1-2. (a) Posiruwo musinke ayi tu digopere unene kugusira po wopeke? (b) Ngapi omu Denise ga gusilire po mugara ogu ga va reterere ehudi?

 AYO kukudigopera kugusira po wopeke ndi? Sinzi setu kutuhorokera, unene po apa gumwe a uyunga ndi a rugana yininke eyi ayi tu koresa unene. Nye nampili ngoso, kuvhura tu funde po kukora oku atu lizuvhu apa ava tu zonene ntani kuvhura tu gusire po wopeke nsene vana tu zonene. Pasihonena, tu tareni sihonena samunazinyetu gomukadi Denise, a ogu ga gusilire po wopeke kutundilira komutjima. Mo-2017, Denise nepata lyawo kwa ka dingwire mberewa zonene zoNombangi daJehova zompe. Ngomu va tengwire kembo, musingi gumwe getuwa ta mbwanda etuwa lyawo. Denise kwa pwililire apa lya horokere ehudi olyo. Apa ga pwirurukire ta dimburura asi vana vendi vana remana unene ano mugara gwendi Brian ana dogoroka. Apa Denise a diworoka sihorokwa oso, age kwa tanta asi: “Ame kwa dompere mutjima ntani kwa piyaganene.” Konyima age kwa ya dimbwilire asi musingi getuwa olyo kwato eyi ya mu donganesere apa lya horokere ehudi ntani munazinyetu ogo kwa kanderere kwaJehova a kare nombili.

² Musingi ogo kwa mu kwete noku mu twara kompanguro kweyi ga dipagere mugara gwaDenise ga hana kuyidivira. Ngano asi va mu gwene unzoni, age ngano va mu zedilire modorongo. Nye nampili ngoso, hofa kwa tanterere Denise asi yitundwamo eyi nayi ninkisa mugara ogo va mu ture modorongo, ta yi korere koumbangi ou na gava Denise. Denise kwa tente asi: “Ame kwa lizuvhire ngwendi muntu ana kutura mungwa gomunzi posironda sange morwa na hepere kuuyunga sihorokwa oso sosidona unene esi sa horokere meparu lyange.” Konyima zoyivike  yongandi, Denise kwa zire nokukahingira mevango omu za karere mpanguro ntani nokuliwapaikira mokukagava umbangi komeho zomugara ogu ga koresere unene epata lyawo. Yisinke ga uyungire Denise? Age kwa pulire mupanguli yipo a fire nkenda mugara ogo. b Apa Denise ga mene kuuyunga, mupanguli kwa lilire. Mupanguli kwa tente asi: “Monomvhura nadinye 25 edi na kara mupanguli, kapi na mona rumwe epata eli va zonena li likwambere nge yipo ni fire nkenda muntu ogu ana zono. Kapi na zuvha rumwe nonkango deharo ntani egusiropo.”

3. Yisinke ya vaterere Denise a kare nonkareso zokugusira po?

³ Yisinke ya vaterere Denise a kare nonkareso zokugusira po? Age kwa tedere ko kuhamena omu Jehova a gusire po. (Mika 7:18) Apa atu kara norupandu kweyi Jehova ga tu gusira po, ayo ngayi tu tumangeda nose tu gusire po wopeke.

4. Yisinke ana hara Jehova tu rugane? (Vaefeso 4:32)

⁴ Jehova ana hara tu gusire po wopeke ngwendi moomu ga tu gusira po. (Resa Vaefeso 4:32.) Age kundindira ko kwetu tu gusire po ava ava tu koresa. (Epis. 86:5; Ruk. 17:4) Mosirongwa esi tatu ka lironga yininke yitatu eyi nayi tu vatera tu kare nonkareso zokugusira po.

RUGANA KO YUMA KUHAMENA MONKEDI OMU ONO KULIZUVHA

5. Kuliza noYisewe 12:18, ngapi atu lizuvhu nsene gumwe ana tu koresa?

⁵ Ayo kuvhura kutukoresa nsene gumwe a uyunga ndi a rugana yuma, unene po nsene ogo muntu kaume gwetu gomunene ndi gekoro lyetu. (Epis. 55:12-14) Poyiruwo yimwe kukora oku atu lizuvhu kuvhura kukufanekesa ngwendi kuna tu tu mbere. (Resa Yisewe 12:18.) Poyiruwo yimwe kuvhura tu sense kukora oku tuna kulizuvha. Nye nsene tu yi rugana ayo kuna fana ngwendi kuna tu tu mbere ntani nokuzisigilira posironda. Mokulifana ose kapi ngatu lizuvha hansa ko nsene tu sensa kukora oku tuna kulizuvha.

