SIRONGWA SELIRONGO 6
RUSUMO 18 Rupandu kosizoweseso
Ose kupandura Jehova kweyi a tu gusire po nonzo detu
“Karunga kwa here uzuni unene-nene yiyo ga u pere Munendi gelike a huru.”—JOH. 3:16.
OKU SINA DEMENENE SIRONGWA
Kukara norupandu rorunene kweyi Jehova a tu gusire po nonzo detu, nokukwata egano eyi ga rugene yipo a tu gusire po.
1-2. Ngapi ukaro wetu wa lifana nomudinkantu vana tumbura moparagarafu zokuhova?
GAZADARA ko mudinkantu gomumati ogu ga kara asi vakondi vendi nongawo. Ezuva limwe tapa horoka siponga makura vakondi vendi tava fu. Mbudi ozo tazi mu guvisa unene. Ta ya zuvhu hena mbudi zimwe zondona asi vakondi kwa korota yimaliwa yoyinzi unene ntani kwa zonagura yimaliwa nayinye. Gazara asi mevango lyokupinga ungawo, a ge ta pingi makongo ntani vantu tava mu tondora asi a ga fute usimbu. Age kapi ta vhuru kufuta makongo ogo nagenye.
2 Ukaro womudinkantu ogo wa lifana noukaro wetu. Vakurona vetu Adamu naEva kwa kere wokusikilira mo ntani kwa kere neparu lyewa moparadisa. (Gen. 1:27; 2:7-9) Awo kwa kere nehuguvaro lyokuparuka eparu lyewa narunye-narunye. Nye awo kwa ya zonene konyima. Awo kwa zumbanesere eparu lyomoparadisa ntani nehuguvaro lyokuparuka narunye. Yisinke rwa pingire ruvharo rwawo? Bibeli kutanta asi: “Nzo kwa wiza mouzuni kupitira momuntu gumwe ano nzo kwa reta nomfa makura nomfa yiyo da lihanena movantu navenye morwa vantu navenye kwa zona.” (Rom. 5:12) Ose kwa pinga nzo kwaAdamu, ano nzo kureta nomfa. Nzo ezi kwa fana ngwendi makongo gomanzi aga natu dira kuvhura kufuta.—Epis. 49:8.
3. Morwasinke nonzo va di fanekesera ‘komakongo’?
3 Jesus kwa fanekesere nonzo ‘komakongo.’ (Mat. 18:32-35) Apa atu zono ayo kwa fana ngwendi kuna korota makongo kwaJehova. Mfuto zomakongo ogo nomfa, ngano Jehova kapi ga tulire po ewapaiko lyokutugusira po nonzo detu, ose ngano kwato ehuguvaro lyokukaparuka narunye.—Rom. 6:7, 23.
4. (a) Pwa hana evatero lyaJehova, yisinke ngano ayi tu horokere natuvenye? (Episarome 49:7-9) (b) Yisinke azi tanta nkango “nzo” ezi va tumbura moBibeli? (Tara kakende “ Nzo.”)
4 Kuvhura ngatu ka gwane eyi ga zumbanesere Adamu naEva ndi? Pwanyamwetu kapi tatu yi vhuru. (Resa Episarome 49:7-9.) Pwa hana evatero lyaJehova, ose ngano kapi twa kara nehuguvaro lyemevhumbuko. Ose ngano kufa nokupira kukaparuka hena ngwendi yikorama.—Muud. 3:19.
5. Ngapi omu Guhyetu geharo ga tu futira po makongo gononzo edi twa pinga? (Tara efano lyopontunda.)
5 Gazara mudinkantu gwina tuna tumbura moparagarafu zokuhova, ngapi omu na lizuvha nsene mugara gongawo a tokora kumufutira po makongo gendi nagenye? Yosili mudinkantu tayi tambura mokumufutira po, ta hafa unene nokupandura unene. Jehova nage kwa rugana sininke sokulifana pokutupa uhwi ou wa futa makongo ndi nzo ezi twa pinga kwaAdamu. Jesus kwa yi fatwilire asi: “Karunga kwa here uzuni unene-nene yiyo ga u pere Munendi gelike a huru yipo asi nkenye ogu a mu pura ngava dire kukamuzonagura po nye nga ka gwane mwenyo gwanarunye.” (Joh. 3:16) Uhwi owo kutuvatera tu kare nelikwatakano lyewa naJehova.
