“Amen” zoge mulyo kwaJehova
JEHOVA kutara ukareli wetu asi mulyo. Age ‘kupurakena nokuzuvha’ vakareli vendi ntani age kuhafera yininke nayinye eyi ava mu ruganene yikare asi yoyinunu. (Mara. 3:16) Pasihonena, tu konekeni nkango “amen” ezi atu ruganesa nkenye apa. Jehova kutara nkango ozo asi mulyo. Mokudiva asi morwasinke za karera nomulyo kwendi, tu tareni eyi azi tanta nomu va zi ruganesa moBibeli.
“MBUNGA MUDIMA NGAZI LIMBURURE ASI: ‘AMEN!’”
Nkango “amen” kutanta asi “yimo” ndi “yi kare ngorooro.” Nkango “amen” kwa tundilira konkango zoRuhebeli ezi azi tanta asi “kara mulimburukwi ndi gokuhuguvara.” Azo ngava zi ruganesa poyiruwo yimwe mompanguro. Konyima zokugana, muntu nga uyunga asi “amen” mokukwatesa ko asi eyi ana uyunga kuna kara usili yi kare asi yisinke ngayi horoka. (Num. 5:22) Apa muntu ogo nga uyunga asi “amen” komeho zombunga, age ngayi mu tumangeda a sikise mo eyi ana uyunga.—Neh. 5:13.
Sihonena simwe omu va ruganesa nkango “amen” kusigwana mwaDeuteronomium egaununo 27. Konyima zapa Vaisraeli va ka sikire moSirongo setumbwidiro, awo kwa pongere pokatji kondundu zaEbali nezi zaGelisimu, yipo va purakene koVeta. Awo kapi tupu va zire ko mokukapurakena nye va hepere kukalikida asi vana tambura Veta ozo. Awo kwa likidire asi vana zi tambura apa va uyungire asi “Amen” konyima zapa va resere yitundwamo yokudira kulimburukwa. (Deut. 27:15-26) Yikare asi vagara, vakadi ntani vanona, navenye kwa limbwilire. (Jos. 8:30-35) Awo kapi va divarere nonkango edi va uyungire ezuva lina. Vaisraeli kwa sikisire mo etumbwidiro lyawo, morwa Bibeli kutanta asi: “Mbunga zalsraeli ngazi ruganene Hompa age Josuwa simpe muzuni, nokonyima zonomfa dendi tazi twikire, ngorooro kuruganena HOMPA, awo vagendisi simpe poveli, ava va divire nayinye eyi ga ruganena Hompa Israeli.”—Jos. 24:31.
Jesus nage nga ruganesa “amen” mokupameka eyi nga uyunga nye ngayi rugana monkedi zokulisiga. Age ngazi ruganesa komeho zokuuyunga yuma mokuyipameka asi ayo usili ntani poyiruwo yimwe ngazi ruguruka. (Mat. 5:18; Joh. 1:51) Monkedi zangoso age kwa likidire kovapurakeni vendi asi nonkango edi nga uyunga kwa kere usili wene-wene. Jesus ga kere nononkondo mokuuyunga ngoso, morwa age yige va pa unankondo mokusikisa mo matumbwidiro gaKarunga.—2 Kol. 1:20; Ehor. 3:14.
“MBUNGA MUDIMA TAZI TANTA ASI: ‘AMEN,’ MAKURA TAZI TANGA HOMPA”
Vaisraeli nawo ngava ruganesa nkango “amen” apa ngava kanderere nokuhamberera Jehova. (Neh. 8:6; Epis. 41:13) Pokuuyunga “amen” kouhura wekanderero, vapurakeni kwa likidire asi vana kwatesa ko eyi vana tumbura mekanderero. Navenye kwa lihamekere mo ntani awo kwa haferere kukarera Jehova monkedi zangoso. Eyi yiyo ya horokere apa hompa Ndafita ga twere Sikesa sEgwanekero koJerusarema. Konyima zosipito esi va kere naso, age kwa geve ekanderero eli lya kara morupe rorusumo atu gwana mo-1 Histoli 16:8-36. Nonkango odo kwa gumine komutjima vantu ava va kere po, makura “mbunga mudima tazi tanta asi: ‘Amen,’ makura tazi tanga HOMPA. Navenye kwa hefe kukarera Jehova kumwe.
Vakriste wokuhova nawo ngava ruganesa nkango “amen” apa ngava hamberere Jehova. Vatjangi woBibeli nawo ngava ruganesa nkango ozo monombilive dawo. (Rom. 1:25; 16:27; 1 Pet. 4:11) Buke zEhororo kwa tumbura mo kuhamena yisitwa yemeguru eyi ya hambererere Jehova pokutanta asi: “Amen. Hamberereni Hompa!” (Ehor. 19:1, 4) Vakriste wokuhova nkenye apa ngava ruganesa nkango “amen” konyima zekanderero. (1 Kol. 14:16) Nye kapisi nkango ngava tumbura tupu awo va hana kugazadara ko.
EYI “AMEN” ZOGE ZA KARERA NOMULYO
Mauzera aga tuna zogere gana tu vatere tu kwate egano eyi nkango “amen” za karera nkango zongwa mokuhagesa ekanderero. Apa atu zi uyunga kouhura wekanderero lyanyamwetu, ayo kulikida asi eyi tuna uyunga kuna tundu komutjima. Ntani apa atu uyunga “amen” konyima zekanderero lyagumwe, ose kulikida asi tuna kwatesa ko eyi ana uyunga. Tu tareni hena eyi “amen” zetu za karera nomulyo.
Ruha roukareli wetu. Ose kapi tupu atu karere Jehova pokukwatesa ko eyi vana uyunga mekanderero, nye hena kwa kwatera mo eyi atu rugana nsene gumwe kuna kukanderera. Nsene tuna hara kukwatesa ko nawa eyi vana uyunga mekanderero, ya wapa kupurakena nawa.
Ayo kutureta mouumwe ngovakareli vaJehova. Mbungakriste nazinye kupurakena apa ava gava ekanderero lyomombunga. (Yirug. 1:14; 12:5) Apa atu uyunga natuvenye mombungakriste asi “amen” ayo kutuvatera tu kare mouumwe. Apa atu uyunga asi “amen” kumwe nombunga ndi nampili pwanyoselike, ayo kutumangeda Jehova a sikise mo eyi tuna kanderere.
“Amen” zoge mulyo kwaJehova
Ose kuhamberera Jehova. Jehova kumona nayinye eyi atu mu ruganene apa atu mu karere. (Ruk. 21:2, 3) Age kumona eyi ya kara monomutjima detu ntani neyi tuna hara kurugana. Kuvhura tu kare nehuguvaro hena asi Jehova kutumona hena apa atu uyunga “amen” konyima zekanderero nampili kuna kutarera epongo koserefoni zetu. Nsene tu yi rugana, ose kuna kukwatesa ko vanavazinyetu ava vana kara kepongo mokuhamberera Jehova.
“Amen” zetu kuvhura zi moneke ngwendi kwato mulyo nye azo mulyo unene kwaJehova. Buke Insight on the Scriptures kwa tanta asi: “Apa vakareli vaJehova ava uyunga nkango ozo, awo kulikida asi va kara nehuguvaro.” Ngano “amen” zetu zi hafese Jehova.—Epis. 19:14.
