1. Ngapi omu Bibeli za faturura episuro?

YISINKE ayi wiza momagano goge apa o zuvhu nkango “episuro”? Ove nampo kugazara asi kutengeka, nye yinzi ya hamena mo. Bibeli kuuyunga asi episuro kuturetera uwa ntani poyiruwo yimwe azo kuuyunga asi episuro kwa likwatakana nonondunge nounongo neharo ntani neparu. (Yis. 1:2-7; 4:11-13) Yipo nye, apa Karunga a tu pisura age kulikida asi ga tu hara ntani ana hara ngatu ka gwane mwenyo gwanarunye. (Heb. 12:6) Nampili ngomu kupisura kwa kwatera mo kutengeka, kapi ayi tanta asi ngoso nyanya. Nye konda zomulyo po zepisuro kwa hamena mo erongo, ngwendi eli vakurona ava pe vana vawo.

2, 3. Ngapi omu kupisura naku kwatera mo kuronga nokutengeka? (Tara efano pepenuno.)

² Tarurura sihonena esi: Mumatigona gedina Johnny kuna kudanauka nombara monzugo. Ozina tava mu tantere asi: “Hageka wa ha danauka nombara monzugo, kuvhura o taure yininke.” Nye, morwa kudira kuvapurakena ta twikire nokudanauka  nombara, ano moruhura ta taura eharase lyombya. Ngapi omu ozina nava mu pisura? Awo kuvhura va mu pisure pokumuronga nokumutengeka. Pokumuronga, awo kuvhura va mu diworokese asi eyi ana rugana epuko. Ozina vana mu harere a dimburure asi ayo mulyo kulimburukwa vakondi vendi, ntani asi noveta dawo mulyo. Mokuvatera hena Johnny ayi kwate egano, awo kuvhura va mu pe etengeko lyokuwapera. Pasihonena, kuvhura va guse mbara zendi mazuva gongandi. Ayo kuvhura yi mu vatere a dimburure asi kudira kulimburukwa kureta yitundwamo yoyidona.

³ NgoVakriste, ose kwa kara membo lyaKarunga. (1 Tim. 3:15) Yipo nye, Jehova ga kara nononkondo mokututulira po nompango ntani nokutupisura nsene kapi tuna kudikwama. Unene po, nsene eyi tuna rugana yi reta yitundwamo yoyidona, episuro lyendi ngali tu diworokesa omu ya kara nomulyo kumulimburukwa. (Gar. 6:7) Karunga kutupakera mbili ntani kapi ana hara tu hepe.—1 Pet. 5:6, 7.

4. (a) Nkedi musinke ana tu harere Jehova tu deure vana vetu novarongwa vetu? (b) Yisinke natu ka konakona mosirongwa esi?

⁴ Pokugava episuro lyomoMatjangwa, ngatu vatera vana vetu novarongwa vetu va kare varongwa vaKristusa. Nonkango daKarunga ngadi tu vatera ‘mokupukurura mouhungami.’ Eyi ngayi vatera vana vetu novarongwa vetu va kwate egano ‘nayinye eyi ga tu rekera Jesus’ nokuyilimburukwa. (2 Tim. 3:16; Mat. 28:19, 20) Ezi yizo nkedi ana hara Jehova tu va deure yipo nawo ngava deure wopeke va kare varongwa vaKristusa. (Resa Titusa 2:11-14.) Ngesi tatu ka limburura mapuro aga gatatu gomulyo: (1) Ngapi omu episuro lyaKarunga ali likida asi ga tu hara? (2) Yisinke natu lirongera ko kovantu ava ga piswire Karunga nare? (3) Ngapi natu honena Jehova naMunwendi pokugava episuro?

5. Yisinke ali likida episuro lyokutunda kwaJehova?

⁵ Eharo yilyo ali tumangeda Jehova a tu pukurure nokuturonga ntani nokutudeura yipo tu kare pepi nendi ntani tu ka gwane mwenyo gwanarunye. (1 Joh. 4:16) Age kapi a tu swaura ndi a tu mone asi kwato mulyo. (Yis. 12:18) Nye age kudemenena koyikara yetu yoyiwa, nokutupa umanguruki wokutura po matokoro. Episuro eli atu gwana kupitira moBibeli, moyimbapiratjangwa yetu, koVakriste ndi kovakuronambunga kulikida asi Jehova kwa tu hara. Yosili, vakuronambunga ava ava tu pukurura monkedi zeharo apa atu ‘puka’ kulikida omu Jehova ga tu hara.—Gar. 6:1.

