AME kwa kulira mositata Graz, moAustria. Apa na kere nonomvhura ntambali, tava tumu nge kosikora zomaukarelikarunga. Nye ayo ya ka tetukisire nge apa na ka mwene omu varuti ngava hondere novasosita. Onane yipo va pulisilire nge ni sige sikora ozo azo mvhura mvhura za hana kupwa.

Konyima tani ka dimbira kosure ezi za kere nohositera. Nye ngurova zimwe, otate tava ya gusa nge po morwa mositata saGraz kwa ya zugumine mo noboma. Makura tatu tjwayukire modoropa zaSchladming. Tupu twa tagurukire zangata makura tazi hanuka po boma. Siruwo simwe nondira kwa royere membo lyetu omu twa kere nomama wovakadi. Epangero ntani ukarelikarunga kapi wa sikisire mo eyi twa ndindilire.

Momvhura 1950, onane tava tameke kulironga Bibeli nagumwe goNombangi daJehova. Apa ngava lirongo, name ngani purakene, ntani pamwe ngani zi noyina komapongo. Apa va ya nongwenene asi Nombangi daJehova kuronga usili yipo va gwene ekuho mo-1952.

Siruwo sina, mbungakriste kwa monekere kwange ngwendi evango oku ngava pongere vakurukadi. Nye apa twa ka dingwire mbungakriste omu mwa kere vadinkantu wovanzi, mutaro gwange tagu runduruka. Apa twa tengwire moGraz, tani tameke kuza komapongo nagenye, ntani naya nogwenene asi eyi na lirongere usili. Makura tani ya kwata egano asi Jehova, Karunga ogu a kwafa vakareli vendi. Age kutukwafa nampili momaukaro aga moneka kwetu asi udigu.—Epis. 3:5, 6.

Ame kwa tokomenene kutantera ko wopeke usili. Vekoro lyange yiwo na hovere kuhedera. Posiruwo oso awo vakuru vange vane awo nare va tunda mo membo nokukakara vamitili. Ame ngani va dingura konomukunda  dawo ntani ngani va korangeda va lironge Bibeli. Mwaza siruwo navenye vaya tamekere kulironga nokuyakara Nombangi daJehova.

Mosivike sange sauvali sokuzuvhisa tunda embo zende embo tani gwana mukadi gonomvhura dokoyiha 30, ogu na tamekere kulironga nendi Bibeli. Age kwa tulire po ezokomeho lyewa dogoro ta gwana ekuho, ntani konyima mugara gwendi novana vawo vavali kwa rugene yokulifana. Pokulironga nomukadi ogu, ayo ngayi nkondopeke epuro lyange morwa kwato ogu nga rongo nge Bibeli posiruwo sina. Na hepere kuliwapaikira nawa nkenye sirongwa. Pomuhowo tanko na hepere kulironga nyamwange yipo ni ka ronge murongwa gwange. Yosili, ayo kwa vaterere nge ni hare unene usili. Makura mo-1954, tani ligava kwaJehova nokugwana ekuho.

Momvhura 1955, kwa ka kere poyigongi eyi ya karere moNdovesiranda, Fransa naIngiranda. MoLondon tatu ka ligwana naAlbert Schroeder. Age nga rongo koSikora zaGiliyata, ntani ga ya kere gumwe gomoMbungagendesi. Apa twa ka dingwire nzugopungwiro moBritania, munazinyetu Schroeder tatu likida matjangururo gamwe goBibeli ganare. Matjangururo aga kwa kara mo edina lyaKarunga monondanda doRuhebeli. Makura tatu fatwilire omu ga kara nomulyo. Ayo kwa gumine nge sili nokutumangeda nge ni tware komeho usili womononkango daKarunga.

Mo-1 Murongagona 1956, tani tameke nouzuvhisi wokukarerera. Ano konyima zomakwedi gane tava zigida nge ni ka kare muzuvhisi gosiruwo nasinye moAustria. Posiruwo sina kapi mwa kere Nombangi daJehova modoropa zaMistelbach. Nye na ligwanekerere nomaudigu gamwe. Ose kwa lisigire unene namunazinyetu gomukadi ogu ngani zuvhisa nendi. Ame kwa kere koyiha yonomvhura 19 nye age 25, ntani ame kwa kulilire mositata nye mukwetu age mofarama. Ame kwa here kuhulilira kupinduka, nye age kwa here kulivinduka kupinduka. Kongurova age nga livinduka kurara nye ame ngani hulilire. Nye, apa twa tulire nompango domoBibeli pasirugana twa gusire po udigu wetu ntani ya tu tompokere kurugana kumwe.

