumwe.
“Nonzo deni nampili di gehe ngwendi honde, ngadi zera ngwendi yiterengenze.” (Jes. 1:18)
10. Sifanekeso musinke hena simwe esi asi likida omu Jehova a tu gusire po?
10 Ngwendi moomu tupu kava yi tumbwire mosirongwa sina ka pita, nonzo kwadi fanekesa komakongo. (Mat. 6:12; Ruk. 11:4) Nkenye apa atu tura nzo kwaJehova, ayo kwa fana ngwendi kuna kuza momakongo gomanzi. Ose kwa mu korota yininke yoyinzi. Nye apa Jehova a tu gusire po, ayo kwa fana ngwendi ana tu gusire po makongo aga twa hepa kufuta. Age kapi a tu pura tu fute ko yuma kononzo edi ga tu gusira po. Ngwendi moomu tupu muntu a hafa apa ava mu gusire po makongo gendi, nose kuhafa apa Jehova a tu gusire po.
“Tu dongwenena po nonzo detu.” (Mat. 6:12)
11. Yisinke azi tamba Bibeli apa azi uyunga asi nonzo detu kudikomba po? (Yirugana 3:19)
11 Jehova kapi tupu a tu gusire po nonzo detu, nye hena kudikomba po. (Resa Yirugana 3:19.) Apa makongo ava ga futu, ose kuvhura kugazara musunda gomure ogu vana tjarura pomakongo ogo. Nye nampili ngoso, nkenye ogu kuvhura kumona musunda ogu vana tjarura pomakongo. Nye kukomba sininke ya lisiga nokutjarura. Mokukwata egano nkango ezi zopasifanekeso, twa hepa kudiworoka asi inka ezi ngava ruganesa mosiruwo sanare mokutjanga kwa kere ureru kuzidongonona nomema. Muntu kuvhura kugusa sitarase a zi dongonone po. Yipo nye, apa makongo ngava ga kombo po, ago ngaga dongonokerera po. Vantu kapi ngava vhuru kumona nampili ndanda zimwe ezi va tjenge po. Ayo kwa fana ngwendi kapi va tjenge po makongo. Ayo kutuhafesa sili pokudiva asi apa Jehova a tu gusire po nonzo detu, age kudikomba po nadinye.—Epis. 51:9.
“Yipo nonzo deni va di mu dongwenene po” (Yirug. 3:19)
12. Yisinke tuna lirongere ko kosifanekeso seremo?
12 Kozili nkedi zimwe hena omu Jehova a tu gusire po nonzo detu. Age kwa tanta asi: “Ame kwa komba po nonzo doge ngwendi eremo.” (Jes. 44:22) Apa Jehova a tu dongwenene po nonzo detu, ayo kwa fana ngwendi asi age kuna kuruganesa eremo eli nali viva nonzo detu yipo di dire kumoneka.
“Ame kwa komba po nonzo doge ngwendi eremo” (Jes. 44:22)
13. Ngapi omu atu lizuvhu apa Jehova a tu gusire po nonzo detu?
13 Yisinke tuna lirongere ko koyifanekeso eyi tuna zogere? Apa Jehova a tu gusire po nonzo detu, kapisi tu twikire kulizuvha unzoni kuhamena nonzo edi twa rugana. Nonzo detu kwa di tu gusira po kupitira mohonde zaJesus. Apa Jehova a tu gusire po nonzo detu, ayo kwa fana ngwendi kapi twa di rugana rumwe. Ano monkedi ezi yimo Jehova a tu dongwenene po nonzo detu apa atu litezurura.
JEHOVA KUTUTAMBURA NGOVAKAUME VENDI
Apa Guhyetu gemeguru a tu gusire po, ayo kutupa mpito tu kare nelikwatano kumwe nendi (Tara paragarafu 14)
14. Morwasinke natu yi pulira asi Jehova ngatu dongwenena po nawa-nawa? (Tara hena mafano.)
14 Apa Jehova a tu gusire po nonzo detu, ose kuyipura nawa-nawa asi age kaume gwetu. Ayo kutuvatera tu nyokere po kulipa usima. Kapisi tu kare nowoma asi Jehova nampo ga kara nonkoko nose ntani kuna hara kututengeka. Age kapi ngayi rugana oyo. Ose kuhuguvara Jehova apa a tu tantere asi ana tu gusire po. Jehova kwa tanterere muporofete Jeremiya asi: “Ame ngani dongonona po nonzo dawo, kapi ngani diworoka hena mausima gawo. (Jer. 31:34) Paurusa kwa temwinine nonkango odo apa ga uyungire asi: “Nonzo dawo kapi ngani di diworoka hena.” (Heb. 8:12) Nye yisinke ayi tanta oyo?