6. Ngapi kupisura aku likida asi Karunga kwa hara vantu nampili gumwe a zumbanese yitumbukira?

⁶ Poyiruwo yimwe episuro kwa kwatera mo yoyinzi kupitakana tupu kugava mapukururo. Nsene muntu a tura nonzo dononene, kuvhura a zumbanese yitumbukira yendi mombungakriste. Oyo kapi ayi likida asi Jehova kapi ga mu hara. Ayo kuvhura kuvatera muntu a dimburure omu ya kara nomulyo kurugana elirongo lyoBibeli lyanyamwendi nokuteda ko ntani kukanderera. Kurugana oyo ngayi mu vatera a pameke elikwatakano lyendi naJehova. (Epis. 19:7) Mwaza siruwo kuvhura ngava mu tengwidire yitumbukira yendi. Nampili apa muntu ava mu gusa mombunga ayo kulikida asi Karunga ga mu hara morwa ayo kupopera mbungakriste konkareso zondona. (1 Kol. 5:6, 7, 11) Eyi kuvatera  muntu a dimburure unene wonzo zendi nokumutumangeda a litezurure.—Yirug. 3:19.

7. Muntu musinke ga kere Sebuna ntani sikara musinke sosidona ga ya kere naso?

⁷ Mokukwata egano mulyo gepisuro, tu tarurureni vantu ava va gwene episuro lyokutunda kwaJehova. Awo kuna kara Sebuna ogu ga parukire posiruwo sahompa Hisikiya ntani munazinyetu Graham gomosiruwo setu. Sebuna kwa kere ‘erenga lyekurona lyomombara’ zahompa Hisikiya ntani ga kere nounankondo. (Jes. 22:15) Nye ehudi, ga ya linenepekere nokuliharera mfumwa. Age kwa litjokwerere mwene ntoko, ntani nga rondo “poturukara toyita.”—Jes. 22:16-18.

8. Ngapi omu Jehova ga piswire Sebuna ntani yitundwamo musinke ya kere?

⁸ Sebuna kwa linenepekere makura Karunga yipo ga ‘mu gusire momberewa’ nokupinganesera po Eliyakimu. (Jes. 22:19-21) Eyi kwa horokere apa hompa goVaasiliya Senakelibu ga here kuhomokera Jerusarema. Konyima zosiruwo, hompa kwa tumine marenga gendi kumwe novakwayita koJerusarema va ka tjilise Vajuda naHisikiya yipo a li gave. (2 Vah. 18:17-25) Hisikiya kwa tumine Eliyakimu kumwe novagara vavali va ka uyunge nomarenga gaSenakelibu. Gumwe govagara owo kwa kere Sebuna, ogu va pere situmbukira sokukara hamutjanga. Kuvhura tu dimburure asi posiruwo esi Sebuna kwa linunupikire, ntani ga tambwire neharo situmbukira sosinunu po. Ngesi tatu ka zogera yitwa yitatu eyi natu lirongera ko kosihorokwa sendi.

9-11. (a) Yirongwa musinke yomulyo natu lirongera ko kwaSebuna? (b) Ngapi omu yina kukorangeda monkedi omu Jehova ga tekwire Sebuna?

⁹ Sokuhova, Sebuna ga zumbanesere situmbukira sendi. Sihorokwa sendi kutudiworokesa asi, “elinenepeko kureta ehanauko, ano elitumbo kureta epunduko.” (Yis. 16:18) Nsene wa kara noyitumbukira mombungakriste, ngo linunupika ndi? Ngo gava mfumwa kwaJehova kwankenye udivi ou wa kara nawo ndi koyininke eyi wa sikisa mo ndi? (1 Kol. 4:7) Mupositoli Paurusa kwa tjenge asi: “Tani mu korangeda one namuvenye asi, walye omu pitakanesa mokuligazara nyamweni. Nye omu heteke kugazara nawa.”—Rom. 12:3.

