1. Maudigu musinke va ligwanekerere nago Vakriste womosiruwo sovapositoli?

KOYIHA yopokatji komvhura 62 ntani 64, mupositoli Peturusa kwa tjangerere mbilive ‘kovanayirongo, ava va lihanenene moyirongo yaPontusi naGarate naKapadokiya naAsiya naBitiniya.’ (1 Pet. 1:1) Vakriste owo wokomarudi gokulisiga-siga va hepere makorangedo morwa ngava va hepeke nokuvaswaura. Awo kwa ligwanekerere ‘nomaheteko’ gomanene. Ntani hena awo kwa parukire poyiruwo yoyidigu. Peturusa kwa tjenge asi: “Uhura woyininke nayinye pepi una kara.” Konyima tupu zonomvhura dongandi, Jerusarema kwa ya zi zonagwilire po. Yisinke ya vaterere Vakriste owo va lididimikire?—1 Pet. 4:4, 7, 12.

2, 3. Morwasinke Peturusa ga korangedere Vakriste vakwawo va litambura-tambure? (Tara efano.)

² Peturusa kwa korangedere vapuli vakwawo asi: “Omu litambura-tambure momambo.” (1 Pet. 4:9) Nkango zoRugereka “kutambura vagenda” kwa tamba “kokupakera mbili vageni.”  Nye koneka asi Peturusa apa kwa korangedere Vakriste va “litambura-tambure,” novakwawo ava va divire. Ngapi kulitambura-tambura ya va vaterere?

³ Ayo kwa pamekere ukaume wawo. Ove ngapi? Ga ku zigida gumwe kembo lyendi ndi? Nsene yimo, ayo ya ku hafesere ndi? Apa wa zigidire gumwe gomombungakriste zeni, ya pamekere ukaume weni ndi? Kutambura vanavazinyetu womombungakriste kutuvatera tu lidive nawo momunene. Vakriste womosiruwo saPeturusa va hepere kupameka ukaume wawo ngomu maudigu ga ya ligwederere. Vakriste ava vana kuparuka “pomazuva gopouhura” nawo va hepa kurugana yokulifana.—2 Tim. 3:1.

4. Mapuro musinke natu ka konakona mosirongwa esi?

⁴ Nompito musinke atu gwana ‘dokutambura’ vagenda? Ngapi natu nyokera po eyi nayi tu kondera mokutambura vagenda? Yisinke nayi tu vatera tu kare vagenda wovawa?

5. Ngapi natu tambura vantu komapongo getu?

⁵ Komapongo: Ose kutambura navenye ava ava wiza komapongo getu morwa Jehova yige ga tu zigida natuvenye. (Rom. 15:7) Apa vantu ava wiza sikando sawo sokuhova komapongo getu, ose kuvatambura. Litulira po sitambo sokutambura wovape yi kare asi ngapi omu va fana ndi yikoverero musinke vana dwara. (Jak. 2:1-4) Nsene o dimburura asi mugenda gelike ana kara, kuvhura o mu pure mu ya hingire kumwe. Age kuvhura ngayi hafere nsene o mu tantera eyi yina kupita mepongo nokumuvatera hena a gwane usimbu matjangwa. Ezi kuna kara mpito zongwa ‘mokutambura vagenda.’—Rom. 12:13.

6. Wolye natu tambura po unene?

⁶ Yikunwa ndi nondya: Posiruwo sanare, kutambura vagenda ngamu hamene hena kuvazumbura. (Gen. 18:1-8; Vap. 13:15; Ruk. 24:28-30) Eyi ngava yi ruganene nositambo sokutulisa po ukaume nombili. Wolye natu tambura po unene? Awo kuna kara vanavazinyetu womombungakriste zetu. Mokumona asi mazuva aga tuna kuparuka kuna kudonapa, ose twa hepa evatero lyovanavazinyetu. Eyi yiyo twa hepera kukara vakaume wovawa nokukara nombili novanavazinyetu. Mo-2011, Mbungagendesi kwa rundwilire vili ezi ngava rugana elirongo lyoRuhungu moBeteli zaAmerika. Vili kwa zi rundwilire zi tunde po 6:45 zi ze po 6:15. Morwasinke va yi ruganenene? Madiviso aga va geve kwa tente asi elirongo lyoRuhungu nsene li pwa usimbu ngayi pa mpito Vabeteli mokuzigida nokutambura vakwawo. Nobeteli dimwe nado kwa rugana yokulifana. Ewapaiko olyo kwa vatera womoBeteli va lidive nawa novakwawo.