Jesus kwa zuvhisire mbudi zongwa kuhamena omu Jehova ga tu gusira po kupitira mosizoweseso. (Johanesa 3:16) Ano konyima age kwa geve eparu lyendi ngosizoweseso(Tara paragarafu 5)
6. Yisinke natu ka zogera mosirongwa esi, ntani morwasinke?
6 Ngapi natu gwanena mo uwa mouhwi ou wouwa, yipo nonzo detu ndi makongo getu va ga tu gusire po? Mokukagwana elimbururo kepuro olyo tatu ka zogera nonkango dimwe va ruganesa moBibeli neyi adi tanta. Ngomu natu ka teda ko kononkango odo, ose ngatu twikira kupandura unene Jehova kweyi ga tu gusira po.
JEHOVA ANA HARA TU KARE VAKAUME VENDI
7. (a) Yisinke hena ga zumbanesere Adamu naEva? (b) Yisinke ga ruganena Jehova ruvharo rwaAdamu naEva? (Varoma 5:10, 11)
7 Kugusa ko kudira kuparuka narunye, Adamu naEva kwa zumbanesere elikwatakano lyawo naJehova. Adamu naEva kwa kere mepata lyaJehova. (Ruk. 3:38) Apa va zonene, Jehova kwa va gusire mo mepata lyendi komeho va kare novanona. (Gen. 3:23, 24; 4:1) Yipo nye, kwato gomoruvharo rwawo kukwatera mo nose ga vhulire kukara mepata lyaJehova. Mokukara nelikwatakano lyewa naJehova twa hepa evatero. (Resa Varoma 5:10, 11.) Twa hepa nye kuhageka kukara nonkore daKarunga yipo tu kare vakaume vendi. Ayo kuhafesa sili pokudiva asi Jehova yige ga hova kuhugura nzira yipo tu tulise po ukaume nage. Ngapi ga yi rugana?
KARUNGA KWA HUGURA NZIRA
8. Ewapaiko musinke ga tulisa po Jehova?
8 Ezuva lyEfironkenda kuna kara ewapaiko eli ga tulisa po Jehova mokutengwidira po elikwatakano kumwe nose vananzo. Amo kwa hamena mo mfuto zokuhetakana. Monkedi ezi, kuvhura kutengwida eyi va zumbanesere ndi va zonagwire. Matjangwa goRugereka nago kwa likida eyi ga rugana Jehova mokuvatera vantu yipo va vhure kukara nelikwatakano kumwe nage ndi va kare nombili nage.—Rom. 3:25.
9. Yisinke ga rugene Jehova yipo a gusire po Vaisraeli nonzo dawo?
9 Jehova kwa tulisire po ewapaiko yipo Vaisraeli vava gusire po nonzo dawo, ntani va kare nelikwatakano lyewa nage. Vaisraeli ngava kara nosipito sEzuva lyEfironkenda rumwe momvhura. Mezuva olyo mupristeli gomunene nga gava nonzambo doyikorama morwa nonzo dovantu. Nye nampili ngoso, nonzambo doyikorama kapi ngadi vhuru kugusilira po nonzo dovantu morwa vantu mulyo unene kupitakana yikorama. Jehova ga gusilire po Vaisraeli ava va litezwilire apa va geve nonzambo edi ga va pulire. (Heb. 10:1-4) Ewapaiko lyokugava nonzambo mEzuva lyEfironkenda ntani poyiruwo yimwe kwa vaterere hena Vaisraeli va dimburure asi awo vananzo, ntani va hepere yimwe eyi nayi vhura kudongonona po nawa-nawa nonzo dawo.