6. Yisinke natu rugana nsene gumwe ana tu zonene?

⁶ Apa gumwe a tu koresa, rorunzi ose kuvhura kuhanduka. Bibeli kuuyunga asi ose kuvhura kuhanduka. Nye nampili ngoso, Bibeli kuturondora asi kapisi tu pulisire nkareso ozo zi tu pangere. (Epis. 4:4; Efe. 4:26) Morwasinke? Morwa nkareso ozo kuvhura kutuninkisa tu rugane yininke yoyidona. Ntani muntu kapi a rugana youhunga nsene ana handuka. (Jak. 1:20) Rorunzi ose kapi atu vhuru kupangera ehandu lyetu poopo nsene gumwe ana tu zonene nye kuvhura tu tokore nsene kuvhura tu kare nonkoko nogo muntu ndi hawe.

7. Ngapi hena atu lizuvhu nsene gumwe ana tu koresa?

⁷ Apa gumwe atu tekura momudona, ayo simpe kuvhura kutukoresa pamalizuvho. Pasihonena, munazinyetu gomukadi Ann kwa uyunga asi: “Apa na kere munona, otate kwa sigire oyina nokukwara mukadi ogu nga rugana pembo lyetu ogu nga pakere nge mbili. Ame kwa lizuvhire asi vana sigilire nge. Apa va kere novana vawo vavali ame kwa lizuvhire asi kapi vana kupakera nge mbili. Apa na kulire ame kwa lizuvhire asi kwato mulyo.” Munazinyetu gomukadi Georgette kwa uyunga kuhamena omu ga lizuvhire apa mugara gwendi ga honderere. Age kwa uyunga asi: “Ose kwa kere vakaume kutundilira unona. Ntani ngatu rugana kumwe uzuvhisi wokukarerera. Ayo kwa koresere  nge sili.” Ntani munazinyetu gomukadi Naomi kwa uyunga asi: “Kapi nayi gazara rumwe asi mugara gwange nga koresa nge. Apa ga tanterere nge asi age nga tarere mafano goruhonda ntani nga yi horekere nge, ayo kwa guvisire nge ntani kwa lizuvhire asi kwato mulyo.”

8. (a) Nokonda musinke dimwe deyi natu gusilira po wopeke? (b) Mauwa musinke atu gwanene mo apa atu gusire po wopeke? (Tara kakende “ Ngapi nsene gumwe ga ku koresa unene?”)

⁸ Ose kapi tatu vhuru kunyokera po eyi ava uyunga ndi eyi ava rugana wopeke nye ose kuvhura tu lipangere koyininke eyi tuna hara kurugana. Nye sininke somulyo po esi twa hepa kurugana kuna kara kugusira po. Morwasinke? Morwa twa hara Jehova ntani ana tu harere tu gusire po wopeke. Nsene tu twikira kuhanduka ntani nokudira kugusira po wopeke, ose kuvhura ngatu rugane yininke yoyidona ntani kuvhura ngayi tu koresa pamalizuvho. (Yis. 14:17, 29, 30) Tuzeni tu ka tare sihonena samunazinyetu Christine. Age kwa uyunga asi: “Apa ani handuka kapi ani menya-menya unene. Ame kulya nondya dokudira ukanguki. Kapi ani rara nompofu dokugwanena po ntani ayo kudigopera nge kupangera malizuvho gange. Ayo kukundama nonkwara dange ntani nomu ani tekura wopeke.”