7, 8. Ngapi natu tambura vagenda ava azi tumu mbunga zaJehova?

⁷ Natuvenye kuyihafera apa mutareli gonombunga ndi munazinyetu gokombungakriste zapeke a wiza mokuyagava siuyungwa kombunga zetu. Ntani poyiruwo yimwe ose kugwana vagenda wokoBeteli. Edinguro lyawo kutupa mpito zokuvatambura momambo getu. (Resa 3 Johanesa 5-8.) Ose kuvhura tu va zigide nokuvazumbura nondya ndi yikunwa. Nove kuvhura oyi rugane.

⁸ Munazinyetu gomukadi gomoAmerika kwa tanta asi: “Nomvhura da ka pita, name namugara gwange kwa gwene nompito mokutambura vagavi yiuyungwa novakadi vawo. Nkenye sihorokwa twa limonena, kwatu hafesa sili ntani kwa nkondopeka epuro lyetu. Ose kapi twa livera mokutambura vagenda.”

9, 10. (a) Wolye twa hepa kupa mararo siruwo sosire? (b) Ava va kara nomambo gomanunu nawo kuvhura kugava mararo ndi? Gava sihonena.

 ⁹ Vagenda wokuyakara siruwo sosire: Posiruwo sanare, kutambura vagenda kwa hamenene mo kugava mararo. (Joba 31:32; Fir. 22) Naina, pana kara hepero zokutambura vagenda. Nkenye apa vatareli wonombunga ava dingura nombungakriste awo kuhepa mararo. Vazuvhisi ava ava zi konosikora doUhompa ntani nava ava lizambere mokutunga mavango goukareli nawo kuhepa mararo. Ntani hena vanavazinyetu ava ayi kundama yimpagwa nawo kuhepa mararo dogoro mambo gawo ga pwe kuwapukurura. Twa ha gazara tupu asi vanavazinyetu ava va kara nomambo gomawa ndi gomanene yiwo velike wokugava mararo, awo nampo nare va gusa kugava marararo. Nampili ngomu twa kara nomambo gomanunu, kuvhura nose tu gave mararo.

¹⁰ Munazinyetu gomugara gomoKoreya kudiworoka apa ga geve mararo kovanavazinyetu ava va zire konosikora doUhompa. Age kwa tjenge asi: “Pomuhowo ame kwa likata-katere morwa posiruwo sina ose ntani tupu twa likwere namukadange ntani nzugo zetu kwa kere zonunu. Nye ayo ya tu hafesere unene apa twa tambwire vanavazinyetu ava va wizire kosikora. Ngovalikwali wovape, twa dimbwilire asi ose kuvhura tu kare noruhafo nsene tu karera Jehova nokulitulira po yitambo yopampepo.”

11. Morwasinke twa hepera kutambura wovape mombungakriste zetu?

¹¹ Vanavazinyetu wovape mombungakriste: Vanavazinyetu vamwe kuvhura va dirukire momukunda gwetu. Vamwe kwa wiza morwa momukunda gwetu muna hepa vazuvhisi. Ndi nampo vazuvhisi wokukarerera kwava tuma kombungakriste zeni. Navenye owo va hepa kuyika mparukiso ndi kulironga eraka lyomomukunda gweni. Nsene tu va zigida tu ka hafere kumwe, ngayi va vatera va tulise po ukaume nose ntani va yike ukaro woupe.

12. Sihorokwa musinke sina kulikida asi kapisi hepero tu wapaike yoyinzi mokutambura vagenda?

¹² Kapi twa hepa kuwapaika yoyinzi mokutambura vagenda. (Resa Rukasa 10:41, 42.) Munazinyetu gomugara kudiworoka eyi ya horokere apa va tamekere sirugana soutumwa namukadendi. Age kwa tanta asi: “Ose kwa kere vadinkantu, kapi twa divire yoyinzi ntani ngatu rongora kembo. Ngurova zimwe, mukandange kwa guvire makura tani hetekere ko kumuhengagwida, nye kapi ya tompokere. Kongurova, tatu zuvhu muntu ana kungongora kevero lyetu. Apa twa pwege ko tatu mono murongwa goBibeli ogu ga tu reterere maguni gatatu. Age kwa wizire aya tu tambure ngovatumwa wovape. Yipo twa mu tanterere a hwilire makura tatu mu peko mema. Konyima tatu nu hena te nokofi. Posiruwo oso kapi twa divire kuuyunga Ruswahili ano nage kapi ga divire Ruhingilisa. Sihorokwa sina sa tu vaterere tu tulise po ukaume novanavazinyetu womomukunda.”