¹⁰ Sauvali, Jehova ga yi divire asi Sebuna  na tura po marunduruko kuliza nepukururo eli ga mu pere. (Yis. 3:11, 12) Aso sirongwa somulyo kowo ava zumbanesa yitumbukira yawo mombungakriste naina. Mevango lyokuhanduka nokukara nonkoko, ngano va twikire kukarera Karunga mwankenye situmbukira vana va pe nokutara episuro lyawo asi Jehova kwava hara. Tu diworokeni asi Guhyetu nga ka tu futa nsene tu linunupika. (Resa 1 Peturusa 5:6, 7.) Apa Karunga a tu pisura age kutuhonga yipo nye, ngano tu kare erova lyewa eli na vhura kuhonga.

¹¹ Sautatu, monkedi omu Jehova ga tekwire Sebuna kuna kara sirongwa somulyo kovakurona novakuronambunga ava va pa nonkondo dokupisura. Nampili ngomu Jehova ga nyenga nonzo, age simpe ga hara muntu ogu ana tura nzo. Nsene omu mukurona ndi mukuronambunga kuvhura o honene monkedi omu Jehova a gava episuro.—Juda 22, 23.

12-14. (a) Ngapi omu vamwe ava tara episuro lyokutunda kwaJehova? (b) Ngapi Bibeli za vatera munazinyetu gumwe a rundurure nkareso zendi, ntani yitundwamo musinke ya kere?

¹² Ehudi, apa vamwe ava va pisura, awo kusiga Jehova nokuhageka kuza komapongo. (Heb. 3:12, 13) Nye oyo ngoso kutanta asi vantu vangoso kapi tatu vhuru hena kuvavatera ndi? Tarurura sihorokwa saGraham ogu va gusire mombunga, ano mwaza siruwo tava ya mu tengwidire mo nye konyima taya tengura hena monyima. Konyima zonomvhura dongandi, age kwa pulire mukuronambunga ogu nga mu dingura-dingura va lironge kumwe Bibeli.

¹³ Mukuronambunga kwa tanta asi: “Graham kwa kere noudigu wokulinenepeka. Age kapi ngali zuvhu novakuronambunga ava va mu gusire mombunga. Melirongo lyetu ose ngatu zogere matjangwa gokuhamena elinenepeko ntani yitundwamo eyi ali reta. Graham ga ya dimbwilire nkareso zendi ntani kapi za mu hafesere. Ayo kwa mu tetukisire. Apa ga ya dimbwilire asi age kulinenepeka ntani asi nkareso zendi yizo za retere po udigu, makura ta tura po usimbu marunduruko. Ga ya tamekere kuza komapongo nkenye apa nokuresa Bibeli nelituromo ntani nga kanderere nkenye ezuva. Age ga ya tambwire hena situmbukira sendi ngomutwe gepata ano ayo kwa hafesere mukadendi novana vendi.”—Ruk. 6:41, 42; Jak. 1:23-25.

¹⁴ Mukuronambunga gwina kwa tanta hena asi: “Ezuva limwe Graham kwa tanterere nge sininke esi sa gumine nge komutjima. Age kwa kwe tente asi ‘ame kwa diva usili nomvhura dononzi, ame kwa rugana uzuvhisi wokukarerera. Nye ngesi ntani nina kulizuvha asi na hara Jehova.’ Mwaza siruwo, va ya mu pere situmbukira sokomambako moSinyanga soUhompa, situmbikira esi ga haferere. Ame na lirongera ko kwendi asi nsene muntu a linunupika pokutambura episuro, nga gwana matungiko gomanzi.”

15. Yisinke natu rugana yipo episuro lyetu li tumangede muntu a rugane ko yuma?

¹⁵ Mokukara varongi wovawa, twa hepa hena kukara varongwa wovawa. (1 Tim. 4:15, 16) Mokulifana, ava va pa nonkondo dokugava episuro va hepa nawo kulimburukwa mavyukiso gaJehova. Nsene wopeke va mona asi va linunupika ngava va fumadeka nokutambura mapukururo gawo. Tarurura sihonena saJesus.

