Yosili, kwato muntu ogu ga diva nawa-nawa omu ga fene Paurusa. Mafano gomoyimbapiratjangwa yetu, mafano tupu, kapi ga liza neyi va gwana vasimaguli.

Nampili ngoso, pwa kara maumbangi gamwe aga aga likida omu ga fene Paurusa. Pasihonena, Zion’s Watch Tower za 1 Nsinano 1902, kwa tumbura mo emoneko limwe pokutanta asi: “‘The Acts of Paul and Thecla’ ezi va tjenge koyiha yonomvhura 150 konyima zapa ga tengwire Jesus meguru, kwa fatwilire mo kuhamena Paurusa, alyo kwa kere efatururo lyewa ntani lyousili. Age kwa mu faturura asi: ‘Rutu rwendi rununu, age ngwara, maguru gendi kwa penga, ga kere nononkondo, yikenikeni yendi kwa gwanekera posipara ntani gezuru lyere.’”

Bukenkango zimwe kwa tanta kuhamena matjango ganare asi mobuke “The Acts of Paul and Thecla kwa kara mo magano gamwe kuhamena mausili ganare.” Buke ozo kwa kwa kere nomulyo mosiruwo sanare konyima tupu apa va mene kuzitjanga, ngomu va yi likida momatjangururo 80 goRugereka ntani momaraka hena gamwe. Yipo nye, mafano getu ga liza nomauzera gamwe ganare kuhamena omu ga fene mupositoli Paurusa.—The Oxford Dictionary of the Christian Church zomo-1997.

Nye, tu diworokeni asi koyili yininke yomulyo eyi ya pitakana emoneko lyaPaurusa. Nampili apa Paurusa nga rugana sirugana sokuzuvhisa vamwe ngava mu rundire asi, “muntu mwene-mwene mokumutara [kwa kere] murupiranonkondo, nonkango dendi hena nayimwe si.” (2 Kol. 10:10) Nye twa hepa kudiworoka asi age kwa ya kere Mukriste kupitira mositetu esi ga rugene Jesus. Kuvhura hena tu gazadare ko eyi ga sikisire mo Paurusa ngo ‘siruganeso va horowora sa [Kristusa] a divise edina lya [Jesus] kovapagani.” (Yirug. 9:3-5, 15; 22:6-8) Ntani tarurura mauwa aga natu gwanena monobuke domoBibeli edi ga tjanga Paurusa kupitira megendeso lyaJehova.

Paurusa kapi ga likangangere eyi nga rugana komeho aya kare Mukriste ndi a li singonone mwene kuhamena omu ga fene nare. (Yirug. 26:4, 5; Fil. 3:4-6) Age kwa tente asi: “Ame nyame gekuto lyenunu po kovapositoli navenye, ame kapi na fira kutumbura nge asi mupositoli.” (1 Kol. 15:9) Konyima ga ya tjenge asi: “Mpili ngomu na kara ni mununu movapongoki navenye, Karunga kwa pa nge nkenda, asi ni udisire vapagani Mbudi zoNgwa zougawo waKristusa ou wa ha si kuvhura kuheteka.” (Efe. 3:8) Mbudi ozo mulyo unene kupitakana nkenye eyi ndi monkedi omu ga fene Paurusa.