13. Mauwa musinke ava gwanene mo vantu pokutambura vagenda?

¹³ Wa likatakata rumwe mokutambura vagenda ndi? Nsene yimo, ove nampo wa zumbanesere mpito zongwa mokutulisa po vakaume. Kutambura vagenda kuvatera o dire kulizuvha mukuma. Nampo wa lipura asi, ‘Morwasinke vamwe ava likata-katere mokutambura vagenda?’ Pwa kara nokonda dongandi.

14. Yisinke natu rugana nsene kapi tuna kugwana siruwo sokutambura vagenda?

 ¹⁴ Siruwo: Vakareli vaJehova kuviyauka unene morwa kwa kara noyirugana yoyinzi. Vamwe kulizuvha asi kwato siruwo sokutambura vagenda. Nsene kwa kara moukaro owo, wa hepa kuwapukurura elikwamo lyoge yipo o gwane siruwo sokutambura vagenda. Bibeli kutukorangeda tu tambure vapuli vakwetetu. (Heb. 13:2) Aso sininke somulyo kulitulira po siruwo mokutambura vagenda. Nye kapisi hepero kuruganesa siruwo sosinzi koyininke ya hana mulyo.

15. Yinka musinke ayi ninkisa vamwe va kare nowoma wokutambura vagenda?

¹⁵ Omu o lizuvhu kuhamena nyamooge: Wa hetekera ko kutambura vagenda nye wa lizuvhire woma ndi? Vamwe kulizuvha nomuga ntani kulipakera sinka ntani asi kwato eyi nava ya zogera novagenda. Ano vamwe morwa yimaliwa yawo yisesu kulizuvha asi kapi tava vhuru kuzumbura vagenda moomu ava yi rugana vamwe womombungakriste. Twa hepa kudiworoka asi yomulyo po embo likare lina zere nye kapisi hepero likare lyondiro.

16, 17. Yisinke nayi kuvatera o dire kukara nosinka pokutambura vagenda?

¹⁶ Sinzi sovantu kulizuvha woma kutambura vagenda. Mukuronambunga gomoBritaniya kwa tanta asi: “Muntu kulipakera sinka apa a liwapaikire mokutambura vagenda. Nye morwa kuyiruganena Jehova, ose kugwanena mo mauwa gomanzi kupitakana yinka yetu. Ame kuyihafera kuhingira ni zogere novagenda.” Aso sininke sosiwa kulikida elituromo movagenda. (Fil. 2:4) Vantu wovanzi kwa hara kusimwitira eyi va limonena meparu. Ano mapongasano kutupa mpito tu dive eyi vanavazinyetu vana kupita meparu. Mukuronambunga gumwe kwa tjenge asi: “Kuzigida vanavazinyetu kembo lyange, kuvatera nge ni va dive nawa, nye unene po ni dive omu va genda va ya dive usili.” Kulikida elituromo movakwetetu kutuvatera tu hafere mapongasano.

¹⁷ Munazinyetu gomukadi a rugana uzuvhisi wokukarerera nga tambura ava ngava zigida konosikora doUhompa. Age kwa tanta asi: “Pomuhowo, ame kwa kere nosinka morwa kapi na kere noyininke yondiro ntani sinzi seyi na kere nayo va yi ruganesa nare. Nye mukadi gwagumwe govarongi kosikora zoUhompa kwa vaterere nge ni dire kukara nosinka. Age kwa tente asi eyi a hafere po unene apa ava dingura kuna kara pokukakara pembo lyagumwe ga kara noyiweka yoyisesu morwa narunye awo kudemenena kokurera Jehova. Eyi kwa diworokesere nge eyi va tanterere nge onane pounona asi: ‘Sa vhura po sikwawo sokulya yikwahidi novantu ava wa hara.’” (Yis. 15:17) Kapisi hepero tu kare nosinka, yomulyo po twa hepa kutambura vakwetetu morwa twa va hara.

18, 19. Ngapi kutambura wopeke nayi tu vatera tu guse po madiro kulizuvha?

