SINZI sovantu mouzuni kulizuvha asi va hepa kuvatekura nawa kupitakana wopeke ntani va hepa kugwana yitumbukira yongandi. Nampili ngomu ava va tekura nawa, awo simpe kulizuvha asi va hepa kugwana yitumbukira yoyinzi. Vantu owo kuligazara tupu vene ntani kapi va kara norupandu kweyi va kara nayo, ano Bibeli kwa pumba asi ezi yizo nkareso ngava kara nazo vantu pomazuva gopouhura.​—2 Tim. 3:2.

Nampili mosiruwo sanare, vantu ngava ligazara tupu vene. Pasihonena, Adamu naEva kwa tokwere vene kuhorowora pokatji koyininke yoyiwa neyi yoyidona, nye eyi kwa va ninkisire va ligwanekere noyitundwamo yoyidona. Sihonena simwe kuna kara saUsiya hompa gorudi rwaJuda. Age kwa gazarere asi kuvhura a gave nzambo zoyitutumikidiso kontembeli, nye kapi ya mu tumbukilire. (2 Hist. 26:18, 19) Ntani Vafalisayi noVasadukayi kwa gazarere asi Karunga ga hepa kuvatekura nawa kupitakana wopeke morwa awo kwa tundilire moruvharo rwaAbirahamu.​—Mat. 3:9.

Ose kwa tunga kumwe novantu ava va kara nonkareso zokuligazara vene ntani zokurumbasana, ano nkareso zawo kuvhura kutukundama. (Gar. 5:26) Kuvhura tu gazare asi twa hepa kugwana situmbukira songandi ndi va hepa kututekura monkedi zokulikarera. Ngapi omu natu nyokera po nkareso ezi? Pomuhowo twa hepa kukwata egano omu Jehova a tara nkareso ezi. Tu konakoneni nompango mbali domoBibeli edi nadi tu vatera.

 Jehova yige a tokora eyi natu vhura kugwana. Tu konakoneni yihonena yimwe.

• Mepata, mugara ga hepa kulizuvha asi mukadendi ga mu fumadeka ntani mukadi nage ga hepa kulizuvha asi mugara gwendi ga mu hara. (Efe. 5:33) Valikwali vahepa kulilikida eharo eli lya va fira velike nye kapisi nkenye ogu. (1 Kol. 7:3) Vakurona kundindira ko kovana vawo va va limburukwe, ano vanona kundindira ko kovakurona vawo va va hare nokuvavatera.​—2 Kol. 12:14; Efe. 6:2.

• Jehova kundindira ko kwetu tu fumadeke vakuronambunga morwa awo kurugana unene. (1 Tes. 5:12) Nye nampili ngoso, vakuronambunga kapi va kara nononkondo dokupangera eyi ava rugana vanavazinyetu.​—1 Pet. 5:2, 3.

• Karunga kwa pa mapangero govantu nonkondo dokuninka vantu va fute mutero ntani va ga fumadeke.​—Rom. 13:1, 6, 7.

Jehova kutupa neharo yininke yoyinzi kupitakana eyi twa hepa. Mokumona asi ose kwa pinga nzo zaAdamu, ose kufa. (Rom. 6:23) Nye Jehova kutupa yininke yoyinzi yoyiwa morwa ga tu hara. (Epis. 103:10, 11) Ose kugwana matungiko gomanzi noyitumbukira morwa nkenda zaKarunga zonene.​—Rom. 12:6-8; Efe. 2:8.

Takamesa nkareso zovantu womouzuni. Ose kuvhura tu tameke kugazara asi twa hepa yininke yoyinzi kupitakana wopeke twa hana kuyidimburura. Jesus kwa fatwilire omu natu kara nonkareso ozo pokuruganesa sifanekeso sovarugani ava va futire nkenye ogu edenali limwe. Varugani vamwe kwa tamekere kurugana ngurangura zonene ntani kwa rugene ezuva nalinye momutenya, ano vamwe kwa rugene vili zimwe tupu. Varugani ava va hovere kurugana kwa lizuvhire asi va hepa kuvafuta yimaliwa yoyinzi morwa yirugana eyi va rugene. (Mat. 20:1-16) Pokuruganesa sifanekeso esi, Jesus kwa yi likidire asi vasikuli vendi ya hepa ku va gwanena po yininke eyi ana kuvapa Karunga.

Kara norupandu nye kapisi o ndindire ko yoyinzi kwava wopeke. (1 Tes. 5:18) Honena mupositoli Paurusa ogu ga dilire kuhundira ekwafo lyoyihepwa yendi kovanavazinyetu womoKolinte,  nampili ngomu ya mu tumbukilire. (1 Kol. 9:11-14) Twa hepa kupandura kwanayinye eyi ava tu pe wopeke nokunyokera po kundindira yoyinzi kwawo.

Tunga po elinunupiko. Apa muntu a ligazadara unene, age kuya tameka kulizuvha asi ga hepa kugwana yoyinzi kupitakana eyi ana kara nayo. Elinunupiko ngali tuvatera tu dire kukara nomagazaro gomadona.

Muporofete Ndaniyera kuna kara sihonena sosiwa somuntu ogu ga likidire elinunupiko. Mokumona asi age kwa tundilire mepata lyokudivikwa , nomu ga wepe mosipa nonondunge ntani noudivi wounzi ou ga kere nawo, ngano ya mu ninkisire a lizuvhe asi ya mu tumbukira kumutekura monkedi zokulikarera ntani yitumbukira eyi ga gwene nayo ya mu wapera. (Ndan. 1:3, 4, 19, 20) Nye Ndaniyera kwa linunupikire ntani sikara esi kwa ninkisire Jehova a mu hare.​—Ndan. 2:30; 10:11, 12.

Tu nyokereni po nkareso zokuligazara nyamwetu ezi zina kara mouzuni naunye. Ngano tu hafere nkenye etungiko eli ana kutupa Jehova morwa nkenda zendi zonene.