16. Yisinke natu lirongera ko kwaJesus kuhamena kugava episuro lyewa nokuronga monkedi zongwa?

¹⁶ Jesus nga purakene nkenye apa koGuhwe  nampili ngomu ya kere udigu kuyirugana. (Mat. 26:39) Age nga diworokesa vapurakeni vendi asi erongo lyendi kwa tundire koGuhwe. (Joh. 5:19, 30) Elinunupiko kwa vaterere Jesus a kare murongi gomuwa gonkenda ntani kwa tumangedere vantu wonomutjima donongwa va wize kwendi. (Resa Rukasa 4:22.) Nonkango dendi dombili da korangedere ava va kere ngwendi ruu rokudifauka ndi ava va dompere mutjima. (Mat. 12:20) Age kwa pukwilire vapositoli vendi monkedi zeharo, nampili ngomu ngano ya vhulire kumuhandukisa apa va litatanene asi yilye munene po mokatji kawo.—Mar. 9:33-37; Ruk. 22:24-27.

17. Yikara musinke ngayi vatera vakuronambunga va kare vasita wovawa wosiunda saKarunga?

¹⁷ Nkenye apa vakuronambunga nava gava epukururo lyomoMatjangwa, va hepa kuhonena Jesus. Pokuyirugana oyo, kulikida asi vana hara Karunga naMunwendi a va ronge. Mupositoli Peturusa kwa tjenge asi: “Kareni vasita wosiunda saKarunga esi ga mu pa, si takameseni neharo, moomu ga yi mu harera Karunga, nye kapisi komusininiko. Omu rugane yirugana yeni, kapisi morwamfuto za nyata, nye neharo lyewa lyokurugana. Walye omu kara ohompa vava va mu pa asi mu va takamese, kareni sihonena kombunga.” (1 Pet. 5:2-4) Yosili, vakuronambunga ava ava limburukwa Karunga naKristusa, ngava gwanena mo mauwa kumwe nava ava pakere mbili.—Jes. 32:1, 2, 17, 18.

18. (a) Yisinke ana kundindira ko Jehova kovakurona? (b) Ngapi omu Karunga a vatere vakurona va sikise mo situmbukira sawo?

¹⁸ Vemepata nawo va hepa kukwama nompango dokulifana. Bibeli kutantera vanturagumbo asi: ‘Walye omu pakere vana veni nyanya, hawe, omu va tekure oku tomu va pukurura nokuliza neyi ga hara HOMPA.’ (Efe. 6:4) Ngapi omu ya kara nomulyo? Yisewe 19:18 kutanta asi: “Pisura vana woge awo simpe vanona mokulironga nawa. Nye nsene kapi o yi ninki, ove kuna kuvakwafa mokulizonagura po vene.” Yosili, nsene vakurona va dira kupisura vana vawo, Jehova ngaka yi va pura. (1 Sam. 3:12-14) Nye, Jehova kugava unongo nononkondo kovakurona apa ava mu pura evatero mekanderero napa ava kwama Nonkango dendi ntani apa azi va pitisire mpepo zokupongoka.—Resa Jakopo 1:5.

19, 20. (a) Matungiko musinke atu gwana mokutambura episuro? (b) Yisinke ngatu ka konakona mosirongwa sokukwama ko?

¹⁹ Ose ngatu gwana matungiko gomanzi nsene tu tambura episuro lyokutunda kwaJehova nokuhonena omu Karunga naJesus ava gava episuro. Mepata nomombungakriste ngamu kara mbili. Vantu ngava lizuvha epopero ntani ngava lizuvha asi kwava hara. Ayo hena ngayi likida matungiko aga ngatu ka gwana komeho. (Epis. 72:7) Episuro lyaJehova kutuwapaikira omu ngatu ka tunga mombili ngepata. (Resa Jesaya 11:9.) Nsene tu diworoka sitwa oso, ngatu diva nawa-nawa asi episuro kuna kara umbangi ou au likida asi Karunga kwatu hara.

²⁰ Mosirongwa sokukwama ko ngatu ka konakona marupe gokulisiga-siga gepisuro, mepata nomombungakriste. Ose ngatu ka konakona omu natu lipangera nyamwetu. Ntani ngatu ka lironga hena sininke simwe sokukora unene komutjima kupitakana nkenye episuro eli natu vhura kugwana.