WA Ligwanekera rumwe noudigu ntani kwato ogu ga ku vaterere ndi? Ose kuna kuparuka ‘poyiruwo youdigu’ eyi nayi tu ninkisa tu guve nokuhara kukara nyoselike. (2 Tim. 3:1) Nye nampili ngoso, koveli ava nava tuvatera nsene tuna kara nomaudigu. Bibeli za tumbura mulyo gokukara novakaume wousili ‘poyiruwo youdigu.’​—Yis. 17:17.

Mupositoli Paurusa kwa zire kumwe novakaume vendi vamwe morugendo rwendi routumwa ntani awo kwa mu vaterere monokedi dononzi. (Koros. 4:7-11) Apa Paurusa ga kere modorongo zomoRoma, vakaume vendi kwa rugene yininke eyi ga dilire kuvhura kurugana. Pasihonena, Epafuraditusa kwa twere yininke kwaPaurusa eyi va mu tuminine vanavazinyetu womoFilipi. (Fil. 4:18) Tikikusi kwa twere nombilive daPaurusa konombungakriste dokulisiga-siga. (Koros. 4:7) Paurusa kwa sikisire mo sirugana sendi nevatero lyovakaume vendi nampili ngomu va mu tulire modorongo zemembo ndi apa ga kere gelike modorongo. Ngapi omu nove no kara kaume gousili?

Pwa kara yihonena yovanavazinyetu neina eyi ayi likida eyi nava rugana vakaume wousili yipo va livatere. Elisabeta muzuvhisi gokukarerera gomoSipaniya kwa faturura omu ga mu vaterere munazinyetu gomukadi gumwe mosiruwo soudigu. Apa ozina vaElisabeta va vakwatekere kankera, munazinyetu ogo gomukadi kwa tuminine Elisabeta nombudi dokukorangeda dokutundilira moBibeli. Elisabeta kwa uyunga asi “nombudi dendi kwa korangedere nge no kuninkisa nge ni lizuvhe asi kapisi nyamelike nina kara.”​—Yis. 18:24.

Ose kunkondopeka ukaume wetu novapuli vakwetu apa atu va vatere va ze mokuzuvhisa nokomapongo. Pasihonena, ose kuvhura tu piture vanavazinyetu wovakurupe komapongo ndi mokuzuvhisa. Pokuyirugana oyo, awo nga va tu korangeda ntani nose ngatu va korangeda. (Rom. 1:12) Nye vanavazinyetu vamwe kapi ava vhuru kutunda momambo gawo. Ngapi omu natu kara vakaume vawo wousili?

Vanavazinyetu vamwe kapi ava vhuru kuza komapongo morwa uvera ndi maukaro gamwe. Gazadara ko kosihonena saDavid ogu va kwatekere kankera. Age kwa gwene uhaku wokankera makwedi gokupitakana pontazimwe. Apa nga gwana uhaku, David namukadendi Lidia ngava kara momapongo kupitira koyikwakonentu membo.

Ngapi omu vakaume vawo womombungakriste va va vaterere? Vanavazinyetu vamwe ava ngava pongere koSinyanga soUhompa ngava uyunga naDavid ntani naLidia pokuruganesa yikwakonentu konyima zepongo. Awo hena ngava tumine David naLidia nombudi dekorangedo konyima zepongo  nsene vana gava malimbururo. Ano eyi kwa ninkisire David naLidia va lizuvhe asi va va hara ntani kapisi velike vana kara.

Nose kuvhura tu ture po mawapaiko gokuzuvhisa novanavazinyetu ava ava dili kuvhura kutunda membo. Kuvhura tuture po malitjindjo gamwe moyininke eyi atu rugana nkenye apa yipo tu pwage nawo, ano eyi ngayi likida asi kapi twa va divara. (Yis. 3:27) Kuvhura tu litulire po siruwo tu zuvhise nawo pokutjanga nombilive ndi tu zuvhise nawo kupitira koterefona. Vanavazinyetu ava ayi dili kutompoka kutunda momambo gawo kuvhura kukara momapongo goyirugana yokuzuvhisa pokuruganesa yikwakonentu. David naLidia kwa haferere ewapaiko eli. David kwa uyunga asi: “Ayo kwa tu korangedere sili unene pokukara nonzogera zonsupi moyirugana yokuzuvhisa kumwe nokambunga ketu ntani nekanderero.” Poyiruwo yimwe kuvhura o pure munazinyetu ogu ayi dili kutompoka kutunda membo, nsene kuvhura o ze nomurongwa goge goBibeli pembo lyendi mu ka lirongere po, nye pura ko munazinyetu ogo nsene nawa tupu.

Apa atu kara kumwe novanavazinyetu ava ayi dili kutompoka kutunda momambo gawo, ose kuyavadiva nawa nokulimonena yikara yawo yoyiwa ntani kutuninkisa tu tulise po ukaume nawo. Pasihonena, apa atu zuvhu omu vana kuronga nawa gumwe Nonkango daKarunga nokumuvatera a hedere Jehova pepi, ayo kutuhafesa sili unene. Kuvhura o tulise po vakaume wovanzi nsene no vatera vanavazinyetu va ze komapongo nomokuzuvhisa.​—2 Kol. 6:13.

Titusa kwa hengagwidire kaume kendi Paurusa. (2 Kol. 7:5-7) Sihonena saTitusa kuturonga asi nose kuvhura kuhengagwida wopeke apa atu kara kumwe nawo ntani apa atu rugana ko eyi atu vhuru ko yipo tu va vatere.​—1 Joh. 3:18.

Vanavazinyetu womoRussia kwa tu tulira po sihonena sosiwa sokulivatera-vatera. Gazadara ko kosihonena saSergey namukadendi Tatyana. Konyima zapa vaporosi va rugene epaparo membo lyawo, awo kwa va twere kosasiyona zovaporosi va ka va puragere. Tatyana yige va hovere kumangurura makura ta tengura kembo. Sergey kwa tanta asi: “Apa tupu ga ka sikire Tatyana membo, munazinyetu gumwe gomukadi gouradi kwa wizire a ya mu dingure. Konyima, vanavazinyetu wovanzi kwa wizire va ya tu vatere kuzeresa nzugo zetu konyima zapa va mene epaparo.”

Sergey kwa tanta hena asi: “Ame kwa hara Yisewe 17:17, ezi azi tanta asi: “Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?” Posiruwo esi somahepeko ame kwa hepere unene evatero lyokutunda kovakaume vange ntani ame na lironga asi nonkango domoYisewe 17:17 kuna kara usili. Jehova kwa pange vakaume ava va kara nouradi ava va vatera nge.” a

Ngomu tuna kuligwanekera nomaudigu gomanene, tuna hepa evatero lyokutunda kovakaume vetu ntani ngatu va hepa unene poudigu wounene. Yipo nye, tu ruganeni paapa twa hulira yipo tu kare vakaume wousili.​—1 Pet. 4:7, 8.