10. Yisinke ga rugana Jehova yipo vantu va va dongwenene po nonzo dawo?
10 Ewapaiko musinke ga tulisire po Jehova yipo vantu vava dongwenene po nonzo dawo? Jehova kwa geve Munendi ogu ga hara ‘a ligave rumwe tupu mokuzowora vantu kononzo.’ (Heb. 9:28) Jesus kwa geve “mwenyo gwendi mokuyazowora wovanzi.” (Mat. 20:28) Yisinke sizoweseso?
MFUTO ZOSIZOWESESO
11. (a) Morwasinke va heperere kugava sizoweseso? (b) Yisinke ya hepere po mokufuta sizoweseso?
11 Kuliza noBibeli Jehova kwa tokwere kugava sizowesoso yipo nonzo detu va di tu dongwenene po ntani yipo tu kare vakaume vendi. Sizoweseso musinke ga hepere kufuta Jehova yipo a tengwidire po eyi ga zumbanesere Adamu? Diworoka asi Adamu naEva kwa zumbanesere eparu lyokusikilira mo ntani ehuguvaro lyokuparuka narunye. Mfuto zosizoweseso za hepere kuhetakana neyi va zumbanesere. (1 Tim. 2:6) Sizoweseso sa hepere kusifuta muntu ogu (1) ga sikilira mo (2) ogu ga kere nevhuliko lyokuparuka narunye pevhu (3) ogu ga kere neharo lyokuligava yipo a tu fire. Yipo nye, muntu gwangoso ga vhulire kufuta nayinye eyi va zumbanesere.
12. Morwasinke Jesus ga vhulilire kufuta sizoweseso?
12 Tu tareni nokonda ntatu deyi Jesus ya mu tompokerere kufuta sizoweseso. (1) Age ga sikilira mo ntani “kapi ga tulire nzo.” (1 Pet. 2:22) (2) Age ga kere nompito zokuparuka narunye pevhu. (3) Ga kere neharo lyokuligava yipo a tu fire. (Heb. 10:9, 10) Jesus kwa sikilire mo ngwendi moomu ga sikilire mo Adamu komeho a zone. (1 Kol. 15:45) Morwa Jesus kwa fire age ga vhulire kufuta nayinye eyi ga zumbanesere Adamu. (Rom. 5:19) Jesus kwa ya kere “Adamu gomoruhura.” Kapisi hepero hena muntu gokusikilira mo a wize a fute eyi ga zumbanesere Adamu. Jesus kwa fire “pwarumwe tupu.”—Heb. 7:27; 10:12.
13. Yisinke ayi tu vatera tu kare nelikwatakano lyewa naJehova?
13 Yisinke ayi tu vatere tu kare nelikwatakano lyewa naJehova? Jehova kwa tulisire po ewapaiko yipo nonzo detu va di tu gusire po. Jesus kwa geve eparu lyendi lyokusikilira mo yipo a fute eyi va zumbanesere.—Efe. 1:7; Heb. 9:14.
JEHOVA KWA TU ZOWORA KONONZO NONOMFA, AGE KUTUTARA ASI VAHUNGAMI
14. Yisinke natu ka zogera ngesi, ntani morwasinke?
14 Uwa musinke twa gwanena mo kweyi ga tu ruganena Jehova? Mokugwana elimbururo, tatu ka zogera nonkango mbali edi va ruganesa moBibeli edi adi tu vatere tu kwate egano mauwa aga atu gwanene mo kweyi Jehova a tu gusire po.
15-16. (a) Kuliza noBibeli ngapi omu va tu mangurura? (b) Ngapi atu lizuvhu kweyi va tu mangurura kononzo nonomfa?
15 Bibeli kwa faturura asi ose va tu zowora morwa sizoweseso va si futa. Mupositoli Peturusa kwa yi fatwilire ngesi asi: “Yeeyi mwa yi diva asi kapi va mu mangurura noyininke eyi ayi zonauka, nosisiliveli ndi ngorodo, moukaro weni wa hana sikwafa ou mwa pinga kozinyakurweni. Nye one kwa mu zowora nohonde zondiro zaKristusa, ezi za kara ngwendi zonzwigona za hana sipo ndi sivadi.”—1 Pet. 1:18, 19; ftn.