Ose kwa ligwanekerere nomaudigu gamwe hena. Pwa kere mahepeko, nye Karunga ‘kapi gatu zumbire.’ (2 Kol. 4:7-9) Sikando simwe apa twa zuvhisire momukunda gumwe, vantu kwa tu sumwidire nombwa dawo. Konyima zosiruwo yimbwa tayi tu kundurukida pokatji nokuhuda. Ose kwa kwa likwete kumwe mawoko nokukanderera kwa Jehova. Apa da wizire nombwa, tadi sikama nokutuhamberera nonomusira dayo, makura tadi ka za. Ose kwa lizuvhire asi Jehova ana tu popere. Konyima zoyo, tatu zuvhisire momukunda nagunye, ayo kwatu tetukisire morwa vantu kwa purakenene. Nampo ya va tetukisire asi nombwa kapi da tu remekere ndi mokutumona omu twa lididimikilire sihorokwa sina. Vamwe va ya kere Nombangi.

Ose kwa ligwanekerere hena nosihorokwa simwe. Ezuva limwe mugara ogu gatu pere nzugo kwa wizire kembo age ana korwa, age kwa here kutudipaga ntani ga uyungire asi ose kuna kudonganesa vamusinda. Mukadendi  ga hetekerere ko kumukava nye kapi ga here kupurakena. Nayinye oyo ose kwa yi zuvhilire monzugo zekeguru ezi twa kere. Makura tatu tura usimbu yipundi kevero nokutameka kurongera. Apa twa zegwilire evero, tatu mono age ana sikama peguru lyoyitarapa, age ana kwaterere emumbere lyemunene. Yipo twa pitilire kevero lyokonyima tu tjwayuke kumwe nonomurongero detu, kapi twa tengwira ko hena.

Ose kwa zire kohotera tu ka pure ko nzugo zokurara. Ose kwa kere mohotera ozo konyara ure womvhura, ano ayo ya tu vaterere nosirugana setu sokuzuvhisa. Ngwendi ngapi? Hotera kwa kere pokatji kodoropa, ntani varongwa vetu vamwe woBibeli kwa here kuwiza poopo tu ya lironge. Konyima zosiruwo ose ngatu pongo monzugo zetu mohotera tu rugane elirongo lyoBibeli noRuhungu nkenye sivike. Vantu kwa kere wokusika ko-15, ava ngatu pongo nawo.

Ose kwa kere modoropa zaMistelbach ure wokupitakana pomvhura zimwe. Konyima tava tumu nge kodoropa zaFeldbach kourundu wositata saGraz. Tani ka gwana ko ogu ngani zuvhisa nendi, nye nako kapi kwa kere mbungakriste. Ose kwa tungire monzugo zonunu ezi va tungisa koyitji. Mpepo ngazi pepe nokupita momantomo gonzugo ozo, makura yiyo twa hetekerere ko kusitayika mo yimbapira. Mema ngatu ga vheta metope. Nye kwa kere nomulyo mokuyirugana oyo. Konyima zomakwedi gongandi, yipo twa totere po mbungagona. Mwaza siruwo, epata limwe lyovantu wokusika ko-30 ava ngatu lirongo nawo kwa ya tambwire usili.

Yihorokwa oyo kwa nkondopekere nge ni dimburure asi Jehova kuvatera owo ava tura muhowo Uhompa. Nampili yi dire kututompoka pwanyawamwetu, Jehova ngatu vatera.—Epis. 121:1-3.

Momvhura 1958, kwa kere sigongi sosinene mositata saNew York, mosira sombara saYankee nesi saPolo Grounds. Name kwa tulire mo mahundiro, ntani mberewa zomutayi zaAustria kwa pulire nge nsene kuvhura ni ze koSikora zaGiliyata. Yipo na limbwilire ame ‘nawa tupu.’

Mosikora ozo, ame kwa hingilire pepi  naMartin Poetzinger. Age kwa lididimikilire yihorokwa yoyinzi mokamba zaNazi. Konyima nage kwa ya kere gumwe gomoMbungagendesi. Poyiruwo yimwe monkondwarongero Martin nga pura nge asi: “Erika yisinke asi tanta oso moRundovesi?”