¹⁸ Omu o lizuvhu kuhamena wopeke: Kweli ogu o dili kulizuvha nendi mombungakriste ndi? Nsene o dira kurugana ko yuma, udigu owo ngau twikira ngorooro. Madiro kulizuvha kuvhura ga ku ninkise o dire kutambura wopeke. Ndi nampo kukudigopera kugusira po gumwe ogu ga ku koresere.

¹⁹ Bibeli kutukorangeda tu tambure nampili nonkore detu. (Resa Yisewe 25:21, 22.) Kutambura muntu ogu o dili kulizuvha nendi nawa kuvhura kusesupika udigu weni. Ayo kuvhura yi horore yikara yendi yoyiwa eyi ga mwene mwendi Jehova apa ga mu kokerere kousili. (Joh. 6:44) Nsene o tambura muntu morwa eharo, ayo ngayi mu vatera mu tulise  po ukaume. Ngapi no divilisa asi ove kuna kuyiruganena morwa eharo? Nkedi zimwe kuna kara pokukwama epukururo lyomoVafilipi 2:3 eli asi: “Omu linunupike, tomu tara vakweneni asi va mu pita mekuto.” Twa hepa kumona vanavazinyetu asi va tu pita mekuto unene po pokudemenena kepuro ndi elididimiko ndi yikara yawo yimwe yoyiwa. Nsene tu yi rugana oyo ngatu va hara unene ntani ngatu va tambura momambo getu.

20. Morwasinke twa hepera kusikisa mo eyi tuna tumbwidire nsene gumwe ana tu zigida?

²⁰ Ndafita kwa pulire asi: “HOMPA, yilye ogu ga fira kukara monzugo zoge?” (Epis. 15:1) Konyima zepuro olyo, age kwa tumbagwire yikara eyi ga hepa kukara nayo muntu mokukara monzugo zaJehova. Sikara simwe kuna kara asi: “Age kusikisa mo narunye eyi ga tumbwidira, mpili si mu gwane simpagwa.” (Epis. 15:4) Nsene tuna tambura ezigido lyagumwe twa ha rundurura pwa hana konda zomulyo. Nonkondo dendi edi ana ruganesa mokuwapaika nayinye ta yi kara yomawoko-woko. (Mat. 5:37) Vamwe kuteza po etumbwidiro lyawo lyomuhowo yipo va ze kezigido limwe eli lina kumoneka ngwendi ewa. Nye ose ngoso kuna kulikida efumadeko kwava wopeke ndi? Hawe, twa hepa kukara norupandu nokutambura nkenye eyi vana kutupa nampili yi moneke asi ayo yisesu. (Ruk. 10:7) Ano nsene ukaro kapi una kutupulisira, twa hepa kuvadivisa komeho zosiruwo asi kapi tuna kuyamoneka.

21. Yisinke nayi tu vatera tu kare vagenda wovawa?

²¹ Ayo mulyo kufumadeka nompo domomukunda. Monompo dimwe, vagenda wokuwiza hararasi kuvhura kuvatambura. Ano monompo dimwe va hepa kudivisa komeho zosiruwo. Komavango gamwe vatambuli vagenda kuwapaikira yoyiwa po kovagenda ano monompo dimwe yi kare asi mugenda ndi venya embo, navenye kugwana yokulifana. Monomukunda dimwe, vagenda kusimba ko yuma va ka gave kwava vana kuvatambura. Ano vamwe kwato hepero va piture ko yuma. Monompo dimwe hena vagenda kuvhura kunyoka yikando yivali nsene kuna va zigida ano dimwe nsene o nyoka, ayo kumoneka ngwendi kapi wa kara norupandu. Ngano tu hetekere ko kuhafesa ogu ana kututambura membo lyendi.

22. Morwasinke ya karera nomulyo ‘kulitambura-tambura’?

²² Peturusa kwa tente asi: “Uhura woyininke nayinye pepi una kara.” (1 Pet. 4:7) Udigu wounene ou wa dira kukara ko rumwe pepi una kara. Ngomu gana kuligwederera maudigu, twa hepa kuhara unene vanavazinyetu. Epukururo lyaPeturusa kuna kara nomulyo naina, alyo kutanta asi: “Omu litambura-tambure.” Esi kuna kara sininke sohepero esi twa hepa kurugana dogoro narunye.—1 Pet. 4:9.