16 Sizoweseso kwa tu mangurura kononzo nonomfa. (Rom. 5:21) Ose kupandura unene Jehova naJesus kweyi va tu mangurura kupitira mohonde zaJesus.—1 Kol. 15:22.
17-18. (a) Yisinke ayi tanta kweyi Jehova a tu tara asi tu vahungami? (b) Mauwa musinke atu gwanene mo kweyi Jehova a tu tara asi vahungami?
17 Bibeli kutanta asi Jehova kutara vakareli vendi asi vahungami. Eyi kutanta asi age kapi a va pura va fute nonzo edi va rugana. Nye nampili ngoso age simpe kutara nompango dendi asi mulyo. Eyi kapi ayi tanta asi age kututara asi vahungami morwa asi ose mulyo, ndi asi nonzo kapisi sininke sosidona nye age kwa yi rugana oyo morwa epuro eli twa kara nalyo mosizoweseso esi sa gusa po nonzo detu.—Rom. 3:24; Gar. 2:16.
18 Yisinke ayi tanta eyi kwa nkenye gumwe gwetu? Ava va horowora va ka pangere kumwe naJesus meguru kuvatara nare asi vahungami awo hena vana vaKarunga. (Tit. 3:7; 1 Joh. 3:1) Age kuvagusira po nonzo dawo. Ayo kumoneka ngwendi kapi va tura rumwe nonzo, makura awo va wapera mokukakara moUhompa. (Rom. 8:1, 2, 30) Ava va kara nehuguvaro lyokukaparukira paapa pevhu kuvatara asi vahungami, awo hena vakaume vaKarunga ntani nonzo dawo va di va gusira po. (Jak. 2:21-23) Emukurumbunga lyovantu ava ngava ka paruka poyita yaHarumagedoni va kara nehuguvaro lyokupira kufa nampili rumwe roru. (Joh. 11:26) “Vahungami” nava “va dira kuhungama” ava va fa ngava ka va vhumbura. (Yirug. 24:15; Joh. 5:28, 29) Ano konyima, vakareli navenye vaJehova wovalimburukwi vepevhu ngava ka ‘gwana umanguruki wounene wokukara vana vaKarunga.’ (Rom. 8:21) Ose kuna kundindira nononkondo siruwo oso apa ngatu ka kara nelikwatakano lyangoso naGuhyetu Jehova!
19. Ngapi omu Jehova ga tu vatera? (Tara hena kakende “ Omu Jehova ga tu gusira po.”)
19 Yosili, ukaro wetu kwa fene ngwendi womudinkatu gomugara ogu tuna tumbura ketameko, ogu ga zumbanesere yininke nayinye ntani nokupinga makongo gomanzi aga ga dilire kuvhura kufuta. Ose kupandura Jehova kweyi ga tu vatera. Ukaro wetu wa litjindja morwa sizoweseso. Epuro eli twa kara nalyo mwaJesus Kristusa kwa tu mangurura kononzo nonomfa. Apa Jehova a tu dongwenene po nonzo detu, ayo kwa fana ngwendi kapi twa tura rumwe nonzo. Nye somulyo po unene, ose ngesi kuvhura kukara nelikwatakano lyewa kumwe naGuhyetu gemeguru Jehova.
20. Yisinke ngatu ka zogera mosirongwa sokukwama ko?
20 Nsene tu teda ko kweyi Jehova naJesus va tu ruganena, ngayi tu ninkisa tu kare norupandu rorunene. (2 Kol. 5:15) Pwa hana evatero lyawo, ose ngano kapi twa kara nehuguvaro lyokomeho. Yisinke ayi tanta kwetu pamundinda kweyi Jehova ga tu gusira po? Epuro olyo ngatu ka li zogera mosirongwa sokukwama ko.
RUSUMO 10 Tangeni Jehova, Karunga gwetu!