Komeho tu ka mane sikora zetu, munazinyetu Nathan Knorr yipo ga tu tanterere oku ngava tu tuma. Ame kwa tuminenge koParaguay. Nye mokuza ko na hepere epulisiro lyotate morwa ame simpe kwa kere munona. Apa va pulisire nge, ame kwa ka sikire moParaguay mwaNsinano 1959. Kwa tumine nge mositata saAsunción membo lyomutumwa gumwe, kumwe nagumwe gomupe.

Konyima twa ya lidivire naWalter Bright, mutumwa ogu ga zire koSikora zaGiliyata. Konyima tatu likwara nokupita kumwe momaudigu. Nkenye apa ngatu ligwanekere nomaudigu, ngatu resa etumbwidiro lyaJehova mwaJesaya 41:10 asi: “Wa ha tjira – ame noge na kara! Ame nyame Karunga goge – patupu yokukutjilisa! Ngani ku nkondopeka.” Eyi kwatu korangedere asi Jehova kapi ngatu zumba nsene tu twikira kumulimburukwa nokutura Uhompa wendi muhowo.

Mwaza siruwo, kwatu tumine komukunda gumwe gwa kara pepi naBrasilia. Vanangereka kwa tanterere vanona va tu zugumange mamanya membo lyomutumwa gumwe omu twa tungire, ntani alyo kwa kurupire. Konyima Walter yipo ga tamekere kuronga Bibeli mukurona govaporosi. Muporosi gwina kwa tumine vaporosi va ya tu kunge ure wosivike ntani vantu kapi hena ngava tu hepeke. Konyima yipo va tu tumine kevango lyewa koyiha yomurudi gwaBrasilia. Esi kwa kere sininke sosiwa morwa ngatu pongo moParaguay ntani moBrasilia. Apa twa sigire sirugana oso, pwa kere nombungakiste mbali dononunu.

Vandokotora vange ngava tantera nge asi kapi ngani reta vanona, nye ya tetukisire nge apa naya dimbwilire asi tani ka kara namunwange. Siruwo sosinzi ose kwa tungire moHollywood momukunda gwaFlorida, pepi novakondi vaWalter. Nomvhura dononzi name naWalter kapi twa kere negano lyokurugana uzuvhisi wokukarerera. Twa hepere kupakera mbili epata lyetu. Nye, twa twikilire kutura muhowo Uhompa.—Mat. 6:33.

Apa twa ka sikire moFlorida mwaMangundu 1962, kwa ka tu tetukisire pokudimburura asi vanavazinyetu wovasovagani kapi ngava pongo kumwe novanavazinyetu woyirumbu, ntani ngava zuvhisire komavango gokulisiga. Nye Jehova kapi ga hara elitondororo lyoparudi, ano konyima nombungakriste da ya tamekere kuyalipakerera. Jehova yige ga rugene ko yuma, ano ngesi pana kara nombungakriste dononzi momukunda ogo.

Nye ehudi, Walter kwaya dogorokere kokankera zomouruvi mo-2015. Age kwa kere mugara gomuwa nomvhura nadinye edi twa paruka kumwe 55, age kwa here Jehova ntani nga vatere vanavazinyetu wovanzi. Kwa kundindira nononkondo mokukamumona apa ngava ka mu vhumbura.—Yirug. 24:15.

Ame nina hafa kweyi na kara nomvhura dokupita po-40 mosirugana sokuzuvhisa, na gwanena mo mauwa ntani nina hafa. Pasihonena, mezuva eli varongwa vetu woBibeli 136 va gwene ekuho name namugara gwange yipo twa kere. Yimo, twa li gwanekerere nomaudigu. Nye kapi ya tu konderere mokukarera Jehova. Ose kwa nkondopekere elikwatakano lyetu naJehova nokumuhuguvara a guse po maudigu kuliza nosiruwo sendi. Age gayi rugene.—2 Tim. 4:16, 17.

Ame kuna kurongora mugara gwange, nye kurugana uzuvhisi wokukarerera kuvatera nge ni lididimike. Ayo kuvatera nge unene po, apa ani rongo wopeke nokuvatantera ko ehuguvaro lyevhumbuko. Jehova kapi ga sigilira nge. Yosili, etumbwidiro lyendi lyasikilira mo, ga ‘popera nge nokuparura nge.’—Jes. 41:10.