“Kapi ngani diworoka hena mausima gawo” (Jer. 31:34)
15. Yisinke ayi tanta apa Jehova a uyunga asi kapi a diworoka nonzo detu?
15 MoBibeli, nkango ezi ‘kudiworoka’ kapi azi tamba nkenye apa komuntu ogu ana kudiworoka yimwe ndi ogu ana kugazara eyi ya mu horokera nare. Nye azo kuvhura kutamba komuntu ogu ana kurugana yuma. Munamahaka ogu va pamparere kositji, ogu ga kere pepi naJesus kwa tanterere Jesus asi: “Jesus, ngo ka diworoke nge moUhompa woge.” (Ruk. 23:42, 43) Munamahaka ogu kwa pulire Jesus yipo nga ka mu ruganene yininke yimwe apa ngasi sika mo siruwo. Ano Jesus kwa tanterere mugara ogo asi ngaka mu vhumbura. Yipo nye, apa Jehova a tu tantere asi kapi a diworoka nonzo detu, ayo kutanta asi age ga tu gusira po ntani kapi nga tu tengeka komeho.
16. Ngapi omu Bibeli za faturura umanguruki ou atu lizuvhu apa Jehova a tu gusire po?
16 Apa Jehova a tu gusire po, ose kulizuvha emanguruko. Bibeli kwa ruganesa hena sifanekeso simwe esi asi tu vatere tu kwate egano eyi ayi tanta apa Jehova a tu gusire po. Azo kuuyunga asi mokumona asi kapi twa sikilira mo, ose “vapika wononzo.” Nye apa Jehova a tu gusire po, ayo kwa fana ngwendi vapika ava ava “mangurura mo mononzo.” (Rom. 6:17, 18; Ehor. 1:5) Apa atu diva asi Jehova ga tu gusira po nonzo detu, ose kuhafa unene ngwendi mupika ogu vana mangurura.
‘Kwa mu mangurura mo mononzo’ (Rom. 6:18)
17. Yitundwamo musinke ayi kara apa Jehova a tu gusire po? (Jesaya 53:5)
17 Resa Jesaya 53:5. Bibeli kuuyunga asi mokumona asi ose vananzo, ose kwa fana gwendi vantu ava va kara nouvera wosiponga. Nye morwa nzambo zosizoweseso ezi ga tu pa Jehova kupitira mwaMunendi, Jehova kwa tu verura. (1 Pet. 2:24) Apa atu tura nzo, ose kuzonagura elikwatakano lyetu naJehova, nye morwa sizoweseso age kutugusira po ntani ose kutengwidira po elikwatakano kumwe nage. Ngwendi moomu muntu a hafa unene apa a veruka kouvera wosiponga, nose kuhafa unene apa atu tengwidire po elikwatakano lyetu naJehova ntani Jehova kutuhafera hena.
“Moyironda yendi yimo twa gwana ukangure” (Jes. 53:5)
NGAPI OMU AYI KUNDAMA EPARU LYETU APA JEHOVA A TU GUSIRE PO?
18. Yisinke tuna lirongere ko koyihonena yomoBibeli eyi ya uyunga kuhamena omu Jehova a gusire po? (Tara hena kakende “Ngapi omu Jehova a tu gusire po?”)
18 Yisinke tuna lirongere ko koyifanekeso yomoBibeli eyi ya uyunga kuhamena omu Jehova a gusire po? Apa Jehova a gusire po, age kuyitara ngwendi kapi twa tura nzo. Ano eyi kutuninkisa tu kare nelikwatakano lyewa kumwe nage. Nye nampili ngoso, ose twa yi diva asi kugusira po kuna kara uhwi au tundu kwaJehova morwa ga tu hara ntani age ugavi nye kapisi moomu tuna yi harere.—Rom. 3:24.
19. (a) Morwasinke natu pandwira Jehova? (Varoma 4:8) (b) Yisinke ngatu ka zogera mosirongwa sokukwama ko?
19 Resa Varoma 4:8. Ose kupandura kweyi Jehova ga kara Karunga ogu a tu dongwenene po. (Epis. 130:4) Nye nampili ngoso mokuninka asi Jehova a tu gusire po, ayo kwa korera mokurugana yininke yomulyo. Jesus kwa uyungire asi: “nsene mu dira kudongwenena po vantu maunzoni gawo, Guhyeni gemeguru nage ngano kapi nga mu dongwenena po maunzoni geni.” (Mat. 6:14, 15) Yipo nye, ayo ya kara nomulyo tu honene Jehova monkedi omu a gusire po. Nye ngapi natu yi rugana? Sirongwa sokukwama ko ngasi tu likida omu natu yi rugana.
RUSUMO 46 Rupandu Jehova
a Nkango kugusira po ezi va ruganesa moRuhebeli kulikida asi yiko kwelike kugusira po nawa-nawa nampili pa kare nonkedi dimwe dokugusira po. Sinzi sonoBibeli kapi da toroka nawa-nawa sitwa esi sa kara mEpisarome 130:4.