9. Morwasinke natu nyokerera po kukara nonkoko?

⁹ Nampili muntu ogu ga tu koresa kapi ga ya tu pura egusiropo, ose kuvhura tu nyokere po kulikoresa nyamwetu pokudira kudiworoka eyi ga tu rugana. Monkedi musinke? Georgette ogu tuna tumbura kwa tanta asi: “Ayo kwa gusire siruwo nye na nyokerere po nkoko ntani ehandu kwa mugara gwange gwanare. Ngoyitundwamo, ame kwa lizuvhire mbili. Apa atu nyokere po nkoko, ayo kutuvatera yipo tu dire kuhanduka. Ose kugwanena mo hena uwa apa atu nyokere po kukara nonkoko morwa ayo kutuvatera tu dire kudemenena kweyi ya horoka. (Yis. 11:17) Nye yisinke no rugana nsene simpe kuna kulizuvha asi kapi ono liwapaikire kugusira po muntu gongandi?

NGAPI OMU NO NYOKERA PO EHANDU?

10. Morwasinke natu lipera nyamwetu siruwo dogoro ehandu lyetu ngali li ture? (Tara hena mafano.)

¹⁰ Yisinke nayi kuvatera yipo o nyokere po ehandu? Wa hepa kulipa nyomoge siruwo dogoro ngo lizuvhe asi hansa ko. Konyima zapa muntu gokuremana a gwana uhaku, age kuhepa siruwo yipo yironda yendi yi veruke. Mokulifana, ayo kuvhura kugusa siruwo yipo ehandu lyetu li liture komeho tu gusire po kutundilira komutjima.​—Muud. 3:3; 1 Pet. 1:22.

11. (a) Ngapi omu ekanderero nali kuvatera o gusire po wopeke? (b) Yisinke ono lirongere mo monovidiyo kuhamena omu no gusira po wopeke?

 ¹¹ Kanderera kwaJehova a ku vatere yipo o gusire po wopeke. c Ann ogu tuna tumbura kwa faturura omu makanderero ga mu vatera. Age kwa tanta asi: “Ame kwa pulire Jehova yipo a gusire po nkenye gumwe gemepata lyetu koyininke yepuko eyi twa rugene. Makura ame kwa tjangerere mbilive otate noyinagona nokuvatantera asi nina va gusire po.” Ann kwa tanta asi kapi ya kere ureru kuyirugana. Nye age kwa uyunga asi: “Ame kwa kere nehuguvaro asi pokuhonena omu Jehova a gusire po, ngayi tumangeda otate noyina va lironge yoyinzi kuhamena Jehova.”

12. Morwasinke natu huguvarera mwaJehova mevango lyokuhuguvara omu tuna kulizuvha? (Yisewe 3:5, 6)

¹² Huguvara mwaJehova nye kapisi o rugane yininke moomu ono kulizuvha. (Resa Yisewe 3:5, 6.) Jehova ga diva yoyiwa po kwetu. (Jes. 55:8, 9) Ntani kapi ngatu tantera tu rugane yininke eyi ngayi tu koresa. Yipo nye, apa a tu korangeda tu gusire po wopeke, ose kuvhura tu yi pure nawa-nawa asi ngatu gwanena mo mauwa nsene tu yi rugana. (Epis. 40:4; Jes. 48:17, 18) Nye nampili ngoso, nsene tu lihuguvara nyamwetu kuvhura ngatu dire kugusira po wopeke. (Yis. 14:12; Jer. 17:9) Naomi ogu tuna tumbura kwa uyunga asi: “Pomuhowo ame kwa lizuvhire asi kapi tani vhuru kugusira po mugara gwange kweyi ga tarerere mafano goruhonda. Ame kwa kere nosinka asi nga koresa nge hena ndi nga divara omu ga koresa nge. Ntani ame kwa gazarere asi Jehova ana kwata nge egano omu nina kulizuvha. Nye na ya tamekere kudimburura asi nampili ngomu Jehova ga kwete nge egano, ayo kapi ya tente asi ga kwatesere ko omu na lizuvhire. Age ga yi diva omu ani lizuvhu ntani nomu ayi gusa siruwo yipo ehandu li liture, nye ana harere nge hena ni gusire po wopeke.”

NGAPI OMU NATU KARA NOMAGAZARO GOMAWA?

13. Kuliza noVaroma 12:18-21, yisinke twa hepa kurugana?

¹³ Nsene kuna kugusira po muntu ogu ga tu koresa, tuna hara kurugana yoyinzi kupitakana tupu kunyokera po kuzogera eyi ya horoka. Nsene asi ogu ga tu zonena kuna kara munazinyetu,  sitambo setu kuna kara sokutulisa po mbili. (Mat. 5:23, 24) Mevango lyokuhanduka ntani nokukara nonkoko, twa hepa kumulikida nkenda ntani nokumugusira po. (Resa Varoma 12:18-21; 1 Pet. 3:9) Yisinke nayi tu vatera yipo tu yi rugane?

14. Yisinke natu hetekera ko kurugana ntani morwasinke?

¹⁴ Twa hepa kutara muntu ogu ga tu zonena ngwendi moomu Jehova a mu tara. Jehova kutara yininke yoyiwa movantu. (2 Hist. 16:9; Epis. 130:3) Nsene tu tara yikara yoyidona momuntu kuvhura ngatu yi gwane ntani nsene tu tara yikara yoyiwa momuntu kuvhura nayo ngatu yi gwane. Nsene tu tara uwa mwava wopeke, ayo ngayi tu rerupira kuvagusira po. Pasihonena, munazinyetu gomugara Jarrod kwa uyunga asi: “Ayo kurerupira nge kugusira po munazinyetu apa ani gazadara ko koyikara yendi yoyiwa mevango tupu lyokudemenena komapuko gendi.”

15. Morwasinke ya karera nomulyo kutantera muntu asi ono mu gusire po?

¹⁵ Sininke hena somulyo esi no vhura kurugana  kuna kara mokutantera mukweni asi ono mu gusire po. Morwasinke? Koneka eyi ga uyungire Naomi ogu tuna tumbura. Age kwa tente asi: “Mugara gwange kwa pulire nge asi, ‘ono gusire nge po ndi?’ Ayo kwa digoperere nge kuuyunga asi ‘nina ku gusire po.’ Makura yipo na dimbwilire asi kapi na mu gusilire po kutundilira komutjima. Konyima zosiruwo yipo na mu tanterere asi ‘nina ku gusire po.’ Apa na gusilire po mugara gwange, age kwa lilire ntani ame kwa lizuvhire mbili zokomutjima. Ame kwa tamekere hena kumuhuguvara ntani ose ngesi vakaume wovanene.”

16. Yisinke ono lirongo kuhamena kugusira po wopeke?

¹⁶ Jehova kuna tu harere tu gusire po vakwetu. (Koros. 3:13) Nye nampili ngoso, kuvhura yi tu digopere kuvagusira po. Kuvhura tu gusire po vakwetu nsene tu nyokera po ehandu ntani nokukara nomagazaro gomawa.​—Tara kakende “ Yininke yitatu eyi no rugana yipo o gusire po wopeke.”

GAZADARA KO KOMAUWA AGA GA KARA PO NSENE O GUSIRA PO WOPEKE

17. Mauwa musinke natu gwanena mo nsene tu gusira po wopeke?

¹⁷ Twa kara nonokonda dononzi deyi natu gusira po wopeke. Tu tareni ko nokonda dimwe. Zokuhova, ose kuhonena nokuhafesa Guhyetu Jehova. (Ruk. 6:36) Zauvali, ose kulikida rupandu kweyi Jehova ga tu gusira po. (Mat. 6:12) Zautatu, ose kuhafera ukanguki wouwa ntani ukaume novakwetetu kunkondopara.

18-19. Yitundwamo musinke nayi kara nsene tu gusira po wopeke?

¹⁸ Nsene tu gusira po wopeke kuvhura ngatu gwanene mo mauwa aga tuna dili kundindira. Pasihonena, tu tareni eyi ya horokerere Denise ogu vana tumbura ketamekero lyosirongwa. Posiruwo sompanguro, Denise kapi ga yi divire asi mugara ogu ga retesere po siponga kepata lyawo kwa here kulidipaga konyima zompanguro ozo. Nye nampili ngoso, mugara ogo kwa kere norupandu kweyi Denise ga mu gusilire po makura ayo kwa mu ninkisire a tameke kulironga Bibeli noNombangi daJehova.

¹⁹ Kuvhura tu lizuvhe asi kugusira po muntu gongandi kuna kara sininke simwe soudigu unene esi natu vhura kurugana. Nye nampili ngoso, ayo hena kuvhura kuturetera uwa wounene nsene tu yi rugana. (Mat. 5:7) Yipo nye, ngano natuvenye tu rugane paapa twa hulira yipo tu honene Jehova monkedi omu a gusire po.